1 Ri Alma xutzʼet cʼa chi ri xubij ri Amulek can xukʼil vi ri ruchiʼ ri Zezrom. Ri Zezrom xretamaj cʼa chi tok xrajoʼ xuyoj ri Amulek, ri Amulek can xusech vi rijaʼ chupan ri rutzʼucuj tzij y ri rukʼoloj. Cʼariʼ, rijaʼ xcʼaracʼot roma xunaʼ ri rumac. Can ja vi cʼariʼ tok ri Alma xujek ruchiʼ y xuchop tzijonic riqʼuin, y xujiquibaʼ ri ruchʼabel ri Amulek, y xukʼalajirisaj jubaʼ chic. O pa jun chic chʼabel, rijaʼ xusol rij ri lokʼolej tzʼibanic jubaʼ chic chuvech ri rubanon can ri Amulek.

2 Ri vinakiʼ ri e cʼo chiriʼ, chukaʼ xcacʼaxaj ri chʼabel ri xubij ri Alma chire ri Zezrom, y can janíla vi nim ri molaj vinakiʼ ri e cʼo chiriʼ. Quereʼ cʼa xubij rijaʼ:

3 Vacami cʼa, rat Zezrom, natzʼet chi at sachatajinek chupan ri atzʼucuj tzij, y ri itzel novinek anaʼoj. Rat man xaxe ta atzʼucun tzij chiquivech ri vinakiʼ, xa chukaʼ chuvech ri Dios. Can kitzij vi chi rijaʼ retaman chic ronojel ri anojibal. Chukaʼ, rat natzʼet chi ri Ruxlabal rijaʼ nukʼalajirisaj ri anojibal chikavech roj.

4 Chukaʼ, natzʼet chi roj ketaman chi ri anojibal can novinek vi pan etzelal, achiʼel cʼa ri novinek nojibel richin ri itzel vinek. Xavajoʼ xatzʼuc tzij y xeʼasech quicʼuʼx re vinakiʼ reʼ, richin chi xtipe ta coyoval chikij, y xkojcokotaj ta el.

5 Jareʼ cʼa ri runojibal ri netzelan avichin, y rijaʼ rusamajin ri ruchukʼaʼ aviqʼuin. Vacami cʼa, ninvajoʼ chi xtokaʼ cʼa chacʼuʼx, chi ri nibij chave rat, can ninbij vi chique conojel.

6 Can kitzij vi ninbij chive rix ivonojel chi jareʼ xa jun tzakbel richin ri itzel vinek ri xunucʼ can rijaʼ, richin chi yeruchop ta re vinakiʼ reʼ. Xrajoʼ xixrukasaj cʼa pa ri rukʼaʼ rijaʼ, y xixruxim ta riqʼuin ri ruximibal rijaʼ, richin queriʼ yixrujitzʼ ka cʼa chupan ri vulatajic jumul. Jareʼ, nibanatej cʼa riqʼuin ri ruchukʼaʼ richin ri rutzʼapibal.

7 Tok ri Alma xubij re chʼabel reʼ, ri Zezrom can janila vi xcʼaracʼot, roma xunabelaʼ ri ruchukʼaʼ ri Dios. Chukaʼ, xunabej chi ri Alma y ri Amulek xquetamaj achique rijaʼ. Rijaʼ retaman chi rijeʼ quetaman ri nunojij y ri nurayij ri ránima. Ri uchukʼaʼ xyaʼox cʼa chique rijeʼ, richin chi xquetamaj cʼa ronojel reʼ, roma ri uxlabel richin ruyaʼic lokʼolej rutzijol ri quicʼuan.

