Pukfel
Ilaman 10


Sopun 10

Ewe Samon a ngeni Nifai ewe manamanen ririfengen—A kawor ngeni manaman pwe epwe riri me epichano won fonufan me non nang—A annuku ekkewe aramas pwe repwe aier are mano—Ewe Ngun a uwei i seni mwicheich ngeni mwicheich. Arap ngeni 21–20 Ier Mwen Kraist.

1 Iwe non ewe fansoun pwe a wor ew keimufesen me nein ekkewe aramas, ina popun pwe ra keimufesen epek ngeni epek me feino ngeni pwisin aaner, ra nikitano Nifai ne akkanamon, nupwen an uta me neir.

2 Iwe non ewe fansoun pwe Nifai a feino won aanan ngeni pwisin imwan we, a ekipwichi ekkewe mettoch minne ewe Samon a fen pwari ngeni i.

3 Iwe non ewe fansoun nupwen an ekipwich—me a fokkun tipitipingaw pokiten fofforungawen ekkewe aramasen ekkewe chon Nifai, ar kewe angangen rochopwak mi monomon, me ar kewe nii manau, me ar kewe angemwan, me sokopaten angangangaw meinisin—iwe non ewe fansoun nupwen an ekipwich non netipan, nengeni, ew mongungu a feito ngeni a apasa:

4 En ka feioch, Nifai, ren ekkewe mettoch minne ka fen fori; pun ua fen kuna ifa usum ren nikitu om afanafana ewe kapas, minne ua fen ngonuk, ngeni ekkei aramas. Iwe kose mwo fen nuokusiti ir, me kose mwo senani pwisin manauom, nge ka achocho ne fori ai mochen, me ne aneasochisi ai kewe annuk.

5 Iwe iei, pokiten ka fen fori ei ren sokkun nikitu, nengeni, upwe efeiochuk feinfeino chok; iwe upwe foruk kopwe pochokun non kapas me non foffor, non nuku me non angang; ewer, pwan mwo pwe mettoch meinisin repwe fis ngonuk anongonong won om kapas, pun kosap tingor met minne mi ungeni ai mochen.

6 Nengeni, en Nifai, me ngang Kot. Nengeni, ua affata ngonuk me ne mesen nei kewe chon nang, pwe epwe wor om pochokun won ekkei aramas, me kopwe wichi ewe neni ren nengita, me ren samau, me kiteter, anongonong won fofforungawen ekkei aramas.

7 Nengeni, ua ngonuk pochokun, pwe met chok kopwe ririfengeni won fonufan epwe ririfengen me non nang; me met chok kopwe epichano me won fonufan epwe pichino me non nang; iwe iei epwe wor om pochokun me nein ekkei aramas.

8 Iwe iei, ika kopwe apasa ngeni ei tempel epwe keimufesen non ruepek, epwe wesino.

9 Iwe ika kopwe apasa ngeni ei chuk, Kopwe katurutiw me sosonochuno, epwe fisino.

10 Iwe nengeni, ika kopwe apasa pwe Kot epwe wichi ekkei aramas, epwe fisino.

11 Iwe iei nengeni, ua annuku ngonuk, pwe kopwe feino me afanafan ngeni ekkei aramas, pwe iei anon ewe Samon Kot, i ewe mi Napanap: Tiwenon chok ika oupwe aier oupwe wichiwich, pwan mwo ngeni kiteterino.

12 Iwe nengeni, non ewe fansoun pwe nupwen ewe Samon a wes ne apasa ekkei kapas ngeni Nifai, a kouno me ese feino ngeni pwisin imwan we, nge a niwin ngeni ekkewe mwicheich ekkewe ir mi toropas fetan won unungen ewe fonu, me poputa ne afanafan ngeni ir ewe kapasen ewe Samon minne a fen affat ngeni i, usun ar kiteter ika resap aier.

13 Iei nengeni, me nukun ena auchean manaman minne Nifai a fen fori ne ureni ir usun manon ewe sou apung, ra apochokunano netiper me rese ausening ngeni ekkewe kapasen ewe Samon.

14 Iei minne Nifai a afanafana ngeni ir ewe kapasen ewe Samon, a apasa: Tiwenon chok ika oupwe aier, iei anon ewe Samon, oupwe wichiwich pwan mwo ngeni kiteter.

15 Iwe non ewe fansoun pwe nupwen Nifai a afanafan ngeni ir ewe kapas, nengeni, ir mi chok apochokunano netiper me rese mochen ausening ngeni an kewe kapas; iei minne ra kapas mi ngaw ngeni, me ra sotuni ne wata pour won pwe repwe tongeni aturanong i non kanapus.

16 Nge nengeni, ewe manamanen Kot a nom ren, iwe rese tongeni angei i pwe repwe aturanong i non kanapus, pun a fen kekino me ren ewe Ngun me emmweniu seni me neir.

17 Iwe non ewe fansoun pwe iei i a feino non ewe Ngun, seni mwicheich ngeni mwicheich, ne afanafana ewe kapasen Kot, pwan mwo tori an a afanafana ngeni ir meinisin, are tinano me nein ekkewe aramas meinisin.

18 Iwe non ewe fansoun pwe rese mochen ausening ngeni an kewe kapas; iwe a poputa ne wor anini fengen, ina popun pwe ra keimufesen inisir me poputa ne nieno emon me pwan emon ren ewe ketinas.

19 Iwe iei a muchuno ewe fik me ewin ierin muun ekkewe sou apung won ekkewe aramasen Nifai.