1 Xcʼulvachitej cʼa chi ri Alma, ri xanimej el chiquivech ri rusamajelaʼ ri Noé, ri rutataʼal ri tinamit, xtzolin pe ri rucʼuʼx chupan ri rumac, y ri itzel ri rubanalon. Cʼa cʼariʼ, rijaʼ xbe chiquicojol ri vinakiʼ pan evel chuvech ri rutataʼal ri tinamit y xerutijoj rijeʼ chique ri ruchʼabel ri Abinadi.

2 Xchʼo cʼa chirij ri xticʼulvachitej apon y ri cʼastajibel quichin ri caminakiʼ. Chukaʼ xchʼo chirij ri lokʼolej elesanic quichin ri vinakiʼ ri xtibanate; roma ri ruchukʼaʼ ri Cristo, y ri pokonal xtutij rijaʼ, y ri rucamic, y ri rucʼastajibel, y ri rujotobelen chicaj.

3 Rijaʼ xerutijoj cʼa conojel ri xcajoʼ xcacʼaxaj ri ruchʼabel. Xerutijoj cʼa rijeʼ pan evel richin queriʼ ri rutataʼal ri tinamit man ta xunabej. E qʼuiy xquinimaj cʼa ri ruchʼabel.

4 Xcʼulvachitej cʼa chi conojel ri xquinimaj rijaʼ xebe apon pa jun cʼojlibel rubiniʼan Mormon. Xucʼul ri biʼaj riʼ roma queriʼ rubiniʼan can jun rutataʼal ri tinamit riʼ. Ri cʼojlibel riʼ cʼo cʼa chupan ri cʼulbaʼt richin ri ruvachʼulef, acuchi jantek cʼa yecʼojeʼ vi e aj pa kʼayis chicopiʼ.

5 Chiriʼ pa Mormon xcʼojeʼ vi jun yaʼ can chʼajchʼoj vi. Ri Alma xbe cʼa chiriʼ chunakaj ri yaʼ pa jun ti molaj cheʼ. Pa kʼij rijaʼ xrevaj riʼ chiriʼ richin queriʼ man nilitej ta cʼa roma ri rutataʼal ri tinamit.

6 Xcʼulvachitej cʼa chi conojel ri xquinimaj rijaʼ xebe chiriʼ chiracʼaxaxic ri ruchʼabel.

7 Xcʼulvachitej cʼa chi tok e qʼuiy kʼij e kʼaxinek chic el, e qʼuiy xquimol quiʼ chiriʼ pa ri cʼojlibel rubiniʼan Mormon richin nicacʼaxaj ri ruchʼabel ri Alma. Can conojel vi ri xquinimaj ri ruchʼabel ri Alma quimolon quiʼ chiracʼaxaxic rijaʼ. Rijaʼ xerutijoj cʼa rijeʼ y xeruchʼabalij chique rijeʼ ri tzolibel cʼuʼx, y ri lokʼolej elesanic, y ri cukubabel cʼuʼx riqʼuin ri Ajaf.

8 Xcʼulvachitej cʼa chi quereʼ xubij rijaʼ chique: Titzuʼ pe, jareʼ ri yaʼ richin ri Mormon (queriʼ cʼa xubiniʼaj ri yaʼ riʼ). Vacami cʼa, rucʼamon chi nivajoʼ yixoc pa ri rukʼataj ri Dios y xtibiniʼaj ri ruvinak rijaʼ. Rucʼamon cʼa chukaʼ chi cʼo irayibal richin chi nitolaʼ iviʼ quiqʼuin ri ivejkaʼn, richin queriʼ man can ta e al chive.

9 Chukaʼ rucʼamon chi rix nirayij yixokʼ quiqʼuin ri yeʼokʼ, y yeʼibochiʼij ri queriʼ nicʼatzin chique. Rucʼamon cʼa chukaʼ chi yixoc jiquibanelaʼ chirij ri Dios pa ruviʼ ronojel, benek ruvech y xabacuchi ix cʼo vi, cʼa tok yixcom. Queriʼ cʼa yixelesex cʼa pe roma ri Dios, y yixajilex quiqʼuin ri yecʼuluman richin ri nabey cʼastajibel, richin queriʼ xticʼojeʼ ri icʼaslen jumul.

10 Ninbij cʼa chive rix chi vi queriʼ nurayij ri ivánima, ¿achique cʼa roma tok man ta yixkasex chuxeʼ yaʼ pa rubiʼ ri Ajaf? Riqʼuin cʼariʼ, rix xtikʼalajirisaj chuvech rijaʼ chi ibanon jun cʼulanen tzij riqʼuin richin xtisamajij cʼa rijaʼ, y xqueʼitakej ri rupixaʼ richin queriʼ rijaʼ can janíla vi xtuyaʼ cʼa ri Ruxlabal pan iviʼ.

11 Cʼa cʼariʼ, tok ri vinakiʼ xcacʼaxaj re chʼabel reʼ, rijeʼ xquipakʼapaʼ ri quikʼaʼ y quereʼ xquibij: ¡Can ja vi riʼ ri nurayij ri kánima roj!

