1 Hinataq, rispanku Yayaq siminta runakunaman yachachiyta qallarirqanku, sinagogankunaman wasinkunamanwan haykuspanku; ari, k’ikllukunapipas yachachirqankun simita.

2 Hinataq, paykunapurapi ancha askha llank’ay pataman, wakcha runakuna purapi usachikuyniyoq kayta qallarirqanku. Kay wakcha runakunaqa, sinagogakunamanta qarqosqan karqanku wakcha p’achankurayku.

3 Chhaynataq, Yaya yupaychanankupaq sinagogakunaman haykunankumanta hark’asqa karqanku, qhelli runakuna hina qhawasqa kaspanku. Chhaynataq wakcha karqanku; ari, q’opa hinan wawqenkunaq rikusqan karqanku, kay pachaq imaymanankunaman hinataq wakcha karqanku; sonqonkupipas wakchan karqanku.

4 Kunantaq, Onidah orqopi runakunaman Alma yachachishaqtin, kay pachaq imaymanankunaman hina wakcha kasqankurayku sonqonkupi wakcha rimasqanchis runakunamanta, ancha askha runakuna payman hamurqanku.

5 Paykunataq Almaman hamurqanku; paykuna umachaqtaq Almata nirqan: Imatan kay wawqeykuna ruwanqaku, wakcha kasqankuraykun llapan runakunaq cheqnisqan kanku; ari, kurakniykuq cheqnisqan astawanqa. Sinagoga ruwanaykupaq kikin makiykuwan anchatapuni llank’asqayku sinagogaykunamantan paykuna qarqowarqanku, ancha wakcha kasqaykuraykutaqmi qarqowarqanku; manan maypi Yayayku yupaychanaykupaq kanchu; imatan ruwasaqku, nispa.

6 Kayta uyarispataq payman hina Alma kutirirqan, ancha kusikuywantaq payta qhawarqan; ñak’ariyninku paykunata cheqaqtapuni llanp’u sonqota wakichisqanta, Yayaq rimayninta uyarinankupaq hina kasqankutawantaq rikurqan.

7 Chhaynataq, manaña imatapas hukkaq runakunaman nirqanchu, ichaqa, makinta chutarispa cheqaqtapuni yuyayninkuman kutirimuq qhawasqan runakunata khaynata nirqan:

8 Rikunin llanp’u sonqo kasqaykichista, chhayna kaqtinqa, saminchasqan kankichis.

9 Imatan ruwasaqku—sinagogaykunamanta qarqosqan kayku, manataqmi Yayayku yupaychayta atiykuchu—nispan wawqeykichis nirqan.

10 Kaytan nisaykichis: Sinagogallaykichispi Yayata yupaychaytachu yuyankichis?

11 Astawanraqtaq tapuykichisman: Semanapi huk kutillata Yayata yupaychanaykichistachu yuyankichis?

12 Nisaykichistaq—allinmi sinagogaykichismanta qarqosqa kasqaykichis llanp’u sonqo kanaykichispaq, yachaysapa kayta yachanaykichispaqwan. Nesitakunmi yachaysapa kayta yachanaykichis; qarqosqa kasqaykichisraykun wawqeykichiskunaq cheqnisqan kankichis, ancha wakcha kasqaykichisrayku; chayraykutaqmi llanp’u sonqo kayman apamusqa karqankichis; chhayna nesitopin llanp’u sonqo kayman apamusqa kankichis.

13 Kunantaq saminchasqa kankichis llanp’u sonqo kayman tanqasqa kasqaykichisrayku. Mayninqa, llanp’u sonqo kayman tanqasqa kaspan runaqa yuyayman kutiriyta mashkan. Kunanqa, cheqaqtapuni yuyayman kutirimuqqa, khuyapakuytan tarinqa; khuyapakuyta tarispa tukukuykama takyaq runataq qespichisqa kanqa.

14 Kunantaq qankumanan, llanp’u sonqo kayman tanqasqa kasqaykichisraykun saminchasqa kankichis nispa nisqayrayku, manachu yuyankichis, Yayaq rimayninrayku cheqaqtapuni llanp’u sonqo wakiqkuna aswan saminchasqa kasqankuta?

15 Ari, cheqaqtapuni llanp’u sonqo wakispa huchankunamanta runa kutirimun, hinaspataq tukukuykama takyan chayqa, chay runan saminchasqa kanqa; ari, ancha wakcha kasqankurayku, llanp’u sonqo kayman tanqasqa kaqkumanta aswan saminchasqa.

