1 Mosiahq kamachisqa-siminpin karqan, sapanka runa kamachisqa-simiq taripaqnin kaspa, utaq taripaq kanankupaq churasqa kaspanku qolqeta chaskinankupaq, ñawpaqenkuman taripasqa kanankupaq apamusqa runakunata taripanankupaq llank’asqankuman hina.

2 Huk runa huk runaman manu kaspan, mana chay manu kasqanta kutichipuyta munarqanchu chayqa, taripaqman willasqan karqan; taripaqtaq atiyninta llank’achirqan, llaqtakamayoqkunatataq kacharqan, taripaqpa ñawpaqenman apamusqa chay runa kananpaq; taripaqtaq chay runata tariparqan, kamachisqa simiman hina, chay runa kontra cheqaqchay apamusqankuman hinapiwan. Chhaynataq chay runaqa kamachisqa karqan, manukusqanta kutichinanpaq, utaq, qechusqapas karqan, utaq, runakuna chawpimantapas suwa hina qarqosqa kananpaq.

3 Taripaqtaq qolqeta chaskiq, tiempunman hina—qorimanta senineta huk p’unchawmanta, utaq, qolqemanta senumtapas (kaytaq qorimanta senineman kushka puralla karqan); kaytaq karqan qosqa kasqan kamachi-simiman hina.

4 Kaytaq qorimanta qolqemantawan qolqenkuq sutinkuna, hayk’a chanin kasqanman hina. Sutinkunataq nefitakunaq qosqan karqan; manan Jerusalenpi judiokuna hinachu yuparqanku, nitaq judiokuna hinachu tupurqanku. Ichaqa kambiyarqankun yupayninkuta tupunankutapas, sapanka miraypi runakunaq munayninkuman, susidisqanmanwan hina, inka Mosiahq churasqan taripaqkunaq kamachiyninkukama.

5 Khaynan chay yupay karqan—qorimanta senine, qorimanta seon, qorimanta shum, qorimanta limnahpiwan.

6 Qolqemanta senum, qolqemanta amnor, qolqemanta ezrom, qolqemanta ontipiwan.

7 Qolqemanta senumqa qorimanta senineman kaqllan karqan, sebada tupunapaqpas, imaymana rurukuna tupunapaqpas.

8 Qorimanta seonpa chaninninqa karqan seninemanta ishkay kutin.

9 Qorimanta shumtaq, seonpa chaninninpa ishkay kutin karqan.

10 Qorimanta limnahq chaninnintaq, llapankuq chaninnin hina.

11 Qolqemanta amnorqa, ishkay senumkuna hinan karqan.

12 Qolqemanta ezromtaq, tawa senumkuna hina.

13 Ontitaq, llapankuq chaninnin hina karqan.

14 Kunanqa kaytaqmi karqan, huch’uy yupayninkuq chaninnin—

15 Huk shiblon, senumpa chawpin karqan; chhaynaqa, huh shiblon karqan sebadaq tupunanpa chawpin.

16 Shiblumtaq shiblonpa chawpin.

17 Leahtaq karqan shiblumpa chawpin.

18 Kunanqa kaymi sutinku karqan yupayninkuman hina.

19 Qorimanta antionqa kinsa shiblonkuna hinan karqan.

20 Kayqa karqan qhapaqyanankupaqmi, ruwasqankuman hinataq qolqenkuta chaskirqanku chayqa; chhaynaqa, runakunatan churanakuykunaman, imaymana takurikuykunaman, millay ruwaykunamanwan haykuchirqanku, astawan llank’achisqa kanankupaq; ñawpaqenkuman apamusqa taripaykunaman hina qolqeta chaskinankupaq; hinataq runakunata phiñarichirqanku Alma kontra, Amulek kontrapiwan.

21 Kay Zeezromtaq khaynata Amulekta tapuyta qallarirqan: Kutichiwankichu qanman huk chikan tapuykuna tapunayta, nispa. Zeezromqa makin karqan saqraq ruwayninkunapi, allin kaqta qolluchinanpaq; hinaspataq Amulekta nirqan: Kutichiwankichu qanman tapunay tapuykunata, nispa.

22 Amulektaq payta nirqan: Ari, noqapi kaq Wiraqochaq Nunanman hina kanqa chayqa; manan imatapas nisaqchu Wiraqochaq Nunanman kontraqa, nispa. Zeezromtaq payta nirqan: Qhawariy kay qolqemanta soqta ontikunata, kay llapantan qosayki Llapamanta Aswan Kaqta mananchanki chayqa, nispa.

23 Kunantaq Amulek nirqan: Supay wasiq churin, imanaqtinmi wateqawanki? Yachankichu chaninkuna chhayna wateqaywan mana urmasqankuta?

24 Kreyinkichu Yaya mana kasqanta? Manan nisaykin; yachankin Yaya kasqanta, ichaqa qhapaqyaytan Paymanta astawan munakunki.

25 Kunantaq Yayaq ñawpaqenpi llullakuwarqanki. Qhawariy kay ancha chaninniyoq soqta ontikunata, qanman qosqayki nispan niwarqanki; ichaqa, mana qowanaykipaqmi sonqoykipi yuyayukurqanki. Munayniykiqa karqan, cheqaqpuni kawsaq Yayata mananchanaypaqmi, qolluchiwanaykipaq ima kananpaq. Kunantaq kay ancha hatun millayrayku chaninchayniyoq kanki, nispa.

