1 Xcʼulvachitej cʼa chi ri Benjamín, ri rutataʼal ri tinamit, xubij can queriʼ chique ri ruvinak. Cʼa cʼariʼ, xutek quicʼutuxic chiquicojol ri vinakiʼ, roma xurayij xunabej vi rijeʼ xquinimaj ri chʼabel ri xubij can rijaʼ chique.

2 Cʼariʼ, rijeʼ conojel xquibij quereʼ riqʼuin jun chʼabel: Jaʼ, nikanimaj ronojel ri chʼabel ri abin can chike roj. Chukaʼ can ketaman vi chi e jic y e kitzij ri chʼabel riʼ, roma ri rubanon chike roj ri Ruxlabal ri Ajaf Ronojel Tiquirel. Rijaʼ rubanon cʼa jun nimalej jalatajic kiqʼuin roj pa ri kánima. Man nikarayij ta chic nikaben ri itzel. Xa nikajoʼ nikaben ri utz junelic.

3 Roma cʼa ri jumul rutzil ri Dios y ri kʼalajirisanic richin ri Ruxlabal, roj chukaʼ janíla ketaman chirij ri xticʼulvachitej pe. Vi ta cʼatzinel, yojtiquir ta nikayaʼ cʼa lokʼolej rutzijol chirij ronojel.

4 Roj ketaman ronojel reʼ roma xkacukubaʼ kacʼuʼx riqʼuin ri xubij chike ri tataʼal richin ri katinamit. Romariʼ tok can janíla vi nim ri kaquicoten.

5 Roj nikajoʼ nikaben jun cʼulanen tzij riqʼuin ri ka Dios ri nubij chi tikabanaʼ ri nurayij rijaʼ, y quekatakej ri rupixaʼ quiqʼuin chinojel ri yeruchilabej chike chijun ri kacʼaslen. Riqʼuin cʼariʼ, man xtikaqʼuen ta cʼa pa kaviʼ ri jumul cʼayeval achojchij xchʼo vi ri takonaxel. Chukaʼ ri kumbel richin ri royoval ri Dios.

6 Vacami cʼa jareʼ ri chʼabel ri xrajoʼ ri tataʼal Benjamin chi xquibij chire. Roma cʼariʼ, rijaʼ xubij chique quereʼ: Rix xibij ri xinvajoʼ chi xibij. Ri cʼulanen tzij ri ibanon, xa can choj vi.

7 Vacami cʼa, roma cʼa ri cʼulanen tzij ri ibanon can, rix xtibiniʼaj ri ralcʼual ri Cristo, ri rucʼajol y ri rumiʼal. Roma can kitzij vi, vacami rijaʼ ix ralcʼualan riqʼuin ri uxlabel. Nibij cʼa chi rijaʼ rujalon cʼa ri icʼuʼx roma xicukubaʼ icʼuʼx riqʼuin ri rubiʼ rijaʼ. Roma cʼariʼ, ix alaxinek chic riqʼuiin rijaʼ y ix oquinek chic ri rucʼajol y ri rumiʼal.

8 Riqʼuin re biʼaj reʼ rix ix oskʼopin y manjun chic biʼaj achojroma xquixoskʼopix vi. Man niyaʼox ta jun chic biʼaj achojroma nipe vi ri colotajic. Roma cʼariʼ, rix ivonojel ri ibanon jun cʼulanen tzij riqʼuin ri Dios richin ninimaj rutzij, cʼa pa ri ruqʼuisibel ri icʼaslen, ninvajoʼ cʼa chi niqʼuen pan iviʼ ri rubiʼ ri Cristo.

9 Xticʼulvachitej cʼa chi ri xtibanon queriʼ, can xtilitej vi pa ri rajquikʼaʼ ri Dios, roma rijaʼ xtretamaj ri biʼaj achojiqʼuin noyox vi. Roma rijaʼ xtucʼuaj cʼa ri rubiʼ ri Cristo.

10 Xticʼulvachitej chukaʼ chi ri man xtuqʼuen ta cʼa pa ruviʼ ri rubiʼ ri Cristo, cʼo chi nucʼuaj jun chic biʼaj. Roma cʼariʼ, rijaʼ xtilitej vi pa ri rajxocon ri Dios.

11 Ninvajoʼ cʼa chi nokaʼ chiʼicʼuʼx chukaʼ chi jareʼ ri biʼaj ri xinbij chi xtinyaʼ chive, y manjun bey xtichuputej, xaxe vi nikʼej ri pixaʼ. Roma cʼariʼ, tichajij iviʼ richin chi man nikʼej ta ri pixaʼ. Queriʼ cʼa, man xtichuptej ta re biʼaj reʼ chupan ri ivánima.

12 Ninbij chive chi ninvajoʼ chi nokaʼ chiʼicʼuʼx richin niyec can re biʼaj reʼ tzʼibatel pan ivánima jutakel, richin queriʼ man ta xquixilitej cʼa pa ri rajxocon ri Dios. Xa xtivacʼaxaj cʼa y xtivetamaj ri chʼabel achojroma xquixoyox vi, y chukaʼ ri biʼaj achojiqʼuin rijaʼ xquixroyoj vi.

13 ¿Achique cami banel richin chi jun achin nretamaj ruvech ri rajaf vi xa man samajinek ta riqʼuin rijaʼ, y xa man etaman ta ruvech roma, y xa can nej vi cʼo vi riqʼuin ri runojibal y ri rurayibal ri ránima?

14 Chukaʼ nincʼutuj chive quereʼ: ¿La nucʼuaj ta cami jun achin jun quiej richin ri rachibil y nrilij ta cʼa? Ninbij chive chi mani. Rijaʼ man xtuyaʼ ta kʼij richin chi nivaʼ quiqʼuin ri rukʼataj chicopiʼ rijaʼ, xa xtrokotaj cʼa el nej y xtrelesaj vi el. Ninbij cʼa chive chi can que vi riʼ xtiban cʼa chive rix vi man ta ivetaman ri biʼaj achojiqʼuin ix oyon vi.

15 Roma cʼariʼ, ninvajoʼ chi yixchʼiqueʼ cof y man yixsilon ta, xa nibanalaʼ ta ri utz junelic, richin chi ri Cristo, ri Ajaf Ronojel Tiquirel xtuyaʼ ivetal chi ix richin rijaʼ. Riqʼuin cʼariʼ, xquixucʼuex ta cʼa chicaj, richin chi xticʼojeʼ iviqʼuin rix ri colotajic ri man niqʼuis ta y ri cʼaslen richin jumul roma ri utzilej nojibal, y ri uchukʼaʼ, y ri chojmilal, y ri joyovabel richin ri tzʼucuyon ronojel ri cʼo chicaj y ri cʼo chuvachʼulef. Ja rijaʼ ri Dios, y cʼo pa ruviʼ ronojel. Amen.