3 Nifai 3
    iVakamacala e botona e ra
    Theme

    Wase 3

    Sa vinakata ko Kitianai, na nodra iliuliu na Ketianitoni, me soro ko Lakoniasi kei ira na Nifaiti ka ra solia tale ga na nodra vanua—Sa lesi Kitikitonai ko Lakoniasi me turaganivalu liu ni veimataivalu—Era sa soqoni vata na Nifaiti e Saraemala kei Vanuasautu me ra taqomaki ira kina vakaira. Rauta na 16–18 S.K.

    1 Ka sa yaco oqo ni ena ikatinikaono ni yabaki mai na nona lako mai na Karisito, sa taura kina ko Lakoniasi, na kovana ni vanua, e dua na ivola mai vua na nodra iliuliu ka nodra kovana na daubutako; a sa vakaoqo na vosa era sa volai kina:

    2 I Lakoniasi, na turaga levu ka kovana levu talega ni vanua, raica, au sa vola vei iko na ivola oqo, ka vakacaucautaki iko vakalevu sara ena nomu tudei kei na nodra tudei talega na nomu tamata, ena nomuni vakadeitaka tiko ga na ka ko ni nanuma ni sa nomuni galala kei na dodonu; io, ko ni a taqomaki kemuni vinaka, me vaka sara ga e a tokoni kemuni tiko e dua na Kalou, ena kena taqomaki na nomuni galala, na nomuni iyau, kei na nomuni vanua, se na veika ko ni sa vakatoka me nomuni.

    3 Ka sa vaka e rairai vakaloloma toka vei au, oi kemuni Lakoniasi na turaga levu, na nomuni sa rui lialia ka dokadoka, mo ni nanuma kina ni rawa mo ni vorati ira na lewevuqa na tamata qaqa ka’u lewai ira tu, ka ra sa vakaiyaragi tu ena gauna sara ga oqo, ka ra sa waraka ga me tau yani na lewa—Dou lako sobu vei ira na Nifaiti ka vakarusai ira.

    4 Au sa kila na yalo ni veiraravui sa tu vei ira, ka’u sa vakadinadinataka oti ena buca ni vala, au kila tale ga ni sa tawavakaiyalayala na nodra cati kemuni ena vuku ni veika ca ko ni a vakayacora vei ira, ia kevaka era sa lako sobu yani ka valuti kemuni, era na vakarusai kemuni sara.

    5 O koya au sa vola yani kina na ivola oqo, ka dregata e ligaqu, ni’u nanuma na nomuni tiko vinaka, ena vuku ni nomuni tudei ki na ka ko ni vakabauta ni dodonu, kei na nomuni yalo vakaturaga ena buca ni vala.

    6 O koya au sa volavola yani kina vei iko, ni’u vinakata mo ni soro vei ira na noqu tamata oqo, ka solia vei ira na nomuni veikoro, na nomuni vanua kei na veika kece ko ni taukena tu, ka me ra kakua ni sikovi kemuni yani ena nodra iseleiwau ka vakarusai kemuni.

    7 Se me tukuni ga, mo ni soro ka mai to vata kei keimami, me da duavata mo ni kila kina na neimami aveicakacaka vuni, mo ni wekai keimami ka tautauvata ga kei keimami—ko ni na sega ni na neimami bobula, ia ko ni na wekai keimami ka vakaivotavota vata kei keimami ena ka kecega.

    8 Ka raica, au sa abubuluitaka vei kemuni, kevaka ko ni kitaka oqo, ka bubului kina, ko ni na sega ni vakarusai; ia kevaka ko ni na sega ni kitaka oqo, au sa bubuluitaka oqo vei kemuni ni’u na vakaroti ira na noqu mataivalu me ra valuti kemuni yani ena vula mai oqo, au na vakaroti ira na noqu veimataivalu me ra lako sobu yani vei kemuni ka ra na sega ni tarova na ligadra ka ra na sega ni vakavotaka, io era na yaviti kemuni, ka laiva na iseleiwau me lutuki kemuni me yacova ni ko ni sa kawaboko vakadua.

    9 Ka raica, koi au ko Kitianai; na kovana ni asoqosoqo vuni i Ketianitoni; na isoqosoqo ka’u kila ni bvinaka na kena veicakacaka; ia sa tauyavu cmakawa sara ka qai vakadewataki sobu mai me yacovi keimami.

    10 Ka’u sa vola yani na ivola oqo vei iko Lakoniasi, ka’u nuitaka ni ko na solia mai na nomuni vanua kei na nomuni iyau kecega, ka me kua ni vakadavei na dra, me ra na qai rawata tale na noqu tamata oqo na nodra dodonu kei na nodra matanitu, o ira e ra a se tani mai vei kemuni ena vuku ni nomuni caka ca ena nomuni a bureitaka vei ira na nodra dodonu ni matanitu, au na sauma na cala e a vakayacori vei ira, ka vakavo ga kevaka ko ni vakayacora na ka oqo. Koi au ko Kitianai.

    11 Ka sa yaco ni sa taura na ivola oqo ko Lakoniasi sa kurabui vakalevu sara, ena vuku ni yalodoudou i Kitianai ena nona surevaka me taura na nodra vanua na Nifaiti, kei na nona vakarerei ira mai na tamata ka via sauma lesu na nodra vakacalai ko ira e a sega e vakacalai ira, ia era a avakacalai ira ga vakaira, ena nodra se tani ki vei ira na tamata caka ca, daubutako ka itovo vakasisila.

