Ri Vuj richin ri Alma
Ri Rucʼajol ri Alma

1 Xcʼulvachitej cʼa chi ri Alma xuchop rutzijoxic ri ruchʼabel ri Dios chique ri vinakiʼ. Nabey xutzijoj pa ri ruvachʼulef Zarajemla. Cʼa cʼariʼ, xutzijoj chupan chijun ri ruvachʼulef riʼ.

2 Jareʼ cʼa ri chʼabel ri xerutzijoj chique ri vinakiʼ ri e cʼo chupan ri kʼataj ri cʼo pa ri tinamit Zarajemla. Ja cʼareʼ ri chʼabel ri e tzʼiban can pa ri retal banobel ri xutzʼibaj rijaʼ. Xubij cʼa quereʼ:

3 Yin Alma xiturusex roma ri nataʼ Alma, richin xinoc jun Tataʼal Teuchunel pa ruviʼ ri rukʼataj ri Dios. Ri nataʼ rucʼuan ri ruchukʼaʼ, y ri rukʼatbel tzij ri Dios, richin chi xuben can queriʼ. Kitzij ninbij chive chi riqʼuin cʼa ri kʼatbel tzij riʼ, rijaʼ xutiquiribaʼ rupabaxic ri kʼataj pa ri cʼulbaʼt richin ri ruvachʼulef Nefi. Ri ruvachʼulef riʼ rubiniʼan ri ruvachʼulef richin ri Mormon. Ri nataʼ xerukasaj chuxeʼ yaʼ ri rachʼalal rijaʼ chiriʼ pa ri yaʼ rubiniʼan Mormon.

4 Can kitzij vi cʼa, ninbij chive chi rijeʼ xecolotej pa quikʼaʼ ri ruvinak ri Noé, ri rutataʼal ri tinamit, roma ri rujoyovabal y ri ruchukʼaʼ ri Dios.

5 Cʼa cʼariʼ, rijeʼ xechapatej can coma ri Lamaniʼ, chiriʼ pa ri tolan ruvachʼulef. Ninbij cʼa chive chi rijeʼ can e tzʼapel vi can. Jariʼ tok ri Ajaf xeroskʼopij roma ri ruchukʼaʼ richin ri ruchʼabel rijaʼ. Cʼa cʼariʼ, xojcʼamer pe pa re ruvachʼulef reʼ. Vaveʼ cʼa, xkatiquiribaʼ rupabaxic ri rukʼataj ri Dios, chupan re ruvachʼulef reʼ chukaʼ.

6 Vacami, can kitzij vi chi yichʼo iviqʼuin rix, ri ix vachʼalal, ri ix cʼo chupan re kʼataj reʼ. ¿La nokaʼ cʼa utz chiʼicʼuʼx rix chi xetzʼapitej can ri iteʼ itataʼ? ¿La nokaʼ cʼa chiʼicʼuʼx chi utzil chi ri Ajaf xujoyovaj quivech, y man chaʼnin ta xoyover quiqʼuin? Y chukaʼ, ¿la nokaʼ cʼa chiʼicʼuʼx chi rijaʼ e rucolon pe rijeʼ, chuvech ri xibalbay?

7 Can kitzij vi chi ri Ajaf xujel ri cánima. Xerucʼasoj pe pa jun nimalej varan, y rijeʼ xquichop runimaxic ri Dios. Xecʼojeʼ cʼa pa kʼekuʼm. Man riqʼuin vi riʼ, xesakirisex ri quicʼaslemal roma ri sakil richin ri jumul ruchʼabel rijaʼ. Rijeʼ xesutix coma ri ximibel richin ri camic, y ri ximibel richin ri xibalbay, y ri jumul vulatajic can xeroyobej vi.

