1. E teianei, e taku au taeake akaperepere, kua tatau akenei au i taua au mea nei kia kite kotou i te au koreromotu a te Atu ra, tana i papau ki te ngutuare katoatoa o Iseraela ra.

2. E nana oki ïa i akakite ki te ngati Iuda ra, na roto i te vaa o tona ra au peroveta tapu, mei muatangana maira, i tera uki i tera uki, e tae roa atu ki te tuatau e akaokiiaʼi ratou ki te akonoanga tika, e ki te anana a te Atua ra, kia akaputuputuia ratou ki to ratou enua ipukarea, e e akanooia ratou ki to ratou au enua ravarai i taputouia ra.

3. I na, e te au taeake akaperepere, kua tuatua atu au kia kotou i taua au mea nei kia mataora e kia akateitei kotou i to kotou upoko e tuatau ua atu, no te akameitakianga ta te Atu ta te Atua, ka oronga mai ki ta kotou au tamariki.

4. Kua kite oki au e, kua kimi pakari tetai pae o kotou kia kite i te au mea te ka tupu a muri atu; i kite ei au e, kua kite katoa kotou e, ka pe ua atu to tatou au kopapa i te mate, e akara ra tatou ki te Atua i to tatou au kopapa.

5. I na, kua kite au e, kua kite kotou e, ka akakite mai aia iaia uaorai i te kopapa nei ki to Ierusalema ra, no reira mai tatou ra; e mea tika oki kia tae aia ki rotopu ia ratou ra, e mea tika oki i Tei Anga i te au mea ravarai, kia akatika aia kia tukuia aia ki raro ake i te tangata nei i te kopapa nei, e kia mate oki no te tangata katoatoa oki, kia kauraro oki te tangata iaia.

6. E no te mea kua tae mai te mate ki runga i te tangata katoatoa ra kia tika te ravenga aroa a Tei Anga i te au mea ravarai; kia tae mai te mana o te tuakaouanga e tikai; no te ingaanga o te tangata e tae mai ei te tuakaouanga, e no te ara oki i tae mai ei te ingaanga o te tangata ra; e no te ingaanga oki o te tangata i tipu keia ratou i te aroaro o te Atu ra.

7. E teianei, kia riro te tarangaara ei mea openga kore e tikai; naringa kare te reira i te tarangaara openga kore, kare e tika i teia kopapa pe ua kia riro ei mea pe kore; e ka vai ua mai te utunga mua tei tae ki runga i te tangata nei, e tuatau ua atu. E naringa kua akapera, ka pe ua atu e ka pueu rikiriki ua atu teianei kopapa i roto i te one ra, e kare ïa e tu akaou mai.

8. E te pakari o te Atua e, e tona aroa, e tona meitaki! I na oki, naringa kare te kopapa e tu akaou mai, ka riro to tatou au vaerua ki taua angela ra tei topa mei mua mai i te aroaro o te Atua mutu kore ra, e tei riro oki ei tiaporo, e kare oki aia e tu akaou mai.

9. E kua riro to tatou vaerua mei iaia te tu, ei tiaporo, e ei angela oki na te tiaporo, kua tipu keia i te mata o to tatou Atua, e kua noo ki o te metua o te au pikikaa, i roto i te aue maata mei iaia te tu; koia ïa, ki taua mea tei pikikaa i to tatou nga metua mua ra, e tei akariro iaia uaorai mei te angela o te mārama ra, e tei tuku ki te tamariki a te tangata i te au ravenga muna, e te ta tangata, e te au angaanga muna e te poiri ra.

10. E te meitaki maata o to tatou Atua e, ko tei akatupu i te ravenga e oraʼi tatou i te rima o taua taae rikarika ra; koia ïa, ko taua taae ra, ko te mate e ko ade, tei tuatuaia e au, ko te mate o te kopapa, e te mate katoa o te vaerua.

11. E no te ravenga ora a to tatou Atua ra, Tei Tapu i Iseraela nei, e tuku mai ei te mate i taku i tuatua ra, koia oki, te mate o te kopapa nei, ka tuku ïa i tona ra au tangata mate; ko taua mate ra, ko te menema ïa.

12. E te mate taku i tuatua ana, koia oki te mate o te vaerua, ka tuku mai ei aia i tona ra au tangata mate; ko taua mate vaerua ra, ko ade ïa. E tenana, kia tuku mai te mate, e ko ade katoa i to raua aronga mate, e kia tuku mai oki ade i tona au vaerua i tapekaia ra e tikai; e ka tuku mai oki te mate i tona au kopapa i tapekaia ra e tikai; e e akaokiia te vaerua ki te kopapa e te kopapa ki te vaerua; e tupu oki te reira na roto i te mana o te tuakaouanga o Tei Tapu i Iseraela nei.