16 Chhaynaqa, saminchasqan kanku, llanp’u sonqo kayman mana tanqasqa kaspa sonqonkupi llanp’uyaqkuna. Hukniraq rimaypiqa, saminchasqan Yayaq rimariyninpi kreyispa sonqonta mana k’ulluyachispa unuchasqa kaqqa; ari, rimay yachananpaq mana apamusqa kaspa, manaraq kreyishaspanku chay yachayman mana tanqasqakuna.

17 Ari, askhan kan kay niqkuna: Hanaqpachamanta huk señalta qhawachiwankiku chayqa, chaymi cheqaqtapuni yachasaqku; chaymi kreyisaqku, nispa.

18 Kunantaq tapuni: Iñiychu kay? Manan nisaykichismi. Hukta runa yachanqa chayqa, manan kreyinanpaq rason kanchu, yachanñataq chayta chayqa.

19 Kunanri, hayk’a aswan ñakasqaraqmi Yayaq munayninta yachaspa chayta mana ruwaq runa iñeqlla runamanta, utaq iñinanpaq rasonniyoq kaspalla huchallikuypi urmaq runamanta?

20 Kaytaqa qankunan taripanaykichis. Nisaykichistaq—huk makipin kan hukkaq makipi kasqan hina; sapanka runamantaq kanqa ruwayninkunaman hina.

21 Kunantaq iñiymanta rimarisqayman hina—iñiyqa, manan imaymanakunamanta hunt’asqa yachayniyoq kaychu; chhaynaqa, iñiyniyoq kankichis chayqa, cheqaq kaq mana rikusqa imaymanakunatan suyankichis.

22 Kunantaq nisaykichis, yuyarinaykichistataqmi munayman, sutinpi llapan kreyiqkunawan khuyapakuyniyoq Yaya kasqanta; chhaynaqa, ñawpaqtaqa Pay munan kreyinaykichistan; ari, rimayninkunapi.

23 Angelkunawanmi rimayninta runakunaman qon; ari, manan qharikunallamanchu, ichaqa, warmikunaman iman. Manan llapanchu kay, huch’uy erqechakunamanpas qosqan askha kuti rimaykuna kan, kaytaq hamawt’ata, yachayniyoqtawan tutayachin.

24 Kunantaq ancha munasqay wawqeykuna, qarqosa, ñak’arisqapiwan kasqaykichisrayku, ima ruwanaykichista noqamanta yachayta munasqaykichisman hina—manan qankuna taripanaypaq munasqaytachu yuyanaykichista munani, ichaqa, cheqaq kasqanman hinallan—

25 Manan, llapaykichismi k’umurikunaykichispaq tanqasqa karqankichis nispa ninaytachu nini; cheqaqtapunin kreyini imapiña kaspankupas llanp’u sonqo wakiy atiqkuna qankuna purapi huk runakuna kasqanta.

26 Kunanqa iñiymanta rimasqayta hina—Iñiy mana hunt’asqa yachay kasqanta—hinallataqmi rimayniykunawan. Qallariypiqa manan yachawaqchischu hunt’asqapuni cheqaq kasqanmantaqa, iñiychu mana hunt’asqa yachay chhaynata.

27 Ichaqa, rikch’arispa yuyayniykichista hatarichinkichis chayqa, rimayniykunata prubanaykichiskamapuni, huk chikan iñiytataq llank’achiwaqchis chayqa, ari, kreyiyllataña munawaqchis chaypas, kay munayta qankunapi llank’ananta saqeychis, huk chikanta rimayniykunamanta qankunapi maypi kananpaq qonaykichispaq kreyinaykichiskama.

28 Kunanqa, muhuman Yayaq rimayninta tupachisun. Sonqoykichispi muhu tarpukunanta kacharinkichis chayqa, cheqaq muhu utaq allin muhu kanqa chayqa, manataq mana kreyiyniykichiswan qarqonkichischu Wiraqochaq Nunanwan tupapakunaykichispaq chayqa, sonqoykichis ukhupin wiñayta qallarinqa. Kay wiñayta rikuyta qallarispataq qankuna ukhupi kay niyta qallarinkichis—kay muhuqa cheqaqtapunin allin muhu utaq kay simiqa allin simin, nunaytan hatunyachiyta qallarin; ari, yuyayniytan k’anchariyta qallarin, ari, noqapaq ancha sumaq kaytan qallarin, nispa.