8 Nincʼutuj cʼa chive vachʼalal: ¿La xevulatej cami rijeʼ? Can kitzij vi ninbij chive chi mani.

9 Chukaʼ nincʼutuj cʼa chive quereʼ: ¿La xekʼajtej ri ximibel richin ri camic? ¿La xesolcopitej cʼa ri ximibel richin ri xibalbay, ri ximiyon quichin? Ninbij cʼa chive quereʼ: Jaʼ, can xesolcopitej vi, y xnimer cʼa ri quicʼaslemal. Cʼa cʼariʼ, xebixan roma ri rajovabal ri yerelesaj pe. Ninbij cʼa chive chi rijeʼ e colon chic.

10 Vacami nincʼutuj chive quereʼ: ¿Achique cʼa banel tok xecolotej rijeʼ? ¿Achique cʼa banel tok xcoyobej pa cánima chi xecolotej? ¿Achique cami banel tok xesolcopitej pe chupan ri ximibel richin ri camic, y chukaʼ chupan ri ximibel richin ri xibalbay?

11 Kitzij cʼa chi yitiquir ninbij chive: ¿La man xunimaj ta cʼa ri nataʼ ri ruchʼabel ri Abinadi? ¿La man ja ta ri Abinadi riʼ jun chʼajchʼojilej yaʼol lokʼolej rutzijol? ¿La man xerutzijoj ta cʼa ri ruchʼabel ri Dios, y jariʼ ri xerunimaj ri nataʼ Alma?

12 Roma ri rucukubabel cʼuʼx rijaʼ, ri ránima janíla xjalatej. Vacami cʼa, ninbij chive chi ronojel reʼ, can kitzij vi.

13 Cʼa cʼariʼ, tok rijaʼ xutzijoj ri chʼabel chique ri iteʼ itataʼ, can janíla vi xejalatej ri cánima rijeʼ chukaʼ. Cʼariʼ, rijeʼ xquichʼutinirisaj quiʼ, y xquicukubaʼ quiʼ riqʼuin ri kitzij y cʼaslic Dios. Cʼa cʼariʼ, rijeʼ xquitij quikʼij, cʼa pa ruqʼuisibel. Roma cʼariʼ tok can xecolotej vi.

14 Vacami cʼa, quereʼ nincʼutuj chive rix ri ix vachʼalal chupan ri kʼataj: ¿La ix alaxinek chic pan uxlabel riqʼuin ri Dios? ¿La yixvachin cami rix, achiʼel cʼa ri ruvachibal rijaʼ? ¿La can icʼulvachin vi re nimalej jalatajic reʼ pan ivánima?

15 ¿La can nicukubaʼ vi icʼuʼx riqʼuin ri colotajic ri nuben ri tzʼucuyon ivichin? ¿La yixtzuʼun apon riqʼuin icukubabel cʼuʼx, y nitzʼet chi re camel chʼaculaj reʼ xtoc man camel ta chic, y re kʼeyitajic reʼ man xtikʼey ta chic? ¿La nitzʼet cʼa chi roma ronojel reʼ, cʼo chi xkojapon chuvech ri Dios, richin queriʼ, rijaʼ nukʼet tzij pa kaviʼ chirij ri samaj kabanon riqʼuin re camel chʼaculaj reʼ?

16 Nincʼutuj cʼa chive quereʼ: ¿La yixtiquir nichʼob pa ri inojibal chi chupan ri kʼij riʼ, can xtivacʼaxaj vi ri ruchʼabel ri Ajaf ri quereʼ xtubij chive? Quixámpe cʼa viqʼuin. Nim ruva ikʼij, roma cʼa ri isamaj chuvech re ruvachʼulef can e choj vi.

17 ¿La nichʼob pa ri inojibal rix, chi cʼa xquixtiquir na xtitzʼuc tzij chire ri Ajaf chupan ri kʼij riʼ, y xtibij quereʼ? Kajaf, can e choj vi ri samaj ri kabanon chuvech re ruvachʼulef. ¿La nichʼob cʼa chi vi xa xtibij queriʼ, rijaʼ cʼa xquixrucol na?

