1. Tons cbanteltzan aj tzʼiban maj: ¡Bitzana, aya aj miban alan, aya aj ntiʼ pokʼsaʼna cʼwaʼlbaj! ¡Chi bitzana wena, bix kʼantz twiʼya tucʼ tchi-al, aya que mi jtoja tena tuʼn tpokʼsana tiʼj jun cʼwal! Tuʼnj máske tal aj mintiʼ tak xjal bis taʼ cywitzkej aj najamna, chitzan Kajaw.

2. Tzʼoc más matijx tuʼna aj trancha, bix licʼan kej xbalan tuʼn cylamet tbentana tiʼj tjaya; miʼn tzʼoca aj miʼn xican, nimsantz tkan techa, bix cyuwsaʼn bajke tstacla.

3. Porque tzanx tuj bankʼabaj bix tuj ẍnayj oc cchʼiyala; bix ajke chelal itzʼj tiʼja oc ccyikʼal erens ajke nasyon, bix oc chi ankʼil cyuj tnam bis teʼ.

4. Miʼn baj tcʼuʼja, tuʼnj miʼn cub kʼot tchʼixwaya, bix miʼn jaw cʼasat tcʼuʼja nim. Tuʼnj miʼn cub kʼot tchʼixwaya; tuʼnj quelal tiʼj tcʼuʼja aj chʼixaw tiʼj kʼapojayil, bix aj icyʼlebil tiʼj kʼapojayil mi jtoj tuʼn tpon juntl el tiʼj tcʼuʼja, bix quelal tiʼj tcʼuʼja aj icʼbil tiʼja tuʼnj meba xuʼja.

5. Tuʼnj aj binchalteya, aj tchmila, atzan aj Kajaw te Ejército tbi; bix aj Clol teya, aj Sant te Israel, atzan tbi cocal aj Dios te cyakil twitz txʼotxʼ.

6. Porque tuʼnj icytzanj xuʼj oʼ cyaj coʼlan bix bis taʼ t-xew, ma txaqueta icyjo tuʼn Kajaw, bix tetzan xuʼjalalbaj kʼapoj, aj tel icʼana, chitzan Dios.

7. Tuj jun chʼin tyemp ẍcyaj nkʼoʼna, per tucʼ nim becyʼbijil cjawal wiʼna.

8. Tucʼ chʼin kʼoj xiʼ weʼwan nwitza tiʼja tuj jun rat, mas tuʼn nxtalbila njatz ncʼuja tiʼja, chitzan Kajaw aj Colal teya.

9. Porque icy icytzanj aʼ te Noe; icy tzan otxiʼ ntziyana que mi jtoj tun ticʼ juntl el twitz txʼotxʼ aj aʼ te Noé, icyxtzan otxiʼ ntziʼyana que mi jtoj chin jaw kʼojla tucʼala.

10. Porque chi bel naj cʼul bixke witz oc chelal kʼitjo, per atzan wecyʼ nbanajibila miʼn chel lakʼeʼ tiʼja tucʼ ntanmya, chitzan Kajaw que at tcʼuʼj tiʼja.

11. ¡Ayaj bis taʼ, kʼuchanmaj tuʼn kʼakab, bix tilx tib keʼ tcʼuʼj! bix lutzan luʼ, oc ckʼukbetlke t-xaka wuʼna cyuʼn cye yax cyiblal, bix cbantel tkʼukala wuʼna tuʼnj xak cyeʼyax bix chaʼx queʼyin.

12. Chi bantel tbentana wuʼna tuʼn jun xak chʼin cyeʼyax, bixke tlamel tjaya tuʼn jun xak cyeʼyax bix yoẍ queʼyin, bix cyakil tligara cbantel wuʼna cyuʼn xak cyeʼyax chi queʼyin.

13. Bix tzaʼnx cytenca tcʼwaʼla oc chocal xnakʼtzal tiʼj Kajaw; bix matijtzan tchi-al te cye tcʼwaʼla.

14. Tuj xtis ctela; lekʼch ctela tiʼj moybil, tuʼnj ntiʼ tchi tiʼja, bix tiʼj tnachal, tuʼnj miʼn tzul lakʼeʼ tiʼja.

15. Bix lutzan luʼ, tiʼj ax toclen cocal cychmon cyib ke contraryo tiʼja, bix nyaʼ tuʼn wecyʼ ntxocbila; alcyej ma tzʼoc tchmon tib tiʼja, cbel tzʼak tuʼn tlaja.

16. Bix lutzan luʼ, oʼ txiʼ nkʼoʼna tuʼn t-itzʼj txʼinol cʼuxbil tuʼn t-xupan tiʼj txa xkʼaʼl tuj kʼakʼ, bix tuʼn tetz tiʼn tmacbil te tbinchben; bix oʼtxiʼ nkʼoʼna tuʼn t-itzʼj jun kʼuchil te kʼuchal te.

17. Mijun macbil bann tiʼja jawna cjawal; bix cyakil akʼbaj ma jaw tiʼja tuj jwisyo, oc cbel tuʼna tuj sentens. Atzan cy-erens tmajan Kajaw, bix aj t-xtis tzajna wiʼja, chitzan Kajaw.