Almaq Churin
Almaq Qelqan

1 Hinataq, Yayaq rimayninkunata runakunaman rimariyta Alma qallarirqan; qallariypi Zarahemla hallp’api, hinamantaq tukuy hallp’antinpi.

2 Kaytaqmi Zarahemla llaqtapi kaq iñeqkuna-huñumanta runakunaman rimarisqan simikuna, pay kikinpa qelqankunaman hina:

3 Noqa Alma, Yayaq iñeqkuna-huñunpi Hatun Kurak kanaypaq taytay Almaq sapaqchasqan kaspa—kay ruwananpaqtaq Yayamanta atiyniyoq kallpayoqpiwan karqan—qankunata niykichis, iñeqkuna-huñutan hatarichirqan Nephiq hallp’anpa lindanpi kaq hallp’api, Mormonpa hallp’an nispa sutichasqa hallp’api; ari, wawqenkunatataq Mormonpa ununkunapi unucharqan.

4 Qankunatataq niykichis, Yayaq khuyapakuyninwan atiyninpiwanmi horqosqa karqanku inka Noeq runankunaq makinkunamanta.

5 Chay patamantaq, purunpi lamanitakunaq hark’asqan karqanku, ari, hark’asqan karqanku niykichismi, yapamantataq hark’asqa kasqankumanta paykunata Wiraqocha qespichirqan rimayninpa atiyninwan; kay hallp’amantaq apamusqa karqanchis, kay tukuy hallp’antinpi imataq Yayaq iñeqkuna-huñunta hatarichiyta qallarirqanchis.

6 Kunantaq qankunata nisaykichis, kay iñeqkuna-huñumanta kaq wawqeykuna, allintachu yuyarinkichis taytaykichiskuna hark’asqa kasqankumanta? Allintachu yuyarinkichis paykunapaq Wiraqochaq khuyapakuyninta unay-ñak’ariynintawan? Astawanraqtaq, allintachu yuyarinkichis supay wasimanta nunankuta qespichimusqanta?

7 Paymi sonqonkuta t’ikrarqan, ari, qaqa puñuymantan paykunata rikch’arichimurqan, Yayamantaq paykuna rikch’arirqanku. Tutayaq chawpipin paykuna karqanku, chaypiwanpas wiñay-wiñaypaq rimaypa k’anchayninwanmi nunanku k’ancharisqa karqan; ari, wañuypa chaqnankunawan, supay wasiq watanankunapiwan muyurisqan karqanku, wiñay-wiñaypaq qolluytaq paykunata suyarqan.

8 Kunantaq qankunata tapuykichis wawqeykuna—qollochisqachu karqanku? Manan, manan qollochisqachu karqanku, nispan nisaykichis.

9 Yapamantataq tapuykichis—t’ipisqachu karqan wañuypa chaqnankuna, kacharisqachu karqan paykuna muyuriq supay wasiq chaqnankuna? Ari nispan nisaykichis, pashkasqan karqan, nunankutaq hatunyarqan, kutichikapuq munakuytataq takirqanku. Qespichisqa kasqankumantataq qankunata niykichis.

10 Kunantaq qankunata tapuykichis—Imaraykun qespichisqa kanku? Ari, imapin teqsichakurqanku qespiyta suyanankupaq? Imaraykun wañuypa chaqnankunamanta, supay wasiq washkarninkunamantapas kacharisqa karqanku?

11 Atinin qankunaman kay niyta—manachu taytay Alma kreyirqan Abinadiq rimasqan simikunapi? Manachu qollanan unanchaq pay karqan? Manachu pay rimarqan Yayaq rimayninkunata, taytay Almataq chay rimaykunapi kreyirqan?

12 Iñiyninman hinataq sonqonpi ancha hatun t’ikrakuy ruwasqa karqan. Qankunatataq niykichis—cheqaqmi kay llapan imaymanakuna, nispa.

13 Paytaqmi rimayninkunata taytaykichiskunaman yachachirqan, paykunaq sonqonkupipas ancha hatun t’ikrakuymi ruwasqa karqan, ullpuykukuspankutaq cheqaq kawsaq Yayapi kunfiyansankuta churarqanku. Tukukuykamataq iñiysapa karqanku, chhaynataq qespichisqa karqanku.

