1. E teianei, te tuatua akaou atu nei au, ko Iakoba, kia kotou, e toku au taeake akaperepere e, no taua atava tuatua tika taku i tuatua ana.

2. I na oki, te au taputou i rauka ia tatou, ko te taputou ïa ia tatou i te kopapa nei; e tenana, kua akakiteia mai kiaku e, e maata ta tatou au tamariki ka mate i te kopapa, no te akarongo kore; ina ra, e manganui oki ta te Atua ka aroa mai; e ka akaokiia ta tatou tamariki, kia tae ratou ki te mea e kite ei ratou i to ratou Akaora.

3. Mei taku i tuatua atu kia kotou ra, kia tae mai te Mesia, (inapo oki i akakite mai ei te angela kiaku e, ko tona ingoa rai ïa) ki rotopu i te ngati Iuda, e ki rotopu oki ia ratou ko te pae kino i to te ao katoa nei; e ka akasatauro ratou iaia; ka akaperaia to tatou Atua e tikai; e kare tetai basileia ke atu i roto i teianei ao e akasatauro atu i to ratou Atua.

4. Naringa kua raveia taua au semeio i tetai au enua ke ke, kua tataraara ratou, e kua kite oki ratou e, ko to ratou Atua oki ïa.

5. Kareka ra, no te purepure e te au angaanga kikino, i akaketaketaiaʼi te ngakau o tei noo ki Ierusalema, kia akasatauro atu iaia.

6. E no reira, no ta ratou au angaanga kikino, ka tae mai ki runga ia ratou te onge, e te maki e te maringi anga toto e ka pou ratou, e ko tei kore e mate, ka akapueurikirikiia ratou ki roto i te au enua katoatoa.

7. I na, te na ko maira te Atu ko te Atua: Kia tae mai te rā e akarongo ei ratou iaku, e ko au te Mesia, mei taku i papau ki to ratou ai tupuna e, e akaokiia mai ratou i te kopapa ki to ratou enua ipukarea nei.

8. E ka akaputuputuia mai ratou mei te roa o to ratou akapueurikirikiangaia, mei te au enua moana mai, e mei nga tuanga e ā o te ao nei; e ka maata oki te au Etene i mua i toku nei mata i te apai anga ia ratou ki to ratou ra enua ipukarea, te na ko maira te Atua.

9. I na, ka riro te au ariki o te Etene ei metua angai no ratou, e ka riro to ratou au ariki vaine e metua angai no ratou, E teianei, e taputou maata ta te Atu ki te au Etene; i tuatua ana oki aia i te reira, e koai oki te ka patoi mai?

10. Te na ko maira te Atua, i na, ka riro teia enua ei enua ipukarea no kotou; e ka akameitakiia oki te au Etene ki runga i te enua.

11. E ka riro teianei enua au ki te au Etene, e kare tetai ariki e tutara ki runga i te enua, te ka akatuia no te au Etene ra.

12. E paruru au i teianei enua i te au enua katoatoa.

13. E ko tei tamaki ia Ziona ra, ka mateia, te na ko maira te Atua.

14. Ko tei akateitei oki i tetai atu ariki iaku ra, ka mateia, no te mea, ka riro au, te Atu, te ariki o te rangi, ei ariki no ratou; e riro au ei mārama no ratou tei akarongo i taku ra tuatua, e tuatau ua atu.

15. Kia akatupu au i te taku ra au koreromotu taku i papau ki te au tamariki a te tangata, e taku ka rave kia ratou ka noo ei ratou i te kopapa nei, ka akakore au i te au angaanga muna a te poiri, e te au ta tangata anga, e te au mea viivii katoatoa e tikai.

16. No reira, ko tei tamaki kia Ziona, te ngati Iuda, e te Etene katoa oki, te tuikaa e te tuikaa kore oki, te tane e te vaine oki, ka mate ratou; no te mea, ko te vaine akaturi no te ao nei ratou; me kare aia i to ko nei iaku nei, no te patoi ïa iaku, te na ko maira to tatou Atua.

17. E akatika oki au i taku au tuatua katoa taku i tuatua atu ki te au tamariki a te tangata nei, e ka akatupu au i te reira ia ratou ka noo mai ei ratou i te kopapa nei.

18. no reira, e taku au taeake akaperepere e, te na ko maira to tatou Atua, E pāpā au i ta kotou uanga ki te rima o te au Etene; kareka ra, e akamaru au i te ngakau o te au Etene, kia riro ratou mei te metua tane ki o ratou ra, no reira, i akameitakiiaʼi te au Etene, e ka tatauia ki roto i te ngutuare o Iseraela.

19. No reira, ka akameitaki au i teianei enua no ta kotou uanga, e no ratou tei noo i rotopu i ta kotou ra uanga, ei enua ipukarea no ratou e tuatau ua atu; ko ta te Atua ïa i tuatua mai kiaku. E enua meitaki rava ïa i te au enua katoatoa, no reira, kia akamori mai iaku te aronga katoatoa e noo ki reira, te na ko maira te Atua.

20. E teianei, e taku au taeake akaperepere e, kua oronga mai to tatou Atua aroa kia tatou i te kite maata no teianei au mea, kia akamaara tatou iaia e kia akaruke i ta tatou au ara, e kia kore e akama, kare oki tatou i akarukenaia; kua tuaruia ra tatou ki vao i to tatou enua ipukarea mua; ina ra, kua aratakiia oki tatou ki tetai enua meitaki rava atu, na te Atu oki i akariro te moana ei mataara no tatou, e tei runga oki tatou nei i tetai enua o te moana ra.

21. E maata ra te au taputou a te Atu ki tei noo ki runga i te au enua o te moana ra; i na, i tuatuaia e au enua moana, e e maata atu te au enua i teia, e kua nooia e to tatou ra au taeake.

22. Ina ra, kua arataki ke atu te Atu i tetai pae tangata o te ngutuare o Iseraela nei i tera tuatau i tera tuatau kia tau ki tona ra inangaro. E teianei, i na, te akamaara nei te Atu ia ratou i tipu keia ra, no reira ka akamaara katoa aia ia tatou katoa.

23. E tenana, kia mataora to kotou ngakau, e akamaara e, tei ia kotou te tika ia kotou uaorai kia iki i te mataara e tae atu ei ki te mate mutu kore me kore ra, i te mataara o te ora mutu kore.

24. E teianei, e taku au taeake akaperepere e, e akaaiteite ia kotou uaorai kia tau i to te Atua inangaro, e eiaa i te anoano o te tiaporo e to te kopapa nei; e akamaara e, kia akaaiteiteia kotou i te Atua, na roto anake i te aroa o te Atua e akaoraiaʼi kotou.

25. E tenana, kia akatu te Atua ia kotou mei te mate maira, na roto i te mana o te tuakaouanga, e mei te mate mutu kore maira oki na roto i te mana o te tarangaara, kia arikiia kotou i roto i te basileia mutu kore o te Atua, kia akapaapaa kotou iaia na roto i te aroa tapu ra. Amene.