29 Kunanri, manachu kay iñiyniykichista hatunyachinman? Ari nisaykichismi; chaypiwanpas manan hunt’asqa yachaymanchu wiñarqan.

30 Ichaqa, muhu punkirisqanman hina, ch’ichirisqanman hina, wiñaytawan qallariqtintaq, allin muhun kay nispan ninaykichis; punkirintaq, ch’ichirintaq, wiñaytawantaq qallarin.

31 Kunanri, sut’inpunichu kashankichis allin muhu kay kasqanmanta? Ari nisaykichismi, rikch’ayninman hinan sapanka muhu qon.

32 Chhaynaqa, muhu wiñan chayqa, allin muhun; mana wiñanchu chaytaq, mana allin muhuchu, chhayna kaqtintaq wikch’usqa kapun.

33 Kunanqa, khaynatataq ruwarqankichis, tarpurqankichistaq muhuta, ch’ichirispataq wiñayta qallarirqan chayqa, yachankichismi chay muhu allin kasqanta.

34 Kunanri, hunt’asqachu yachayniykichis? Ari, hunt’asqan chaypi yachayniykichis, iñiyniykichistaq puñun; yachasqaykichisraykutaqmi kay, yachankichistaqmi nunaykichista Yayaq rimaynin punkirichisqanta, yachallankichistaqmi ch’ichirisqanta, hamut’ayniykichistaq k’ancharisqa kayta qallarisqanta, yuyayniykichistaq wiñayta qallarin.

35 Chhaynari, manachu cheqaq kay? Ari nisaykichismi, k’anchay kasqanrayku; imaña k’anchay kan chayqa, allinmi, atikuntaq reqsiyta chayqa; chhaynaqa, yachanaykichismi allin kasqanta. Kunanri, kay k’anchayta mallisqaykichis pataman, hunt’asqachu yachayniykichis?

36 Manan nisaykichismi, manataqmi iñiyniykichista huk qayllamanchu churanaykichis. Iñiyniykichisllatan llank’achirqankichis, muhuta tarpuspa allinchus muhu chayta yachanaykichispaq.

37 Sach’a wiñayta qallarisqanman hinataq ninkichis: Haku, ancha hatun llank’aywan hallmasun saphichakuspa wiñananpaq, ruruta qowananchispaq, nispa. Ancha hatun afanwan hallmankichis chayqa, saphichakunqan wiñanqataq rurutataq qonqa.

38 Ichaqa, sach’ata qonqankichis, manataq chay kallpachayta yuyankichischu chayqa, manan saphichakunqachu; intiq q’oñiynin hamuspa ruphaqtintaq, mana saphiyoq kaqtin naq’enqa, t’iraspataq wikch’upunkichis.

39 Kayqa, manan muhu mana allin kaqtichu, nitaq chaypa rurun mana munana kaqtinchu; ichaqa, hallp’aykichis wakcha kaqtinmi, sach’ata kallpachayta mana munasqaykichisraykupiwanmi; chhaynaqa, manan chay sach’aq rurun qankunapaq kanmachu.

40 Chhaynan, Yayaq rimayninta mana kallpachankichischu, iñiy ñawiwan rurunta suyaspa chayqa, manan hayk’aqpas kawsay sach’aq rurunta horqowaqchischu.

41 Yayaq rimayninta kallpachankichis chayqa, ari, wiñayta qallariqtin, sach’atataq kallpachankichis wiñayta qallariqtin, iñiyniykichiswan ancha hatun k’uchi kaywan, sonqo ñit’iykukuywan chaypa rurunta suyaspa chayqa, saphichakunqan; wiñay-wiñay kawsayman wiñariq sach’ataq kanqa.

42 Yayaq rimayninta qankunapi saphichakunanpaq kallpachakusqaykichisrayku, k’uchi kayniykichisrayku, iñiyniykichisrayku, sonqo ñit’iykukuyniykichisrayku iman chaypa rurunta horqonkichis; chay rurutaq aswan sumaq, llapan mishk’i kasqanmanta aswan mishk’i, llapan yuraq kaqmanta aswan yuraq, llapan ch’uya kaqmanta aswan ch’uya. Kay rurumantataq mikhunkichis hunt’akunaykikchiskama, mana yarqayniyoq ni ch’akiyniyoq kanaykichispaq.

43 Chaymi wawqeykuna, qankunaman ruruta apamunanpaq sach’ata suyaspaykichis, iñiyniykichispa, k’uchi kasqaykichispa, sonqo ñit’iykukuyniykichispa ima rurunta pallankichis.