Scriptures
Tawa kaq Nefi 1
Footnotes
Theme

Tawakaq Nephi

Nephiq Qelqan
Nephiq Churin
Jesucristoq Yachachisqankunamanta Huknin Kaq

Qelqanman hina Nephiq llaqtanpa willaynin.

1 T’aqa

Cristoq Iñeqkuna-huñun t’ikarin. Nephitakuna lamanitakunapiwan iñeqmasikuna tukunku. Llapan tukuy imaymanakunata rakinakunku. Ishkay pachak wata chanin kayman, t’aqanakuy waqlliypiwan qatin. Amos Ammaronpiwan qelqakunata hap’inku.

1 Hinataq, kinsa chunka tawayoq wata tukukurqan, kinsa chunka pishqayoqpas; Jesuspa yachachisqankunataq Cristoq iñeqkuna-huñunta hatarichirqanku, muyureqnintin hallp’api. Paykunaman hamuspa cheqaqtapuni huchankunamanta kutirimuqkunataq Jesuspa sutinpi unuchasqa karqanku, Qollanan Nunatawantaq chaskirqanku.

2 Kinsa chunka soqtayoq watapitaq hallp’antinpi llapan runakuna Wiraqochaman t’ikrakurqanku, nephitakunapas, lamanitakunapas; manataq ima maqanakuypas ni churanakuypas paykuna purapi karqanchu, sapanka runataq chaninta runamasinwan imatapas ruwarqan.

3 Llapan tukuy imaymanakunatataq hukllapi paykuna purapi kachirqanku; hinataq, mana qhapaqpas ni wakchapas, ni hark’asqapas, ni qespipas karqanchu; ichaqa, llapankun qespi qarqanku, hanaqpacha qoymanta malliqkuna.

4 Hinataq, kinsa chunka qanchisniyoq watapas tukukullarqantaq, qatillarqantaq hallp’api qasi kawsay kay.

5 Ancha hatun ancha sumaq ruwaykunataq Jesuspa yachachisqankunaq ruwasqan karqan; hinataq, onqoqkunata alliyachirqanku, wañusqakunata hatarichirqanku, weqrukunata purichirqanku, ñawsakuna rikuyninkuta chaskirqanku, upakuna uyarirqanku. Imaymana milagrokunatan paykuna ruwarqanku runakunaq wawankunaq chawpinpi, manataq imapipas milagrokunata ruwarqankuchu, ichaqa Jesuspa sutillanpi.

6 Hinataq, kinsa chunka pusaqniyoq wata tukukurqan, hinallatataq kinsa chunka isqonniyoqpas, tawa chunka hukniyoqpas, tawa chunka ishkayniyoqpas; ari, tawa chunka isqonniyoq tukukunankama, pishqa chunka hukniyoqpas, pishqa chunka ishkayniyoqpas; ari, pishqa chunka isqonniyoq wata tukukunankama.

7 Anchatapunitaq hallp’api paykunata Wiraqocha qhapaqyachirqan; hinataq, llaqtakunata yapamanta ruwarqanku, kanasqa llaqtakunaq kasqanpi.

8 Ari, chay hatun Zarahemla llaqtatapas yapamantan ruwachirqanku.

9 Ichaqa, askha llaqtakunan chinkayurqan, unukunataq chaykunaq rantinta hamurqan; chayraykutaq chay llaqtakunaqa mana mosoqyachisqa kayta atikurqanchu.

10 Hinataq, Nephiq llaqtan kallpachakurqan, usqhayllataq mirarqanku, ancha sumaq munay llaqtataq wakirqanku.

11 Sawakurqankutaq, sawakuypi qosqataq karqanku; saminchasqataq karqanku, Paykunapaq Wiraqochaq ruwasqan ancha askha promesankunaman hina.

12 Manañataqmi purirqankuchu Moisespa kamachisqa-siminpa warachikuyninkunaman, qollanan-ruwanankunamanwan hinaqa; ichaqa, Wiraqochankumanta, Yayankumanta chaskisqanku kamachiykunaman hinan purirqanku, sasiypi, yayaman-rimarikuypiwan qatispa; yayaman-rimarikunankupaq, Wiraqochaq rimaynin uyarinankupaqwantaq pasaqlla huñunakuspaku.

13 Hinataq, mana ima maqanakuypas llapan runakuna purapi karqanchu, lliw hallp’antinpi; ichaqa, ancha hatun milagrokunan ruwasqa karqan Jesuspa yachachisqankunapurapi.

14 Hinataq, qanchis chunka hukniyoq wata tukukurqan, qanchis chunka ishkayniyoq watapas, ari, qanchis chunka isqonniyoq wata tukukunankama; ari, pachak watapas tukukurqanmi, Jesuspa akllasqan yachachisqankunataq llapanku Yayaq kusipawqarninman rirqanku, qhepanankupaq kinsa yachachisqakunallataq mana. Hukkunataq paykunaq rantinta churasqa karqanku, chay miraymantapas askhan wañurqan.

