ជំពូកទី ១៤
អំពើទុច្ចរិតរបស់ប្រជាជន នាំមកនូវបណ្ដាសាមួយលើដែនដី — កូរីអានទុមើរធ្វើសង្គ្រាមនឹងកាឡាត ហើយលិប និងស៊ិស — ឈាម និងសាកសពគ្របលើដែនដី។
១ហើយឥឡូវនេះ ចាប់ផ្ដើមមានកបណ្ដាសាមួយយ៉ាងធំនៅលើអស់ទាំងដែនដី ពីព្រោះមកពីអំពើទុច្ចរិតរបស់ប្រជាជន ម្ល៉ោះហើយ បើសិនជាមនុស្សណាម្នាក់ដាក់គ្រឿងឧបករណ៍របស់ខ្លួន ឬដាវរបស់ខ្លួននៅលើធ្នើររបស់ខ្លួន ឬនៅលើទីណាដែលគេចង់ទុកវា មើលចុះ ដល់ស្អែកឡើង គេពុំអាចរកវាឃើញសោះ គឺធំណាស់ហ្ន៎បណ្ដាសាដែលដាក់លើដែនដីនេះ។
២ហេតុដូច្នោះហើយ មនុស្សគ្រប់រូបបានកាន់ជាប់ក្នុងដៃនូវអ្វីដែលជារបស់ផងខ្លួន ហើយមិនខ្ចី ហើយក៏មិនឲ្យគេខ្ចីដែរ ហើយមនុស្សគ្រប់រូបកាន់ដងដាវរបស់ខ្លួននៅក្នុងដៃស្ដាំរបស់គេ ដើម្បីការពារទ្រព្យរបស់គេ និងជីវិតរបស់គេផ្ទាល់ និងជីវិតនៃប្រពន្ធ និងកូនចៅរបស់គេ។
៣ហើយឥឡូវនេះ ពីរឆ្នាំក្រោយមក ហើយបន្ទាប់ពីការស្លាប់របស់សារេឌ មើលចុះ មានប្អូនរបស់សារេឌបានបះបោរឡើង ហើយគាត់បានច្បាំងនឹងកូរីអានទុមើរក្នុងចម្បាំងនោះ កូរីអានទុមើរបានឈ្នះលើគាត់ ហើយបានដេញតាមគាត់ទៅដល់ទីរហោស្ថាន អ័គីស។
៤ហើយហេតុការណ៍បានកើតឡើងថា ប្អូនរបស់សារេឌបានច្បាំងនឹងទ្រង់នៅក្នុងទីរហោស្ថានអ័គីស ហើយការប្រយុទ្ធនោះ បានក្លាយជាឃោរឃៅជាខ្លាំង ហើយមនុស្សជាច្រើនពាន់បានដួលចុះដោយមុខដាវ។
៥ហើយហេតុការណ៍បានកើតឡើងថា កូរីអានទុមើរបានព័ទ្ធជុំវិញទីរហោស្ថាន ហើយប្អូនរបស់សារេឌបានលើកទ័ពចេញពីទីរហោស្ថាននៅពេលយប់ ហើយបានសម្លាប់កងទ័ពមួយភាគរបស់កូរីអានទុមើរ នៅពេលពួកគេកំពុងស្រវឹង។
៦ហើយគាត់បានមកដល់ដែនដីម៉ូរ៉ុន ហើយបានតម្កើងខ្លួនឡើងលើបល្ល័ង្ករបស់កូរីអានទុមើរ។
៧ហើយហេតុការណ៍បានកើតឡើងថា កូរីអានទុមើរ នៅជាមួយនឹងកងទ័ពរបស់ទ្រង់ អាស្រ័យនៅក្នុងទីរហោស្ថានអស់រយៈពេលពីរឆ្នាំ ក្នុងពេលនោះ ទ្រង់បានទទួលកម្លាំងដ៏ខ្លាំងដល់កងទ័ពរបស់ទ្រង់។
៨ឥឡូវនេះ ប្អូនរបស់សារេឌ ដែលមានឈ្មោះថា កាឡាត ក៏បានទទួលកម្លាំងយ៉ាងខ្លាំង ដល់កងទ័ពរបស់គាត់ដែរ ពីព្រោះមកពីបក្សព័ន្ធសម្ងាត់ទាំងឡាយ។
