1 Iwe non ewe fansoun non ewe faik me ruen ierin muun ekkewe sou apung, mwirin an Moronaia a forata kinamwe sefan nefinen ekkewe chon Nifai me ekkewe chon Leiman, nengeni ese wor emon an epwe nenieni ewe nenien mwottun kapung; iei minne a poputa ne wor ew anini fengen sefan nein ekkewe aramas usun ion epwe nenieni ewe nenien mwottun kapung.

2 Iwe non ewe fansoun pwe Ilaman, i ewe noun Ilaman, a kefinita pwe epwe nenieni ewe nenien mwottun kapung, me ren mongungun ekkewe aramas.

3 Nge nengeni, Kiskuman, ewe a nieno Paoran, a opono ne witiwit pwe epwe pwan nieno Ilaman; iwe i a aninis me ren an we mwicheich, ewe a fen tonong non ew pwon pwe esap wor emon epwe sinei an fofforungaw.

4 Pun mi wor emon Katianton, ewe a fokkun tipachem non chommong kapas, me pwan non an mwokutukut, an epwe sopweno ewe angangen nii manau mi monomon me angangen sona; iei minne a winiti ewe sou emmwenin ewe mwichen Kiskuman.

5 Iei minne a eingereno, me pwan Kiskuman, pwe ika repwe enenia i won ewe nenien mwottun kapung i epwe mut ngeni ekkewe ra choni an we mwicheich pwe repwe nom non pochokun me nemenem me nein ekkewe aramas; iei minne Kiskuman a sotuni an epwe nieno Ilaman.

6 Iwe non ewe fansoun nupwen a feino ngeni ewe nenien mwottun kapung pwe epwe nieno Ilaman, nengeni emon me nein ekkewe chon angang noun Ilaman, a fen nom nukun fansoun nepwin, me a fen angei, seni an asokkano nikinikin, ew mirit usun ekkewe kokkot minne ra fen fis me ren ei mwicheich pwe repwe nieno Ilaman—

7 Iwe non ewe fansoun pwe a churi Kiskuman, iwe a ngeni i ew esisin; iei minne Kiskuman a pwari ngeni i kokkotun an mochen, a mochen pwe i epwe emmweni i ngeni ewe nenien mwottun kapung pwe i epwe nieno Ilaman.

8 Iwe nupwen ewe chon angang noun Ilaman a sinei meinisin mochenin netipen Kiskuman, me pwe ina an kokkot pwe epwe nii manau, me pwan ina ewe kokkoten meinisin ekkewe ra choni an we mwicheich pwe repwe nii manau, me repwe sona, me pwe repwe angei nemenem, (iwe iei ar kokkot mi monomon, me ar mwicheich) ewe chon angang noun Ilaman a apasa ngeni Kiskuman: Sipwe feino ngeni ewe nenien mwottun kapung.

9 Iei ei a fokkun apwapwai Kiskuman, pun a ekieki pwe epwe awesano an we kokkot; nge nengeni, ewe chon angang noun Ilaman, nupwen ar ra feino ngeni ewe nenien mwottun kapung, a pwosu Kiskuman pwan mwo ngeni ewe ngasangas, pwe i a turuno me mano me ese wor och ngunungun. Iwe a sano me ureni Ilaman ekkewe mettoch meinisin minne i a fen kuna, me rongorong, me fori.

10 Iwe non ewe fansoun pwe Ilaman a titino pwe repwe angei ei mwicheichen chon sona me nii manau mi monomon, pwe repwe tongeni kapungen ninnino anongonong won ewe annuk.

11 Nge nengeni, nupwen Katianton a kuna pwe Kiskuman ese niwin a nuokus ika pwe i epwe ninnino; iei minne a annuku pwe an we mwicheich epwe tapweno mwirin. Iwe ra suu seni ewe fonu, me ren ew aan mi monomon, ngeni non ewe fonu pon; iwe iei nupwen Ilaman a titino pwe repwe angei ir rese tongeni pwá me ekis.

12 Iwe pwan och usun ei Katianton epwe pwan affateno mwirin. Iwe iei a muchuno ewe faik me ruen ierin muun ekkewe sou apung won ekkewe aramasen Nifai.

13 Iwe nengeni, non soponon ei puk sipwe kuna pwe ei Katianton a fisino pwe i ewe turutiwen, ewer, arap ngeni unusen ewe kiteterinon ekkewe aramasen Nifai.

14 Nengeni use ara soponon ewe puken Ilaman, nge ua ara soponon ewe puken Nifai, seni minne ua fen angei ekkewe uruo meinisin minne ua fen makkei.