1 Xcʼulvachitej cʼa chi ri Abinadi xutanabaʼ rutzijoxic. Jariʼ tok ri rutataʼal ri tinamit xubij chique ri teuchunelaʼ chi tiquichapaʼ cʼa y tiquicamisaj.

2 Chiriʼ cʼa xcʼojeʼ jun chique rijeʼ rubiniʼan Alma, y rijaʼ rijaʼtzul ri Nefi chukaʼ. Rijaʼ cʼa cʼajol na y xunimaj ri ruchʼabel ri Abinadi. Retaman cʼa chiquij ri itzel tak banobel achojchiquij xjiquiban vi ri Abinadi chiquivech rijeʼ. Roma cʼariʼ, rijaʼ can xucʼutuj vi chire ri rutataʼal ri tinamit chi man toyover cʼa riqʼuin ri Abinadi, xa tuyaʼ cʼa kʼij chire richin xtel el chiriʼ riqʼuin uxlanibel cʼuʼx.

3 Jariʼ tok ri rutataʼal ri tinamit janíla xoyover y xuben chi ri Alma xokotex el quiqʼuin rijeʼ. Cʼariʼ, xerutek el ri rusamajelaʼ chirij richin ta xquicamisaj.

4 Rijaʼ xa xanimej cʼa chiquivech rijeʼ y xrevaj riʼ, y rijeʼ man xquil ta. E qʼuiy kʼij rijaʼ xrevaj cʼa riʼ chiriʼ y xutzʼibaj can ronojel ri xubij can ri Abinadi chique ri vinek riʼ.

5 Xcʼulvachitej cʼa chi ri rutataʼal ri tinamit xuben chi ri chajinelaʼ xquisutij rij ri Abinadi y xquichop. Cʼa cʼariʼ, rijeʼ xquixim y xquiyaʼ pa cheʼ.

6 Xkʼax cʼa oxiʼ kʼij, y tok ri rutataʼal ri tinamit chʼovinek chic quiqʼuin ri teuchunelaʼ rijaʼ xuben cʼa chi ri Abinadi xcʼamer pe chuvech.

7 Quereʼ cʼa xubij chire ri Abinadi: Roj cʼo achojiqʼuin yatkasujuj vi, y can rucʼamon vi chi rat yacamisex.

8 Rat abin cʼa chi can ja vi ri Dios xtikaʼ pe chiquicojol ri clacʼual ri achiʼaʼ. Roma cʼariʼ, rat xcacamisex vi man yeʼaxutuj ta el ri itzel tak chʼabel ri e abin pe chuvij yin y chirij ri nuvinak.

9 Cʼa cʼariʼ, ri Abinadi xubij pe chire quereʼ: Yin ninbij cʼa chave chi man xtinxutuj ta ri chʼabel ri xinbij can chive chiquij re vinakiʼ reʼ, roma can kitzij vi. Yin nuyaʼon kʼij chive rix richin yinichop quereʼ, richin cʼo banel richin nivetamaj chi can kitzij vi re chʼabel reʼ.

10 Stapeʼ cʼa yicamisex romariʼ, man xtinxutuj ta ri nuchʼabel. Re chʼabel reʼ can xquejiquiban vi chivij rix. Vi xquinicamisaj, xa xtiquiraj cʼa ri nuquiquʼuel y manjun numac. Riʼ chukaʼ xtijiquiban can chivij rix pa ri ruqʼuisibel kʼij.

11 Vacami cʼa, ri tataʼal Noé jubaʼ chic man xroskʼopij ta el rijaʼ, roma cʼa xuxibij riʼ chuvech ri xubij ri Abinadi. Xunojij cʼa chi ri cʼajisabel ri nuben ri Dios xtikaka pa ruviʼ rijaʼ.

12 Ja cʼariʼ tok ri teuchunelaʼ xquirek quichiʼ chirij ri Abinadi y xquisujuj rijaʼ, y xquibij cʼa quereʼ: Re achin reʼ can ruyokʼon vi ri rutataʼal ri tinamit. Roma cʼariʼ, ri rutataʼal ri tinamit riʼ xoyover chic riqʼuin ri Abinadi y xujech el richin chi nicamisex can.

13 Xcʼulvachitej cʼa chi rijeʼ xquichop y xquixim. Cʼariʼ, can xquicʼatalaʼ vi ri rutzʼumal riqʼuin cʼatinek siʼ, cʼa pa ri rucamic.

14 Vacami cʼa, tok ri ruxak kʼakʼ xquiqʼuet rijaʼ, jariʼ tok xsiqʼuin chique rijeʼ y quereʼ xubij:

15 Kitzij cʼa chi xticʼulvachitej chi ri e ivijaʼtzul rix xquebequicamisaj e qʼuiy riqʼuin ri kʼakʼ, achiʼel cʼa ri ibanon pe chuve. Xtibanatej cʼariʼ roma ri chʼakaʼ chic xtiquinimaj ri colotajic ri xtuyaʼ ri Ajaf qui Dios.

16 Xticʼulvachitej cʼa chukaʼ chi rix xquixnakatej quiqʼuin conojel ruvech yabil roma ri itzel ri nibanalaʼ.

17 Xabacuchi ix cʼo vi rix, can xquixsocotej vi. Xquixquiratej y xquixokotex quereʼ y quelaʼ, achiʼel cʼa jun kʼataj chicopiʼ ri niquirex coma ri xibinelaʼ e aj pa kʼayis chicopiʼ.

18 Chupan ri kʼij riʼ, xquixcanox y xquixchap coma ri yeʼetzelan ivichin. Ja cʼariʼ tok xquixcamisex riqʼuin ri kʼakʼ, achiʼel cʼa yin yicamisex vacami.

19 Quereʼ cʼa ri Dios nutzolij ri rutojbal chique ri yecamisan richin ri ruvinak rijaʼ. ¡Rat, nu Dios, tacʼuluʼ cʼa ri vuxlabal!

20 Tok ri Abinadi xubij can re chʼabel reʼ, rijaʼ xtzak. Rijaʼ xcamisex riqʼuin kʼakʼ. Rijaʼ xcamisex cʼa, xa roma man xumalij ta ri rupixaʼ ri Dios. Xujiquibaʼ cʼa ri ruchʼabel riqʼuin ri rucamic.