1 U ġara li dan kollu seħħ meta s‑sena tnejn u sittin tas‑saltna tal‑imħallfin ġiet fi tmiemha, u l‑biċċa l‑kbira tal‑Lamaniti saru nies twajbin, hekk li t‑tjieba tagħhom kienet tiżboq lil dik tan‑Nefiti, minħabba l‑fermezza u l‑istabbiltà tal‑fidi tagħhom.

2 Għax araw, kien hemm bosta Nefiti li kienu saru nies rashom iebsa u mingħajr ebda indiema u nies mill‑aktar ħżiena, hekk li spiċċaw biex warrbu l‑kelma ta’ Alla u dak kollu li ġie mxandar u mħabbar fosthom.

3 Madankollu, in‑nies tal‑knisja thennew bil‑kbir minħabba l‑konverżjoni tal‑Lamaniti, iva, minħabba l‑knisja ta’ Alla, li ġiet stabbilita fosthom. U huma bdew jissieħbu flimkien, u jifirħu flimkien, u esperjenzaw hena mill‑aktar kbira.

4 U ġara li ħafna mil‑Lamaniti niżlu fl‑art ta’ Żaraħemla, u bdew ixandru mal‑poplu Nefita kif seħħet il‑konverżjoni tagħhom, u bdew iħeġġuhom biex ikollhom il‑fidi u jindmu.

5 Iva, u ħafna kienu li xandru b’qawwa u b’awtorità liema bħalha, u huma wasslu lil ħafna minnhom sal‑qiegħ tal‑umiltà, biex ikunu dixxipli umli ta’ Alla u tal‑Ħaruf.

6 U ġara li ħafna mil‑Lamaniti rħewlha lejn l‑art tat‑tramuntana; u anke Nefi u Leħi marru fl‑art tat‑tramuntana, biex ixandru l‑kelma lin‑nies. U b’hekk ġiet fi tmiemha s‑sena tlieta u sittin.

7 U araw, bdiet issaltan il‑paċi mal‑art kollha, hekk li n‑Nefiti spiċċaw marru f’liema naħa riedu tal‑art, kemm fost in‑Nefiti kif ukoll fost il‑Lamaniti.

8 U ġara li l‑Lamaniti marru wkoll f’liema naħa riedu, kemm jekk kienet fost il‑Lamaniti kif ukoll fost in‑Nefiti; u b’hekk huma bdew jikkomunikaw bejniethom, biex jixtru u jbiegħu, u biex jiksbu aktar ġid, skont xewqathom.

9 U ġara li huma saru nies mill‑aktar għonja, kemm il‑Lamaniti kif ukoll in‑Nefiti; u kellhom ħażniet kbar ta’ deheb, u ta’ fidda, u ta’ kull xorta ta’ metall prezzjuż, kemm fl‑art tan‑nofsinhar kif ukoll fl‑art tat‑tramuntana.

10 Issa l‑art tan‑nofsinhar kien jisimha Leħi, u l‑art tat‑tramuntana kien jisimha Mulek, li kienet imsemmija għat‑tifel ta’ Sedekija; għax il‑Mulej kien mexxa lil Mulek lejn l‑art tat‑tramuntana, u lil Leħi lejn l‑art tan‑nofsinhar.

11 U araw, fiż‑żewġ artijiet kien hemm kull xorta ta’ deheb, u fidda, u metall prezzjuż ta’ kull għamla; u kien hemm ukoll nies tas‑sengħa, li kienu jaħdmu kull xorta ta’ metall u kienu jsaffuh; u b’hekk huma saru nies għonja.

12 Huma bdew ikabbru l‑qamħ bil‑kotra, kemm fl‑art tat‑tramuntana kif ukoll f’tan‑nofsinhar; u huma bdew jiffjorixxu bil‑kbir, kemm fl‑art tat‑tramuntana kif ukoll f’tan‑nofsinhar. U bdew joktru u jissaħħu bil‑kbir fuq wiċċ l‑art. U huma bdew irabbu bosta merħliet u baqar, iva, ħafna bhejjem imsemmna.

13 Araw in‑nisa tagħhom bdew iħabirku u jinsġu, u bdew jagħmlu kull xorta ta’ tessuti, minn għażel minżuġ mill‑aktar fin u minn drapp ta’ kull għamla, biex jgħattu l‑għera tagħhom. U hekk għaddiet fis‑sliem is‑sena erbgħa u sittin.

14 U fis‑sena ħamsa u sittin huma esperjenzaw ukoll hena u paċi kbira, iva, u bosta predikazzjoni u bosta profeziji dwar dak li kellu jseħħ. U hekk għaddiet is‑sena ħamsa u sittin.

