Scriptures
3 Nefi 15


Capítulo 15

Aj ley te Moisés cyaj juntl ley te t-xel. Aj kʼon te ley, el twitz. Ajke neʼl te juntl cʼoloj neʼl.

1. Bix banttzan taj tbajlen yolan Jesús, nxiʼ tqueʼyin tzaʼnx cytenca xjal, bix nxiʼtzan tmaʼn: Lutzan luʼ, ma cybintaya kej cosas i cub nxnakʼtzaʼna aj naʼxtak njaxa tucʼ Nmana; cyjaʼtzan jluʼ, alcyej cʼujlaʼnx tuʼn kej nyola, bix ma chi bant tuʼn, oc ccoletal wuʼna tuj mancʼbil kʼij.

2. Bix banttzan taj otak txiʼ tmaʼn Jesús kej yol ajo, cheba xiʼ tqueʼyin que atka juʼn cyxol nchi labantak, bix i kanan tiʼj cyxolx ti tkal cbantel tuʼn tiʼj tley Moisés; tuʼnj ntiʼ el cynicyʼ cyiʼj yol que ajke cosas te ojtxa otak chicyʼjo, bix cyakilkaj cosas otak chajtz tuj acʼaj.

3. Bix nxiʼ tmaʼn cye: Miʼn chi jaw labana tiʼj aj maʼ txiʼ nmaʼna cyeya cyiʼj cosas ojtxa otak chicyʼ bix cyakilkaj cosas otak chajtz tuj acʼaj.

4. Lutzan luʼ, cxel nmaʼna cyeya que oʼ tzʼel twitz aj ley xiʼ kʼot te Moisés.

5. Lutzan luʼ, a kina inx kʼon te ley, bix a kina bant tiʼj wuʼna tucʼ ntanmiya te Israel; cyjaʼtzan ten, aj ley ma tzʼel twitz wiʼja, tuʼnj oʼ chin nula tuʼn tel ley twitz; cyjaʼtzan jluʼ, oʼ tzʼel baj twiʼ.

6. Lutzan luʼ, miyaʼ ma chin nula kʼuchal te cye profetas; tuʼnj nicyʼpun aj ntiʼ ma tzʼel baj twitz wiʼja, ax toc cxel nmaʼna cyeya que cyakilka chelal baj twitz.

7. Bix noktzan tuʼnj xiʼ nmaʼna que aj ojtxatak otak tzicyʼ, ntiʼ nxiʼ nmaʼna que aj oʼ txiʼ kʼamet cyiʼjke cosas cyjaʼ cytzaj miyaʼ ax toc.

8. Tuʼntzanj lu luʼ, naʼx tel twitz cyakil aj bant tiʼj wuʼna tucʼ ntanmiya mas atzaj ley xiʼ kʼot te Moisés oc nnel baj twiʼ wiʼja.

9. Luluʼ, a kina aj ley bix spicyʼan. Cyqueʼyintza wiʼja, cyocxa tbanal asta oc tjapan baj twi, bix chiankʼiltzana, tuʼnj alcyej tbanal asta oc tjapan baj twi, cxel nkʼoʼna tankʼbil te junmajx.

10. Lutzan luʼ, maʼ txiʼ nkʼoʼna ke mandamyent cyeya; cycʼuʼnx, pwes, ke nmandamyenta. Bix atzanka leyjo bixke profetas, tuʼnj ax toc ncykʼamanta ax toc wiʼja.

11. Bix banttzan que aj tbajlen tkʼamaʼn Jesús ajke yol ajo, xiʼ tmaʼn cyekej aj cab laj otak jaw tsicʼoʼn:

12. Akaya nxjala tiʼj akʼuntl bix akaya jun spicyʼan tej tnam luʼ, que ajo ttxaʼpan tja José.

13. Bix lutzan luʼ, atzan nimak tnam jluʼ tiʼj cy-erensa; bix oʼ tzaj tkʼoʼn Mambaj cyeya.

14. Bix mi jun el oʼ tzaj tmaʼn Mambaj wecyʼ tuʼn tjatz nmaʼna cyeke cyermaniya tuj Jerusalén.

15. Tuj mi jun tyemp oʼ tzaj tkʼoʼn Mambaj mandamyent weya tuʼn nyolana cyiʼj txkantl cʼoloj xjal tuj ja te Israél, que oʼ txiʼ tiʼn tiʼjx aj tnam.

16. Atzan jluʼ tzaj tmaʼn Mambaj wecyʼ tuʼn t-xiʼ nmaʼna cye:

17. At txkantl nneʼla miyaʼ teʼ tuj cʼoloj cye neʼl luʼ; ax il tiʼj tuʼn cytzaj wiʼntla, bix chi bil tiʼj nwiʼya; bix cteltzan junx cʼoloj nel bix junx pastor.

18. Bix nok tuʼnj tcyiwal cyanma bix ntiʼ ocx cyocslaʼn wiʼja, ntiʼ el cynicyʼ tiʼj nyola; cyjaʼtzan jluʼ, o tzaj tkʼamaʼn Mambaj wecyʼ tuʼn mi nyolantla tiʼj ajo.

19. Mas ax toc aj cxel nmaʼna cyeya que oʼ tzaj tkʼoʼn Mambaj mandamyent wecyʼ, bix wecyʼtzan xel nmaʼna cyeya, que i el partiyiʼba cyiʼj nok tuʼn tlaj aj cynachal; cyjaʼtzan ten, nok tuʼn cynachal ntiʼ baʼn cyuʼn cyiʼja.

20. Bix ax toc cxel nmaʼna, que oʼ tzʼel tpartiyiʼn Mambaj txkantl cʼoloj cyiʼj; nok tuʼn tlaj cynachal que ntiʼ loʼn cyuʼn cyiʼjke.

21. Bix ax toc cxel nmaʼna que akaya al iʼj ẍin yolana; at txkantl nneʼla nyaʼ teʼ tuj cʼoloj te neʼl luʼ; il tiʼj tuʼn cytzaj wiʼntla, bix chi bil tiʼj nwiʼya; bix cteltzan junx cʼoloj bix junx pastor.

22. Bix ntiʼ sel cynicyʼ wiʼja, pwes ma tzʼocx cyocslaʼn que akaj xjal nyaʼ teʼ tuj ja te Israel; bix ntiʼ el cynicyʼ tiʼj que nok tuʼn aj cypacbabil cye aj xjal teʼ tuj ja te Israel oc chi meltzʼajel aj ke nya teʼ tuj ja te Israel.

23. Mix el cynicyʼ tiʼj aj t-xiʼ nmaʼna que txkantl neʼl chi bil tiʼj nwiʼya; mix el cynicyʼ tiʼj ajke xjal nyaʼ teʼ tuj ja te Israel miʼn cybinta nwiʼya nok alcye tyemp: que miʼn cub nyecʼan wiba cywitz sino oʼcx tuʼn Xewbaj Sant.

24. Bix lutzan luʼ, oʼ cybintaya nwiʼya bix ax oʼ chin noc cyqueʼyina; bix akaya nneʼla, bix sicʼoʼnkaya cyxolkaj aj oʼ tzaj tkʼoʼn Mambaj wecyʼ.