1 Vacami cʼa nucʼajol, ninnaʼ chi cʼa cʼo na ri janíla nachʼob rij, y xa man nikʼax ta chavech. Jariʼ chirij ri rukʼatoj tzij ri Dios tok rijaʼ nucʼajisaj ruvech ri aj mac. Roma navajoʼ nanojij chi xa man choj ta chi ri aj mac niyaʼox can pa kʼaxomal.

2 Vacami nucʼajol, can kitzij vi chi xtinkʼalajirisaj reʼ chavech. Roma can kitzij vi chi ri Ajaf Dios xerutek el ri nabey kateʼ katataʼ chupan ri cotzʼijbel rubiniʼan Edén richin queriʼ, xquisamajij ri ulef achojiqʼuin xebanatej vi. Jariʼ tok rijaʼ xrelesaj el ri achin, y xeruyaʼ lokʼolej tak chajinelaʼ pa ri relebal kʼij richin ri cotzʼijbel rubiniʼan Edén. Xuyaʼ chiriʼ chukaʼ jun kʼakʼilej tzaqʼuibel ri xupiscolilaʼ riʼ xabacuchi, richin queriʼ xquichajij ri cheʼ richin ri cʼaslen.

3 Nikatzʼet cʼa chi ri achin xoc junan jubaʼ riqʼuin ri Dios, roma retaman ruvech ri utz y ri itzel. Ri Ajaf Dios xeruyaʼ can ri lokʼolej tak chajinelaʼ, y ri kʼakʼilej tzaqʼuibel, richin quereʼ ri achin man xutij ta ri ruvech ri cheʼ richin ri cʼaslen. Jariʼ richin chi rijaʼ man xuyuk ta rukʼaʼ y xuchop ta ruvech ri cheʼ richin ri cʼaslen, y nutij, y nicʼaseʼ benek ruvech.

4 Quereʼ cʼa, nikatzʼet chi xyaʼox chire ri achin jun kʼij richin nitzolin pe rucʼuʼx. Jareʼ cʼa jun kʼij richin nitejtobex, y chukaʼ richin chi nitzolin pe rucʼuʼx, y nusamajij ri Dios.

5 Roma can kitzij vi, vi ta ri Adán xuyuk ri rukʼaʼ chaʼnim y xutij ta ri ruvech ri cheʼ richin ri cʼaslen, cʼariʼ rijaʼ xcʼaseʼ ta benek ruvech, achiʼel xubij can ri Dios, y manek ta kʼij richin nitzolin ta pe rucʼuʼx. Que ta riʼ, ri ruchʼabel ri Dios manek ta ricʼaʼtz, y ri nimalej nucʼun banel richin ri colotajic, xsachtej ta.

6 Vaveʼ cʼa, xa kʼijun cʼa chire ri achin richin nicom. Roma cʼariʼ, achiʼel rijeʼ e elesan el chuvech ri cheʼ richin ri cʼaslen, que cʼa chukaʼ riʼ, yeʼelesex el jumul chuvachʼulef. Ri achin xoc sachinel jumul. Jaʼ rijeʼ xeʼoc e tzakinek tak vinakiʼ.

7 Vacami cʼa, natzʼet chi romariʼ, ri nabey kateʼ katataʼ xeʼelesex el chuvech ri Ajaf riqʼuin ri quichʼacul, y chukaʼ ri cuxlabal. Quereʼ cʼa, nikatzʼet chi xeʼoc vinakiʼ ri niquietzekelbej ri quirayibal rijeʼ.

8 Can kitzij vi cʼa, man xajovex ta chi ri achin xchʼojix ta pe richin man ta nukʼaxaj re camic reʼ chuvachʼulef. Jariʼ, xa xuvulaj ta ri nimalej nucʼun banel richin ri quicoten.

9 Ri cʼaslemal can man vi jun bey nicom. Ri tzakinen xuqʼuen ka chique conojel ri vinakiʼ ri camic richin ri uxlabel, y chukaʼ ri camic richin ri chʼaculaj. Jareʼ nibecʼulun chi rijeʼ can e elesan vi el chuvech ri Ajaf. Xa roma cʼariʼ tok can cʼatzinel vi chi conojel vinakiʼ yechʼojix pe chuvech re camic reʼ richin ri uxlabel.

10 Rijeʼ xeʼoc e aj chʼaculaj, y e aj tiojil, y e aj etzelal, roma cʼa ri quibaniquil. Roma cʼariʼ, re cʼaslen reʼ richin tejtobenic xoc jun cʼalsen richin niquichojmirisaj quiʼ. Xoc cʼa jun cʼaslen richin chojmirisanic.