18 O ¿la yixtiquir nichʼob pa ri inojibal chi yixucʼuex chuvech ri rucʼojlibal ri Dios, y can nojinek vi ri ivánima riqʼuin mac, y can yixbison vi? Y ronojel reʼ, xaxe roma nokaʼ cʼa chiʼicʼuʼx ronojel ri imac, y can tzʼaket vi nokaʼ cʼa chiʼicʼuʼx ronojel ri itzel ibanon can. Nokaʼ cʼa chiʼicʼuʼx chi ixilkʼotin ronojel ri rupixaʼ ri Dios.

19 Nincʼutuj cʼa chive quereʼ: Chupan ri kʼij riʼ, ¿la xquixtiquir xtitzuʼ cʼa ri Dios, riqʼuin ri ivánima chʼajchʼoj, y ri ikʼaʼ man tzʼil ta chic? Nincʼutuj cʼa chive quereʼ: ¿La yixtiquir yixtzuʼun akʼanij, riqʼuin ri ruvachibal ri Dios jiquiban chic riqʼuin ri ivachibal rix?

20 Chukaʼ nincʼutuj chive quereʼ: ¿La yixtiquir ninojij chi can xquixcolotej vi tok ijachon chic iviʼ pa rukʼaʼ ri itzel vinek?

21 Ninbij cʼa chive chi chupan ri kʼij riʼ, can xtivetamaj vi chi man xquixcolotej ta chic. Roma can man vi jun vinek xticolotej, vi man chʼajchʼojirisan ta chi utzil ri rutziak. Can cʼo vi chi ri rutziak nichʼajchʼojirisex, y nichʼaj el ronojel ri rutzʼilol. Jareʼ nibanatej roma ri ruquiqʼuel ri jun, ri xquibij ri katiʼt kamamaʼ chi xtipe cʼa chiquelesaxic pe ri ruvinak chupan ri quimac.

22 Vacami vachʼalal, nincʼutuj cʼa chive quereʼ: ¿Achique cʼa xtinaʼ, vi yixpaʼeʼ chuvech ri rucʼojlibal ri Dios, y can tzʼil vi ri itziak riqʼuin quiqʼuel, y riqʼuin ronojel chic ruvech tzʼilol? ¿Achique cami cʼa xtujiquibaʼ ronojel reʼ chivij rix?

23 ¿La man ta cʼa xtujiquibaʼ chi rix ix camisanelaʼ, y chi can niben vi ronojel ruvech etzelal?

24 Vachʼalal, ¿la ninojij chi jun ri quereʼ rubanon xtiyaʼox rukʼij richin nitzʼuyeʼ cʼa pa ri rajavaren ri Dios, quiqʼuin ri Abrahám, ri Isaac y ri Jacob, y conojel ri chʼajchʼojilej e yaʼol tak lokʼolej rutzijol? Ri quitziak rijeʼ can e chʼajon vi chic, y man e tzʼil ta chic, xa e chʼajchʼoj y e sek.

25 Ninbij cʼa chive chi mani. Xaxe cʼa vi nibij chi ri Katzʼucunel xa jun tzʼucuy tzij pa rutiquiribel pe, o vi ninojij chi rijaʼ jun tzʼucuy tzij pa rutiquiribel pe. Roma can manek vi banel richin chi rix ninojij chi jun ri queriʼ nuben xticʼojeʼ na jun rucʼojlibal chupan ri rajavaren ri caj. Rijeʼ can xaxe vi xqueʼelesex el roma xa e ralcʼual ri rajavaren ri itzel vinek.

26 Vacami vachʼalal, quereʼ ninbij chive: Vi inaʼon can jun jalatajic pan ivánima, y vi irayin can richin yixbixan chirij ri colonel rajovabal ri Cristo, nincʼutuj cʼa chive, ¿la yixtiquir ninaʼ quereʼ vacami?

27 ¿La can chʼajchʼoj vi ix biyirinek chuvech ri Dios? Vi ta yixoyox vacami yan richin yixcom, ¿la yixtiquir ta cʼa nibij pan ivánima chi can chʼuchʼuj vi ri icʼuʼx? Y chukaʼ, ¿la yixtiquir cami nibij chi ri itziak chʼajon chic, y sakirisan chic roma ri ruquiqʼuel ri Cristo ri xtipe chiquelesaxic ri ruvinak chupan ri quimac?