14 Kunantaq tapuykichis iñeqkuna-huñumanta kaq wawqeykuna, Yayamantachu nunaykichispi paqarisqa karqankichis? Chaskirqankichischu rikch’ayninta uyaykichispi? Sentirqankichischu sonqoykichispi kay hatun t’ikrayta?

15 Iñinkichischu kamasuqniykichispa kutichikapuyninpi? Iñeq ñawiwanchu ñawpaqman hina qhawarinkichis, kay wañuq runakurkuta mana wañunanpaq hatarichisqa kasqanta rikuspa, kay waqlliqtaq mana waqlliqpi hatarichisqa kasqanta rikuspa, kay wañuq runa-kurkupi ruwasqa kasqanman hina Yayaq ñawpaqenpi sayarispa taripasqa kanapaq?

16 Qankunata nisaykichis—yuyayukuwaqchischu, khaynata haqay p’unchawpi Wiraqochaq arun niqta: Noqaman hamuychis saminchasqakuna, chaninchaypa ruwayninmi ruwayniykichis hallp’api karqan, niqta?

17 Ichari yuyakuwaqchischu haqay p’unchawpi Wiraqochaman llullakuy atinaykichista—Wiraqocha, ruwayniykuqa chanin ruwaykunan karqan hallp’a patapi, nispa—Paytaqchu qespichisunkichis?

18 Hukniraq rimaypiqa—yuyayukuwaqchischu Yayaq taripana tiyananman huchawan, pisachikuywan ima hunt’a nunayoq apamuspa kayta, tukuy huchaykichista yuyarispa, ari, llapan millay ruwasqaykichista k’apak yuyariypi, ari Yayaq kamachiyninkuna kontra ankallikusqaykichista yuyarispa?

19 Nicaykichis, qhawariwaqchischu Yayata haqay p’unchawpi, ch’uya sonqowan llunp’aq makipiwan? Nisaykichistaq—qhawarikuwaqchischu uyaykichispi Yayaq rikch’aynin churasqa kaqtin?

20 Nisaykichistaqmi—yuyayukunkichischu qespichisqa kanaykichista, saqraq watasqan kanaykichispaq kacharikushaqtiykichis?

21 Nisaykichis, haqay p’unchawpin yachankichis qespichisqa kayta mana atinaykichista. Manan pipas qespichisqa kaytaqa atinmanchu, p’achankuna yuraqtapuni mana t’aqsasqa kaqtinqa; ari, llapa qhellimantan p’achankuna ch’uyanchasqa kanan, taytanchiskunaq rimasqanpa yawarninwan; Paytaqmi hamunqa huchankunamanta runakunata qespichinanpaq.

22 Kunantaq tapusaykichis wawqeykuna, imaynatan mayqin kaqniykichispas sentikuwaqchis Yayaq taripananpa ñawpaqenpi sayarispaykichis, yawarwan, imaymana qhellikunawan ima p’achaykichis qhellichasqa kashaqtin? Imatan kay imaymanakuna qankuna kontra sut’inchanqa?

23 Manachu kaykuna rimarinqa runa wañucheqkuna kasqaykichismanta, ari, imaymana millay ruwaykunamanta huchasapa kasqaykichismantawan?

24 Wawqeykuna, yuyankichischu chhayna kaq runa, Yayaq qhapaq suyunpi Abrahanwan, Isaakwan, Jakobwan, ch’uya yuraq mana ima qhelliyoq, maqchisqa p’achayoq llapa qollanan unanchaqkunawan ima tiyananpaq tiyanayoq kananpaq?

25 Manan nisaykichismi; chhayna kaqtinqa, Kamaqninchistan qallariymantapacha llullakuqta ruwankichis, utaq qallariymantapacha llullakuq kasqanta yuyankichis; manan yuyawaqchischu chhayna runa hanaqpacha qhapaq-suyupi tiyanayoq kananta; ichaqa, qarqosqan kanqaku, saqraq suyunpa wawankuna kasqankurayku.