8 Cʼa cʼariʼ, ri Zezrom xucʼutulaʼ chi utzil chique rijeʼ, richin chi xtretamaj ta jubaʼ chic chirij ri rajavaren ri Dios. Quereʼ cʼa xucʼutuj chire ri Alma: ¿Achique nibecʼulun ri xubij ri Amulek chirij ri cʼastajibel quichin ri caminakiʼ? Xubij cʼa chi conojel ri e choj, y conojel ri man e choj ta, xquecʼastej pe pa ri camic, y xqueʼucʼuex apon chuvech ri Dios. Chiriʼ cʼa xtikʼat tzij pa quiviʼ chirij ri quibanobal, xchaʼ.

9 Cʼa cʼariʼ, ri Alma xuchop rusolic rij ronojel ri chʼabel ri chire ri Zezrom, y quereʼ xubij: Chique chʼakaʼ niyaʼox kʼij richin niquetamaj ri evan etamabel richin ri Dios. Man riqʼuin vi riʼ, nibitej chique chi man ta quequikʼalajirisaj ronojel ri quetamabel, xaxe oc ri ruchʼabel ri nukʼalajirisaj ri Dios chique ri calcʼual ri achiʼaʼ tok rijeʼ niquinimaj rijaʼ chi utzil.

10 Roma cʼariʼ, ri xtucovinsaj ri ránima, man can ta qʼuin chire ri ruchʼabel ri Dios xtucʼul. Jacʼa ri man xtucovirisaj ta ri ránima, xtucʼul cʼa janíla qʼuiy ri ruchʼabel. Riqʼuin cʼariʼ, niyalox cʼa kʼij chire, richin queriʼ nretamaj ri evan etamabel richin ri Dios, cʼa tok xtretamaj ronojel.

11 Ri yecovirisan ri cánima, man can ta qʼuiy chire ri ruchʼabel ri Dios niyalox chique, cʼa tok can manjun vi chic xtiquetamaj chiquij ri evan etamabel richin ri Dios. Cʼariʼ, yechapatej cʼa roma ri itzel vinek, y yeʼucʼuex ka roma ri rurayibal rijaʼ, cʼa chupan ri vulatajic. Can ja vi cʼareʼ ri ximibel richin ri xibalbay.

12 Ri Amulek xubij chi utzil chi roj konojel xkojcom, y xkojyacatej el chupan re camel chʼaculaj reʼ, cʼa pa jun chʼaculaj man camel ta chic. Jariʼ tok xkojucʼuex cʼa chuvech ri rucʼojlibal ri Dios, richin chi xtikʼatatej tzij pa kaviʼ chirij ri kabanon can.

13 Cʼa cʼariʼ, vi e covirisan chic ri kánima, o pa jun chic chʼabel, vi roj kacovirisan ri kánima chirij ri chʼabel, y ri chʼabel man cʼo ta chic kiqʼuin, jariʼ tok yalan cʼayef ri xtuben chike, roma can xkojetzelex vi.

14 Roma achique ri xkabilaʼ, can xkojquetzelaj vi, y ri xkabanalaʼ can, chukaʼ xkojquetzelaj. Man xkojilitej ta chʼajchʼoj. Chukaʼ xkojetzelex ka roma ri xkanojilaʼ. Xtikaxibij cʼa kiʼ richin chi nikatzuʼ apon ri ka Dios, xa roma can cʼayef vi xtuben chike. Janíla ta xkojquicot vi ta yojtiquir nikabij chique ri tak abej y ri juyuʼ chi quetzak ta cʼa pe chikij, y kojquevaj ta cʼa el chuvech ri Dios.

15 Man riqʼuin vi cʼariʼ, xa man tiquirel ta chi nibanatej queriʼ. Can cʼo vi chi yojapon, y yojpaʼeʼ chuvech rijaʼ pa ri rucʼojlemal, y ri rutiquirinic, y ri ruchukʼaʼ, y ri runimirinen, y ri rajavarisanen. Chiriʼ cʼa, riqʼuin ri jumul kaqʼuixbel, cʼo chi xtikakʼalajirisaj chi can e choj vi ri rukʼatoj tzij, y chi rijaʼ can choj vi riqʼuin ronojel ri rusamaj, y chi rijaʼ can nujoyovaj vi quivech ri calcʼual ri achiʼaʼ. Chukaʼ, cʼo chi xtikakʼalajirisaj chi rijaʼ can nitiquir vi yerucol chiquijujunal ri vinakiʼ ri yeniman ri rubiʼ, y ri yecʼutun chi can tzolitajinek vi ri quicʼuʼx.