11 Vacami nucʼajol, tokaʼ cʼa chacʼuʼx chi vi ta man cʼo re nucʼun banel richin ri lokʼolej elesanic pa mac (vi ta nikayaʼ cʼa can chek queriʼ), cʼariʼ tok yecom rijeʼ, ri quicʼaslemal cʼo ta chi niquitij kʼaxomal. Jariʼ roma can e elesan vi chic el chuvech ri Ajaf.

12 Manek ta chic banel richin yechʼojix pe ri vinakiʼ chupan re tzakinen reʼ ri xuqʼuen ka ri vinek chire can rijaʼ, roma man xunimaj ta tzij.

13 Roma cʼariʼ, xa roma ri rusamaj ri kʼatoj tzij, manek chic banel richin nikʼajer ta ri nucʼun banel richin ri lokʼolej elesanic pa mac. Xaxe cʼa riqʼuin ri rubaniquil ri tzolibel cʼuʼx ri niquiben ri vinakiʼ chupan re cʼaslen reʼ richin tejtobenic. Roma vi ta manek ri tzolibel cʼuʼx, ri joyovabel manjun nitiquir ta nuben, xaxe vi nuvulaj ta ri rusamaj ri kʼatoj tzij. Y xa manek banel richin nivulatej ri rusamaj ri kʼatoj tzij. Vi ta cʼa queriʼ, ri Dios xa man ta cʼa Dios chic riʼ.

14 Quereʼ cʼa, nikatzʼet chi conojel ri vinakiʼ e tzakinek chic, y e chapon roma ri kʼatoj tzij. Jariʼ ri rukʼatoj tzij ri Dios ri xbanon ta chique chi yeʼelesex ta chic el riqʼuin ri Dios benek ruvech.

15 Vacami cʼa, ri nucʼun banel richin ri joyovabel, manek ta banel richin nibanatej, xaxe cʼa vi nibanatej ta jun rutojbalil mac. Roma cʼariʼ, tok can ja vi ri Dios, nitojon quichin ri quimac ri vinakiʼ ri e cʼo chuvachʼulef, richin queriʼ nuchojmirisaj cʼa ri nucʼun banel richin ri joyovabel. Riqʼuin cʼariʼ, xtucukirisaj ri nrajoʼ ri kʼatoj tzij. Riqʼuin cʼareʼ, ri Dios xtoc cʼa jun Dios tzʼaket, y choj, y joyovanel chukaʼ.

16 Vacami cʼa, manek banel richin niyaʼox ri tzolibel cʼuʼx chique ri vinakiʼ, xaxe cʼa vi nicʼojeʼ ta jun cʼasjisabel ri can jumul vi, achiʼel cʼa ri rucʼaslen ri cʼaslemal. Ri cʼajisabel riʼ can chʼaron vi riqʼuin ri nucʼun banel richin ri quicoten. Jariʼ can jumul vi chukaʼ achiʼel ri rucʼaslen ri cʼaslemal.

17 Vacami cʼa, ¿achique cʼa banel richin chi jun vinek nitzolin pe rucʼuʼx, vi xa man ta xmacun? Y ¿achique cami banel nimacun, vi xa manek ta ri pixaʼ? Y ¿achique cami banel richin nicʼojeʼ jun pixaʼ, vi xa manek ta ri cʼajisabel?

18 Vave cʼa can xjiquibex vi jun cʼajisabel, y xyaʼox cʼa jun choj pixaʼ ri xuqʼuen pe bis chique ri vinakiʼ pa ri quinabelbal.

19 Vi man ta yaʼon cʼa jun pixaʼ ri nubij chi vi jun achin nicamisan, cʼo cʼa chi rijaʼ nicamisex chukaʼ, ¿la xtuxibij ta cami riʼ richin xticom, vi rijaʼ xticamisan?

20 Chukaʼ, vi man ta yaʼon jun pixaʼ chirij ri mac, ri vinakiʼ man ta cʼa cami niquixibij quiʼ richin yemacun.

21 Vi manek ta pixaʼ yaʼon can, vi jun achin xmacun ta, ¿achique cami nitiquir ta nuben ri kʼatoj tzij, o chuckaʼ ri joyovabel? Roma ri kʼatoj tzij, y ri joyovabel riʼ, xa manek ta ri cuchukʼaʼ pa ruviʼ.

