1 Pea naʻe hoko ʻo pehē ʻi he hili leva ʻenau fokotuʻu ha siasi ʻi he fonua ko ia, naʻe kole ʻe he tuʻi ko Lamōnaí kia ʻĀmoni ke na ō mo ia ki he fonua ko Nīfaí ke ne lava ʻo fakahā ia ki heʻene tamaí.

2 Pea naʻe ongo mai ʻa e leʻo ʻo e ʻEikí kia ʻĀmoni ʻo folofola ange: ʻE ʻikai te ke ʻalu hake ki he fonua ko Nīfaí, he vakai, ʻe feinga ʻe he tuʻí ke tāmateʻi koe; ka ke ke ʻalu ki he fonua ko Mitonaí; he vakai, ʻoku ʻi he fale fakapōpulá ʻa ho tokoua ko ʻĒloné, kae ʻumaʻā foki ʻa Mulokai mo ʻAma.

3 Ko ʻeni naʻe hoko ʻo pehē ʻi he fanongo ʻa ʻĀmoni ki he meʻa ní, naʻá ne pehē ange kia Lamōnai: Vakai, ʻoku ʻi he fale fakapōpulá ʻa hoku tokouá mo hoku kāingá ʻi Mitonai, pea te u ʻalu koeʻuhi ke u lava ʻo fakatauʻatāinaʻi ʻa kinautolu.

4 Pea naʻe pehē ange ʻe Lamōnai kia ʻĀmoni: ʻOku ou ʻilo ʻokú ke lava ʻo fai ʻa e ngaahi meʻa kotoa pē ʻi he ^amāfimafi ʻo e ʻEikí. Kae vakai, te u ʻalu mo koe ki he fonua ko Mitonaí; he ko ha kaumeʻa ʻoʻoku ʻa e tuʻi ʻo e fonua ko Mitonaí, ʻa ia ko ʻAnitiomono hono hingoá; ko ia te u ʻalu ki he fonua ko Mitonaí ke u fakafiemālieʻi ʻa e tuʻi ʻo e fonuá, pea te ne tukuange ho kāingá mei he ^bfale fakapōpulá. Ka naʻe pehē ange kiate ia ʻe Lamōnai: Ko hai naʻá ne fakahā kiate koe ʻoku ʻi he fale fakapōpulá ʻa ho kāingá?

5 Pea pehē ange ʻe ʻĀmoni kiate ia: ʻOku ʻikai ha tokotaha kuó ne fakahā kiate au, ka ko e ʻOtuá pē; ʻo ne folofola mai kiate au—ʻAlu, ʻo fakahaofi ʻa ho kāingá, he ʻoku nau ʻi he fale fakapōpulá ʻi he fonua ko Mitonaí.

6 Pea ʻi he fanongo ʻa Lamōnai ki he meʻa ní, naʻá ne fekau ke hanga ʻe heʻene kau tamaioʻeikí ʻo teuteu ʻene fanga ^ahōsí mo ʻene ngaahi salioté.

7 Peá ne pehē ange kia ʻĀmoni: Haʻu, pea te u ʻalu mo koe ki he fonua ko Mitonaí, pea te u kole ʻi ai ki he tuʻí ke ne tukuange ho kāingá mei he fale fakapōpulá.

8 Pea naʻe hoko ʻo pehē lolotonga ʻa e fononga atu ʻa ʻĀmoni mo Lamōnai ki aí, naʻá na fetaulaki mo e tamai ʻa Lamōnaí, ʻa ia ko e tuʻi ki he fonuá hono ^akotoa.

9 Pea vakai, naʻe pehē ʻe he tamai ʻa Lamōnaí kiate ia: Ko e hā naʻe ʻikai te ke haʻu ai ki he ^akātoanga ʻi he ʻaho lahi ʻa ia naʻá ku fai ai ʻa e kātoanga ki hoku ngaahi fohá, mo hoku kakaí?

10 Pea naʻe pehē foki ʻe ia: Ko hoʻo ʻalu ki fē mo e tangata Nīfai ko ʻení, ʻa ia ko e taha ʻo e fānau ʻa ha ^atangata loi?

11 Pea naʻe hoko ʻo pehē naʻe fakamatalaʻi ʻe Lamōnai kiate ia ʻa e feituʻu ʻokú ne ʻalu ki aí, he naʻá ne manavahē ke fakatupu-houhau kiate ia.

12 Pea naʻá ne fakahā foki kiate ia hono ʻuhinga kotoa naʻá ne nofo ai ʻi hono puleʻanga ʻoʻoná, ʻo ʻikai ai te ne ʻalu hake ki heʻene tamaí ki he kātoanga kuó ne teuteú.