13. Aue te meitaki o te ravenga a to tatou Atua! E tuku oki te paradaiso a te Atua i te au vaerua o te aronga tuatua tika ra, e e tuku mai oki te menema i te au kopapa o te aronga tuatua tika ra; e e akaoki akaouia te vaerua ki te kopapa; e riro te tangata katoatoa ei mea pe kore, ei mea mate kore, e e tangata ora, ma te kite mou, mei to tatou i te kopapa nei; e riro ra to tatou kite ei kite mou ra.

14. E tenana, ka kite tatou i ta tatou au ara katoatoa, e to tatou au tu viivii, e to tatou tu taaka ua; e ka kite oki te aronga tuatua tika i to ratou mataora, e ta ratou tuatua tika, i akakakauia oki ki te viivii kore, koia oki te kakau o te tuatua tika ra.

15. E kia tu mai te tangata katoatoa mei te mate mua, ki te ora, e kua riro ratou ei kopapa pe kore, ka tu ratou ki mua i te akavaanga a Tei Tapu i Iseraela nei e tikai; ei reira e tae mai ei te akavaanga, e ka akavaia ratou kia tau ki te akavaanga tapu a te Atua e tikai.

16. E te ora ra te Atu, kua tuatua mou maira oki te Atu ko te Atua i te reira, e ko tana tuatua mutu kore ïa, te ka kore rava e ngaro, ka tiratiratu ua atu rai te aronga tuatua tika, e ka viivii ua atu rai te aronga viivii ra; e teinei, ko tei viivii ra, ko te tiaporo ïa e tana au angela; e ka uriia ratou ki vao i te ai mutu kore i akonoia no ratou; e to ratou mamae, mei to te roto ai e te teio ra ïa, ko tei ka ua rai tona mura e tuatau ua atu, e kare oki e openga.

17. Aue te meitaki e te tuatua tika a to tatou Atua e! E akatupu oki aia i tana au tuatua katoatoa, e no roto mai ïa i tona vaa e ka akatikaia rai tana au ture e tikai.

18. Ina ra, ka akara ki te aronga tuatua tika, ko te aronga tapu o Tei Tapu i Iseraela nei, ko tei akarongo i Tei Tapu i Iseraela nei, ko tei akakoromaki i te au timataanga o teianei ao, e tei kore oki i anoano i te au mea akama o te reira ra; e noo ia ratou i te basileia o te Atua tei akonoia mei te akatumuanga mai o teianei ao no ratou, e ki oki ratou i te mataora e tuatau ua atu.

19. E te maata o te aroa o to tatou Atua, e Tei Tapu i Iseraela nei! E akaora oki aia i tona ra aronga tapu i taua taae rikarika ra, koia oki te tiaporo, e te mate, e ko ade, e taua roto ai e te teio ra, koia oki te mamae openga kore ra.

20. E te tu tapu maata o to tatou Atua e! Kua kite oki aia i te au mea katoatoa, e kare rava tetai mea tei kore i kitea e ïa ra.

21. E tae mai aia ki te ao nei kia ora te au tangata iaia, kia akono ratou i tona ra reo; i na oki, kua akakoromaki aia i te mamae o te au tangata katoatoa, koia oki, te mamae o te au tangata ravarai, te au tane, e te au vaine, e te au tamariki katoa i roto i te ngutuare o Adamu ra.

22. Kua akakoromaki aia i te reira kia tae te tuakaouanga ki te au tangata katoatoa kia tu ratou i mua i tona ra aroaro i te rā maata o te akavaanga ra.

23. E kua akaue maira oki aia kia tataraara te au tangata katoatoa e tikai, e kia bapetizoia na roto i tona ingoa, ma te akarongo papu i Tei Tapu i Iseraela nei; e kia kore ratou e akapera, kare ratou e akaoraia i roto i te basileia o te Atua.

24. E kia kore ratou e tataraara e e akarongo i tona ingoa, e e bapetizoia i tona ra ingoa, e e akakoromaki kia tae ki te openga ra, ka araiia ratou; te na ko maira oki te Atu ra ko te Atua, ko Tei Tapu i Iseraela nei.