26 Kunantaq qankunata niykichis wawqeykuna, sonqo t’ikrayta rikurqankichis chayqa, kutichikapuq munakuypa takinta takiyta munarqankichis chayqa, tapusaykichis, khaynatachu kunan yuyakunkichis?

27 Yayaq ñawpaqenpi mana qhelliyoq kachikuspaykichischu purirqankichis? Kunanpacha wañunaykichispaq waqyasqa kaqtiykichis, ullpuykukuqmi karqani, nispachu sonqoykichis ukhupi niyta atiwaqchis? Llaqtanta huchankunamanta kutichikapuq hamuq Cristoq yawarninwan maqchisqa yuraqyachisqanpiwan p’achaykichis kasqanta?

28 Anchayaymanta pichasqachu kankichis? Mana chhayna kankichis chayqa, manan listuchu kankichis Yayawan tupanaykichispaq. Usqhayllan alistakunaykichis, sispallapiñan hanaqpacha qhapaq-suyu kashan; chhayna kaq runataq, mana wiñay kawsayniyoqchu.

29 Nillanitaq—kanchu pipas qankuna purapi, chikikuymanta mana llat’asqa? Chhayna runaqa manan alistasqachu, usqhaylla alistakunantataq munayman, sispallapiñan pacha kashan, manataqmi pay yachanchu hayk’aq chay pacha hamunanta; hina kaq runaqa, manan mana-huchayoqchu tarisqa kanqa.

30 Yapamantataq nisaykichis—kanchu pipas qankuna purapi wawqenmanta asikuq, utaq qatikachaykunawanpas pay rawkhaq.

31 Ay chhayna kaq runamanta, manan alistasqachu chay runa; sispallapiñataqmi pacha kashan yuyayninman kutirimunanpaq; mana chayqa, manan qespichisqa kayta atinqachu!

32 Ari, ay millaykuna ruwaqkunamanta; yuyayman yuyayman kutirimuychis, Wiraqocha Yayan chayta rimarirqan.

33 Llapan runakunatan waqyan, khuyapakuyniyoq makikunataq paykunaneqman chutarisqa kashan: Yuyayman kutirimuychis, noqataq chaskisaykichis, nispa.

34 Ari, khaynatan Pay nin: Noqaman hamuychis, kawsaq sach’aq rurunmantataq mikhunkichis; ari, qespillataq mikhunkichis ukyankichis ima kawsaq t’antamanta kawsaq unumantawan;

35 Ari, noqaman hamuychis, chaninchaypa ruwayninkunatataq apamuychis, manataqmi wit’usqachu nitaq ninaman wikch’usqachu kankichis—

36 Sispallapiñan pacha kashan, allin rurukunata mana apamuqkuna, utaq chaninchaypa ruwayninkunata mana ruwaqkuna, muchunankupaq qaparqachanankupaq ima rasonniyoq kankupaq.

37 Millay ruwaqkuna, pachaq yanqapaq kaq imankunapi punkipakuqkuna, chaninchaypa ñanninkunata reqsinankupa yuyayukuspanku mana micheqniyoq owejakuna hina chinkaqkuna, michiqña waqyarqasunkichis waqyashasunkichisña chaypas, manan arunta uyariyta munankichischu!

38 Qankunata nisaykichis—allin kaq micheqqa waqyashasunkichismi, ari, kikin sutinwanmi waqyashasunkichis, chaytaq Cristoq sutin. Waqyasqa kanaykichis sutita, allinkaq micheqpa arunta mana uyarinkichis chayqa, manan allinkaq micheqpa ovejankunachu kankichis.

39 Kunanri, mana allinkaq micheqpa ovejankunachu kankichis chayri, ima t’aqamantan kankichis? Noqataq nisaykichis, saqran micheqniykichis, paypa t’aqanmantataqmi kankichis; kunanri, pin kayta mananchanqa? Nisaykichistaqmi, pipas kayta mananchaqqa llulla runan, supaypa wawantaqmi.

40 Qankunatataq nisaykichis—ima allin kaqpas Yayamantan hamun, imapas mana-allin kaqtaq saqramanta hamun.

41 Chhaynaqa, allin ruwaykunata huk runa apamun chayqa, allin micheqpa aruntan uyarin, Paytataq pay qatikun. Ichaqa, pipas mana-allin ruwaykunata apamuqqa saqraq wawanmi wakipun, paypa aruntataq uyarin, paytataq qatikun.