16 Vacami cʼa, can ninbij vi chive chi jariʼ tok xtipe jun chic camic. Jariʼ ri rucaʼn camic, y jariʼ ri camic richin uxlabel. Ja cʼariʼ tok ri xcom chuvachʼulef riqʼuin ri rumac can xticom vi chukaʼ riqʼuin uxlabel. Xticom cʼa el chuvech ri ruchojmilal.

17 Ja cʼariʼ tok ri quicʼayeval can xqueʼoc vi achiʼel jun choy richin kʼakʼ y cʼaten yaʼal, y ri ruxak kʼakʼ nijoteyaj jumul. Jariʼ cʼa tok rijeʼ xqueximitej chi covil, cʼa pa ri vulatajic richin jumul. Jariʼ xtiban riqʼuin ri ruchukʼaʼ y ri rutzʼapibal ri Satanás, roma rijaʼ xquerujitzʼ can, achiʼel cʼa ri rurayibal.

18 Ninbij cʼa chive chi jariʼ tok rijeʼ xquecʼojeʼ can, achiʼel vi man ta xbanatej cʼa ri lokʼolej elesanic. Manek banel richin yeʼelesex cʼa pe chupan ri quimac, roma cʼa ri nubij ri rukʼatoj tzij ri Dios. Chukaʼ man yetiquir ta yecom, roma can manek chic kʼeyitajic.

19 Xcʼulvachitej cʼa, chi tok ri Alma xutanabaʼ rutzijoxic re chʼabel reʼ, ri vinakiʼ can janíla vi xquimey rij.

20 Man riqʼuin vi riʼ, cʼo jun achin rubiniʼan Antiona. Ja rijaʼ jun nimalej yukenel chiquicojol rijeʼ. Rijaʼ xokaʼ pe, y quereʼ xubij chire ri Alma: ¿Achique cʼa xabij rat? ¿La xabij cʼa chi ri vinek xticʼastej pe pa ri camic, y chi ri camel ruchʼacul xtijalatej richin chi man camel ta chic, y cʼariʼ man xticom ta chic ri rucʼaslemal?

21 Ri lokʼolej tzʼibanic nubij chi ri Dios xeruyaʼ can ri lokʼolej tak chajinelaʼ y jun kʼakʼilej tzaqʼuibel pa ri relebal kʼij richin ri cotzʼijbel rubiniʼan Edén. Riqʼuin cʼariʼ, ri nabey kateʼ katataʼ man xetiquir ta xeʼoc y xquitij ta ri ruvech ri cheʼ richin ri cʼaslen. Quereʼ cʼa nikatzʼet chi manek banel richin chi xecʼaseʼ benek ruvech. ¿Achique cami cʼa nibecʼulun ri lokʼolej tzʼibanic riʼ, nabij rat?

22 Ja cʼariʼ, ri Alma quereʼ xubij chire: Can ja vi riʼ ri xinvajoʼ xinkʼalajirisaj chivech. Ketaman cʼa chi ri Adán xtzak, roma xutij ri ruvech cheʼ chʼaʼoj rij, achiʼel cʼa nubij ri ruchʼabel ri Dios. Quereʼ cʼa, nikatzʼet chi roma ri rutzakinen, conojel ri vinakiʼ e sachinek y e tzakinek.

23 Vacami cʼa, ninbij chive chi va ta xyaʼox kʼij chire ri Adán richin chi nutij ta ri ruvech ri cheʼ richin ri cʼaslen tok rijaʼ tzakinek chic, jariʼ tok man ta xcʼojeʼ cʼa ri camic. Ja ta cʼariʼ xuben ta chi ri Dios xa ta jun tzʼucuy tzij, y manek ta ricʼaʼtz ri ruchʼabel, roma rijaʼ can que vi reʼ xubij: Vi natij, can xcacom vi.