22 Vaveʼ cʼa, can yaʼon vi pe jun pixaʼ, y can kʼijun vi jun cʼajisabel, y yaʼon cʼa chukaʼ ri tzolibel cʼuʼx. Ri tzolibel cʼuʼx riʼ nichʼojix roma ri joyovabel. Vi xa manek tzolibel cʼuʼx rubanon, ri kʼatoj tzij nuchʼojij ri vinek, y nusamajij cʼa ri pixaʼ pa ruviʼ, y ri pixaʼ nuben ri cʼajisabel chique. Vi man que ta reʼ, xa yevulatej ta ri rusamaj ri kʼatoj tzij, y ri Dios xa man ta Dios chic.

23 Jacʼa ri Dios can cʼa Dios na, y ri joyovabel nibanatej roma ri rutojbalil mac. Ri jovoyabel yeruchʼojij pe ri vinek ri nitzolin pe quicʼuʼx. Ri rutojbalil mac nuqʼuen pe ri cʼastajibel quichin ri caminakiʼ. Ri cʼastajibel quichin ri caminakiʼ, xqueruqʼuen pe ri vinakiʼ jun bey chic riqʼuin ri Dios. Riqʼuin cʼariʼ, rijeʼ yetzolix chic riqʼuin rijaʼ, richin queriʼ nikʼat tzij pa quiviʼ chiquij ri quisamaj, achiʼel cʼa nubij ri pixaʼ y ri kʼatoj tzij.

24 Can kitzij vi cʼa, ri kʼatoj tzij yerusamajij conojel ri rurayibal, y chukaʼ ri joyovabel yeruchʼojij conojel ri e richin. Quereʼ cʼa, manjun nitiquir nicolotej, xaxe vi nitzolin pe rucʼuʼx.

25 ¿Achique nabij? ¿La nanojij chi ri joyovabel nitiquir nelekʼ el riqʼuin ri kʼatoj tzij? Ninbij chave chi mani, ni ta xa jun ti nitzʼ. Vi ta queriʼ, ri Dios xa man ta Dios chic.

26 Quereʼ cʼa, ri Dios yeruben ri nimalej y jumul tak rurayibal ri can e chojmirisan vi pe, cʼa pa tok rutiquiribel pe re ruvachʼulef. Quereʼ cʼa, nicʼachoj ri quicolotajic y ri quelesaxic pa mac ri vinakiʼ, y chukaʼ ri quivulatajic, y ri quikʼaxomal.

27 Roma cʼariʼ, nucʼajol, xabachique ri nrajoʼ nijel pe, can niyatej vi kʼij chire richin nuqʼuiyaʼ riqʼuin ri yaʼ richin ri cʼaslen. Y xabachique ri man nrajoʼ ta nipe, man ninim ta richin chi nipe. Man riqʼuin vi cʼariʼ, chupan ri ruqʼuisibel kʼij, can xtitzolix vi chire junan riqʼuin ri rubanon can.

28 Vi rijaʼ rurayin nuben ri itzel y man tzolitajinek ta pe rucʼuʼx chupan ri rucʼaslen, can kitzij vi chi ri itzel xtitzolix chic chire, achiʼel cʼa ri tzolijitajic ri nuben ri Dios.

29 Vacami nucʼajol, yin ninvajoʼ chi re tijonic reʼ man ta niquinek chic ri anojibal, y chi xaxe ri amac niquinek ta ri anojibal riqʼuin ri nakonbel ri xtuben chi chaʼnin nitzolin pe ri acʼuʼx.

30 Yin, nucʼajol, ninvajoʼ chi man taxilkʼotij cʼa chic ri rukʼatoj tzij ri Dios. Man cʼa tatij akʼij richin nacuy aviʼ xa roma nabij chi manek rukʼatoj tzij ri Dios. Xa can tayaʼ vi kʼij richin chi ri rukʼatoj tzij ri Dios, y ri rujoyovabal, y ri rucochʼibel cʼuʼx, can ta xtiquisiloj vi ri avánima. Tayaʼ cʼa kʼij chukaʼ richin yatquichʼutinirisaj, cʼa pa ri pokolaj.

31 Vacami cʼa, nucʼajol, rat at oyon richin natzijoj ri chʼabel chire re vinakul reʼ. Cabiyin cʼa nucʼajol, y tatzijoj ri chʼabel riqʼuin ri kitzij y riqʼuin chojilej naʼoj. Riqʼuin cʼariʼ, xtaben chi e qʼuiy cʼaslemal nitzolin pe quicʼuʼx. Cʼa cʼariʼ, ri nimalej nucʼun banel richin ri joyovabel, xqueruchʼojij cʼa pe rijeʼ. Tuyaʼ cʼa ri Dios chave, achiʼel cʼa ri nubin chave. Amen.