៩ហើយហេតុការណ៍បានកើតឡើងថា សង្ឃជាន់ខ្ពស់របស់គាត់បានធ្វើឃាតគាត់ចោល នៅពេលដែលគាត់អង្គុយលើបល្ល័ង្ករបស់ខ្លួន។
១០ហើយហេតុការណ៍បានកើតឡើងថា មនុស្សម្នាក់ពីបក្សព័ន្ធសម្ងាត់ បានធ្វើឃាតគាត់ចោលតាមផ្លូវសម្ងាត់មួយ ហើយបានទទួលយកនគរដល់ខ្លួន ហើយគាត់មានឈ្មោះថា លិប ហើយលិបគឺជាបុរសម្នាក់មានមាឌធំ ធំជាងបុរសណាទាំងអស់នៅក្នុងចំណោមប្រជាជន។
១១ហើយហេតុការណ៍បានកើតឡើងថា នៅក្នុងឆ្នាំទី១របស់លិប កូរីអានទុមើរបានឡើងមកឯដែនដីម៉ូរ៉ុន ហើយបានច្បាំងជាមួយនឹងលិប។
១២ហើយហេតុការណ៍បានកើតឡើងថា ទ្រង់បានប្រយុទ្ធជាមួយនឹងលិប នៅក្នុងនោះ លិបបានវាយត្រូវដៃទ្រង់ធ្វើឲ្យទ្រង់របួស ក៏ប៉ុន្តែកងទ័ពរបស់កូរីអានទុមើរ បានបន្តការវាយប្រហារទៅលើលិប ធ្វើឲ្យគាត់រត់គេចទៅតំបន់ព្រំប្រទល់ជិតឆ្នេរសមុទ្រ។
១៣ហើយហេតុការណ៍បានកើតឡើងថា កូរីអានទុមើរបានដេញតាមគាត់ ហើយលិបបានច្បាំងជាមួយនឹងទ្រង់នៅលើឆ្នេរសមុទ្រ។
១៤ហើយហេតុការណ៍បានកើតឡើងថា លិបបានវាយកងទ័ពរបស់កូរីអានទុមើរ ធ្វើឲ្យពួកគេរត់គេចទៅកាន់ទីរហោស្ថានអ័គីសវិញ។
១៥ហើយហេតុការណ៍បានកើតឡើងថា លិប បានដេញតាមទ្រង់ រហូតគាត់បានមកដល់ទីវាលអ័កូស។ ហើយកូរីអានទុមើរ បាននាំយកប្រជាជនទាំងអស់ទៅជាមួយទ្រង់ នៅពេលទ្រង់រត់គេចពី លិប ទៅក្នុងនៃដែនដី ដែលទ្រង់រត់គេចទៅនោះ។
១៦ហើយកាលទ្រង់បានមកដល់ទីវាលអ័កូសហើយ នោះទ្រង់បានច្បាំងនឹងលិប ហើយទ្រង់បានវាយគាត់រហូតដល់ស្លាប់ ទោះជាយ៉ាងណាក៏ដោយ គង់តែប្អូនរបស់លិបបានមកច្បាំងនឹងកូរីអានទុមើរជំនួសវិញ ហើយចម្បាំងនោះបានក្លាយទៅជាសាហាវជាខ្លាំងក្រៃ ក្នុងនោះ កូរីអានទុមើរបានរត់គេចពីកងទ័ពនៃប្អូនរបស់លិបទៀត។
១៧ឥឡូវនេះ ឈ្មោះរបស់ប្អូនរបស់លិបគឺ ស៊ិស។ ហើយហេតុការណ៍បានកើតឡើងថា ស៊ិស បានដេញតាមកូរីអានទុមើរ ហើយគាត់បានវាយយកបានទីក្រុងជាច្រើន ហើយគាត់បានសម្លាប់ទាំងពួកស្ត្រី និងកូនក្មេង ហើយគាត់បានដុតទីក្រុងជាច្រើនចោល។
១៨ហើយការភ័យខ្លាចដល់ស៊ិស បានជ្រួតជ្រាបទូទៅអស់ទាំងដែនដី មែនហើយ សម្រែកមួយបានបន្លឺទូទៅទាំងដែនដីថា — តើអ្នកណាអាចទប់ទល់នឹងកងទ័ពរបស់ស៊ិសបាន? មើលចុះ គាត់បោសសំអាតដីពីខាងមុខគាត់!