25. Kua tuku mai oki aia i te ture; mei te mea kare e ture, kare katoa e utunga; e mei te mea kare e utunga, kare katoa e akaapaanga; e mei te mea kare e akaapaanga, ka rauka ia ratou te aroa maata o Tei Tapu i Iseraela nei na roto i te tarangaara; kua akaoraia oki ratou e tona ra mana.

26. Na roto i te tarangaara i peke atu ei te utunga o tana ra tuatua tika i te au tangata i kore i kite i te ture ra, kia ora ratou i taua taae rikarika, koia oki te mate, e ko ade, e te tiaporo, e te roto ai e te teio ra: koia oki te mamae mutu kore; e ka akaokiia ratou ki te Atua ki tei oronga mai i te ao no ratou ra, ki Tei Tapu i Iseraela nei.

27. Aue oki aia ko tei kite i te ture ra, e te au akaueanga a te Atua ra, mei ia tatou e kite nei, e kare aia e akono, e e ope tona puke rā i te kopapa nei i te rave i te au mea puapinga kore, e turanga rikarika oki tona.

28. E te ravenga pikikaa a tei kino ra e! E te puapinga kore, e te apa, e te neneva o te tangata nei. Kia apiiia ratou, e manako ratou e, e aronga pakari ratou; e kare oki ratou e akarongo ki te ako a te Atua, no te mea kua akapae ratou i te reira i te manako anga e, kua kite takere ratou, e no reira, e mea neneva to ratou pakari, kare oki ratou e puapingaia i te reira. E ka mate oki ratou.

29. E mea meitaki ra te kite, me akono ratou i te ako a te Atua.

30. Aue oki to tei apinga nui, e te tangata apinga nui i te au mea o teianei ao. No ta ratou apinga nui e akavaavaaʼi ratou i tei ngere ra, e kuatakinga kino ratou i tei maru, e te vai ua nei rai to ratou ngakau i runga i ta ratou au apinga, i riro ei ta ratou au apinga ei Atua no ratou. E i na, ka riro atu ta ratou au apinga e ratou katoa oki.

31. E aue te taringa turi tei kore e akarongo ra, e pou ratou i te mate.

32. Aue oki te matapo tei kore e akara ra, e mate katoa ratou.

33. Aue oki te peritome koreia o te ngakau, na te kite o ta ratou au ara e pāpā ia ratou i te ra openga ra.

34. Aue oki te tangata pikikaa, ka uriia aia ki raro i ade ra.

35. Aue oki tei ta ua i te tangata ka mateia aia.

36. Aue oki te aronga akaturi e; e uriia ratou ki raro i ade ra.

37. Aue oki te aronga akamori idolo e, ka mataora te tiaporo o te au tiaporo ia ratou ra.

38. Koia mou, e aue oki te aronga katoatoa e mate i ta ratou au ara, e oki atu ratou ki te Atua ra, e e akara oki i tona ra mate, e e vaio uaia ratou i ta ratou au ara.

39. E taku au taeake akaperepere e, E akamaara kotou i te rikarika maata i te ara i te Atua Tapu ra, e te rikarika oki i te oronga anga atu ia kotou ki te akanauruanga a tei pikikaa ra. E akamaara kotou e, ko te inangaro tei akamouia ki runga i te au mea o te kopapa nei, ko te mate ïa; e ko te inangaro tei akamouia ki te au mea o te Vaerua ra, ko te ora ïa.

40. E taku au taeake akaperepere e, e akarongo mai ana i taku nei tuatua. E akamaara i te meitaki o Tei Tapu i Iseraela nei. Eiaa ra kotou e tuatua e, kua tuatua au i te au tuatua akaapa kia kotou na; no te mea, me akapera kotou, kua patoi kotou i te tuatua mou ra; kua tuatua oki au i te tuatua a Tei Anga ia kotou na. Kua kite oki au e, kua akaapa te tuatua mou i te au mea viivii katoatoa ra, kare ra te aronga tuatua tika e mataku i te reira, no te mea kua inangaro ratou i te tuatua mou, e kare ratou e ngaueue.

41. E teianei, e taku au taeake akaperepere e, e aere mai ana ki te Atu ra, ki Tei Tapu. E akamaara kotou e, kua tika tona au aerenga. I na, kua kokota te arataa no te tangata nei, e tika atura i mua iaia, e ko te tiaki ngutupa ra, ko Tei Tapu ïa i Iseraela nei, e kare aia e tuku i te tavini ki reira ra; e kare oki e mataara ke, mari ra, na taua ngutupa ra; e kare aia e vare, no te mea ko te Atu ra ko te Atua tona ingoa.

