1 Nengeni, iei non ewe fansoun pwe nupwen Nifai a wes ne apasa ekkei kapas, ekkoch mwan ir mi nom neir ra sa ngeni ewe nenien mwottun kapung; ewer, pwan mwo nimmön ra feino, iwe ra apasa me pwisin neir, nupwen ra feino:

2 Nengeni, iei sipwene ennetin sinei ika ei mwan epwe emon soufos me Kot a fen annuku ngeni i pwe epwe osini sokkun amwararen mettoch ngenikich. Nengeni, sise nuku pwe a fen annuku ngeni i; ewer, sise nuku pwe i emon soufos; nge inamo, ika ei mettoch minne a fen apasa usun ewe sou apung mi ennet, pwe i a mano, iwe sipwe nuku pwe ekkewe ekkoch kapas minne a fen apasa ir mi ennet.

3 Iwe non ewe fansoun pwe ra sa non ar tongeni, me tonong ngeni ewe nenien mwottun kapung; iwe nengeni, ewe sou apung a fen turuno ngeni ewe puun, me a konnono non chan.

4 Iwe iei nengeni, nupwen ra kuna ei ra fokkun ingeno, ina popun pwe ra turuno ngeni ewe puun; pun rese akkom nuku ekkewe kapas minne Nifai a fen apasa usun ewe sou apung.

5 Nge iei, nupwen ra kuna ra nuku, me nuokus a feito wor ren nuokusun ekkewe kapung meinisin minne Nifai a fen apasa repwe feito won ekkewe aramas; iei minne ra chechech, me ra fen turuno ngeni ewe puun.

6 Iei, mwitir nupwen ewe sou apung a fen ninnino—i a pwos me ren pwin we ren an ufouf ufoufen monomon, iwe a suno, iwe ekkewe chon angang ra sano me ureni ekkewe aramas, ra puchoruu pwe a wor nii manau me neir;

7 Iwe nengeni ekkewe aramas ra ionfengeni inisir ngeni ewe nenien mwottun kapung—iwe nengeni, ren ar mairu ra kuna ekkewe nimmön mwan ra fen turuno ngeni ewe puun.

8 Iwe iei nengeni, ekkewe aramas rese sinei och mettoch usun ewe mwicheich a ionfengen ren ewe atake an Nifai; iei minne ra apasa me neir: Ekkei mwan ir ekkewe ra fen nii manauenewe sou apung, iwe Kot a wichir pwe resap tongeni suno senikich.

9 Iwe non ewe fansoun pwe ra turufireno, me foti ir me aturarenong non kanapus. Iwe mi wor ew porous a titi fetan pwe ewe sou apung a ninnino, me pwe ekkewe chon nii manauei ra fen ono me katurunong non kanapus.

10 Iwe non ewe fansoun pwe non ewe soran ekkewe aramas ra achufengeni inisir pwe repwe netipeta me repwe echikipin, ren ewe angangen peiasenon ewe sou apung mi nap ewe a fen ninnino.

11 Iwe iei pwan ekkewe sou apung ekkewe ir mi nom ren ewe atake an Nifai, me rongorong an kewe kapas, ir mi pwan ionfengen me ren ewe angangen peiaseno.

12 Iwe non ewe fansoun pwe ra eis me nein ekkewe aramas, ra apasa: Ikkefai ekkewe nimmön ekkewe ra titino pwe repwe eis usun ewe sou apung ika mi mano? Iwe ra ponueni me apasa: Usun ekkei nimmön oua apasa pwe oua tinireno, am ause sinei; nge mi wor nimmön ekkewe ir chon nii manau, ekkewe am aua fen aturarenong non kanapus.

13 Iwe non ewe fansoun pwe ekkewe sou apung ra mochen pwe repwe uweireto; iwe ra uweireto, iwe nengeni ir ekkewe nimmön ra fen titino; iwe nengeni ekkewe sou apung ra eisini ir pwe repwe sinei usun ewe mettoch, iwe ra ureni ir mettoch meinisin met ra fen fori, ra apasa:

14 Am aua sano me feito ngeni ewe nenien mwottun kapung, iwe nupwen am aua kuna mettoch meinisin pwan mwo usun Nifai a fen pwarata, am aua ingeno ina popun pwe am aua turuno ngeni ewe puun; iwe nupwen am aua pwak seni am mairu, nengeni ra aturakeminong non kanapus.

15 Iei, usun ewe chon nii manauei ei mwan, am ause sinei ika ion a fen fori; iwe iei chok ukukun met am mi sinei, am aua sano me feito usun chok oua mochen, iwe nengeni a fen mano, anongonong won ekkewe kapas an Nifai.

16 Iwe iei non ewe fansoun pwe ekkewe sou apung ra awewei ewe mettoch ngeni ekkewe aramas, me ra puchoruu ne ungeni Nifai, ra apasa: Nengeni, am mi sinei pwe eni ei Nifai a fen tipeew ngeni emon pwe epwe nieno ewe sou apung, iwe mwirin i epwe tongeni affata ngenikich, pwe i epwe tongeni siwinikich ngeni an nuku, pwe i epwe tongeni seikata inisin pwe i emon mwan mi napanap, a kefinita seni Kot, me emon soufos.

17 Iwe iei nengeni, am aupwe pwarano ei mwan, iwe i epwe fangeta an muan me pwarano ngenikich ewe ennetin chon nii manauei ei sou apung.