26 Zeezromtaq payta nirqan: Kanmi cheqaq, kawsaqpiwan Yaya ninkichu?, nispa.

27 Amulektaq nirqan: Ari, kanmi cheqaq, kawsaqpiwan Yaya, nispa.

28 Kunantaq Zeezrom nirqan: Kanchu huk Yayamanta aswan?, nispa.

29 Paytaq kutichirqan: Manan, nispa.

30 Yapamantataq payta Zeezrom nirqan: Imaynatataq kaykunamantari yachanki, nispa.

31 Amulektaq nirqan: Huk angelmi kaykunata yachachiwarqan, nispa.

32 Yapamantataq Zeezrom nirqan: Pin hamuq kanqa? Yayaq Churinchu, nispa.

33 Paytaq payta nirqan: Ari, nispa.

34 Zeezromtaq yapamanta nirqan: Huchankupichu runakunata qespichinqa, nispa. Amulektaq kutichispa nirqan: Manan nisaykin. Mananpunin Pay atinmanchu, rimayninkuna mananchayta, nispa.

35 Kunantaq runakunata Zeezrom nirqan: Kaykunata yuyariychis, huk Yayallan kan nispa nisqanta; ichaqa nirqanmi, Yayaq Churinmi hamunqa, manataqmi llaqtanta qespichinqachu, nispa; Yaya kamachinanpaq atiyniyoqpas kanman hina, nispa.

36 Yapamantataq payta Amulek nirqan: llullakurqankin, Yayata kamachinanpaq atiyniyoqpas kanman hinan rimarqan, nispan nirqanki—manan runakunata huchankunapiqa Yaya qespichinqachu, nispa nisqayrayku.

37 Yapamantataq qanta nisqayki: Manan huchankunapi runakunata qespichiyta atinmanchu, manan rimayninkunata mananchayta atiymanchu. Nirqantaqmi Pay, mana ima qhellipas hanaqpacha qhapaq-suyuta chaskiy atinanta. Chhaynari, imaynatan qespichisqa kawaq, hanaqpacha qhapaq-suyuta mana chaskispayki? Chhaynaqa, manan huchaykikunapi qespichisqa kayta atiwaqchu, nispa.

38 Kunantaq yapamanta payta Zeezrom nirqan: Kikin Wiñay Taytachu Yayaq Churin, nispa.

39 Amulektaq payta nirqan: Ari, Paymi hanaqpachaq, kay pachaq, kaykunapi kaq imaymanakunaq ima kikin Wiñay Taytan. Paymi qallariy tukukuypiwan ñawpaq kaq qhepa kaqpiwan.

40 Paytaq kay hallp’aman hamunqa, llaqtan kutichikapuq; sutinpi iñeqkunaq huchankunatataq Paypi apanqa; kaykunataqmi wiñay kawsayniyoq kanqaku, manataqmi pimanpas qespiyqa hamunqachu.

41 Chhaynataq huchasapakunaqa qhepanku manapas qespichiy kanmachu karqan hina; ichaqa, wañuypa watayninkuna kacharisqalla. Hamunshanmi pacha llapan runakuna wañusqakunamanta hatarispa Yayaq ñawpaqenpi sayanankupaq, ruwasqankuman hina taripasqa kanankupaq.

42 Kunanqa, kanmi huk wañuy, mana-wiñaypaq wañuy sutiyoq, Jesucristoq wañuynintaq kay mana-wiñaypaq wañuypa chaqnankunata pashkanqa, kay mana-wiñaypaq wañuymanta llapan runakuna hatarichisqa kanankupaq.

43 Nunataq runa-kurkunpiwan yapamanta huñunakunqaku hunt’asqa kikinpi; sapanka chaki-makikuna moqonkunapiwan imayna kanankuman hina yapamanta sayarichisqa kanqaku, kunan kasqanchista hinapuni; Yayaq ñawpaqenpi sayananchispaq apamusqataq kasun, kunanchu yachanchis chhaynata yachaspa, llapa huchanchiskunamanta ch’uyapuni yuyariyniyoq kaspa.

44 Kay yapamanta sayarichiyqa llapamanmi hamunqa, machumanpas waynamanpas, qespimanpas hark’asqamanpas, qharimanpas warmimanpas, millay ruwaqkunamanpas chaninkunamanpas. Manataqmi huk chukchallapas umankumanta chinkanqachu, ichaqa llapanmi kunan kasqanman hina kikillanman utaq runa-kurkuman hunt’asqapuni yapamanta churasqa kanqa. Churi Cristoq, Tayta Yayaq, Qollanan Nunaqpiwan—paykunataq huk wiñay Yayalla kanku—ñawpaqenkumantaq apamusqa kanqaku, ruwasqankuman hina taripasqa kanankupaq, allinña utaq mana allinña ruwayninku karqan chaypas.

45 Wañuq runa-kurkuq wañuyninmanta, wañuq runa-kurkuq kawsariyninmanta iman rimarirqayki. Nisaykitaq—kay wañuq runa-kurkuqa, mana wañuq runa-kurkumanmi hatarichisqa kanqa, wañuqmanta, ñawpaq kaq wañuymantapuni kawsariyman, manaña wañuy atinankupaq; nunankuna runa-kurkunkuman huñunakuspanku manaña hayk’aqpas t’aqasqa kanankupaq. Khaynataq kay llapan nunapi-kay, mana wañuqpiwan wakipun, mana astawan waqlliyta rikuy atinankupaq.

46 Kay rimaykunata Amulek tukuqtintaq, yapamanta runakuna utirayayta qallarirqanku, Zeezrompas khatatataytan qallarirqan. Khaynatataq Amulekpa rimayninkuna tukukurqan, utaq kayllatan qelqarqani.