28 ¿La can man ta cʼa chic cami ninimirisaj iviʼ? Ninbij chive chi vi cʼa ninimirisaj na iviʼ, can manjani ta quixchojmirisex richin nitzʼet ri Dios. Xa cʼo cʼa chi nichojmirisaj iviʼ chaʼnin. Roma cʼa ri rajavaren ri caj man nej ta chic cʼo vi chikavech apon. Y vi cʼa cʼo na jun ri nunimirisaj riʼ, xa man xticʼojeʼ ta cʼa ri rucʼaslen jumul.

29 Vaveʼ cʼa, quereʼ nincʼutuj chive: ¿La cʼo jun chiʼicojol ri cʼa nixochʼin na pa ránima? Ninbij cʼa chi rijaʼ manjani tichojmirisex. Ninvajoʼ cʼa chi nuchojmirisaj apon riʼ chaʼnin. Roma ri kʼij can nakaj chic cʼo vi, y rijaʼ man retaman ta jampeʼ xtipe, y cʼa cʼo na ri rumac.

30 Quereʼ cʼa chukaʼ nincʼutuj chive: ¿La cʼo jun chiʼicojol ri nutziʼej ri rachʼalal, o nrokotaj el?

31 ¡Joʼoc ruvech ri queriʼ nibanon, roma man chojmirisan ta rijaʼ! ¡Ninakajub cʼa pe ri kʼij tok cʼo chi nitzolin pe rucʼuʼx o man xticolotej ta!

32 ¡Joʼoc ivech ivonojel ri yixbanon richin ri itzel! ¡Titzolin cʼa pe icʼuʼx, titzolin cʼa pe icʼuʼx, roma jacʼa ri Ajaf Dios ri biyon!

33 Can kitzij vi chi rijaʼ yeroyoj pe conojel ri vinakiʼ. Ri rukʼaʼ richin ri joyovabel e ruyukun pe chic chique rijeʼ, y quereʼ nubij: Titzolin cʼa pe icʼuʼx y can xquixincʼul vi.

34 Quereʼ cʼa nubij: Quixámpe cʼa viqʼuin, y titijaʼ ri ruvech ri cheʼ richin cʼaslen. Can xquixvaʼ vi y xquixuqʼuiyaʼ riqʼuin ri caxlan vey y ri yaʼ richin ri cʼaslen, y manjun xtikʼaton ivichin.

35 Quixámpe cʼa viqʼuin, y queʼibanaʼ samaj ri can e choj vi. Cʼa cʼariʼ, man xquixchoy ta ka, y man xquixtorix ta ka pa kʼakʼ.

36 Can kitzij vi cʼa chi ninakajub cʼa pe ri kʼij. Ri nibanon cʼa richin ri man utz ta, y ri man nibanon ta ri choj, can cʼo vi chi niquirek quichiʼ y yeʼokʼ.

37 Ja rix ri ix banayon ri itzel. Can inimirisan iviʼ riqʼuin achique ri aj re ruvachʼulef ri manek ricʼaʼtz. Ibin can chi ivetaman ruvech ri chojmilej tak bey. Man riqʼuin vi cʼariʼ, ix elenek chupan ri bey riʼ achiʼel ri carneʼl ri manek quiyukʼunel. Vave cʼa, cʼo jun yukʼunel ri ix royon pe. Rijaʼ cʼa yixroyoj na vacami, ¡y xa man ninimaj ta ri ruchʼabel!

38 Kitzij cʼa, ninbij chive chi ri utzilej yukʼunel yixroyoj. Já, can riqʼuin vi ri rubiʼ rijaʼ yixroyoj pe, y ja ri Cristo rubiʼ rijaʼ. Vi man ninimaj ta ri ruchʼabel ri utzilej yukʼunel, y ri biʼaj achojiqʼuin ix oyon vi, ja cʼariʼ tok rix man ix carneʼl ta nichin ri utzilej yukʼunel.