    12 Raica oqo, sa tamata dodonu ko Lakoniasi, na kovana, ka sega ni rawa me vakarerei wale tu ga mai na lalavaki kei na veivakarerei ni dua na adaubutako; ka sa sega ni via muria ko koya na veivakarerei i Kitianai na nodra kovana na daubutako; ia sa vakauqeta ga me ra masu vagumatua na nona tamata vua na Turaga ka kerea me vakaukauwataki ira ki na gauna era na lako sobu mai kina vei ira, ko ira na daubutako.

    13 Io, sa vakauta yani e dua na itukutuku ena kedra maliwa na tamata kecega, me ra soqoni vata mai ki na dua na vanua, vata kei ira na nodra yalewa kei na gone, na nodra qele ni sipi kei na qele ni manumanu kei na nodra iyau kecega, ka me vo tu ga yani na nodra qele.

    14 Sa vakarota me ra viria wavoki na bai ni nodra koro, ka me caka vakaukauwa sara. A sa vakarota na nodra mataivalu na Nifaiti kei na Leimanaiti, se ko ira kece ka sa wili vata kei ira na Nifaiti, me ra yadravi ira wavoki ena siga kei na bogi mai vei ira na daubutako.

    15 Io, sa kaya vei ira: Me vaka sa bula na Turaga, kevaka ko ni sa sega ni veivutunitaka na nomuni valavala ca kecega, ka masu vua na Turaga, ko ni na sega sara ni bula mai na ligadra na daubutako i Ketianitoni.

    16 Sa ka levu ka vakasakiti na vosa kei na parofisai i Lakoniasi ka ra sa rere kina na tamata; a ra sa solia na nodra igu taucoko me ra kitaka me vaka na vosa i Lakoniasi.

    17 Ka sa yaco ni sa lesia ko Lakoniasi na turaganivalu e so me ra lewa na nodra veimataivalu kecega na Nifaiti, me ra liutaki ira ena gauna era na lako sobu mai kina vei ira mai na lekutu ko ira na daubutako.

    18 A sa lesia e dua na turaganivalu levu me liu vei ira kece na turaganivalu, ka me nodra iliuliu levu na nodra veimataivalu kecega na Nifaiti, ka yacana ko aKitikitonai.

    19 A sa dau nodra ivalavala na Nifaiti me ra lesia na nodra turaganivalu levu, (ka vakavo ga ena gauna ni nodra caka ca), e dua ka tu vua na yalo ni vakatakila kei na aparofisai; e a dua gona kina na parofita levu ena kedra maliwa ko Kitikitonai oqo, ka sa turaganilewa levu talega vakakina.

    20 A ra sa kaya na tamata vei Kitikitonai: Mo masu mada vua na Turaga, ka me da qai lako cake mada ki na lekutu ki na veiulunivanua, me da valuti ira na daubutako ka vakarusai ira ga ena nodra vanua.

    21 Ia sa kaya vei ira ko Kitikitonai: E avakatabuya na Turaga; ni kevaka eda sa lakovi ira yani, ena bsoli keda na Turaga ki na ligadra; o koya gona me da vakarautaki keda ga ena loma donu ni noda vanua, ka soqoni ira vata kina na noda mataivalu ka da na sega ni lako yani vei ira, ia eda na waraka me ra valuti keda mai; ia me vaka sa bula na Turaga, ena soli ira dina ki ligada ko koya kevaka eda sa kitaka na ka oqo.

    22 Ka sa yaco ena ikatinikavitu ni yabaki, ena kena mua ni yabaki, a sa vakau oti na itukutuku i Lakoniasi ki na vanua taucoko, era sa taura na nodra ose, kei na nodra qiqi ni valu, kei na nodra bulumakau, kei na qele ni sipi kecega, kei na nodra qele ni manumanu, kei na vua ni nodra itei, kei na nodra iyau kecega, a ra sa lako yani ena yaudolu kei na yaudolu vakatini, me yacova ni ra sa tadu kece yani ki na vanua sa digitaki me ra soqoni vata kina ka taqomaki ira kina mai vei ira na nodra meca.

    23 Ia sa digitaki tu na vanua ko Saraemala, kei na vanua ena kedrau maliwa na vanua ko Saraemala kei Vanuasautu, io, me yacova yani na kedrau iyalayala ni vanua ko Vanuasautu kei na vanua ko Vanualala.

    24 Era sa udolu vakavuqa na tamata ka ra vakatokai me Nifaiti, era sa soqoni vata yani ki na vanua oqo. A sa vakarota ko Lakoniasi me ra soqoni vata yani ki na vanua ena ceva, ena vuku ni cudru levu sa cudruvi tu kina na avanua ki na vualiku.

    25 Era sa soqoni vata kece yani ki na dua ga na vanua, ka ra kumuni vata me ra dua na mata tamata, ka viribaiti ira vakaukauwa mai vei ira na nodra meca; era sa vakabauta na vosa ka a vosataka ko Lakoniasi, ka ra sa veivutunitaka kina na nodra ivalavala ca kecega; era sa cabora cake na nodra masu vua na Turaga na nodra Kalou, me avakabulai ira ena gauna era na mai valuti ira kina ko ira na nodra meca.

    26 Era sa rarawa vakalevu sara ena vukudra na nodra meca. A sa vakaroti ira ko Kitikitonai me ra bulia na veimataqali aiyaragi kecega ni ivalu, io me levu tu na nodra iyaragi, na isasabai kei na ivakaruru, me vaka na kedra icakacaka sa vakarota ko koya.