12 Cʼa cʼariʼ, xcʼulvachitej chi ri Alma xrachibilaj ri Elam, ja rijaʼ jun chique ri nabey, y xebe y xepaʼeʼ pa ri yaʼ. Cʼariʼ, ri Alma xchʼo akʼanij y quereʼ xubij: Rat Kajaf, tayaʼ cʼa pe ri Avuxlabal pa ruviʼ ri asamajel richin queriʼ rijaʼ xtuben re samaj reʼ riqʼuin lokʼolej ránima.

13 Tok rijaʼ rubin chic re chʼabel reʼ, ri Uxlabel richin ri Ajaf xcʼojeʼ riqʼuin, y quereʼ xubij: Rat Elam, riqʼuin cʼa ri kʼatbel tzij yaʼon can chuve roma ri Dios Ronojel Tiquirel, yin yatinkasaj chuxeʼ yaʼ. Riqʼuin cʼareʼ, rat nakʼalajirisaj chi abanon jun cʼulanen tzij riqʼuin ri Dios richin nasamjij rijaʼ pa re jun cʼaslen reʼ, cʼa tok yacom. Tiyaʼox cʼa pan aviʼ rat ri Uxlabel richin ri Ajaf, y tuyaʼ cʼa ri Dios chave rat ri acʼaslen jumul, roma ri lokʼolej elesanic ri nuben ri Cristo. Ri Dios runucʼun cʼa pe ri Cristo pa tok rutiquiribel re ruvachʼulef.

14 Tok ri Alma rubin can re chʼabel reʼ, ri Alma y ri Elam, che caʼiʼ, xemuk ka chupan ri yaʼ. Cʼariʼ xeyacatej chic el, y xeʼel pe pa ri yaʼ, y can xequicot vi roma xenoj riqʼuin ri Uxlabixel.

15 Cʼa cʼariʼ, ri Alma xrachibilaj jun chic y xbe jun chic bey pa ri yaʼ y xukasaj chuxe yaʼ, achiʼel cʼa xuben riqʼuin a nabey. Vacami cʼa ri Alma man xumuk ta riʼ jun chic bey chupan ri yaʼ.

16 Queriʼ cʼa xerukasaj chuxeʼ yaʼ conojel ri xebe pa ri cʼojlibel rubiniʼan Mormon. Rijeʼ e lajuj cʼal cajiʼ laʼek vinakiʼ. Rijeʼ xekasex cʼa chuxeʼ ri yaʼ rubiniʼan Mormon y xenoj riqʼuin ri rutzil ri Dios.

17 Cʼariʼ, rijeʼ benek ruvech xquibiniʼaj ri Rukʼataj ri Dios o ri Rukʼataj ri Cristo. Xcʼulvachitej cʼa chi xabachique ri xkasex chuxeʼ yaʼ roma ri ruchukʼaʼ y ri rukʼatbel tzij ri Dios, xoc cʼa pa ri rukʼataj rijaʼ.

18 Xcʼulvachitej cʼa chi ri Alma rucʼuan ri rukʼatbel tzij ri Dios y can xerutakalaʼ vi Teuchunelaʼ. Cʼo cʼa jun Teuchunel chiquicojol ri e cavinek lajuj vinakiʼ. Ri Alma xerutek cʼa ri Teuchunelaʼ riʼ richin chi quechʼabalin cʼa chique ri vinakiʼ y quequitijoj rijeʼ chire ri rajavaren ri Dios.

19 Ri Alma xubij chique ri Teuchunelaʼ chi xaxe tiquichʼabalij ri achojcheʼ rijaʼ e rutijon vi, y chukaʼ ri chʼabel quichin ri chʼajchʼojilej e yaʼol lokʼolej rutzijol.

20 Jaʼ, xubij chique rijeʼ chi xaxe tiquichʼabalij ri tzolibel cʼuʼx y ri cukubabel cʼuʼx riqʼuin ri Ajaf ri coloyon quichin ri ruvinak.

21 Rijaʼ chukaʼ xubij chique rijeʼ chi man ticʼojeʼ cʼa oyoval chiquicojol. Xa rucʼamon cʼa chi rijeʼ junan yetzuʼun apon, y nicʼojeʼ junan ri quicukubabel cʼuʼx y ri quikasanic chuxeʼ yaʼ. Chukaʼ rucʼamon chi niquijunamaj ri cánima chi utzil y nicajoʼ quiʼ.

22 Queriʼ cʼa xubij chique rijeʼ chi quechʼabalin. Can que vi cʼariʼ, rijeʼ xeʼoc ri ralcʼual ri Dios.

23 Xubij chukaʼ chique rijeʼ chi tiquichajij cʼa ri kʼij richin uxlanibel, y tiquichʼajchʼojirisaj, y chukaʼ richin tiquimatioxij chire ri Ajaf qui Dios ronojel kʼij.