39 Vi rix man ix carneʼl ta richin ri utzilej yukʼunel, ¿ix aj achique cami cʼa kʼataj rix? Can ninbij vi chive chi ri itzel vinek, ja rijaʼ ri iyukʼunel, y rix ix aj rukʼataj rijaʼ. Vacami cʼa, ¿achique nitiquir nubij chi man que ta reʼ? Can kitzij vi ninbij chive chi ri nibin chi man que ta reʼ xa nutzʼuc tzij, y noc jun ralcʼual ri itzel vinek.

40 Ninbij cʼa chive chi ronojel ri utz nel pe riqʼuin ri Dios. Ronojel itzel nel cʼa pe riqʼuin ri itzel vinek.

41 Roma cʼariʼ, vi jun achin nuben ri utz, can nunimaj vi ri ruchʼabel ri utzilej yukʼunel. Chukaʼ, nutzekelbej rijaʼ. Jacʼa ri nibanon richin ri itzel, can noc vi jun ralcʼual ri itzel vinek. Jariʼ roma nunimaj ri ruchʼabel rijaʼ, y can nutzekelbej vi.

42 Ri nibanon quereʼ, cʼo chi nucʼul ri rutojbal riqʼuin ri itzel vinek riʼ. Roma cʼariʼ, ri rutojbal rijaʼ, xa ja ri rucamic chupan ruchojmilal, roma rijaʼ can caminek vi chuvech ronojel utzilej tak samaj.

43 Vacami vachʼalal, ninvajoʼ chi rix yinivacʼaxaj ta cʼa roma yichʼo riqʼuin ri ruchukʼaʼ ri vánima. Can kitzij vi chi choj in chʼovinek iviqʼuin, richin queriʼ, man ta cʼa nisach icʼuʼx. In chʼovinek cʼa, achiʼel ri nubij ri rupixaʼ ri Dios.

44 Yin in takon pe richin yichʼo quereʼ, achiʼel cʼa ri lokʼolej ruchojmilal ri Dios, ri cʼo riqʼuin ri Cristo Jesús. Jaʼ, in takon cʼa pe richin yipaʼeʼ chiquivech re vinakul reʼ, y ninjiquibaʼ chiquivech rijeʼ achique xquitzijoj ri ojer tak katataʼ chiquij ri xquecʼulvachitej apon.

45 Man xaxe ta cʼa reʼ. ¿La ninojij chi xinvetamaj ronojel reʼ pa nuyonil? Can ninjiquibaʼ vi chivech rix chi yin vetaman chi ronojel ri nubin can chive can e kitzij vi. ¿Achique cami ninojij rix chi xinben yin richin xinvetamaj chi can e kitzij vi?

46 Can kitzij vi ninbij chive chi ri Lokʼolej Ruxlabal ri Dios yerukʼalajirisaj ronojel reʼ chinuvech. Yin in mevayinek, y in chʼovinek akʼanij riqʼuin ri Dios e qʼuiy kʼij richin ninabej ronojel reʼ. Vacami cʼa, yin vetaman chic chi can e kitzij vi. Ri Ajaf Dios e rukʼalajirisan pe chinuvech riqʼuin ri Lokʼolej Ruxlabal. Ja cʼareʼ, ri uxlabel richin kʼalajirisanic ri cʼo viqʼuin.

47 Chukaʼ ninbij chive chi can que vi reʼ, xkʼalajirisex can chinuvech, chi ri chʼabel ri xquibilaʼ ri ojer tak katataʼ, can e kitzij vi. Jariʼ xkʼalajirisex riqʼuin ri uxlabel richin ruyaʼic lokʼolej rutzijol ri cʼo viqʼuin. Jareʼ, chukaʼ nikʼalajirisex roma ri Ruxlabal ri Dios.