13 Pea ko ʻeni, ʻi he fakaʻosi ʻe Lamōnai ʻa ʻene fakamatala kiate ia ʻa e ngaahi meʻá ni kotoa pē, vakai, naʻá ne ʻohovale ʻi he tuputāmaki ʻa ʻene tamaí kiate ia, ʻo ne pehē: ʻE Lamōnai, ko hoʻo ʻalú ke fakahaofi ʻa e kau Nīfai ko iá, ʻa ia ko e ngaahi foha ʻo ha tangata loi. Vakai, naʻá ne kaihaʻa mei heʻeta ngaahi kuí; pea kuo haʻu ʻeni mo ʻene fānaú kiate kitautolu ke nau kākaaʻi ʻa kitautolu ʻi heʻenau olopotó mo ʻenau ngaahi loí, koeʻuhi ke nau toe kaihaʻasi ʻetau koloá meiate kitautolu.

14 Ko ʻeni naʻe fekau ʻe he tamai ʻa Lamōnaí kiate ia ke ne tāmateʻi ʻa ʻĀmoni ʻaki ʻa e heletā. Pea naʻá ne fekau foki kiate ia ke ʻoua te ne ʻalu ki he fonua ko Mitonaí, ka ke ne foki mo ia ki he fonua ko ^aʻIsimelí.

15 Ka naʻe pehē ange ʻe Lamōnai kiate ia: ʻE ʻikai te u tāmateʻi ʻa ʻĀmoni, pea ʻe ʻikai te u foki atu ki he fonua ko ʻIsimelí, ka te u ʻalu ki he fonua ko Mitonaí koeʻuhi ke u lava ʻo fakatauʻatāinaʻi ʻa e kāinga ʻo ʻĀmoní, he ʻoku ou ʻiloʻi ko e kau tangata angatonu ʻa kinautolu, pea ko e kau palōfita māʻoniʻoni ʻa kinautolu ʻa e ʻOtua moʻoni.

16 Ko ʻeni ʻi he fanongo ʻa ʻene tamaí ki he ngaahi lea ní, naʻá ne houhau lahi kiate ia, ʻo ne toʻo ʻene heletaá ke ne taaʻi hifo ia ki he kelekelé.

17 Ka naʻe tuʻu atu ki muʻa ʻa ʻĀmoni ʻo ne pehē ange kiate ia: Vakai, ʻe ʻikai te ke tāmateʻi ho fohá, ka neongo iá ʻe ^alelei ange ʻene toó ʻi haʻo tō, he vakai, kuó ne ^bfakatomala mei heʻene ngaahi angahalá; ka kapau te ke tō ʻi he taimí ni lolotonga hoʻo houhaú, he ʻikai lava ke fakamoʻui ho laumālié.

18 Kae vakai, ʻoku ʻaonga ke ke kātaki pē; he kapau te ke ^atāmateʻi ho fohá, ʻe tangi hono totó mei he kelekelé ki he ʻEiki, ko hono ʻOtuá, koeʻuhi ke tō kiate koe ʻa e tautea, he ko e tangata taʻehalaia ia; pea naʻa mole mo ho ^blaumālié.

19 Ko ʻeni, naʻe hili leva ʻa e lea ʻaki ʻe ʻĀmoni ʻa e ngaahi lea ni kiate iá, naʻá ne tali kiate ia, ʻo pehē: ʻOku ou ʻiloʻi te u lilingi ʻa e toto taʻehalaia ʻo kapau te u tāmateʻi hoku fohá; ka ko koe ia kuo feinga ke fakaʻauha iá.

20 Pea mafao atu hono nimá ke tāmateʻi ʻa ʻĀmoni. Ka naʻe matuʻuaki ʻene ngaahi taá ʻe ʻĀmoni, ʻo ne taaʻi foki ʻa hono nimá, ʻo ʻikai ai te ne lava ke ngāue ʻaki ia.

21 Pea ʻi he vakai ʻe he tuʻí ʻe lava ʻe ʻĀmoni ʻo tāmateʻi iá, naʻá ne kamata ke kole kia ʻĀmoni ke ne fakahaofi ʻene moʻuí.

22 Ka naʻe hiki hake ʻe ʻĀmoni ʻa ʻene heletaá, ʻo ne pehē ange kiate ia: Vakai, te u taaʻi koe ʻo kapau ʻe ʻikai te ke fakangofua mai ke tukuange ʻa hoku kāingá mei he fale fakapōpulá.