42 Pipas kayta ruwaqtaq, paymanta chaskikuyninta chaskinan; chhaynaqa, chaninchaymanta kaq imaymanakunaman hina wañuytan chaskikuyninta hina chaskin, llapan allin ruwaykunaman wañusqa kaspa.

43 Kunantaq wawqeykuna, uyariwanaykichistan munayman, nunaypa tukuy atiyninwanmi rimarishani. Sut’intan qankunaman rimarirqani mana pantay atinaykichispaq, utaq, Yayaq kamachiyninkunaman hinan rimarirqani.

44 Khaynata rimarinaypaqmi waqyasqa kani, Cristo Jesuspi kaq Yayaq qollanan ordenninman hina; ari, sayarispa kay runakunaman sut’inchanaypaqmi kamachisqa kani, hamunan imaymanakunamanta taytanchiskunaq rimasqankumanta.

45 Manataqmi llapanchu kay. Manachu yuyankichis noqa kikiymanta kay imaymanakunamanta yachasqayta? Qankunamantaq sut’inchani, kay rimasqay imaymanakuna cheqaq kasqanta. Imaynatataq yuyankichis, kaykuna cheqaq kasqanmanta yachasqaytari?

46 Qankunata nisaykichis, Yayaq Qollanan Nunanpa yachachiwasqanmi kaykuna. Askha p’unchawmi sasirqani, yayaman-rimarikurqani ima, noqa kikiymanta kay imaymanakunata yachanaypaq. Kunantaq noqa kikiymanta yachani kay imaymanakuna cheqaq kasqanta, Wiraqocha Yaya Qollanan Nunanwan kaykunata yachachiwasqanrayku; kaytaqmi noqapi kaq willaq nuna.

47 Astawanraqtaq niykichis, khaynan noqaman willawasqa karqan, taytanchiskunaq rimasqanku simikuna cheqaq kasqanta, noqapi kaq unanchaq nunaman hina; kaypas Yayaq Nunanpa willasqallantaq.

48 Nisaykichistaqmi, hamunan imaymanakunamanta imataña qankunaman ninay cheqaq kasqanta noqa kikiymanta yachasqayta. Nillaykichistaqmi, Churi, Taytaq Sapan Churin, munakuyniyoq, khuyapakuyniyoq, cheqaqwan ima hunt’a Jesucristoq hamunanmanta yachasqayta. Paymi, runakunaq huchankuna horqoq hamunqa; ari, mana kuyurispa sutinpi iñeq sapanka runaq huchankunata.

49 Kunantaq nisaykichis, kay ordenman hinan waqyasqa karqani, ancha munasqay wawqeykunata yachachinaypaq, kay hallp’api tiyaq sapanka runamanwan; ari, llapaman yachachinaypaq, machumanpas waynamanpas, hark’asqamanpas qespi kaqmanpas, ari, machumanpas mana ancha machu kaqmanpas, wiñaq miraymanpas niykichismi; ari, yuyayninkuman kutirimunankupaq, yapamanta paqarinankupaqwan paykunaman qaparinaypaq.

50 Ari, khaynatan Nuna nin: Yuyayniykichisman kutirimuychis pachaq llapan k’uchunkuna, sispallapiñan hanaqpachaq qhapaq-suyun kashan; ari, kusiqellpunpi, atiyninpi, hatun-kayninpi, kallpanpi, kamachikuyninpiwanmi Yayaq Churin hamunqa, nispa. Ari, qankunatan nisaykichis ancha munasqay wawqeykuna: Qhawariychis hallp’antinpa Inkanpa kusiqellpunta; hanaqpachaq Inkanpas asllamanmi k’ancharimunqa, llapa runakunaq wawankuna purapi, nispa Nunaq nisqanta.

51 Niwallantaqmi Nuna, ari, ancha kallpayoq kunkawan niwan: Riy, kay runakunamantaq nimuy—Yuyayniykichisman kutirimuychis, yuyayniykichisman mana kutirimunkichischu chayqa, manan imaynatapas chaskinkichischu hanaqpachaq qhapaqsuyunta, nispa.

