1 Ut anajwan kik’ulman naq chirix naq li Kristo kixye li k’a’aq re ru a’in, kixch’olob’ a’an chiru li ch’utch’uukil tenamit, ut kixch’olob’ chixjunil li k’a’aq re ru chiruheb’, li nim jo’ ajwi’ li ka’ch’in.

2 Ut kixye: Li loq’laj hu a’in, li moko kiwan ta eerik’in, li Yuwa’b’ej kixtaqla naq tink’e eere, xb’aan naq xchaab’ilal xna’leb’ a’an naq taak’ehe’q reheb’ li tasal tenamit li toj te’wanq.

3 Ut kixch’olob’ chixjunil li k’a’aq re ru, chalen ajwi’ chaq sa’ xtiklajik, toj sa’ li kutan naq taachalq a’an sa’ xloq’al—relik chi yaal, chixjunil li k’a’aq re ru li taachalq chiru lix b’een li ch’och’, toj reetal ajwi’ naq taaha’ob’resiiq li k’a’ru yiib’anb’il wi’, chi k’a’jo’ xtiqwal, ut li ruchich’och’ taab’olob’aaq chanchan jun b’otb’ookil hu, ut li choxa ut li ruchich’och’ te’oso’q;

4 Toj reetal ajwi’ sa’ li xnimal ru ut roso’jikil kutan, naq chixjunileb’ li teepal, ut chixjunileb’ li junkab’al, ut chixjunileb’ li tenamit ut aatinob’aal te’xaqliiq chiru li Dios, re taaraqmanq aatin chirixeb’ xb’aan lix k’anjeleb’, ma useb’ malaj ink’a’ useb’—

5 Wi useb’, re wakliik chi yo’yo sa’ li yu’am li junelik nakana, ut wi ink’a’ useb’, re wakliik chi yo’yo sa’ li tojb’a-maak, chi ka’pak’al xxikikeb’, li jun chi junpak’al ut li jun chik chi junpak’al chik, jo’ chanru li uxtaan, ut lix tiikal ru na’leb’, ut li santilal li wan rik’in li Kristo, li kiwan naq toj maji’ natikla li ruchich’och’.

6 Anajwan ut ink’a’ naru natz’iib’aman sa’ li hu a’in yal ta jun miin raqal li k’a’aq re ru kixk’ut li Jesus chi yaal chiru li tenamit;

7 A’ut k’ehomaq reetal, sa’eb’ lix perel ch’iich’ laj Nefi wan xk’ihal li k’a’aq re ru kixk’ut chiruheb’ li tenamit.

8 Ut li k’a’aq re ru a’in kintz’iib’a, a’an xka’ch’inal li k’a’aq re ru kixk’ut chiruheb’ li tenamit; ut kintz’iib’a choq’ re li ajom naq taaruuq chi k’ame’k wi’chik re li tenamit a’in, chi chalenaq chaq rik’ineb’ laj Gentil, jo’ chanru li aatin kixye li Jesus.

9 Ut chirix naq ke’xk’ul a’in, li aajel ru naq te’xk’ul xb’een wa, re xyalb’al rix xpaab’aaleb’, ut wi taa’uxq naq te’xpaab’ li k’a’aq re ru a’in, rik’in a’an li k’a’aq re ru q’axal nim wi’chik ru taak’utb’esimanq chiruheb’.

10 Ut wi taa’uxq naq ink’a’ te’xpaab’ li k’a’aq re ru a’in, rik’in a’an li k’a’aq re ru xnimal ru taarame’q chiruheb’, choq’ xjitb’aleb’.

11 K’ehomaq reetal, ok raj we chixtz’iib’ankil, chixjunil li b’arwan tz’iib’anb’il chiruheb’ lix perel ch’iich’ laj Nefi, a’b’an li Qaawa’ kixye naq ink’a’, ut kixye: Tinyal rix xpaab’aaleb’ intenamit.

