1. E teianei, te tuatua atu nei au kia koe, e Iosepha, e taku tamaiti openga. I anau mai koe i te metepara ra i toku ra au tumatetenga; e i te rā o toku aue anga maata i anau mai ei toou metua vaine ia koe na.

2. E kua akatakake te Atu i teia nei enua, teia enua meitaki roa atu, noou, ei ipukarea noou, e no taau ra uanga, e no toou ra au taeake, ei akapuanga noou e tuatau ua atu, mei te mea e akono koe i te au akaueanga a Tei Tapu i Iseraela nei.

3. E teianei, e Iosepha e, e taku tamaiti openga, taku i apai mai no roto i te metepara i toku ra au tumatetengaanga, kia akameitaki mai te Atu ia koe e tuatau ua atu, kia kore oki taau uanga e pou roa.

4. I na oki, e uanga koe na toku nei kopu, e e uanga oki au na Iosepha tei apaina tuikaaia ki Aiphiti. E e au koreromotu maata oki ta te Atu i papau kia Iosepha ra.

5. Kua kite tikai a Iosepha i to tatou nei tuatau. E kua rauka mai iaia te taputou a te Atu ra e, no roto i te uanga a tona kopu e akatupu ei te Atu ra ko te Atua, i tetai atava tuatua tika no te ngutuare o Iseraela; auraka te Mesia, ko tetai atava ra, ka tipuia ïa, ka akamaaraia ra ratou i roto i te au koreromotu a te Atu ra, koia oki ka akakiteia te Mesia kia ratou i te au rā openga ra, ma te vaerua mana ra, i te aratakianga mai ia ratou mei roto mai i te poiri ki te mārama, i na, mei roto mai i te poiri tangotango e te tuikaaanga ki te rangatira ra.

6. Kua tuatua maira Iosepha, na ko maira, e akatupu te Atu, toku Atua, i tetai akara, e ka riro aia ei akara ikiia no te uanga a toku nei kopu.

7. I na, kua karanga maira Iosepha, te na ko maira te Atu kiaku e, E akatupu au i tetai akara ikiia no roto mai i toou kopu, e ka manako meitakiia aia i rotopu i te uanga a toou ra kopu. E naku aia e akaue atu kia rave aia i tetai angaanga no te uanga a toou kopu, no tona ra au taeake; e ka riro te reira ei puapinga maata no ratou, i te akakiteanga atu kia ratou i te au koreromotu taku i papau ki toou ai metua.

8. E ka akaue atu au kiaia e, eiaa aia e rave i tetai atu angaanga, mari ra, ko taku ka akaue atu kiaia. E akamaata oki au iaia ki mua i toku nei mata no te mea, ka rave aia i te angaanga naku.

9. E tangata maata aia mei ia Mose ra, ko taku i tuatua, ka akatupu au ia kotou, kia akaora i toku ra iti tangata, e te ngutuare o Iseraela.

10. Ka akatupu oki au ia Mose, e nana toou ra iti tangata e arataki mei te enua maira mei Aiphiti.

11. E ka akatupu oki au i tetai akara no roto i te uanga a toou kopu; e ka oronga atu oki au i te mana kiaia kia akatupu i taku tuatua na roto i te uanga a toou ra kopu; e te na ko maira te Atu, kare no te akatupu anga anake i taku tuatua, mari ra i te akapapu anga atu kia ratou i taku tuatua i tuatuaia ana ki rotopu ia ratou ra.

12. E teianei, ka tata te uanga a toou ra kopu, e ka tata oki te uanga a to Iuda kopu; e ta te uanga a toou ra kopu ka tata, e ta te uanga oki a to Iuda kopu ka tata, ka tupu kapipiti raua i te akakoreanga i te tuatua tarevake, e i te akakoreanga i te taumārō, i te akamouanga i te au ki roto i te uanga a toou ra kopu, e i te aratakianga ia ratou kia kite i to ratou ai metua i te au rā openga ra, e i te kite i taku au koreromotu, te na ko maira te Atu.