15 U ġara li fis‑sena sitta u sittin tas‑saltna tal‑imħallfin, araw, Ċeżoram safa maqtul minn xi ħadd mhux magħruf hekk kif kien bilqiegħda fuq is‑siġġu tat‑tribunal. U ġara li fl‑istess sena, ibnu, li ġie maħtur minfloku mill‑poplu, safa maqtul ukoll. U b’hekk ġiet fi tmiemha s‑sena sitta u sittin.

16 U fil‑bidu tas‑sena sebgħa u sittin in‑nies reġgħu bdew isiru mill‑aktar ħżiena.

17 Għax araw, il‑Mulej berikhom għal żmien twil b’ħafna ġid tad‑dinja li wassalhom biex huma la ġew imqanqla biex jimtlew bl‑għadab, u lanqas biex ixerrdu d‑demm; għalhekk huma bdew jorbtu qalbhom mal‑ġid materjali tagħhom; iva, bdew jaraw kif setgħu jiksbu aktar ġid ħalli jkunu jistgħu jintrefgħu ’l fuq wieħed aktar mill‑ieħor; għalhekk huma bdew joqtlu bil‑moħbi, u jisirqu u jissakkeġġjaw, ħalli jkunu jistgħu jiksbu aktar ġid materjali.

18 U issa araw, dawk il‑qattiela u l‑ħallelin kienu tajfa li ġiet iffurmata minn Kiskumeni u Gadjantun. U issa ġara li kienu ħafna, anke minn fost in‑Nefiti, li kienu jagħmlu parti mit‑tajfa ta’ Gadjantun. Għax araw, l‑għadd tagħhom kien ferm akbar fost il‑Lamaniti li kienu l‑aktar nies ħżiena. U huma kienu jissejħu l‑ħallelin u l‑qattiela ta’ Gadjantun.

19 U kienu huma li qatlu lill‑prim imħallef Ċeżoram, u lil ibnu, waqt li kienu fis‑siġġu tat‑tribunal; u araw, huma baqgħu ma nstabux.

20 U issa ġara li meta l‑Lamaniti sabu li fosthom kien hemm il‑ħallelin huma tnikktu bil‑kbir; u ppruvaw jagħmlu dak kollu li setgħu biex jeqirduhom minn wiċċ l‑art.

21 Iżda araw, Satana beda jipprovoka l‑biċċa l‑kbira tan‑Nefiti, hekk li huma spiċċaw ingħaqdu ma’ dawk it‑tajfiet ta’ ħallelin, u għamlu patt u ħadu ġurament magħhom li kienu lesti jipproteġu u jħarsu lil xulxin f’kwalunkwe ċirkustanza diffiċli li jistgħu jkunu fiha, u li huma ma kellhomx ibatu minħabba l‑qtil, l‑issakkeġġar, u s‑serq tagħhom.

22 U ġara li huma kellhom ċerti sinjali, iva; kellhom sinjali sigrieti, u kliem sigriet; u l‑għan ta’ dan kien biex huma jkunu jistgħu jagħrfu lil dak fosthom li jkun għamel ċertu patt, biex kien x’kien il‑ħażen li jkun wettaq, ħadd ma kellu jinġurjah, la ħuh u lanqas dawk li kienu jagħmlu parti mit‑tajfa tiegħu, li kienu għamlu dan il‑patt.

23 U b’hekk huma setgħu joqtlu, u jissakkeġġjaw, u jisirqu, u jaqgħu fiż‑żína u jwettqu kull xorta ta’ ħażen, li jmur kontra l‑liġijiet ta’ pajjiżhom kif ukoll kontra l‑liġijiet ta’ Alla tagħhom.

24 U jekk ikun hemm xi ħadd li kien jagħmel parti mit‑tajfa tagħhom li jiżvela lil xi nies oħra dwar ħżunithom u l‑għemejjel mistkerrha tagħhom, huwa kellu jitressaq quddiem it‑tribunal, mhux skont il‑liġi ta’ pajjiżhom, iżda skont il‑liġi ta’ ħżunithom, li ġiet imfassla minn Gadjantun u Kiskumeni.

25 Issa araw, kienu sewwasew dawn il‑ġuramenti u patti sigrieti li Alma lil ibnu kien ordnalu li m’għandhomx isiru jafu bihom in‑nies tad‑dinja, ma jmorrux ikunu l‑kaġun għalfejn in‑nies jispiċċaw jinqerdu.

26 Issa araw, Gadjantun ma sarx jaf b’dawk il‑ġuramenti u patti sigrieti mill‑annali li kienu għaddew f’idejn Ħelaman; iżda araw, huma ġew żvelati lil Gadjantun minn dak l‑istess esseru li ħajjar lill‑ewwel ġenituri tagħna biex jieklu mill‑frotta pprojbita—

27 Iva, dak l‑istess esseru li kkonfoffa ma’ Kajjin, li jekk huwa joqtol lil ħuh Abel ħadd ma kien se jsir jaf b’dan. U minn dak iż‑żmien ’il quddiem huwa beda jikkonfoffa ma’ Kajjin u mas‑segwaċi tiegħu.

