Scriptures
Enos 1
Footnotes
Theme

Enospa Qelqan

1 T’aqa

Nefitakunamata lamanitakunaman huk qelqa lloqsimunanmanta Wiraqochaq promesan. Kay ishkay llaqtakunaq imayna kayninku, awqanakuyninkunapiwan.

1 Hinataq noqa Enos, taytay chanin runa kasqanta yachani—siminpitaq yachachiwarqan, Wiraqochaq yachayninpi anyayninpiwan—kayraykutaq saminchasqa Yayaypa sutin kachun.

2 Willasaykichistaqmi huchaykuna panpachayta manaraq chaskispay Yayaq ñawpaqenpi kallpachakusqayta.

3 Sach’a-sach’akunapi uywakuna chakuq rirqani, hinataq wiñay kawsaymanta, qollanankunaq kusikuyninkumantawan taytaypa rimasqan pasaqlla uyarisqay rimaykuna sonqoyman ukhutapuni haykurqan.

4 Nunaytaq yarqasqa karqan, hinaspataq Kamaqniypa ñawpaqenpi qhonqorikurqani, ancha hatun yayaman-rimarikuypi mañakuypiwantaq kikiy nunaypaq qaparirqani; p’unchawnintintaq Payman waqyakurqani; ari, tuta hamuqtintaq seqachirqaniraq aruyta hanaqman, hanaqpachamantaq chayarqan.

5 Huk arutaq noqaman hamurqan: Enos, panpachasqan huchaykikuna, saminchasqataqmi kanki, nispa.

6 Noqa Enostaq yacharqani, Yaya mana llullakuy atinanta; chhaynataq, huchaykuna pichasqa karqan.

7 Noqataq nirqani: Wiraqocha, imaynatan kay ruwakun, nispa.

8 Paytaq niwarqan: Mana hayk’aqpas rikusqayki ni uyarisqayki Cristopi iñiyniykiraykun. Askha watakunataq pasanqa aychapi Pay kikin manaraq qhawachikushaqtin; chhaynaqa, riy, iñiyniykin alliyachisunki, nispa.

9 Kunantaq kay rimaykunata uyareqtiy, wawqeykuna nefitakunaq allin kayninkuta munayta qallarirqani; chhaynataq paykunarayku tukuy nunayta Yayaman seqariyachirqani.

10 Hinataq, khaynata nunapi kallpachakushanaykama, Wiraqochaq arun yuyayniyman yapamanta hamurqan: Kamachiyniykuna waqaychaypi k’uchiy-k’uchi kasqankuman hinan wawqeykikunamanta watukusaq. Paykunamanmi kay hallp’ata qorqani, qollanantaqmi kay hallp’a; manataqmi kay hallp’ata ñakasaqchu, ichaqa millay ruwayninkuraykulla; chhaynaqa, imayna nisqayman hinan wawqeykikunaman hamusaq; huchallikuyninkunatataqumanku pataman llakikuywan apamusaq, nispa.

11 Kay rimaykunata noqa Enos uyarisqay patamantaq, Wiraqochapi iñiyniy mana kuyoq kayta qallarirqan. Wawqey lamanitakunaraykutaq askha kallpachakuywan Payman rimarikurqani.

12 Hinataq, Yayaman k’uchillaña rimarikusqay pataman, llank’asqay patamanwan, Wiraqocha niwarqan: Iñiyniykiraykun munasqaykiman hina qosqayki, nispa.

13 Kaytataqmi Paymanta munarqani: Sichus llaqtay nefitakuna huchapi urmankuman, hinaspataq qollunkuman, manataq lamanitakuna qolluchisqachu kankuman chayqa, llaqtay nefitakunaq qelqanta Wiraqocha Yaya waqaychananpaq, qollanan mankinpa atiyninwanña kanman chaypas; hayk’aqllapas hamuq p’unchawkunapi lamanitakunaman apamusqa kananpaq, ichapas qespichisqa kayman apamusqa kanankupaq—

14 Kunan p’unchawkanaqa, yanqapaqmi yapamanta cheqaq iñiyman paykunata apamunaykupaq kallpaychakusqayku karqan. Phiñakuyninkupitaq sullullchakurqanku atinkuman chayqa, noqaykuta, qelqaykuta, taytaykuq llapan kustumbrenkutawan chinkachinankupaq.