24 Vaveʼ cʼa nikatzʼet chi ri camic nipe chiquij conojel ri vinakiʼ. Ja ri camic riʼ, achojchij xchʼo vi ri Amulek. Jariʼ ri camic richin ri chʼaculaj. Man riqʼuin vi cʼariʼ, xyaʼox kʼij chire ri vinek richin nitzolin pe rucʼuʼx. Roma cʼariʼ tok re cʼaslen reʼ xoc jun kʼij richin tejtobenic. Jareʼ cʼa jun kʼij richin chi ri vinek nuchojmirisaj apon riʼ, richin queriʼ nibe riqʼuin ri Dios. Jareʼ cʼa jun kʼij richin chi nuchojmirisaj apon riʼ richin ri cʼaslen jumul riʼ, achojchij xojchʼo vi roj. Ri cʼaslen riʼ nipe cʼa chirij ri cʼastajibel quichin ri caminakiʼ.

25 Ri nucʼun banel richin ri colotajic xbanatej cʼa pe, pa tok rutiquiribel re ruvachʼulef. Vi man ta cʼo riʼ, manek ta banel richin yecʼastej pe ri caminakiʼ. Jacʼa ri nucʼun banel richin ri colotajic, can xbanatej vi, y can xtuqʼuen vi pe ri cʼastajibel quichin ri caminakiʼ, achojchij banon vi can chʼoven.

26 Can kitzij vi cʼa, vi ta xyaʼox kʼij chique ri nabey kateʼ katataʼ richin chi xebe ta apon, y xquitij ta ri ruvech ri cheʼ richin ri cʼaslen, xa xebison ta cʼa benek ruvech. Jariʼ roma manek ta xcʼojeʼ jun kʼij richin chi xquichojmirisaj ta apon quiʼ. Vi xa ta queriʼ xbanatej, ri nucʼun banel richin ri colotajic xsachtej ta, y ri ruchʼabel ri Dios manek ta ricʼaʼtz, roma manjun ta xuben.

27 Can kitzij vi cʼa chi xa man xbanatej ta queriʼ. Xa xyaʼox kʼij chique ri vinakiʼ richin yecom. Chirij cʼa ri camic, can nipe vi ri kʼatonic tzij achojchij oj chʼovinek vi. Ri kʼatonic tzij riʼ, can ja vi riʼ ri ruqʼuisibel.

28 Cʼariʼ, tok ri Dios rukʼijun chic chi ri vinek xtiquicʼulvachij ronojel reʼ, jariʼ tok xutzʼet chi cʼatzinel chi ri vinakiʼ niquetamaj chirij achique ri xkʼijux can chiquij.

29 Roma cʼariʼ, rijaʼ xerutek pe takonaxelaʼ richin queriʼ xetzijon cʼa quiqʼuin ri vinakiʼ. Jecʼa rijeʼ xebanon chi ri vinakiʼ xquitzʼet ri rucʼojlemal ri Dios.

30 Cʼa cʼariʼ, xquichop pe chʼoven akʼanij pa rubiʼ rijaʼ. Roma cʼariʼ, ri Dios xchʼo quiqʼuin ri vinakiʼ, y xukʼalajirisaj chiquivech rijeʼ ri nucʼun banel richin ri colotajic ri can chojmirisan vi, pa tok rutiquiribel pe re ruvachʼulef. Rijaʼ xukʼalajirisaj ri nucʼun banel riʼ chiquivech rijeʼ, tok xquicukubaʼ quicʼuʼxʼ y xquiben ri lokʼolej tak quisamaj.