52 Yapamantataq nisaykichis Nunaq nisqanta: sach’aq saphinmanmi hacha churasqa kashan, chhaynataq, allin ruru mana qoq sapanka sach’a wit’usqa kanqa, ninamantaq wikch’usqa kanqa; ari, mana tukukuq, mama qollochiy atina ninaman. Yuyariychis, Qollanan Kaqmi rimarirqan, nispa.

53 Kunantaq niykichis ancha munasqay wawqeykuna, awantawaqchischu kay rimariykunata; ari, huk qayllamanchu kay imaymanakunata churawaqchis, sarukachawaqchischu Qollanan Kaqta, ari, punkipakuwaqchischu sonqoykichispa anchayayninpi; atipakunkichisraqchu sinchi chaninniyoq p’achakunawan p’achakuyta, kay pachaq yanqapaq imankunapi qhapaqyayniykichiskunapiwan sonqoykichista churaspa?

54 Ari, atipakunkichispunitaqchu, hukniykichis hukkaqmanta aswan allin kanaykichispaq yuyayta; ari, atipakunkichistaqchu wawqeykichis qatikachayta—k’umurikuspa Yayaq qollanan ordenninman hina puriqkunata, chaywantaq iñeqkuna-huñuman apamusqa karqanku, Qollanan Nunaq qollanachisqantaq karqanku, yuyayman kutirimuypa chanin ruwaykunata apamuspa—

55 Ari, atipakunkichischu wakchakunaman nesitaqkunamanwan wasaykichista t’ikrayta, paykunamanta kapusuqniykichista hark’aspa?

56 Qhepatataq, millay ruwayniykichispi atipakuqkuna qankunata niykichis, kaykunan wit’usqa kaspa ninaman wikch’usqa kanqaku, mana usqhayllachu yuyayninkuman kutirimunqaku chayqa.

57 Llapaykichismantaq kunan niykichis, allin micheqpa arun uyariy munaqkunaman, lloqsimuychis millay ruwaqkuna puramanta, sapaq kaychis, amataq qhelli imaymanankunata llamiychischu. Pichasqan sutinku kanqa, huchasapakunaq sutinkutaq mana chaninkunaq sutinkuwanchu yupasqa kanqa, Yayaq khayna nisqan simi hunt’akunanpaq: Huchasapakunaq sutinkunaqa, manan llaqtaypa sutinwanqa chharqosqachu kanqa;

58 Chaninkunaq sutinkunaqa kawsaypa qelqanpi qelqasqan kanqa, paykunamantaq paña makiypi huk chaskikuyta qosaq, nispa. Kunanri wawqeykuna, iman kapusunkichis kay kontra ninaykichispaq? Nisaykichismi, kay kontra rimarinkichis chayqa, manan imapas qokunchu, Yayaq rimayninqa hunt’akunanmi.

59 Ima micheqmi qankuna purapi kan, askha ovejayoq kaspa atoqkuna hamoqtin ovejankunata mana mikhunanpaq ovejankuna mana qhawaq? Ovejankunaman atoq haykunman chayri, manachu atoqta pay qarqonqa? Atinqa chaytaq atoqta sipinqa.

60 Kunantaq niykichis, waqyashasunkichismi allin micheq; arunta uyarinkichis chayqa, t’aqanmanmi apamusunkichis, ovejankunataq kankichis; Paytaq kamachisunkichis qankuna puraman ima millay atoqpas haykunanta mana kacharinaykichispaq, mana qollochisqa kanaykichispaq.

61 Kunantaq noqa Alma, kamachiykichis kamachiwaqpa siminpi, qankunaman rimarisqay simikunata ruwanaykichispaq.

62 Kamachita hinan rimariykichis iñeqkuna-huñumanta kaqkunaman; iñeqkuna-huñumanta mana kaqkunamantaq rimarini waqyakuyta hina: Hamuychis, yuyayman kutirimuypi unuchakuychis, kawsaq sach’aq rurunmanta qankunapas mallinaykichispaq, nispa.