15 Chhaynataq, Wiraqocha Yaya qelqaykuta waqaychay atisqanta yachaspay, pasaqlla Payta waqyakurqani: Imataña iñiywan Cristoq sutinpi mañakunki chayta chaskinaykipaq kreyispayki chayqa, chaytan chaskinki, nispan Pay niwarqan.

16 Iñirqanitaqmi, Yayatataq waqyakurqani qelqakunata waqaychananpaq. Noqawantaq rimanakurqan, Pay kikin chanin pachapi lamanitakunaman chaykunata apamunanpaq.

17 Noqa Enostaq yacharqani, ruwasqan rimanakuyman hina kananta; chhaynataq nunay samarqan.

18 Wiraqochataq niwarqan: Taytaykikunapas kaytan mañakuwarqanku, iñiyninkuman hinataq paykunapaq ruwasqa kanqa; qanpa hinan iñiyninku karqan, nispa.

19 Hinataq kunan noqa Enos, Nephiq llaqtan chawpinta rirqani, hamunan imaymanakunamanta unanchaspa, uyarisqaymanta rikusqaymatawan sut’inchaspa.

20 Sut’inchanitaqmi, Nephiq llaqtan mana sayk’uypuni, Yayapi cheqay iñiyman lamanitakunata apamunankupaq llank’asqankuta. Ichaqa, yanqapaqmi llank’ayniyku karqan; mana kuyoqmi cheqnikuyninku karqan; mana allin kayninkuwan pusasqan karqanku, salqa, phiñallaña, yawar munaq runakuna; rikch’aykunayoq, qhelli kayniyoqpiwan hunt’a; aycha mikhuq uywakunata mikhuspanku, karpakunapi tiyaspanku; qaramanta llañu chunpita weqawninkuman watakuspankutaq q’ara umantin purunpi muyupakurqanku. Peqtapi, chanpikunapi, hachakunapiwantaq allin makipuni karqanku. Ashkhataq paykunamanta hanku aychallata mikhuqku; pasaqllataq noqayku sipiyta mashkarqanku.

21 Hinataq Nephiq llaqtan hallp’ata chakrarqan, imaymana granokunata rurukunatawan wiñachirqanku; huñu-huñuta uywakunata, huñu-huñutataq imaymana uywakunata, kabrakunata, salqa kabrakunata, askha kawallokunata ima uywarqanku.

22 Ashkhapunitaq unanchaqkuna noqayku purapi karqan. K’ullu umayoqtaq runakuna karqanku, sasa hamut’ana.

23 Manataq imapas karqanchu, ichaqa ancha k’aracheq kaylla, awqanakuykunamata, maqanakuykunamanta, qolluymantawan yachachiy unanchallaypiwan; pasaqlla wañuymanta, wiñaywiñay hayk’a unay kananmanta, Yayaq atiyninmanta taripayninmantawan, kay llapa imaymanakunamantawan yuyarichiy, Wiraqochaq manchakuyninpi kachinapaq pasaqlla paykunata yuyarichiy. Manan pishichu kaykunamanta karqan, ancha sut’in rimaykunallan wañuyman usqhaylla rinankumanta paykunata hark’arman. Khaynatataq paykunamanta qelqani.

24 Awqanakuykunatataq p’unchawniykunapi rikurqani, nefitakuna lamanitakunawan.

25 Hinataq machuyayta qallarirqani, pachak qanchis chunka isqonniyoq watakunataq pasarqan, Jerusalenmanta taytayku lloqsimusqanmanta pacha.

26 Rikurqanitaqmi asllaman ayapanpayman urayunayta, Yayaq atiyninpa llank’asqantaq karqani, kay llaqtaman unanchanaypaq, yachachinaypaq, Cristopi kaq cheqaqman hina Wiraqochaq rimayninta willanaypaq. Llapan p’unchawniykunapitaq chaykunata willarqani, chaypitaq kusikurqani pachaq imaymanankunamanta astawanraq.

27 Asllamantaqmi maypi samanay kasqanman risaq, chaytaq Kutichikapuqniywan; yachanin Paypi samanayta. Anchatapunitaqmi kusikuni, wañuq kaqniy mana wañuqwan churakunan p’unchawpi, Paypa ñawpaqenpitaq sayasaq; hinaspataq ancha hatun kusikuywan uyanta rikusaq, Paytaq niwanqa: Noqaman hamuy saminchasqa, kanmi maypi kanaykipaq allichasqa Taytaypa wasinkunapi, nispa. Hinataq kachun.