28 U huwa wkoll dak l‑istess esseru li lin‑nies żvelalhom biex jibnu torri għoli biżżejjed li seta’ jilħaq is‑sema. U kien dak l‑istess esseru li mexxa lin‑nies li telqu minn dak it‑torri lejn din l‑art; li ferrex l‑għemejjel tad‑dlam u l‑għemejjel mistkerrha ma’ wiċċ l‑art kollha, sakemm huwa wassal lin‑nies lejn qerda totali, u sal‑infern ta’ dejjem.

29 Iva, huwa dak l‑istess esseru li żvela lil Gadjantun biex jibqa’ għaddej bl‑għemejjel tad‑dlam, u jibqa’ joqtol bil‑moħbi; u huwa ra li dan iseħħ sa mill‑bidu tal‑bniedem sewwasew sal‑ġurnata tal‑lum.

30 U araw, huwa hu l‑awtur ta’ kull dnub. U araw, huwa jkompli jwettaq l‑għemejjel tad‑dlam u l‑qtil bil‑moħbi, u jibqa’ jgħaddi minn ġenerazzjoni għall‑oħra l‑konfoffi tagħhom, u l‑ġuramenti tagħhom, u l‑patti tagħhom, u l‑pjanijiet tagħhom ta’ ħażen mill‑aktar terribbli, u dan jagħmlu skont jekk jirnexxielux jaħkem qlub ulied il‑bnedmin.

31 U issa araw, huwa rnexxielu jaħkem qlub in‑Nefiti; iva, hekk li huma saru nies mill‑aktar ħżiena; iva, il‑biċċa l‑kbira minnhom abbandunaw it‑triq tas‑sewwa, u għaffġu b’saqajhom il‑kmandamenti ta’ Alla, u bdew jagħmlu dak li jridu, u bnew għalihom infushom allat tad‑deheb u tal‑fidda.

32 U ġara li dan il‑ħażen kollu seħħ fosthom fi spazju ta’ ftit snin biss, tant li l‑parti l‑kbira minnu seħħ fosthom fis‑sena sebgħa u sittin tas‑saltna tal‑imħallfin fuq il‑poplu ta’ Nefi.

33 U huma komplew jikbru fi ħżunithom anke fis‑sena tmienja u sittin, u dan wassal għal niket kbir u anke għal lamentazzjoni fost it‑twajbin.

34 U b’hekk naraw li n‑Nefiti ftit, ftit bdew jitilfu l‑fidi, u jikbru fil‑ħażen u l‑għemejjel mistkerrha, waqt li l‑Lamaniti bdew jikbru sew fl‑għarfien ta’ Alla tagħhom; iva, huma bdew iħarsu l‑preċetti u l‑kmandamenti tiegħu, u jimxu fis‑sewwa u t‑tjieba quddiemu.

35 U b’hekk naraw li l‑Ispirtu tal‑Mulej beda jitbiegħed min‑Nefiti, minħabba l‑ħażen u l‑ebusija ta’ qalbhom.

36 U b’hekk naraw li l‑Mulej beda jsawwab l‑Ispirtu tiegħu fuq il‑Lamaniti, minħabba d‑doċilità u r‑rieda tagħhom li jemmnu fi kliemu.

37 U ġara li l‑Lamaniti marru wara t‑tajfa ta’ ħallelin ta’ Gadjantun; u huma xandru l‑kelma ta’ Alla fost dawk l‑aktar ħżiena fosthom, hekk li din it‑tajfa ta’ ħallelin spiċċat biex inqerdet għal kollox minn fost il‑Lamaniti.

38 U mill‑banda l‑oħra ġara li n‑Nefiti għenuhom biex ikomplu jissaħħu u tawhom l‑appoġġ tagħhom, fejn l‑ewwel bdew minn dawk li kienu l‑aktar ħżiena fosthom, sakemm żaru l‑art kollha tan‑Nefiti, u huma qarrqu b’dawk li kienu l‑aktar twajbin sakemm dawn spiċċaw jemmnu fl‑għemejjel tagħhom u jaqsmu magħhom ħwejjeġ li kienu serqu mingħand ħaddieħor, u bdew jingħaqdu magħhom fil‑qtil bil‑moħbi u l‑alleanzi sigrieti.

39 U b’hekk huma kisbu l‑kontroll assolut tal‑gvern, hekk li huma bdew jgħaffġu b’saqajhom u jsawtu u jittrattaw ħażin u jagħtu daharhom lill‑foqra u lill‑imsejknin, u lid‑dixxipli umli ta’ Alla.

40 U b’hekk naraw li huma kienu fi stat terribbli, u kienu jinsabu lesti għall‑qerda ta’ dejjem.

41 U ġara li b’hekk ġiet fi tmiemha s‑sena tmienja u sittin tas‑saltna tal‑imħallfin fuq il‑poplu ta’ Nefi.