31 Roma cʼariʼ, rijaʼ xeruyaʼ rupixaʼ chique ri vinakiʼ. Rijeʼ xquikʼej cʼa ri nabey pixaʼ aj re ruvachʼulef, y xeʼoc cʼa achiʼel ri tak Dios, roma quetaman cʼa ruvech ri utz y ri itzel. Xquijech cʼa quiʼ pa jun cʼaslen acuchi niquiben vi ri nicajoʼ. O pa jun chic chʼabel, rijeʼ xeyaʼox pa jun cʼaslen acuchi niquiben vi ri niquirayij, y ri nikaʼ chiquivech rijeʼ. Niyaʼox cʼa kʼij chique richin niquiben ri utz o ri itzel.

32 Ri Dios xukʼalajirisaj cʼa chiquivech rijeʼ ri nucʼun banel richin ri colotajic. Cʼa cʼariʼ, xeruyaʼ chique rijeʼ ri pixaʼ, richin queriʼ man ta cʼa tiquiben ri itzel. Vi ta niquiben ri itzel, cʼo ta chi niquicʼovisaj ri rucaʼn camic. Re jumul camic reʼ, ja ri chʼaronic riqʼuin ronojel ri ruchojmilal. Ri nucʼun banel richin ri colotajic, manek cʼa ruchukʼaʼ pa quiviʼ ri yebanon queriʼ. Roma cʼa ri nimalej rutzil ri Dios, can manek vi banel richin nivulatej ta ri samaj richin ri kʼatoj tzij.

33 Man riqʼuin vi riʼ, ri Dios xchʼo quiqʼuin ri vinakiʼ pa rubiʼ ri Rucʼajol. (Jareʼ cʼa ri nucʼun banel richin ri colotajic ri xuben can rijaʼ.) Quereʼ cʼa xubij chique: Vi nitzolin pe icʼuʼx y man nicovirisaj ta ri ivánima, cʼa cʼariʼ, xtinjoyovaj ivech roma ri Junayon Nucʼajol.

34 Roma cʼariʼ, xabachique ri nitzolin pe rucʼuʼx, y man nucovirisaj ta ri ránima, xtiyaʼox cʼa chire ri nujoyovabal roma ri Junayon Nucʼajol. Riqʼuin cʼareʼ, xquecuyutej ri rumac. Ri yebanon quereʼ, xqueʼoc pe chupan ri vuxlanibel cʼuʼx.

35 Jacʼa ri xticovirisan ri ránima, y ri xtibanon richin ri itzel, can ninjiquibaʼ vi riqʼuin ri voyoval chi rijaʼ man xtoc ta pe chupan ri vuxlanibel cʼuʼx.

36 Vacami cʼa, vachʼalal, can ninbij vi chive chi vi rix nicovirisaj ri ivánima, can man xquixoc ta pe riqʼuin ri uxlanibel cʼuʼx richin ri Ajaf. Roma cʼariʼ, ri itzel ibanobal can nuben vi chi xtipe ri royoval rijaʼ chivij rix, achiʼel xpe chirij ri Adán pa rutiquiribel. Xubij cʼa chi xtipe ka chivij vacami, achiʼel cʼa xpe pa rutiquiribel, richin nivulatej jumul ri icʼaslemal. Can que vi cʼareʼ xtibanatej pa ri ruqʼuisibel camic, achiʼel cʼa pa ri nabey, roma quereʼ xubij can rijaʼ.

37 Vacami, vachʼalal, can ketaman vi chi e kitzij re chʼabel reʼ. Roma cʼariʼ, titzolin cʼa pe kacʼuʼx, y man tikacovirisaj ri kánima. Quereʼ cʼa, man xtikaben ta chi ri Ajaf ka Dios nukasaj pe chikij ri royoval rijaʼ, quiqʼuin re rucaʼn rupixaʼ ri e ruyaʼon chike. Xa kojoc cʼa riqʼuin ri uxlanibel cʼuʼx richin ri Dios, acuchi xubij vi rijaʼ chi chojmirisan chic chike.