3 Nifai 4
    iVakamacala e botona e ra
    Theme

    Wase 4

    Era sa vakadrukai ira na daubutako i Ketianitoni na nodra veimataivalu na Nifaiti—Sa vakamatei ko Kitianai, ka kuna na kena isosomi ko Semanaraia—Era sa vakacaucautaka na Turaga ko ira na Nifaiti ena vuku ni nodra qaqa. Rauta na 19–22 S.K.

    1 Ka sa yaco ni sa voleka me cava na ikatinikawalu ni yabaki, era sa vakavakarau ki na ivalu na mataivalu ni daubutako, ka lako vakasauri sobu mai na veidelana kei na veiulunivanua, kei na lekutu, kei na nodra veikoro ni valu kei na nodra veivanua vuni, era sa lako yani ka taura na veivanua ki na ceva kei na vanua ki na vualiku, io era sa taura na vanua taucoko era sa avakalala tu na Nifaiti, kei na veikoro ka ra sa lala tu.

    2 Ia raica, sa sega na manumanu kila se na manumanu ni vanua me laukana ena veivanua era sa vakalala tu na Nifaiti, a sa sega e kea na manumanu me ra kania na daubutako, vakavo ga na manumanu era tu sara mai na lekutu.

    3 Ka ra sega ni bula rawa na daubutako ni ra sa via kana, ka vakavo ga ke ra laki vakasasa ki na lekutu; ni ra sa laiva na Nifaiti me laladidi tu na nodra vanua, ni ra sa kauta yani na nodra qele ni sipi kei na nodra qele ni manumanu kei na nodra iyau kecega, ka ra duavata yani ki na vanua ko ya.

    4 A sa sega tale na sala e vo me ra vakacaca ka rawa kakana mai kina na daubutako, ka sa vo walega me ra sa vala kei ira na Nifaiti; era sa lewevuqa sara na Nifaiti ni ra sa tiko vata ga ena dua na vanua, era sa vakarautaka tu na kakana, na ose kei na bulumakau, kei na qele ni manumanu ena kedra veimataqali kecega, me ra bula tiko kina ena vitu na yabaki, na gauna era sa nuitaka tu me ra vakarusai ira kina na daubutako mai na dela ni vanua; ka sa mai cava kina na ikatinikawalu ni yabaki.

    5 Ka sa yaco ena ikatinikaciwa ni yabaki sa raica kina ko Kitianai ni sa dodonu me ra lako yani ka valuti ira na Nifaiti, ka ni sa sega tale ni dua na sala me ra na bula rawa kina ka vakavo ga me ra ia na vakacaca ka butako ka laba.

    6 Era sa sega ni doudou me ra dui lako yani e dela ni vanua ka tei sila, de ra na lako yani na Nifaiti ka yaviti ira; o koya sa vakaroti ira kina na nona veimataivalu ko Kitianai me ra lako yani ka vala kei ira na Nifaiti ena yabaki oqo.

    7 Ka sa yaco ni ra sa lako yani ena ikaono ni vula me ra vala; ka raica, sa levu ka rerevaki na siga era a lako mai kina me ra vala; era sa vakaisulu ena nodra isulusulu na daubutako; a sa vau na tolodra ena kuli ni sipi, ka ra sa lomoci ena dra, sa tasi na uludra, ka vakaisala ena peleti ni ulu; ia sa ka levu ka rerevaki na kedra irairai na mataivalu i Kitianai, ena vuku ni nodra iyaragi, kei na nodra sa boro tu ena dra.

    8 Ka sa yaco ni ra sa raici ira na mataivalu i Kitianai ko ira na veimataivalu ni Nifaiti, era sa bale vakatoboicu ki na qele, ka ra laveta cake na nodra tagi vua na Turaga na nodra Kalou, me taqomaki ira ka vakabulai ira mai na ligadra na nodra meca.

    9 Ka sa yaco ni ra sa raica mai na ka oqo, na mataivalu i Kitianai era sa marau ka kaila ena domolevu, raica era sa nanuma ni ra sa bale sobu na Nifaiti ni ra sa rerevaka na nodra mataivalu.

    10 Ia era sa cudru sara ena ka oqo, ni ra sa sega ni rerevaki ira ko ira na Nifaiti; ia era sa arerevaka ga na nodra Kalou ka ra masuti koya kina me taqomaki ira; o koya gona, ena gauna era sa cicivi ira yani kina na mataivalu i Kitianai, era sa vakarau tu mai me ra sotavi ira; io, era sa vorati ira mai ena kaukauwa ni Turaga.

    11 A sa tekivu na ivalu levu ka rerevaki oqo ena ikaono ni vula; a sa ka levu ka rerevaki na ivalu ko ya, io, na veivakamatei levu e yaco kina, ka sa sega mada ni se bau kilai vakadua e dua na veivakamatei levu vakaoqo ena kedra maliwa na kawa i Liai, me tekivu mai na gauna era biuti Jerusalemi mai kina.

    12 E dina ga sa aveivakarerei ka vosabubului tu ko Kitianai, raica, era sa qaqa sara na Nifaiti ka ra sa vakasuka lesu kina mai vei ira.

    13 Ka sa yaco ni sa vakaroti ira na nona mataivalu ko aKitikitonai me ra cici muri ira me yaco sara ki na iyalayala ena lekutu, ka me kua sara ni ra vakabula e dua era toboka rawa e gaunisala; o koya era sa cici muri ira yani kina ki na iyalayala ena lekutu ka vakamatei ira, me yacova ni ra sa vakayacora me vaka sa vakarota vei ira ko Kitikitonai.

