1 Vacami nucʼajol, cʼa cʼo na ri ninvajoʼ ninbij chave chirij ri tzolijitajic, achojchij xtzijox vi can. Roma can kitzij vi, chʼakaʼ quisukʼun ri lokʼolej tzʼibanic, y e sachon romariʼ. Yin ninnaʼ chi ri anojibal rat chukaʼ ninojnot can romareʼ. Can kitzij vi cʼa chi xtinkʼalajirisaj chavech.

2 Yin ninbij chave, nucʼajol, chi can nicʼatzin vi ri nucʼun rubanel ri tzolijitajic chire ri kʼatoj tzij richin ri Dios. Roma can cʼatzinel vi chi conojel yetzolitej pa ri tzʼaket ruchojmilen. Can kitzij vi cʼa, chi cʼatzinel y choj chi ri uxlabel richin jun vinek nitzolix pe riqʼuin ri ruchʼacul, y chi chijun ri ruchʼacul cʼo chi nitzolix pe chic. Que cʼariʼ rubanon roma ri ruchukʼaʼ y ri rucʼastajibel ri Cristo.

3 Cʼo cʼa chi nikʼat tzij pa quiviʼ ri vinakiʼ chiquij ri quisamaj, roma queriʼ nrajoʼ ri kʼatoj tzij richin ri Dios. Vi utz ri quisamaj pa re cʼaslen reʼ, y vi utz ri rurayibal ri cánima, cʼo chukaʼ chi rijeʼ xquetzolix chic riqʼuin ri utz chupan ri ruqʼuisibel kʼij.

4 Vi e itzel ri quisamaj, cʼo chi xquetzolix chic chiquij rijeʼ pa ri itzel. Roma cʼari, ronojel xtitzolix chic pa ri kitzij ruchojilen y pa ri quibaniquil. Ri camel xtiyacatej riqʼuin ri man camel ta chic, y ri kʼeyitajic riqʼuin ri chʼajchʼoj. Xqueyacatej cʼa chupan jumul quicoten richin niquichinaj ri rajavaren ri Dios, o chupan jumal kʼaxomal richin niquichinaj ri rajavaren ri itzel vinek. Jun nibe riqʼuin ri jun, y jun nibe riqʼuin ri jun chic.

5 Ri jun niyacatej chupan ri ruquicoten, junan riqʼuin ri rurayibal chire ri quicoten, o chupan ri utz, junan riqʼuin ri rurayibal chire ri utz. Ri jun chic niyacatej chupan ri itzel, junan riqʼuin ri rurayibal chire ri itzel. Roma rijaʼ xurayij xuben ri itzel chijun kʼij, y roma cʼari, can que vi reʼ xtril cʼa ri itzel rajel ruqʼuexel tok nocokʼaʼ.

6 Quereʼ cʼa chukaʼ niban riqʼuin ri jun chic. Vi rijaʼ tzolitajinek pe ri rucʼuʼxʼ chupan ri rumac, y rurayin ri ruchojmilal, cʼa pa ri ruqʼuisibel ri rukʼij, can que vi reʼ, rijaʼ xtril cʼa ri rajel ruqʼuexel ri ruchojmilal.

7 Can je vi rijeʼ ri yeʼelesex pe chupan ri quimac roma ri Ajaf. Kitzij chi je rijeʼ ri e elesan pe, y ri e colon pe, chupan ri tocokʼaʼ richin jumul kʼekuʼm. Xa rijeʼ chic cʼa, ri yepaʼeʼ, o ri yetzak. Roma can kitzij vi, je rijeʼ ri yechaʼon, y niquiben ri utz o ri man utz ta.

8 Vacami cʼa, ri nubij ri Dios can man nijalatej ta. Roma cʼariʼ, chojmirisan chic ri bey richin chi xabachique ri nirayin cʼo banel richin nibiyin chupan, y nicolotej.

9 Vacami cʼa, nucʼajol, man cʼa tanim aviʼ jun bey chic richin nacʼulaʼaj ri a Dios chirij re tijonic reʼ. Ja re tijonic reʼ ri cʼa vacami arayin richin nakʼej.

10 Man cʼa tanojij chi xaxe roma xtzijox ka chirij ri tzolijitajic chi rat xcatzolix pe acuchi cʼo vi ri mac, cʼa chupan ri quicoten. Can kitzij vi chi ninbij chave chi ri etzelal manjun bey ja ta riʼ ri quicoten.

11 Vacami cʼa, nucʼajol, conojel ri achiʼaʼ ri e cʼo pa ri naʼoj aj re ruvachʼulef, o pa jun chic chʼabel, ri e cʼo pa jun naʼoj aj chʼaculaj, je rijeʼ can e cʼo vi chupan ri ruyaʼal ri qʼueyilel, y ri ximibel richin ri etzelal. E cʼo cʼa chuvech re ruvachʼulef, y ri Dios xa manek quiqʼuin. Rijeʼ e samajinek cʼa chirij ri runaʼoj ri Dios. Roma cʼariʼ, e cʼo pe, e paban chuvech ri naʼoj richin ri quicoten.

12 Vacami cʼa, ¿la nibecʼulun ri tzij tzolijitajic, chi jun nelesex el chupan ri kitzij rubaniquil, y niyaʼox cʼa pa jun chic rubaniquil jalatajinek? ¿La nibecʼulun cami cʼa chi niyaʼox acuchi xa chʼaron chic el chuvech ri kitzij rubaniquil rijaʼ?

13 Nucʼajol, man que ta riʼ nibecʼulun pe. Ri tzij tzolijitajic xa nibecʼulun chi nitzolix chic ri itzel pa ruqʼuexel ri itzel, y ri aj chʼaculaj pa ruqʼuexel ri aj chʼaculaj, o ri etzelal pa ruqʼuexel ri etzelal. Chukaʼ nibecʼulun chi ri utz nitzolix pa ruqʼuexel ri utz, y ri ruchojmilal pa ruqʼuexel ri nichojmilal, y ri choj pa ruqʼuexel ri choj, y ri joyovabel pa ruqʼuexel ri joyovabel.

14 Roma cʼariʼ, nucʼajol, tatijaʼ cʼa akʼij richin najoyovaj quivech ri avachʼalal. Casamej cʼa choj quiqʼuin, y tasamajij ri ruchojmilal, y tabanaʼ cʼa ri utz benek ruvech. Vi naben cʼa ronojel reʼ, can xtacʼul vi ri avajel. Kitzij chi ri joyovabel xtitzolix chic chave, y ri ruchojmilal xtitzolix chic chave. Chukaʼ ri chojmilej kʼatoj tzij xtitzolix chic chave, y ri utz xtitzolix chic chave chukaʼ.

15 Roma achique ri xtatek el, can xtitzolin vi pe chic aviqʼuin. Roma cʼariʼ, ri tzij tzolijitajic can tzʼaket vi nretzelaj ri aj mac, y can man nutoʼ ta vi.