18 Iwe non ewe fansoun pwe ekkewe nimmön ra ngaseno non ewe ranin ewe angangen peiaseno. Nge inamo, ra apungu ekkewe sou apung usun ekkewe kapas minne ra fen apasa ne ungeni Nifai, me ra anini ngeni ir emon me emon, ina popun pwe ra etipitipingawereno.

19 Nge inamo, ra annuku pwe Nifai epwe ono me fofo me emmwenito me mwen ewe mwicheich, iwe ra poputa ne etittina i non sokopaten napanap pwe repwe tongeni fori an epwe ossokano an kapas, pwe repwe tongeni etipisi i ngeni mano—

20 Ra apasa ngeni i: En ka atipeew ngeni emon; ion ei mwan a fen fori ei nii manau? Iei urenikem, me fangeta om muan; ra apasa, Nengeni iei moni; me am aupwe pwan fang ngonuk manauom ika kopwe urenikem, me fangeta ewe atipeew minne ka feni fori ngeni i.

21 Nge Nifai a apasa ngeni ir: O ami mi puch, ami ouse sirkumsais non netipemi, ami mi chun, me ami aramas mi nukumach, ami mi sinei ifa nangatamen ewe Samon ami Kot epwe mutikemita pwe oupwe soposopono non ei ami napanapen tipis?

22 O mi murino ami oupwe fen poputa ne ngungures me netipeta, pokiten ewe kiteter mi pochokun minne non ei fansoun a awitiwitikemi, tiwenon chok ika oupwe aier.

23 Nengeni oua apasa pwe ua fen atipeew ngeni emon mwan pwe i epwe nii manauei Sisorom, nouch we sou apung mi nap. Nge nengeni, ua apasa ngenikemi, pwe ei pokiten ua fen pwarata ngenikemi pwe oupwe tongeni sinei usun ei mettoch; ewer, pwan mwo pwe upwe emon chon pwarata ngenikemi, pwe ngang mi sinei usun ewe fofforungaw me angang mi anieput minne ra nom neimi.

24 Iwe pokiten ua fen fori ei, oua apasa pwe ua fen atipeew ngeni emon mwan pwe i epwe fori ei mettoch; ewer, pokiten ua pwari ngenikemi ei esissin oua song rei, me sotuni ne nieno manauei.

25 Iwe iei nengeni, upwe pwari ngenikemi pwan ew esissin, me katon ika non ei mettoch oupwe sotuni ne nieino.

26 Nengeni ua apasa ngenikemi: Feino ngeni imwen Siantum, i ewe pwin Sisoram, me apasa ngeni i—

27 Met Nifai, ewe etittipen soufos, ewe a osini fokkun watten ngaw usun ekkei aramas, etipeew ngonuk, non ewe minne ka fen nii manauen Sisoram, i pwium we?

28 Iwe nengeni, i epwe apasa ngenikemi, Apw.

29 Iwe oupwe apasa ngeni i: Ka fen nii manauen pwium we?

30 Iwe i epwe uta ren nuokus, me esap sinei met epwe apasa. Iwe nengeni, i epwe amam ngenikemi; iwe i epwe etittipen fori usun ita i a ingeno; nge inamo, i epwe affata ngenikemi pwe i mi nimenimoch.

31 Nge nengeni, oupwe attonaochu i, iwe oupwe kuna cha won urosun ufan we uf mi nangatam.

32 Iwe nupwen oupwe kuna ei, oupwe apasa: Seni ian a feito ei cha? Met am ause sinei pwe iei chan pwium we?

33 Iwe mwirin epwe chechech, iwe epwe sawapwecheno, pwan mwo usun ita mano a feito won.

34 Iwe mwirin oupwe apasa: Pokiten ei nuokus me ei sawapwech minne a fen pwano won mesom, nengeni, am mi sinei pwe en ka tipis.

35 Iwe mwirin ennetin nuokus epwe feito won; iwe mwirin i epwe fangeta ngenikemi, me esap chiwen amam pwe i a fen fori ei nii manau.

36 Iwe mwirin epwe apasa ngenikemi, pwe ngang, Nifai, use sinei och mettoch usun ewe mettoch tiwenon chok ika a kawor ngeniei me ren ewe manamanen Kot. Iwe mwirin oupwe sinei pwe ngang emon mwan mi ennet, me pwe ngang ua titito ngenikemi seni Kot.

37 Iwe non ewe fansoun pwe ra feino me fori, pwan mwo usun met Nifai a fen apasa ngeni ir. Iwe nengeni, ekkewe kapas minne a fen apasa mi ennet; pun anongonong won ekkewe kapas i a amam; me pwan anongonong won ekkewe kapas i a fangeta.

38 Iwe a emmwenito pwe epwe pwarata pwe i pwisin i ewe ennetin chon nii manau, ina popun pwe ekkewe nimmön ra ngaseno, me pwan Nifai.

39 Iwe mi wor ekkoch ekkewe chon Nifai ekkewe ra nuku non ekkewe kapas an Nifai; me mi pwan wor ekkoch, ekkewe ra nuku pokiten ewe kapasen pwarata an ekkewe nimmön, pun ra fen siwin nupwen ra nom non kanapus.

40 Iwe iei mi wor ekkoch me nein ekkewe aramas, ekkewe ra apasa pwe Nifai i emon soufos.

41 Iwe mi wor ekkoch ekkewe ra apasa: Nengeni, i emon kot, pun tiwenon chok ika i emon kot i ese tongeni sinei ekkei mettoch meinisin. Pun nengeni, i a fen urenikich ekiekin netipach, me a pwan urenikich mettoch; iwe a pwan mwo pwarano ngenikich ach mirit ewe ennetin chon nii manauen nouch we sou apung.