15 Hinataq, mana ima churanakuypas hallp’api karqanchu, runakunaq sonqonkupi Yayaq munakuynin kasqanrayku.

16 Manataq ima munapakuykunapas, churanakuykunapas, ni ima qotunakuykunapas ni map’akuykunapas, ni llullakuykunapas, ni runa wañuchiykunapas ni ima aychakaq munapakuykunapas karqanchu. Cheqaqtapuniqa, manan aswan kusisamiyoq llaqtaqa kanmanchu Yayaq makinpa kamasqan llapan runakuna purapiqa.

17 Manan suwakuna karqanchu, ni runa wañuchiqkunapas; manataq lamanitakunapas ni ima laya -itakunapas karqanchu; hukllapin karqanku Cristoq wawankuna, Yayaq qhapaq-suyun chashkiqkuna.

18 Hayk’a saminchasqan karqanku! Llapan ruwayninkupin paykunata Wiraqocha samincharqan; ari, saminchasqan karqanku, t’ikarirqankutaq pachak chunkayoq wata tukukunankama. Cristomanta ñawpaq kaq miraytaq tukukurqan; manataq ima churanakuypas hallp’antinpi karqanchu.

19 Kay qhepa qelqakuna waqaychaq, Nephiq raphinkunapi qelqaq Nephi wañurqan, churin Amostaq paypa rantinta qelqakunata waqaycharqan; paypas Nephiq raphinkunapin qelqarqan.

20 Kaytataq pay waqaycharqan pusaq chunka tawayoq wata, kallarqantaqmi hallp’api qasi kawsay; runakunamanta huk chikallantaq iñeqkuna-huñumanta t’aqakurqanku, paykunataq lamanita sutita churakurqanku; chhaynataq yapamanta lamanitakuna hallp’api kayta qallarirqan.

21 Amospas wañurqanmi (Cristoq hamusqanmantataq pachak isqon chunka tawayoq wata karqan), churin Amostaq paypa rantinta qelqakunata waqaycharqan; paypas Nephiq raphinkunapin qelqarqan; Nephiq qelqanpi imataq qelqasqa karqan, chaytaq kay qelqa.

22 Hinataq, ishkay pachak wata tukukurqan; ishkay kaq miraytaq wañurqan, huk chikallantaq mana.

23 Kunantaq noqa Mormon yachanaykichista munayman, runakuna mirasqankuta, hinaspa llapan hallp’antinpi mast’arikurqankuta, ancha qhapaqtaq wakisqankuta, Cristopi hatunyayninkurayku.

24 Kunantaq kay ishkay pachak hukniyoq watanpi paykuna purapi anchayaypi hoqarikuqkuna kayta qallarirqan, ancha chaninniyoq p’achayukuypi, imaymana laya sumaq umiñakunawan, pachaq ancha sumaq imaymanankunapiwan.

25 Chay pachamantapachataq manaña astawan hukllapichu kapuqninkunata mikhuyninkunatawan kachirqanku.

26 Sanakunapi t’aqanakuyta qallarirqanku; qolqeyoq kanankupaqtaq paykuna kikinkupaq iñeqkuna-huñukunata hatarichiyta qallarirqanku; Cristoq cheqaq iñeqkuna-huñuntataq mananchayta qallarirqanku.

27 Hinataq, ishkay pachak chunkayoq wata tukukuqtin, hallp’api askha iñeqkuna-huñukuna karqan; ari askha iñeqkuna-huñukunan karqan Cristo reqseq nikuqkuna, yachachiyninpa aswan askha partenkunatataq manancharqanku; hinataq, imaymana laya millay ruwaykunata chaskirqanku, qollanan kaqtataq millay kasqankurayku hark’asqa kaqkunaman qoqku.

28 Kay iñeqkuna-huñutaq waputapuni mirayta qallarirqan, millay ruwaykunarayku, sonqonkumanta allinta hap’ipakuq saqraq atiyninrayku ima.

29 Karqantaqmi Cristo mananchaq iñeqkuna-huñu, Cristoq cheqaq iñeqkuna-huñuntataq qatikacharqanku, llanp’u sonqo kasqankurayku, Cristopi kreyisqankuraykupiwan; paykunatataq cheqnikurqanku, paykuna purapi askha milagrokuna ruwasqa kasqanrayku.

30 Hinataq, paykunawan kaq Jesuspa yachachisqankunapi kallpata atiytawan llank’achirqanku, watana wasikunamantaq paykunata churarqanku; ichaqa paykunapi kaq Yayaq rimayninpa atiyninwan, watana wasikuna ishkaypi ch’eqtakurqanku, paykuna purapi ancha hatun milagrokunata ruwaspataq purirqanku.

31 Chaypiwanpas, kay llapan milagrokunaña karqan chaypas, sonqonkutan runakunaqa rumiyachirqanku; yachachisqakuna sipiytataq mashkarqanku, Jerusalenpi judiokuna Jesusta sipiyta munasqankuta hina, Paypa rimayninman hina.

