1 U issa, ġara li kienu ħafna li semgħu l‑kliem li Samwel, il‑Lamanita, qal minn fuq is‑swar tal‑belt. U dawk kollha li emmnu l‑kelma tiegħu marru jfittxu lil Nefi; u meta huma marru u sabuh huma stqarrew miegħu dnubiethom bla ma ċaħduhom, u wrew ix‑xewqa li jitgħammdu għall‑Mulej.

2 Iżda dawk kollha li kien hemm li ma emmnux kliem Samwel ħaduha kontrih; u bdew iħaġġruh waqt li kien fuq is‑sur, u ħafna oħrajn sparawlu l‑vleġeġ hekk kif kien jinsab fuq is‑sur; iżda l‑Ispirtu tal‑Mulej kien miegħu, hekk li huma ma setgħux jolqtuh, la bil‑ġebel u lanqas bil‑vleġeġ tagħhom.

3 Issa meta huma raw li ma setgħux jolqtuh, kien hemm ħafna oħrajn li emmnu fi kliemu, hekk li huma marru għand Nefi biex jitgħammdu.

4 Għax araw, Nefi beda jgħammed, u jħabbar u jxandar lin‑nies u jħeġġiġhom biex jindmu, u beda juri sinjali u għeġubijiet, u jwettaq il‑mirakli fost il‑poplu, biex huma jkunu jafu li l‑Kristu kien se jiġi dalwaqt—

5 Beda jgħidilhom dwar ħwejjeġ li kienu se jiġu fis‑seħħ dalwaqt, biex fil‑mument li dawn jiġu fis‑seħħ huma jkunu jafu u jiftakru li dawn kienu ġew żvelat lilhom minn qabel, bil‑għan li huma jemmnu; għalhekk dawk kollha li emmnu fi kliem Samwel marru għandu biex jitgħammdu, fejn huma marru hemm fi spirtu ta’ ndiema u jistqarru dnubiethom.

6 Iżda l‑biċċa l‑kbira minnhom ma emmnux kliem Samwel; għalhekk meta huma raw li ma setgħux jolqtuh bil‑ġebel u l‑vleġeġ tagħhom, huma għajtu lill‑kmandanti tagħhom u qalulhom: Aqbdu lil dan ir‑raġel u orbtuh, għax araw hu għandu fih xitan; u minħabba l‑qawwa tax‑xitan li tinsab fih aħna ma nistgħux nolqtuh bil‑ġebel tagħna u bil‑vleġeġ tagħna; għalhekk aqbduh u orbtuh, u ħuduh ’il bogħod minn hawn.

7 U hekk kif marru biex jaqbduh taħt idejhom, araw, huwa qabeż minn fuq is‑sur, u ħarab ’il barra minn artijiethom, iva, u baqa’ sejjer f’pajjiżu, u beda jxandar u jħabbar fost il‑poplu tiegħu.

8 U araw, ħadd minn fost in‑Nefiti ma sema’ bih aktar; u dan kien dak li ġara fost il‑poplu.

9 U b’hekk ġiet fi tmiemha s‑sena sitta u tmenin tas‑saltna tal‑imħallfin fuq il‑poplu ta’ Nefi.

10 U b’hekk ġiet fi tmiemha wkoll is‑sena sebgħa u tmenin tas‑saltna tal‑imħallfin, fejn il‑biċċa l‑kbira tan‑nies baqgħu mimlijin kburija u ħażen, u l‑minoranza tagħhom bdew iġibu ruħhom sewwa quddiem Alla.

11 U dawn kienu wkoll iċ‑ċirkustanzi fis‑sena tmienja u tmenin tas‑saltna tal‑imħallfin.

12 U fis‑sena disgħa u tmenin tas‑saltna tal‑imħallfin ftit li xejn kien hemm tibdil fl‑affarijiet tal‑poplu, ħlief li n‑nies bdew jikbru aktar fil‑ħażen, u bdew jagħmlu aktar u aktar dak li jmur kontra l‑kmandamenti ta’ Alla.