24 Rijaʼ chukaʼ xuchilabej chique ri Teuchunelaʼ ri e rutakon can, chi xesamej cʼa quiqʼuin ri quikʼaʼ richin niquichʼec ri niquitij rijeʼ.

25 Chʼaron cʼa can jun kʼij che ri vukukʼij richin chi xquimol quiʼ. Chiriʼ cʼa, rijeʼ xequitijoj ri vinakiʼ y xquiyaʼ rukʼij ri Ajaf qui Dios. Chukaʼ xquimol quiʼ xa jampeʼ mul xetiquir.

26 Man rucʼamon ta cʼa chi ri Teuchunelaʼ xeʼilix coma ri vinakiʼ. Xa xtiquicʼul ri rutzil ri Dios pa ruqʼuexel ri quisamaj rijeʼ. Riqʼuin cʼariʼ, rijeʼ xtiquicovirisaj quiʼ riqʼuin ri Uxlabel. Quicʼuan cʼa ri retamabal ri Dios. Roma cʼariʼ tok cʼo beyal richin chi rijeʼ xquetijon riqʼuin ri ruchukʼaʼ y ri rukʼatbel tzij ri Dios.

27 Ri Alma chukaʼ xubij chique ri e cʼo chupan ri Kʼataj chi tiquisipalaʼ jubaʼ ri cʼo quiqʼuin, xa jampeʼ cʼa oc yetiquir niquisipaj chiquijujunal. Vi jun vinek cʼo qʼuiy riqʼuin, rucʼamon cʼa chi nuyaʼ qʼuiy. Vi jun vinek xa jubaʼ oc cʼo riqʼuin, xaxe cʼa jubaʼ nicʼutux chire. Queriʼ cʼa, conojel xquiyalaʼ achiʼel ri cʼo quiqʼuin. Vi cʼo cʼa jun ri manek riqʼuin, ja cʼariʼ ri xtoʼox coma ri chʼakaʼ chic.

28 Queriʼ cʼa, can rucʼamon vi chi niquiyaʼ chique ri Teuchunelaʼ ri cʼo nicʼatzin chique, y chukaʼ chique conojel vinakiʼ ri can manjun cʼo quiqʼuin, y ri cʼa cʼo na nicʼatzin chique. Rucʼamon cʼa chi niquirayij niquiben ri utzil riqʼuin ri utzilej quirayibal chire ri Dios.

29 Ri Alma queriʼ xubij chique rijeʼ roma queriʼ xuchilabej ri Dios chire rijaʼ. Rijeʼ choj xebiyin chuvech ri Dios. Xquiyalaʼ cʼa chique ri chʼakaʼ chic ri nicʼatzin vaveʼ chuvachʼulef y chukaʼ ri nicʼatzin chire ri cuxlabal rijeʼ, achiʼel cʼa ri quirayibal y ri cʼatzinel chique.

30 Xcʼulvachitej cʼa chi ronojel reʼ xebanatej can pa Mormon. Xebanatej cʼa pa ri qʼuechelaj ri cʼo chunakaj ri yaʼ rubiniʼan Mormon. Ri cʼojlibel rubiniʼan Mormon, y ri yaʼ rubiniʼan Mormon, y ri qʼuechelaj rubiniʼan Mormon, can e jebel vi yetzuʼun chiquivech rijeʼ ri xeʼetaman chirij ri Lokʼolej Quelesanel chiriʼ. Rijeʼ janíla e turusan, y rijeʼ xtiquibixaj cʼavomabel chire rijaʼ benek ruvech.

31 Ronojel reʼ xebanatej chupan ri cʼulbaʼt richin ri ruvachʼulef, richin queriʼ ri rutataʼal ri tinamit man ta xerunabej.

32 Man riqʼuin vi riʼ, kitzij chi ri rutataʼal ri tinamit xunabej chi ri vinakiʼ yebe y yepe el chiriʼ. Roma cʼariʼ, xerutek el ri rusamajelaʼ richin xebequitzʼetaʼ. Roma cʼariʼ, chupan ri kʼij tok xquimol quiʼ chiriʼ richin nicacʼaxaj ri ruchʼabel ri Ajaf, jariʼ tok ri rutataʼal ri tinamit xerunabej.

33 Cʼa cʼariʼ, ri rutataʼal ri tinamit xubij chi ri Alma xaxe xeruyukʼ ri vinakiʼ richin chi rijeʼ niquipabaʼ ta quiʼ chuvech rijaʼ. Roma cʼariʼ, can xerutek vi el ri molaj royovanelaʼ richin yequicamisaj.

34 Xcʼulvachitej cʼa chi ri Alma y ri ruvinak ri Ajaf xquinabej chi e petenek ri molaj royovanelaʼ ri rutataʼal ri tinamit. Romariʼ tok xequicʼuaj el ri quimoʼc y ri quichinamit, y xebe cʼa pa ri tolan ruvachʼulef.

35 Rijeʼ e jukʼo cavinek lajuj laʼek vinakiʼ.