12 Jo’kan naq laa’in, aj Mormon, nintz’iib’a li k’a’aq re ru taqlanb’ilin wi’ xb’aan li Qaawa’. Anajwan ut laa’in, aj Mormon, nink’e xraqik inyehom, ut nin’ok wi’chik chixtz’iib’ankil li k’a’aq re ru taqlanb’ilin wi’.

13 Jo’kan ut, nawaj raj naq teek’e reetal naq li Qaawa’ chi yaal kixtzoleb’ li tenamit, chiru xnumik oxib’ kutan; ut chirix a’an kixk’ut rib’ chiruheb’ chi kok’ aj xsa’, ut kixjachi li kaxlan wa chi kok’ aj xsa’, ut kirosob’tesi, ut kixk’e reheb’.

14 Ut kik’ulman naq a’an kixtzoleb’ ut kik’anjelak chiruheb’ lix kok’aleb’ li ch’utch’uukil tenamit li yeeb’il wi’ resil, ut kirach’ab’ ru’ujeb’ li raq’, ut eb’ a’an ke’xye reheb’ lix yuwa’eb’ xnimal ru ut sachb’a-ch’oolejil na’leb’, li naxq’ax ajwi’ xnimal ru li kixk’utb’esi chaq a’an chiru li tenamit; ut kirach’ab’ ru’uj raq’eb’ re te’ruuq chi aatinak.

15 Ut kik’ulman naq chirix naq ak kitaqe’ sa’ choxa—li xkab’ sut naq kixk’ut rib’ chiruheb’, ut ak xko’o chaq rik’in lix Yuwa’, chirix xk’irtesinkil chixjunileb’ lix yaj, ut lix yeeq roq, ut xteeb’al rilob’aaleb’ lix mutz’ ut risinkil xtz’apb’al xxikeb’ lix tz’ap xikeb’, ut chirix ajwi’ xb’aanunkil li k’iila paay chi k’irtesink sa’ xyanqeb’, ut xwaklesinkil jun winq sa’ xyanqeb’ chaq li kamenaq, ut chirix xk’utb’al chaq lix wankil chiruheb’, ut chirix naq kitaqe’ rik’in li Yuwa’b’ej—

16 K’ehomaq reetal, kik’ulman wulajaq chik naq li k’iila tenamit ke’xch’utub’ rib’, ut ke’ril ut ke’rab’i ajwi’ li kok’al a’in; relik chi yaal, eb’ li k’uula’al ke’xte ajwi’ xtz’uumaleb’ re ut ke’xye sachb’a-ch’oolejil aatin; ut kitaqlaman naq moko taatz’iib’amanq ta li k’a’aq re ru ke’xye, re naq maajun winq taatz’iib’anq re.

17 Ut kik’ulman naq eb’ li tzolom li kixsik’eb’ chaq ru li Jesus, chirix li hoonal a’an ke’ok chi kub’sink ha’ ut chixtzolb’al jo’ k’ihal li ke’chal rik’ineb’; ut jo’ k’ihaleb’ li ke’kub’e xha’ sa’ lix k’ab’a’ li Jesus ke’nujak rik’in li Santil Musiq’ej.

18 Ut naab’al reheb’ ke’ril ut ke’rab’i k’a’aq re ru ink’a’ naru xyeeb’al, li moko naru ta xtz’iib’ankil xb’aan li chaq’rab’.

19 Ut ke’xk’ut li na’leb’, ut ke’k’anjelak chiruheb’ lix komon chirib’ileb’ rib’; ut kiwan chixjunil li k’a’aq re ru reheb’ sa’ komonil sa’ xyanqeb’, ut li junjunq chi winq naxb’aanu li k’a’ru tiik, li jun re li jun chik.

20 Ut kik’ulman naq ke’xb’aanu chixjunil li k’a’aq re ru jo’ chanru ajwi’ naq kixtaqlaheb’ li Jesus.

21 Ut eb’ li ke’kub’e xha’ sa’ lix k’ab’a’ li Jesus, lix iglees li Kristo ke’yehe’ re.