32 Nina hornokunaman paykunata choqarqanku, mana ima k’iriyoqtaq paykuna lloqsimurqanku.

33 K’ita uywakunaq wasinmanpas choqarqankun paykunata, chay k’ita uywakunawantaq paykunaqa pukllarqanku, uña ovejawan erqeq pukllasqanta hina; chay uywakuna chawpimantataq lloqsimurqanku mana ima k’irita chaskispa.

34 Chaypiwanpas, sonqonkuta runakuna rumiyachirqanku; askha kurakkunaq, mana cheqaq unanchaqkunaq ima pusasqan kaspanku, askha iñeqkuna-huñukuna hatarichinankupaq, imaymana laya millaykunata ruwanankupaqwan. Jesuspa runankunatataq maqarqanku, ichaqa Jesuspa llaqtanqa manan chay maqaykunata kutichirqankuchu. Khaynatan mana kreyiypi, millay ruwaykunapiwan urmarqanku watamanta wataman, ishkay pachak kinsa chunka wata tukukunankama.

35 Hinataq, kay watapi, ari, ishkay pachak kinsa chunka hukniyoq watapi, ancha hatun t’aqanakuy runakuna purapi karqan.

36 Hinataq, kay watapi huk llaqta hatarirqan, nephitakuna nispa waqyasqakuna; Cristopi cheqaqpuni iñeqkunan paykuna karqanku, paykuna chawpipitaq lamanitakunaq waqyasqan karqan—jakobitakuna, josefitakuna, zoramitakunapiwan.

37 Chhaynataq, Cristopi cheqaq kreyiqkuna, Cristota cheqaq yupaychaqkuna (paykuna chawpipitaq karqan qhepakunankupaq kaq Jesuspa yachachisqankuna) nephitakuna, jakobitakuna, josefitakuna, zoramitakunapiwan nispa waqyasqa karqanku.

38 Yayaq yachachiyninkuna mana munaqkunataq, lamanitakuna, lemuelitakuna, ismaelitakunapiwan waqyasqa karqanku. Manan paykunaqa mana kreyiypichu urmarqanku, ichaqa munaspankun Cristoq yachachiynin kontra ankallikurqanku, wawankunatataq yachachirqanku mana kreyinankupaq, qallariymantapacha mana kreyiypi urmaq taytanku hina.

39 Taytankunaq millay ruwayninkurayku, millay-millanankurayku imataq kay karqan, qallariypi kasqan hinapuni. Yayaq wawankuna cheqninankupaq yachachisqataq karqanku, qallariymantapacha Nephiq wawankunata cheqnikunankupaq lamanitakuna yachachisqa kasqankuta hina.

40 Hinataq, ishkay pachak tawa chunka tawayoq wata tukukurqan, khaynataq runakunaq ruwayninkuna karqan. Runakunaq aswan millay kaqkunataq kallpasapa karqanku, Yayaq llaqtanmanta aswan askhataq wakirqanku.

41 Paykuna kikinkupaq iñeqkuna-huñukunata hatarichiyta qatillarqanku, imaymana sumaq imaymanakunawantaq chayta achalarqanku. Khaynatataq ishkay pachak pishqa chunka wata, ishkay pachak soqta chunka watapas tukukurqan.

42 Hinataq, runakunaq millay kaqninkuna Gadiantonpa pakallapi juraykunata allchanakuyninkunata ima yapamanta hatarichiyta qallarirqanku.

43 Nephiq llaqtan nispa waqyasqa runakunapas sonqonkupi anchayaytan qallarirqanku, ancha askha qhapaqyayninkunarayku; wawqenku lamanitakuna hinataq yanqa-yanqa wakirqanku.

44 Kay pachamantapachataq runakunaq huchankunaryaku, yachachisqakuna llakikuyta qallarirqanku.

45 Hinataq, kinsa pachak wata tukukuqtin, nephitakunapas, lamanitakunapas, huk hukkaq hina ancha millaypuni wakipurqanku.

46 Gadiantonpa suwankunataq hallp’antinpi mast’arikurqanku, manataq pipas chanin runa karqanchu, ichaqa Jesuspa yachachisqankunalla. Ashkhatapunitaq qorita, qolqetawan waqaycharqanku, imaymana laya qhatukuykunapitaq purirqanku.

47 Hinataq, kinsa pachak pishqayoq wata tukukuqtin Amos wañurqan (runakunataq millay kayllapi karqanku); wawqen Ammarontaq paypa rantinta qelqakunata waqaycharqan.

48 Kinsa pachak ishkay chunka wata tukukuqtintaq, Ammaronqa, Qollanan Nunaq kamachisqan kaspa, qollanan qelqakunata pakarqan; ari, miraymanta mirayman haywasqa qollanan qelqakunata, Cristoq hamusqanmanta kinsa pachak ishkay chunka watakama.

49 Paytaq chay qelqakunata Wiraqochapaq pakarqan, Jakobpa wasinpa puchunman yapamanta hamunanpaq, unanchaykunaman, Wiraqochaq promesankunamanwan hina. Khaynan Ammaronpa qelqanpa tukukuynin.