Scriptures
Alma 42


42 T’aqa

Koriantonman Almaq rimaynin qatillan. Chaninchav khuyapakuypiwan sut’inchasqa. Kawsay sach’a. Kay kawsay prubakuna pacha. Nunapi runa-kurkupiwan wañuy. Yuyayman kutirimuy, qespiy, kamachisqa-simi, muchuchiy, kay llapan imaymanakuna kanan.

1 Kunanqa churiy, mana hamut’ay atisqayki yuyayniykita mana qasita kachisqanta rikuni, chaytataq mana hamut’ayta atinkichu—kaytaq huchallikuqta muchuchiypi Yayaq chaninchayninmanta; manan chaninchu huchallikuq runa millay ñak’ariyman churasqa kanan, nispan yuyashanki.

2 Kunanqa churiy, kaytan qanman sut’inchasayki. Horqosqa kasqanku hallp’ata hallmanankupaq Eden pawqarmanta ñawpaq kaq tayta-mamanchista Wiraqocha Yaya qarqosqan patamanmi, ari, horqorqanmi runata, Eden pawqarpa intiq lloqsimunan qayllapitaq kerubinta, tukuy qayllaman muyuq rawraq q’anchinatawan churarqan, kawsay sach’ata hark’ananpaq—

3 Kunanqa rikunchismi, Yaya hina runa wakisqanta, allinta mana allintawan reqsispa. Makinta chutarispa, kawsay sach’amantawan hap’ispa mikhuspa wiñay-wiñaypaq mana kawsananpaqmi kerubinta rawraq q’anchinatawan Wiraqocha Yaya churarqan, rurumanta runa mana mikhunanpaq—

4 Khaynatataq rikunchis, yuyayman runa kutirimunanpaq pacha qosqa kasqanta; ari, probakunanpaq pacha, yuyayman kutirimunanpaq, Yayata sirvinanpaqwan.

5 Hinaqa, chay kikin pacha makinta chutarispa kawsaypa sach’anmanta Adan mikhunman karqan chayqa, wiñaypaqmi kawsanman karqan, Yayaq rimayninman hina, yuyayninman kutirimunanpaq mana tiempuyoq kaspa. Ari, Yayaq rimaynintaq ch’usaq wakipunman karqan, hatunpuni imayna qespina kanantaq waqllichisqa kanman karqan.

6 Ichaqa, wañunanpaqmi runaman señalasqa karqan; chhaynaqa, kawsay sach’amanta kuchusqa kasqankuman hinan pachamanta wit’usqa kananku karqan. Wiñaypaq chinkasqataq runa wakirqan; ari, urmasqa runan wakipurqanku.

7 Kunanqa rikunkin kaywan, qallariypi tayta-mamanchis kay kawsaypipas nunapipas Wiraqochaq ñawpaqenmanta qarqosqa kasqankuta. Hinaqa rikunchismi, runakuna munayninkuman hina ruwanankupaq wakisqankuta.

8 Khaynaqa, manan nesitakurqanchu kay kawsaypi wañuymanta runakuna kutichikapusqa kananku; khayna kanman chayqa, kusikuypaq hatunpuni imayna kananqa waqllinmanmi karqan.

9 Chhaynaqa, manataq hayk’aqpas nuna wañuyta atinmanchu, urmaytaq llapan runakunaman nunapi wañuyta, kay kawsaypi wañuytawan apamurqan chayqa—hukniraq rimaypiqa, Wiraqochaq ñawpaqenmanta qarqosqa—chhaynaqa, kananmi karqan kay nunapi wañuymanta runakuna kutichisqa kananku.

10 Hinataq, imayna kayninkupi aycha kaq, aychaq munayninkunawan apachikuq, millay ima wakiqtinku, kay probakuna pacha allichakunankupaq pacha wakirqan; allichakunapaq pacha wakipurqan.

11 Kunanqa yuyariy churiy, kutichikapuna imayna kanan mana kanmanchu chayqa (huk qayllaman churasqa), wañusqankuman hinan nunanku usuri karqan, Wiraqochaq ñawpaqenmanta qarqosqa kaspanku.

12 Manataqmi kay urmasqa kasqanmanta runa kutichinapaq imapas karqanchu, kaytataq pay kikinman runa apakamurqan mana kasukuq kasqanrayku.

13 Chhaynaqa, chaninchayman hinaqa, kutichikapunaqa manan wakinmanchu karqan, ichaqa kay allichakuna pachapi, ari, kay alistakuna pachapi yuyayman runakuna kutirimuqtillanku; mana khaynachu kanman chayqa, manan khuyapakuy llank’anmanchu, ichaqa, chaninchaypa ruwaynintan chinkachinman. Chaninchaypa ruwayninkunaqa manan qolluchisqachu kanman; hina kanman chayqa, Yaya kaytan Yaya qollunman.

14 Khaynaqa rikunchismi, lliw runakuna urmasqa kasqankuta, chaninchaypa makinpitaq karqanku; ari, Yayaq chaninchayninpi, kaytaq paykunata churarqan ñawpaqenmanta wiñaypaq qarqosqa kanankupaq.