13 Iżda ġara li fis‑sena disgħin tas‑saltna tal‑imħallfin, in‑nies ingħataw bosta sinjali kbar, u għeġubijiet; u kliem il‑profeti beda jiġi fis‑seħħ.

14 U l‑anġli dehru lin‑nies, lin‑nies għorrief, u ħabbrulhom hena mill‑aktar kbira; b’hekk f’din is‑sena l‑iskrittura bdiet tiġi fis‑seħħ.

15 Madankollu, in‑nies kollha bdew iwebbsu qalbhom, ħlief għal dawk fosthom ta’ fidi akbar, kemm minn fost in‑Nefiti kif ukoll minn fost il‑Lamaniti, u huma bdew jiddependu biss fuq il‑qawwa tagħhom u fuq l‑għerf tagħhom, u jgħidu:

16 Minn fost il‑bosta ħwejjeġ li ġraw jista’ jkun li huma rnexxielhom jaqtgħu xi ftit minnhom; iżda araw, aħna nafu li dawn l‑għemejjel kbar u tal‑għaġeb kollha, li dwarhom huma tkellmu, ma jistgħux jiġu fis‑seħħ.

17 U huma bdew jiddibattu u jitlewmu bejniethom, u jgħidu:

18 Ma jagħmilx sens li jiġi xi ħadd bħala Kristu; għax jekk jiġri dan, u huwa jkun Bin Alla, il‑Missier tas‑sema u l‑art, kif beda jingħad, għalfejn huwa ma jurix lilu nnifsu lilna kif ukoll lil dawk li se jkunu f’Ġerusalemm?

19 Iva, għalfejn ma jurix lilu nnifsu f’din l‑art kif ukoll fl‑art ta’ Ġerusalemm?

20 Għax araw, aħna nafu li din hija drawwa ħażina, li għaddiet għandna mingħand missirijietna, biex iwassluna ħalli nemmnu f’xi ħaġa kbira u tal‑għaġeb li għandha tiġi fis‑seħħ, mhux fostna iżda f’art li tinsab ferm ’il bogħod, art li ma nafu xejn dwarha; għalhekk huma jkunu jistgħu jħalluna fi stat ta’ injoranza, għax ma nkunux nistgħu naraw b’għajnejna li dan kollu huwa veru.

21 U permezz tal‑arti qarrieqa u misterjuża tal‑malinn, huma jispiċċaw iwettqu xi misteru kbir li aħna ma nkunux nistgħu nifhmuh, li jwassalna biex nibqgħu qaddejja ta’ kliemhom, kif ukoll qaddejja tagħhom, għax aħna niddependu minnhom biex jgħallmuna l‑kelma; u b’hekk huma jkunu jistgħu jħalluna fi stat ta’ injoranza, jekk aħna noffru ruħna lilhom, għall‑jiem kollha ta’ ħajjitna.

22 U f’qalbhom in‑nies immaġinaw ħafna affarijiet oħra fiergħa u bla sens, u huma kienu mħawdin bil‑kbir, għax Satana beda jħeġġiġhom kontinwament biex jagħmlu l‑ħażen; iva, huwa beda jdur ixerred ix‑xnigħat u t‑tilwim fuq wiċċ l‑art kollha, biex ikun jista’ jwebbes qlub in‑nies kontra dak li hu tajjeb u kontra dak li għandu jiġi.

23 U minkejja li dehru bosta sinjali u għeġubijiet fost il‑poplu tal‑Mulej, u minkejja li kienu ħafna l‑mirakli li għamlu fosthom, Satana spiċċa ħakem bil‑kbir qlub in‑nies fuq wiċċ l‑art kollha.

24 U b’hekk ġiet fi tmiemha s‑sena disgħin tas‑saltna tal‑imħallfin fuq il‑poplu ta’ Nefi.

25 U b’hekk ġie fi tmiemu l‑ktieb ta’ Ħelaman, skont ir‑rakkont ta’ Ħelaman u wliedu.