48 Ninbij cʼa chive chi yin vetaman chic chi can kitzij vi ronojel ri xtinbij chive chirij ri xticʼulvachitej apon. Ninbij cʼa chive chi yin vetaman chi ri Jesucristo xtipe. Ja rijaʼ ri Cʼajolaxel, ri Junayon richin ri Tataʼixel. Rijaʼ nojinek riqʼuin utzil, y joyovabel, y kitzij. Can kitzij vi chi ja rijaʼ ri xtipe richin yerelesaj el ri quimac ri vinakiʼ ri e cʼo chuvachʼulef. Xquerelesaj cʼa ri quimac conojel ri vinakiʼ ri yeniman chi utzil ri rubiʼ.

49 Vacami cʼa, ninbij chive chi jareʼ ri rucʼojlen achojiqʼuin in takon vi pe. In takon cʼa richin ninchʼabalij chique ri vachʼalal ri e nucʼuʼxlan, y chique conojel ri yecʼaseʼ chupan re ruvachʼulef reʼ. Ninchʼabalij cʼa chique conojel vinakiʼ, ja ri e rijitek chic y ri cʼa e alcʼualaʼ na ri e tzʼapel y ri e solcopitajinek. Jaʼ, ninchʼabalij cʼa chique ri e rijitek chic, y ri e cʼajolaʼ, y ri alcʼualaʼ ri yenimer na. In takon cʼa richin can yenpixabaj vi richin titzolin pe quicʼuʼx, y queʼalex jun bey chic.

50 Quereʼ cʼa nubij ri Uxlabel: Titzolin pe icʼuʼx rix ivonojel ri ix cʼo chuvachʼulef. Roma cʼa, ri rajavaren ri caj xa nakaj chic cʼo vi apon. Ri Rucʼajol ri Dios can nipe vi riqʼuin ri rucʼojlemal, y ri ruchukʼaʼ, y ri runimirinen, y ri rutiquirinic, y ri rajavarisanen. Can kitzij vi, vachʼalal ri ix nucʼuʼxlan, chi ninbij chive chi quereʼ nubij ri Uxlabel: Can kitzij vi chi ri rucʼojlemal ri Tataʼal richin re ruvachʼulef y chukaʼ ri caj xa jubaʼ chic oc xtitzuʼun el chiquicojol ri calcʼual ri achiʼaʼ.

51 Chukaʼ ri Uxlabel can nichʼo vi pe viqʼuin, jaʼ, riqʼuin ri nimalej ruchʼabel y quereʼ nubij: Cabiyin apon y tabij quereʼ chique re vinakiʼ reʼ: Titzolin pe icʼuʼx, roma vi man nitzolin ta pe icʼuʼx, man xquixtiquir ta xtivichinaj ri rajavaren ri caj.

52 Chukaʼ ninbij chive chi quereʼ nubij ri Uxlabel: Can kitzij vi chi ri iquiej nutzuʼ chic apon ri ruxeʼ ri cheʼ. Queriʼ cʼa, ronojel cheʼ ri nuvachij ri man utz ta can xtichoy vi, y xtitorix cʼa pa ri kʼakʼ. Ri kʼakʼ riʼ man nichuputej ta, y man niqʼuis ta. Titzuʼ cʼa pe y tokaʼ cʼa chiʼicʼuʼx chi jacʼa ri Lokʼolaxel biyon can quereʼ.

53 Vacami cʼa vachʼalal, ri ix nucʼuʼxlan, ¿la yixtiquir nipabaʼ iviʼ chuvech re chʼabel reʼ? ¿La yixtiquir cʼa nixilkʼotij ronojel reʼ, y nipalibej ka ri Lokʼolaxel? ¿La yixtiquir ninimirisaj iviʼ chuvech rijaʼ, riqʼuin ri inimirisabel cʼuʼx? ¿La cʼa xticusaj na ri tziek ri jotol rajel, y xtijiquibaʼ icʼuʼx riqʼuin achique ri aj re ruvachʼulef ri manek ricʼaʼtz, y chukaʼ riqʼuin ri ibeyomal?