23 Ko ʻeni ko e meʻa ʻi he manavahē ʻa e tuʻí naʻa mole ʻene moʻuí, naʻá ne folofola ange: Kapau te ke fakamoʻui au, te u foaki kiate koe ʻa ia kotoa pē te ke kole ki aí, ʻo aʻu ki hono vaeua ʻo e puleʻangá.

24 Pea ʻi he ʻiloʻi ʻe ʻĀmoni kuó ne fakalotoʻi ʻa e tuʻi toulekeleká ʻo hangē ko hono lotó, naʻá ne pehē ange kiate ia: kapau te ke fakangofua ke tukuange hoku kāingá mei he fale fakapōpulá, pea ke tauhi foki ʻe Lamōnai ʻa hono puleʻangá, pea ʻe ʻikai te ke kei houhau kiate ia, kae tuku ke ne fai ʻo hangē ko ʻene ngaahi holí, ʻi ha ^ameʻa pē ʻokú ne fakakaukau ki aí, pe ʻoku lelei kiate iá, pea te u toki fakamoʻui koe; ka ʻikai, pea te u taaʻi koe ki he kelekelé.

25 Ko ʻeni ʻi he hili hono lea ʻaki ʻe ʻĀmoni ʻa e ngaahi lea ní, naʻe kamata ke fiefia ʻa e tuʻí koeʻuhi ko hono toe fakahaofi ʻene moʻuí.

26 Pea ʻi heʻene vakai ʻoku ʻikai fie tāmateʻi ia ʻe ʻĀmoní, pea ʻi heʻene vakai ki heʻene fuʻu ʻofa lahi ʻaupito ki hono foha ko Lamōnaí, naʻá ne fuʻu ofo ʻaupito, ʻo folofola ange: Koeʻuhi ko ʻeni pē kuó ke fie maʻú, ke u tukuange ho kāinga kae tuku ki hoku foha ko Lamōnaí ke ne tauhi hono puleʻangá, vakai, te u tuku maʻau ke tauhi ʻe hoku fohá ʻa hono puleʻangá, ʻo fai atu mei he ʻahó ni ʻo taʻengata; pea he ʻikai te u toe puleʻi ia—

27 Pea te u tuku foki maʻau ke tukuange ho kāingá mei he fale fakapōpulá, pe ʻe lelei ke mou haʻu mo ho kāingá kiate au ʻi hoku puleʻangá; he ʻoku ou fakaʻamu lahi ke u feʻiloaki mo koe. He naʻe fuʻu ofo lahi ʻa e tuʻí ʻi he ngaahi lea ʻa ia kuo lea ʻaki ʻe hono foha ko Lamōnaí, ko ia naʻá ne ^afakaʻamu ke ʻilo ki ai.

28 Pea naʻe hoko ʻo pehē naʻe hoko atu ʻa ʻĀmoni mo Lamōnai ʻi hona fononga ki he fonua ko Mitonaí. Pea naʻe finangalo lelei kia Lamōnai ʻa e tuʻi ʻo e fonuá; ko ia naʻe taki mai ki tuʻa ʻa e kāinga ʻo ʻĀmoní mei he fale fakapōpulá.

29 Pea ʻi he feʻiloaki ʻa ʻĀmoni mo kinautolú naʻá ne fuʻu loto-mamahi ʻaupito, he vakai naʻa nau tēlefua, pea kuo fuʻu mafohifohi ʻa honau kilí ko e tupu mei honau haʻi ʻaki ha ngaahi afo mālohi. Pea kuo nau mamahiʻia ʻi he fiekaiá mo e fieinuá mo e ngaahi faʻahinga mamahi kehekehe; ka neongo iá naʻa nau ^afaʻa kātaki ʻi honau ngaahi mamahi kotoa pē.

30 Pea, ko e meʻa ʻeni naʻe hokó, naʻe pau ke nau tō ki he nima ʻo ha kakai loto-fefeka ange mo ha kakai kia-kekeva ange; ko ia naʻe ʻikai te nau fie tokanga ki heʻenau ngaahi leá, pea kuo nau kapusi ʻa kinautolu ki tuʻa, mo taaʻi ʻa kinautolu, mo tuli ʻa kinautolu mei he fale ki he fale, pea mei he potu ki he potu, kae ʻoua kuo nau aʻu atu ki he fonua ko Mitonaí; pea naʻe puke ai ʻa kinautolu pea lī ki he fale fakapōpulá, pea haʻi ʻaki ʻa e ngaahi afo ^amālohi, pea tuku ʻi he fale fakapōpulá ʻo laulau ʻaho, pea naʻe fakatauʻatāinaʻi ʻa kinautolu ʻe Lamōnai mo ʻĀmoni.