    14 Ka sa yaco ni ko Kitianai, ka sa tu ka vala vakaukauwa mai, a sa qai cemuri ni sa dro; ia me vaka ni sa oca tu ena kaukauwa ni nona vala, a tobo kina ka vakamatei. Ka sa vakaoqori na itinitini i Kitianai na daubutako.

    15 Ka sa yaco ni ra sa lesu tale mai na mataivalu ni Nifaiti ki na nodra vanua ni tataqomaki. Ka sa yaco ni sa takali yani na ikatinikaciwa ni yabaki, ka ra sa sega ni lesu tale mai na daubutako me ia na vala; era sa sega tale ga ni lesu mai ena ikaruasagavulu ni yabaki.

    16 Ia ena ikaruasagavulu kadua ni yabaki era sa qai lako sobu mai ka sega ni ra mai vala, ia era mai vakavolivolita ga na veiyasana ka buki druadrua vei ira na tamata i Nifai; mai na nodra vanua ka sogoti ira ena veiyasana kecega, ka sogota na veika kece era vinakata, me na rawa kina me ra soro, me vaka na nodra gagadre.

    17 Era a sa lesia oti e dua na nodra iliuliu vou ka yacana ko Semanaraia; ia sai Semanaraia ka vakarota me caka na buki druadrua oqo.

    18 Ia raica, sa daumaka sara oqo vei ira na Nifaiti; ka ni na sega ni rawa vei ira na daubutako me ra buki druadrua vakabalavu sara me dua kina na kena leqa vei ira na Nifaiti, me baleta ni sa levu sara na kedra kakana era sa maroroya tu,

    19 Ia sa lailai sara na kedra kakana na daubutako; sa sega na ka e tu vei ira, era sa bula voli ga ena lewe ni manumanu era rawata mai na loma ni lekutu;

    20 Ka sa qai yaco ni sa kunekune dredre sara na amanumanu kila ena loma ni lekutu, ka ra sa voleka kina ni mate na daubutako ena viakana.

    21 A ra sa daulako yani na Nifaiti ena siga kei na bogi ka sikiti ira na nodra mataivalu, ka mokuti ira ena veiyaudolu kei na yatini na udolu.

    22 Ka ra sa qai gadreva kina na tamata i Semanaraia, me ra vakasuka mai na nodra inaki, ena vuku ni veivakarusai levu e lakovi ira tiko mai ena bogi kei na siga.

    23 Ka sa yaco ni sa vakaroti ira na nona tamata ko Semanaraia me ra vakasuka mai na nodra buki druadrua, ka me ra lako sara ki na veiyasana yawa sara ni vanua ki na vualiku.

    24 Ia oqo, me vaka ni sa kila ko Kitikitonai na nodra inaki, ka sa kila tale ga na veivakamatei levu sa yaco oti ena kedra maliwa, kei na nodra malumalumu ni sa lailai na kedra kakana, o koya gona sa vakatalai ira kina na nona mataivalu ena bogi ka tuvai ira me ra sogota na sala era na dro yani kina.

    25 Era sa vakayacora na ka oqo ena bogi, ka ra lako siviti ira yani na daubutako, ia me na qai kida na mataka, ni ra sa lako yani na daubutako, era sa na sota kei ira na mataivalu ni Nifaiti mai liu ka vakakina e muri.

    26 A sa sogoti tale ga na vanua me ra dro kina na daubutako ka ra tiko ena ceva. A sa vakayacori na ka kece oqo ena ivakaro i Kitikitonai.

    27 A sa vica vata na udolu era sa soli ira yani vakavesu vei ira na Nifaiti, ia era sa vakamatei na kena vo.

    28 A sa vesu ko Semanaraia, na nodra iliuliu, ka vakaliligi ena dua na vunikau, io, ena tuvukana sara e cake me yacova ni sa mate. Ia ni ra sa vakaliligi koya me yacova sara ni sa mate, era sa taya sobu na vunikau ki na qele, ka kaya ena domolevu:

    29 Me maroroi ira mada na nona tamata na Turaga ena nona yalododonu kei na yalosavasava, me ra vakabalei kina ki na qele ko ira kece sa segata me ra vakarusai ira ena vuku ni kaukauwa kei na vei isoqosoqo vuni, me vaka sa vakabalei ki na qele na tamata oqo.

    30 Era sa reki ka kaya ena dua ga na domo: Me ra taqomaki ira mada na tamata oqo ena yalododonu na aKalou i Eparaama, kei na Kalou i Aisake, kei na Kalou i Jekope, ena gauna kecega era sa bmasuta kina na yaca ni nodra Kalou me taqomaki ira.

    31 Ka sa yaco ni ra sa tabalaka cake na domodra ena yalovata, ka ia na sere ni avakavinavinaka, vua na nodra Kalou ena vuku ni ka levu sa vakayacora vei ira, ni sa maroroi ira mai na ligadra na nodra meca.

    32 Io, era sa kaci ka vaka: aOsana ki vua na Kalou sa Cecere Sara. Ka ra sa kacivaka: Me kalougata na yaca ni Turaga na Kalou bQaqa, na Kalou sa Cecere Sara.

    33 Sa vuabale na nodra marau, ka sa drodro vakayauyau na wai ni matadra, baleta na nona vinaka cecere na Kalou ena nona vakabulai ira mai na ligadra na nodra meca; era sa kila tale ga ni ra sa sereki mai na dua na rusa tawa-vakaiyalayala ni ra sa veivutuni ka yalomalumalumu.