54 ¿La cʼa xtinojij na chi rix janíla ix utz chiquivech ri chʼakaʼ chic? ¿La cʼa xqueʼiyokʼ na ri ivachʼalal ri niquichʼutinirisaj quiʼ y yecʼaseʼ achiʼel cʼa ri lokʼolej rucʼojlen ri Dios? Rijeʼ e cʼamon vi pe pa re kʼataj reʼ, y e chʼajchʼojirisan roma ri Uxlabixel, xa roma queriʼ quibanon. Chukaʼ niquiben ri samaj ri nucʼut chi xtzolin yan pe quicʼuʼx.

55 ¿La cʼa xtiyaʼ na ivij chiquivech ri mebaʼiʼ y ri e cʼo ri nicʼatzin chique, y man xtiyaʼ ta chique jubaʼ ri cʼo iviqʼuin?

56 Pa ruqʼuisibel cʼa, yichʼo ka chive ivonojel rix, ri cʼa nibanalaʼ na ri etzelal. Ninbij cʼa chi ja rix ri xquixchoy ka, y xquixtorix cʼa pa kʼakʼ, vi man nitzolin ta pe icʼuʼx chaʼnin.

57 Vacami cʼa, yichʼo iviqʼuin rix ri nivajoʼ nitzekelbej ri chʼabel richin ri utzilej yukʼunel. Quixel cʼa pe quiqʼuin ri e itzel, y tichʼaraʼ cʼa iviʼ quiqʼuin. Man cʼa tinek ri quitzʼilol. Can kitzij vi chi ri quibiʼ rijeʼ xqueyojtej can. Riqʼuin cʼariʼ, ri quibiʼ ri e itzel man xqueʼajilex ta quiqʼuin ri quibiʼ ri e choj. Riqʼuin cʼariʼ, xtikʼajer ri ruchʼabel ri Dios ri quereʼ nubij: Ri quibiʼ ri e itzel man xtiquixol ta quiʼ quiqʼuin ri quibiʼ ri nuvinak.

58 Ri quibiʼ ri e choj xquetzʼibex chupan ri vuj richin ri cʼaslen, y xtiyaʼox cʼa chique rijeʼ jun ichinanic pa ri vajquikʼaʼ. Vacami, vachʼalal, ¿achique cami xtibij chirij re chʼabel reʼ? Ninbij cʼa chive chi vi yixchʼo chirij re chʼabel reʼ, xa manek rubanon. Roma ri ruchʼabel ri Dios cʼo chi xtikʼajer.

59 ¿Achique cʼa yukʼunel chiʼicojol rix ri cʼo e qʼuiy rucarneʼl y man cami yeruchajij ta, richin queriʼ ri utif man ta noc apon chupan rukʼataj carneʼl, richin yerutij? Y vi jun utif noc apon chupan ri rukʼataj carneʼl, ¿la man ta nrokotaj vi el? Jaʼ, y cʼarunaj, rijaʼ can xtucamisaj vi, vi nitiquir.

60 Vacami cʼa, ninbij chive chi ri utzilej yukʼunel yixroyoj. Vi ninimaj cʼa ri ruchʼabel, jariʼ tok rijaʼ can xquixruqʼuen vi pe pa rukʼataj rijaʼ, y can xquixoc vi rix ri rucarneʼl rijaʼ. Rijaʼ nubij chive chi man cʼa tiyaʼ kʼij richin jun camisanel utif noc chiʼicojol, richin queriʼ man ta cʼa xquixyojtej.

61 Vacami cʼa, yin Alma, nibij chive riqʼuin ri ruchʼabel ri biyon pe chuve, chi titijaʼ cʼa ikʼij, richin niben ri nubin can chive.

62 Yichʼo cʼa riqʼuin jun pixaʼ chique ri e cʼo chupan ri kʼataj. Chive rix, ri man ix cʼo ta chupan ri kʼataj, yichʼo cʼa richin yixinvoyoj pe. Quereʼ cʼa ninbij chive: Quixámpe cʼa, y titzolin pe icʼuʼx. Quixkasex cʼa chuxeʼ yaʼ, richin queriʼ, rix chukaʼ yixtiquir nitij ri ruvech ri cheʼ richin cʼaslen.