42. E ko tei topapa, e kiritiia ïa kiaia; e te aronga pakari, e tei apiiia, e tei apinga nui ra, ko tei akatietie no to ratou pakari, e to ratou kite, e ta ratou apinga nui, ko ratou ïa tana e riri ra; e me kore ratou e akaruke i te reira au mea, e e manako ratou ia ratou uaorai e, e tangata kite kore i mua i te Atua, e e taakaaka ia ratou uaorai kia akaaka rava, kare aia e kiriti i te pa ia ratou.

43. E uunaia te au mea o te aronga pakari e te aronga karape ia ratou e tuatau ua atu; koia ïa, ko te mataora i akonoia no te aronga tapu ra.

44. E taku au taeake akaperepere e, e akamaara i taku nei tuatua. I na, te kiriti nei au i toku kakau, e te ruru nei au i te reira ki mua ia kotou na. E te pure atu nei au ki te Atua o toku nei ora, kia akara mai aia iaku ki tona ra mata; ei te ra openga ra, kia akavaia te tangata katoatoa ki ta ratou uaorai angaanga, ka kite kotou e, kua kite mai te Atua o Iseraela ra e, kua ruru atu au i to kotou au kino iaku nei, e te tu nei au i mua iaia ma te kaka, e kua ma oki au i to kotou toto.

45. E aku au taeake akaperepere e, ka akaruke ana kotou i ta kotou au ara; ka ruru atu ana kotou i te vivi na tei anoano kia tapeka ia kotou kia mou, ka aere mai ana ki te Atua, koia te papa o to kotou ora.

46. E akateateamamao ia kotou uaorai no taua rā maata ra, e tukuiaʼi te meitaki ki te aronga tuatua tika ra; koia oki, te rā akavaanga, kia kore kotou e emi i te mataku maata ra e kia kore kotou e akamaara papu i ta kotou au ara kino; kia kore kotou e tuatua e, E Tapu, kua tapu toou ra au akavaanga, e te Atu, e te Atua Mana katoatoa. Kua kite ra au i taku nei au ara; kua ara oki au i taau ra ture; e naku uaorai taku au ara; kua riro atu au ki te tiaporo, e kua riro atu oki au ki tona ra mamae maata.

47. Ina ra, e taku au taeake, e mea tika ainei kia akaara au ia kotou i te kite i taua au mea rikarika ra? Ka ako ainei au ia kotou mei te mea kua ma to kotou ngakau? Ka tuatua papu ainei au kia kotou i te akakite anga i te tuatua tika, mei te mea kare a kotou ara?

48. I na, naringa kotou i te aronga tapu e tuatua au kia kotou i te au mea tapu ra; kare ra kotou te aronga tapu; kua akariro kotou iaku ei puapii, e e tika iaku i te apii atu kia kotou i te utunga no te ara.

49. I na, e mea rikarika te ara iaku, e kua mataora oki toku ngakau i te tuatua tika ra; ka akapaapaa atu ei au i te ingoa tapu o toku Atua.

50. Ka aere mai ana, e taku au taeake tei kaki vai; ka aere mai ki te vai nei; e te tangata moni kore, ka aere mai ana, ka oko, e e kai; koia ïa, ka aere mai ana e oko i te wina e te u ma te kore e moni e te kore e oko.

51. E teianei, auraka e oko ki te moni i te au mea puapinga kore, auraka katoa e angaanga no te au mea te ka kore e riro ei akameitaki ia kotou. Ka akarongo marie mai ana kotou iaku, e akamaara oki i te au tuatua taku i tuatua ana; e aere mai ki Tei Tapu i Iseraela nei, ka kai ei i te mea kare e pou, e kare oki e kino, kia mataora to kotou ngakau i te meitaki ra.

52. I na, e taku au taeake akaperepere, e akamaara i te au tuatua a to kotou Atua; e pure atu kiaia i te ao kare e tivata, e e akameitaki i tona ra ingoa tapu i te po. Kia mataora to kotou ngakau.

53. I na, te meitaki maata o te au koreromotu a te Atu ra, e tona aroa maata ki te tamariki a te tangata nei e; e tona meitaki maata, e tona aroa, i taputou mai ei aia e, kare ta tatou uanga e pou rava i te kopapa nei; e akaora ra aia ia ratou; ei te au uki a muri atu e riro ei ratou ei atava tuatua tika i roto i te ngutuare o Iseraela nei.

54. E teianei, e taku au taeake, kua inangaro au i te tuatua ua atu kia kotou, apopo ra e tuatua atu au i te toenga i taku au tuatua kia kotou. Amene.