15 Khuyapakuypa ñanninqa manan wakichisqachu kamnan karqan, ñak’ariy mana ruwasqachu kanman chayqa; chayraykun kikin Yayapuni runakunaq huchankunata ñak’arin, khuyapakuypa ñanninta wakichinanpaq; chaninchaypa mañakuyninta thañichinanpaq; Yaya, hunt’asqa Yaya, chanin Yaya, khuyapakuyniyoqpiwan Yaya kananpaq.

16 Kunanqa, yuyayman kutirimuyqa manan runaman hamuyta atinmanchu karqan, muchuchiy mana kanmanchu chayqa, kaypas wiñaypaqmi karqan, nunaq kawsaynin chhayna kasqan hina, kusikuy kanan kontrapi churasqa; kaypas nunaq kawsayninpa hina wiñaypaqmi karqan.

17 Kunanri, imaynatan runa yuyayninman kutirimunman, mana huchallikunmanchu chayri? Imaynatan huchallikunman kamachisqa-simi mana kanmanchu chayri? Imaynataq kamachisqa-simiri kanman muchuchiy mana kanmanchu chayri?

18 Ichaqa, churasqan muchuchiy karqan, chanin kamachisqa-simitaq qosqa karqan; kaytaq lurin nanananta runaman apamurqan.

19 Mana kamachisqa-simi qosqachu kanman karqan chayri—runa wañuchiq runaqa wañunanmi nispa—wañuyta runa manchakunmanchu, runata wañuchiqtin.

20 Hucha kontra kamachisqa-simi mana qosqachu kanman chayqa, runaqa manan huchallikuyta manchakunmanchu.

21 Manataq kamachisqa-simi qosqachu kanman, runataq huchallikunman chayri, imatan chaninchay khuyapakuypas ruwanman; manan kaykunaqa runapi derechuyoqchu kankuman.

22 Ichaqa, qosqan kamachisqa-simi, churasqataq muchuchiypas, qosqataq yuyayman kutirimuypas; kay yuyayman kutirimuytataq khuyapayakuy mañakun; mana chayqa, runatan chaninchay waqyan kamachisqa-simitataq llank’achin, kamachisqa-simitaq muchuchiyta qon; mana khayna kaqtinqa, qolluchisqan chaninchaypa ruwayninkuna kanman, Yayataq Yaya kayta qollunman.

23 Ichaqa, manan Yaya kayta Yaya qollunchu, yuyayman kutirimuqtataq khuyapayakuy waqyan, khuyapakuytaq hamun ñak’ariyrayku; ñak’ariytaq wañusqakunaq kawsarimuyninkuta wakichin; wañusqakunaq kawsarimuyninkutaq Yayaq ñawpaqenman runakunata kutirichimun. Khaynatan ñawpaqenman yapamanta apamusqa kanku, ruwayninkuman hina, kamachisqa-simiman hina, chaninchaymanwan hina taripasqa kanankupaq.

24 Llapan mañakuynintan chaninchay llank’achin, khuyapakuypas paypa llapan kasqantan waqyan; khaynataq mana pipas, ichaqa, cheqaqtapuni yuyayman kutirimuqkunalla qespichisqa kanku.

25 Chaninchaymanta khuyapakuy suwakunantachu yuyarqanki? Manan, manan imatapas nisqaykin. Chhayna kaqtinqa, Yaya kaytan Yaya qollunman.

26 Khaynatan Yaya wakichin ancha hatun wiñaypaq munayninkunata, pacha kamasqa kasqanmantapacha allichasqa kasqanta. Khaynatataq runaq qespiynin kutichiyninpiwan wakin, chhaynallatataq qolluyninkupas ñak’ariyninkupas.

27 Chhaynaqa churiy, pi hamuqpas qespillan kawsaq unumanta ukyanman; mana hamuqkunataq mana hamunankupaq tanqasqachu kanku; ichaqa, ruwasqanman hinan qhepa p’unchawpi payman sayarichisqa kanqa.

28 Millay kaq ruwayta munarqan, manataq p’unchawninkunapi yuyayman kutirimurqanchu chayqa, millaymi payman qosqa kanqa, Yayaq sayarichiyninman hina.

29 Kunanqa churiy, amaña kaykuna muchuchinasuykita saqenaykitan munani. Huchaykikunalla qanta muchuchichun, chay muchuchiy yuyayniykiman apamunasuykipaq.

30 Churiy, Yayaq chaninchayninta amaña astawan mananchanaykitan munani. Amaña aswan huch’uy kaqpi allinchakuyta atipakuychu huchaykikunarayku, Yayaq chaninchayninta mananchaspa; ichaqa Yayaq chaninchayninta, khuyapakuyninta, sonqo ñit’iykukuynintawan sonqoykita atipananta kachariy; ullpuykukuypa ñut’u hallp’anman apamunasuykita kachariy.

31 Kunantaq churiy, kay runakunaman Yayaq rimayninta yachachinaykipaq Yayaq waqyasqanmi kanki. Kunanqa churiy, riy, Yayaq rimayninta willamuy, cheqaqwan sut’i sonqopiwan, runakunata yuyayman kutirimuyman apamunaykipaq, khuyapakuypa ancha hatun ñannin paykunapi atiyniyoq kananpaq. Yayañayá qanman qochun rimayniykunaman hinapuni. Hinataq kachun.