1. Bix banttzan que aj tbajlenxa tkʼamaʼn ke tyol, Jesús nnaʼjal meltzʼaj te acʼaj cyucʼ tzaʼnx cytenca xjal bix njakettzan juntl el ttziʼ, xiʼ tmaʼn: Miʼn chi xtisana tuʼntzan mi cyoca tuj xtis.

2. Tuʼntzanj tuʼn aj jwisya oc cyxtisana oc chocala tuj xtis; bix tuʼntzanj malbil aj chamalola tuʼn oc chi maletala te acʼaj.

3. Bix ¿Ti kuʼn ntila aj uẍ tocx tuj twitz termaniya, bix ntiʼ ntila aj biga tocx tuj teʼ?

4. Bixmo ¿tzaʼn xel tmaʼna te termaniya: Tzakpintza tuʼn tetz wiʼna aj uẍ tuj tbakʼ twitza; bix lutzan luʼ, at jun biga tocx tuj teʼ tbakʼ twitza?

5. ¡Xmeletzʼa! tnejal kʼiʼn etza biga tuj teʼ twitz; tons spicyʼantzan ctilabala tuʼn tetz tiʼna uẍ tuj twitz termaniya.

6. Miʼn txiʼ cykʼoʼna aj jun tiʼ tkal cyʼiwlaʼn cye chʼyan, mix tuʼn tcub cykʼoʼna cyeʼyax cywitz cuch; bala cyjel cybetzʼan tuʼn cykan bix chijawtz makʼtzʼaj bix oc chi bajal piẍj.

7. Cykanantza, bix xel kʼot cyeya; cyjayonxa bix ccanetal cyuʼna; chi kʼajta tuʼn cyocxa, bix cocax jakoʼn cywitza.

8. Pwes alcyej nkanan, ccʼametl; bix aj njayon, ncanet tuʼn; bix aj nkʼajt tuʼn tocx, nnocx jakoʼn twitz.

9. Bixmo ¿Alcye jun xinak at cyxola, que oc tkanan tcʼwaʼl tiʼj pan, jun xak xel kʼoʼnte?

10. ¿Bixmo cyiẍ ctzajal tkaʼnan, oc cxel kʼoʼn jun labjte?

11. Pwes ka ax toc nach akeye, baʼn chikʼona tbanal oyaj cye cycʼwaʼla, ¿Jnicyʼpuntzan ctzajal tkʼoʼn Kman taʼ tuj cyaʼj, ajke tbanal cosas cyekej nchi kanan tiʼj te?

12. Cyjaʼtzan ten aj nicyʼpun cyajbila aj tuʼn tbant cyuʼn xjal cyucʼala, ax icyxtzan cyeya tuʼn tbant cyuʼna cyucʼal, tuʼntzanj atzanj leyjo bixke profetas.

13. Cyocxa tuj tlamel ja nuch ttziʼ; porque matijxix twitz tlamel ja, bix matij tuj be aj nkoʼx tiʼn tuj najsbil, bix nimka nchocx tuj j-ajo;

14. Porque nuch twitz tlamel ja, bix neʼ twitzj be nxiʼ kʼin te ke tuj ankʼbil, bix niʼxakaj ncanet cyuʼn.

15. Cycwentanc cyiba cyiʼj slaʼj profetas, que chul tucʼ cyxbalan icytzan cye neʼl, bix tujxatzan akajo xoʼjke txʼuj.

16. Nok tiʼj cywitz celal cynicyʼa tiʼj, ¿Cyiʼntzaj uva tiʼj tchʼiʼxal, bix higo twiʼ tkan?

17. Tuj ax tuʼmal, tzaʼnx tenca tzeʼ tbanal ntakʼ tbanal twitz, atzan jun tzeʼ nach ax nach twitz ntakʼ.

18. Jun tzeʼ tbanal nlay tzʼel jun twitz nach, mix jun tzeʼ nach nlay tzʼel jun twitz baʼn.

19. Cyakilj tzeʼ ntiʼ ntakʼ twitz tbanal njaw txʼemat bix nnocx tuj kʼakʼ.

20. Cyjaʼtzan, nok tiʼj cywitz celal cynicyʼa tiʼj.

21. Nya cyakilkaj ntzaj cymaʼn wecyʼ: Tat, Tat, chocax etzbil tuʼcʼ Dios tuj cyaʼj; sino que oʼcxaj nbant tuʼn aj tajbil Nmana taʼ tuj cyaʼj.

22. Nimke chi kʼamal tiʼj tuj kʼij ajo: Tat, Tat, ¿naʼx kkʼamantiya tiʼj tbiya, bix tiʼj tbiya naʼx t-xiʼ kxoʼna juʼẍ, bix naʼx cybant kuʼna, tuj tbiya, nim binchben nim t-xiʼlen?

23. Tons chajal ntzakʼ weʼna: Mi jtoja tzʼoc nqueʼyina cywitza; cyel lakʼeʼya wiʼja, akaya binchal tnachal.

24. Cyjaʼtzan ten, alcyej ma tbinta kej maʼ txiʼ nmaʼna, bix cbantel tuʼn, bix cocal mojbat tucʼ jun xjal aj jaw tbinchan jun tja tibaj jun xak:

25. Bix ntzajtzan jbal bix ntzaj kʼakab, bix nxumantzanke cykʼikʼ, bix nchoctzan tintzʼj tiʼj ja; bix ntiʼ cub, tuʼnj binchaʼntak tibaj xak.

26. Bix cyakil aj ma tbinta nyola ajo bix mi ma bant tuʼn, oc cocal mojbat tucʼ jun xjal aj junmajx mi loʼn tuʼn que cub tbinchan tja tibaj txatzʼaʼn:

27. Bix ntzajtzan jbal, kʼakab, bix nxumantzanke cykʼikʼ, bix nchoctzan tintzʼj tiʼj ja; bix cub xitj, bix matijxix tcublen tilj.