1. Te apainga o Babulonia, ta Isaia te tamaiti a Amosa i kite.

2. Ei runga i te maunga teitei ka akatu ei i te reva, ka akateitei ei i te reo kia ratou, ka mou atu ei i te rima; kia tomo ratou ki te au ngutupa o te ui ariki.

3. I akaue ana au i te aronga tapu noku, e kua tuatua atu au ki toku aronga maroiroi, kare e vai toku riri i runga ia ratou tei mataora i te teitei noku.

4. Te mutamutaanga o te urupu ki runga i te au maunga, mei to tetai iti tangata maata ïa, e aruru maata oki to te au basileia e akaputuputuia mai, na te Atu Sabaota ra oki e akaputuputu i te nuku ra e tamaki.

5. Mei te enua mamao mai ratou, mei te openga mai o te rangi, koia ïa, ko te Atu e te au taoonga tamaki nona, e akapou i te enua katoatoa ra.

6. Ka aue ana kotou; kua vaitata te rā o te Atu; ei mate ïa no ko mai i te Mana Katoatoa.

7. No reira i parukaua te au rima katoa, e tae a vai oki te ngakau o te tangata nei.

8. E rokoia mai ratou e te mataku; e opukia mai ratou e te mamae e te aue; e umere ua ratou ia ratou uaorai; e riro oki to ratou mata mei te ai mura te tu.

9. I na, te vaitata maira te rā o te Atu! E rā tangi oki, e te riri otooto, ka tanea takiri te enua ra; e te au tangata ara i roto iaia ra, ka akapou ravaia ïa e ïa.

10. Te au etu oki no te rangi ra, e to reira katoa au pupu, kare ïa e marama mai; ka akapoiriia te rā i tona aere mai anga, kare oki te marama e pa mai i tona mārama.

11. E papa atu au i teianei ao no tona kino, e te aronga kino no ta ratou au ara; e akakore au i te nengonengo o te aronga parau, e e taakaaka au i te akateitei o te aronga akamataku ra.

12. E akariro au i te tangata ei puapinga maata atu i to te auro ra; e puapinga maata to te tangata okotai i to te toka auro no Ophira ra.

13. No reira au e akangaueue ei i te rangi ra, e taka ke atura te enua i tona ngai i te riri o te Atu Sabaota ra, e i te ra o tona riri maata.

14. E riro oki ratou mei te zabi arumakiia ra, mei te mamoe e kare e tangata e rave mai; e anga anake ratou ki to ratou uaorai; e oro anake ratou, te tangata katoatoa ra, ki tona uaorai enua.

15. Te au tangata ngakau parau ra, e koia tei piri ki te aronga kino, e inga ïa i te koke.

16. E taiaia ta ratou au tamariki ki mua i to ratou mata; e āruia to ratou au kainga, e kukumiia oki ta ratou au vaine.

17. I na, e akatu au i to Madai ei rave ia ratou, ko te kore e akono i te ario e te auro, e kare oki ratou e rekareka i te reira.

18. E taiaia te au tangata mapu i to ratou au ana, e te uanga no roto i te kopu ra kare e aroa; kare oki to ratou mata e tangi ua atu ki te tamariki.

19. E ko Babulonia, te manea o te au basileia ra, te meitaki o te parau o te Kaledea ra, ka aite ïa ia Sodoma e Gomora ra, tei akapouia e te Atua.

20. Kare e noo akaouia e te tangata, kare oki e nooia i tera uki i tera uki; kare oki te Arabia e patia i tona puakapa ki reira; kare oki te au tiaki e anga i te koro anana ki reira.

21. Ei reira ra te au manu taae no te ngangaere e moe ei; e ki oki to ratou au are i te au taae; ei reira oki te titi e noo ei; e e rererere oki te au manu viivii ki reira.

22. E aoa ua te au tu manu taae i te enua i te moana ki roto i te au are i akarukeia ra, e te au taae ki roto i te au ngai manea ra. Kua vaitata tona ra e kare oki ïa e akaroaia. E akapou vave au iaia; E aroa ra au i toku ra iti tangata, e mate ra te aronga rave kino.