Scriptures
2 Niphai 21


Pene 21

Te Tuatua Tapu i tataia ki runga i te au papa veo ra. Akara ki te Isaia pene 11.

1. E tupu tetai tupu ou no roto i te tumu ra o Iese; e no roto mai i tona au aka e tupu mai ei tetai uri uua.

2. Ka noo ua mairai te Vaerua o te Atu ki runga iaia, te vaerua o te pakari e no te mana, te vaerua no te kite e no te mataku i te Atu ra.

3. E ka apii oki iaia kia kite i te mataku i te Atu, kare aia e akava ua i ta tona mata i akara ra, kare katoa e ako i ta tona taringa i akarongo ra.

4. I te tuatua tika aia e akara mai ei i te aronga rikiriki ra, e aku oki aia ma te tuatua tau i te aronga maru o te enua nei; e ta aia i te enua nei ki te rakau ra i tona vaa, e i te ao o tona vaa e tamate ei aia i te tangata kino.

5. E te tuatua tika ra, ko te tatua ïa o tona taukupu; e te tuatua mou ra, ko tona ïa ruru manava.

6. Ei reira te luko e noo katoaʼi raua ko te punua mamoe; e te nemera e te punua puakanio, e kapiti katoaia i te moe anga; e te punua puakatoro, e te liona ou, e te puakatoro angaiia ra, okotai ra kapiti anga mai; e na tetai tamaiti meangiti e arataki ia ratou.

7. Te puakatoro ūā ra e te pea okotai rai ïa one kai; okotai rai moeanga to te anau; e kai oki te liona i te mauku mei te puakatoro katoa ra.

8. E kanga ua te tamaiti kai u ki te vaarua o te asepi, e ki runga i te koanga vipera ra e tuku ei te tamaiti i tona rima.

9. Kare ratou e akamamae, kare oki e mea e mate ei, i toku katoa nei maunga tapu; no te mea, ka ki te enua i te kite i te Atu, mei te tai e tapoki i te enua ra.

10. E kia tae ki taua rā ra, e riro tetai aka no Iese, i te tuanga ki runga ei reva no te au tangata, e kimi oki te au pa enua i te reira, e e kakā oki tona akangaroianga.

11. E i te reira rā, e akatika akaou ei te Atu i te rua o te taime i tona rima e akaora i te toenga o tona iti tangata, ko tei toe i Asura ra, e i Aiphiti, e i Patarosa, e i Kusa, e i Elama, e i Sinara, e i Hamata, e i te au enua o te moana ra.

12. E akatu aia i tetai reva ki runga no te pa enua ra, e e akaputuputu mai aia i to Iseraela i tuaruia ra, e akaputuputu katoa mai oki ia Iuda i akapueurikiriki keia ra, mei nga openga mai o te enua e ā katoa ra.

13. E topa te vareae o Epheraima, e te au enemi o Iuda, e tipu keia ïa; kare Epheraima e vareae ia Iuda, kare oki Iuda e akariri ia Epheraima.

14. E rere ratou ki runga i te pakuivi o te Philiseti ki te pae i te opunga o te rā ra; e pou katoa oki te au tamariki no te itinga o te rā ra ia ratou; e rave oki to ratou rima ia Edoma raua ko Moabi; e akarongo mai oki te tamariki a Amona ia ratou.

15. E akapou rava oki te Atu i te arero o te tai Aiphiti ra, e ruru katoa aia i tona rima ki runga i te kauvai ra ki tana matangi viviki maata e ka ta aia i te reira ki te itu kauvai rikiriki ra, e na rungao ratou i te aere kare e mau te vaevae.

16. E ka vai rai te arataa tika no te toenga o tona ra au tangata, ko tei toe i Asura ra; mei to Iseraela i te ra e aere mai ei ratou mei Aiphiti maira.