១៩ហើយហេតុការណ៍បានកើតឡើងថា ប្រជាជនបានចាប់ផ្ដើមប្រមូលគ្នាមកជាពលទ័ពទូទៅអស់ទាំងផ្ទៃដែនដី។
២០ហើយពួកគេបានបែកគ្នា ហើយពួកគេមួយផ្នែក បានរត់ទៅខាងកងទ័ពរបស់ស៊ិស ហើយមួយផ្នែកទៀត បានរត់ទៅខាងកងទ័ពរបស់កូរីអានទុមើរ។
២១ហើយសង្គ្រាមនោះធំណាស់ ហើយអស់ពេលយ៉ាងយូរ ហើយឆាកនៃការខ្ចាយឈាម និងការកាប់សម្លាប់បន្តទៅយ៉ាងយូរយារ រហូតដល់ផ្ទៃដែនដីទាំងមូលគ្របដណ្ដប់ដោយកសាកសពនៃមនុស្សស្លាប់។
២២ហើយសង្គ្រាមនោះ កើតឡើងយ៉ាងឆាប់រហ័ស បណ្ដាលឲ្យគ្មាននរណាម្នាក់នៅសល់ ដើម្បីកប់អ្នកស្លាប់ឡើយ ប៉ុន្តែពួកគេបានដើរចេញពីការខ្ចាយឈាមមួយទៅការខ្ចាយឈាមមួយទៀត ដោយទុកចោលសាកសព ទាំងប្រុសទាំងស្រី និងកូនក្មេង រាយលើផ្ទៃដែនដី ឲ្យក្លាយទៅជាចំណីរបស់កដង្កូវ។
២៣ហើយក្លិនស្អុយពាសពេញលើផ្ទៃដែនដី គឺលើអស់ទាំងផ្ទៃដែនដី ហេតុដូច្នោះហើយ ប្រជាជនមានការលំបាកទាំងយប់ទាំងថ្ងៃ ដោយសារក្លិនស្អុយនោះ។
២៤ក៏ប៉ុន្តែស៊ិសដេញតាមកូរីអានទុមើរមិនឈប់ឈរសោះ ត្បិតគាត់បានស្បថថានឹងសងសឹកកូរីអានទុមើរ ដើម្បីឈាមរបស់បងគាត់ ដែលត្រូវបានស្លាប់ ហើយព្រះបន្ទូលនៃព្រះអម្ចាស់បានប្រាប់ដល់អេធើរថា កូរីអានទុមើរនឹងពុំត្រូវស្លាប់ដោយដាវឡើយ។
២៥ម្ល៉ោះហើយ យើងឃើញថា ព្រះអម្ចាស់ ទ្រង់បានដាក់ទោសដល់ពួកគេក្នុងសេចក្ដីខ្ញាល់ដ៏ពេញទំហឹងរបស់ទ្រង់ ហើយអំពើទុច្ចរិត និងអំពើគួរខ្ពើមឆ្អើមទាំងឡាយរបស់ពួកគេ បានរៀបចំផ្លូវឲ្យពួកគេទៅកាន់សេចក្ដីបំផ្លិចបំផ្លាញដ៏អស់កល្បជានិច្ច។
២៦ហើយហេតុការណ៍បានកើតឡើងថា ស៊ិសបានដេញតាមកូរីអានទុមើរ ឆ្ពោះទៅទិសខាងកើត រហូតដល់តំបន់ព្រំប្រទល់ជិតឆ្នេរសមុទ្រ ហើយនៅទីនោះ ទ្រង់បានច្បាំងនឹងស៊ិស អស់រយៈពេលបីថ្ងៃ។
២៧ហើយការបំផ្លិចបំផ្លាញក្នុងចំណោមពលទ័ពរបស់ស៊ិស នោះឃោរឃៅណាស់ ធ្វើឲ្យប្រជាជនចាប់ផ្ដើមភិតភ័យ ហើយចាប់ផ្ដើមរត់គេចចេញពីពលទ័ពរបស់កូរីអានទុមើរ ហើយពួកគេបានរត់ទៅដែនដីកូរីហូរ ហើយបោសសំអាតបណ្ដាជនដែលនៅពីមុខពួកគេ គឺអស់អ្នកណាដែលពុំព្រមចូលរួមជាមួយនឹងពួកគេ។
២៨ហើយពួកគេបានបោះត្រសាលរបស់គេនៅក្នុងច្រកភ្នំកូរីហូរ ហើយកូរីអានទុមើរបានបោះត្រសាលរបស់ទ្រង់នៅក្នុងច្រកភ្នំសើរ។ ឥឡូវនេះ ច្រកភ្នំសើរគឺនៅជិតកូនភ្នំកុមណូរ ហេតុដូច្នោះហើយ កូរីអានទុមើរបានប្រមូលពលទ័ពរបស់ទ្រង់នៅលើភ្នំ កុមណូរ ហើយបានបន្លឺត្រែដល់ពលទ័ពរបស់ស៊ិស ហៅពួកគេឲ្យមកច្បាំង។
២៩ហើយហេតុការណ៍បានកើតឡើងថា ពួកគេបានចេញមក តែត្រូវបានរុញច្រានទៅវិញ ហើយពួកគេបានមកជាលើកទី២ ហើយពួកគេត្រូវបានរុញច្រានទៅវិញទៀតជាលើកទី២។ ហើយហេតុការណ៍បានកើតឡើងថា ពួកគេបានមកម្ដងទៀតជាលើកទី៣ ហើយការប្រយុទ្ធបានក្លាយទៅជាសាហាវអស្ចារ្យ។
៣០ហើយហេតុការណ៍បានកើតឡើងថា ស៊ិសបានវាយត្រូវកូរីអានទុមើរ ធ្វើឲ្យទ្រង់របួសយ៉ាងជ្រៅជាច្រើនកន្លែង ហើយ កូរីអានទុមើរ ដោយអស់ឈាមជាច្រើន ក៏សន្លប់ទៅ ហើយត្រូវបានសែងចេញ ហាក់ដូចជាទ្រង់សុគត។
៣១ឥឡូវនេះ ការបាត់បង់មនុស្សប្រុស ស្រី និងកូនក្មេងៗទាំងសងខាង មានចំនួនច្រើនណាស់ ទើបស៊ិសបានបញ្ជាឲ្យទ័ពរបស់គាត់ថា ពួកគេមិនត្រូវដេញតាមពលទ័ពរបស់កូរីអានទុមើរទៀតទេ ហេតុដូច្នោះ ពួកគេបានត្រឡប់ទៅឯជំរំរបស់គេវិញ៕