13. E no roto mai i te paruparu i akamaroiroiiaʼi aia i te rā e akamataʼi taku angaanga i rotopu i toku ra iti tangata katoatoa, i te akaokianga mai ia kotou, ko te ngutuare o Iseraela, te na ko maira te Atu ra.

14. Kua totou maira Iosepha, na ko maira, i na, ka akameitaki mai te Atu i taua akara ra, e ko te tangata e kimi iaia e ta, ka tāpūia aia no te mea, ka tupu teia taputou tei rauka mai iaku no ko mai i te Atu ra, ki te uanga a toku nei kopu. I na, kua kite papu au e, ka tupu tikai taua taputou ra.

15. E ka tapaia aia ki toku nei ingoa, e ki te ingoa katoa oki o tona ra metua. E ka riro aia mei iaku nei te tu, no te mea ko te au mea ta te Atu ka akatupu, ka na roto mai iaia ra, na roto i te mana o te Atu, e arataki aia i toku ra iti tangata ki te ora.

16. I na, kua pera maira a Iosepha i te totou: Kua kite papu au i te reira, mei taku katoa i kite i te taputou a Mose ra; kua tuatua mai oki te Atu kiaku, Ka akaora au i toou ra uanga e tuatau ua atu.

17. Kua tuatua maira te Atu, i te na ko anga mai e, Ka akatupu au ia Mose, e ka oronga atu au i te mana kiaia i roto i tetai rakau ra; e ka oronga katoa atu au i te mana kiaia kia tata i te tuatua. Kare ra au e tatara i tona arero kia tuatua maata aia, kare oki au e akariro iaia ei tangata maata i te tuatua anga atu. Kareka ra, e tata au i taku ra ture kiaia ki toku uaorai mangamanga rima; e ka akatupu katoa au i tetai vaa tuatua nona ra.

18. E kua karanga katoa maira te Atu kiaku e, ka akatupu au i tetai no roto i te uanga a toou ra kopu; e ka akatupu oki au i tetai vaa tuatua nona. E i na, naku oki, naku uaorai e oronga atu i te mana kiaia kia rauka iaia te tata i te tuatua a te uanga a toou ra kopu ki te uanga a toou ra kopu; e na te vaa tuatua no toou ra kopu e akakite atu i te reira.

19. E te au tuatua tana ka tata ko te au tuatua ïa tei tau, i toku nei pakari, kia akakiteia atu ki te uanga a toou ra kopu. E ka riro oki te reira mei te mea e, te kapiki nei te uanga a toou ra kopu kia ratou no raro mai i te one pueu ra; kua kite oki au i to ratou akarongo.

20. E kia topa te au uki e manganui kua kapiki mai ratou no raro mai i te one pueu, i te tuatua tataraara ki to ratou au taeake. E ka aere ta ratou kapikianga na roto i ta ratou tuatua mama ua.

21. E no to ratou akarongo, ka riro atu ta ratou tuatua na roto i toku nei vaa, ki to ratou au taeake, koia oki ki te uanga a toou ra kopu, e na roto i to ratou akarongo e akamaroiroi ei au i ta ratou ra tuatua paruparu, i te akamaara anga i te au koreromotu taku i papau atu ki toou ai metua.

22. E teianei, i na, e taku tamaiti e Iosepha e, i pera mai toku ra metua taito i te totou anga mai.

23. E tenana, no teia koreromotu e akameitakiiaʼi koe, kare oki toou ra uanga e pou, e akarongo oki ratou ki te au tuatua a te puka.

24. Ka tupu oki tetai tangata maata i rotopu ia ratou, e nana e rave i te meitaki maata, i te tuatua e i te angaanga na te Atua, ma te akarongo maata, kia rave i te angaanga umere rava, e kia rave oki i te mea maata ki mua i te mata o te Atua, i te akaokianga mai i te au mea e manganui ki te ngutuare o Iseraela, e ki te uanga oki a toou ra au taeake.

25. E teianei, e ao toou e Iosepha. I na, e tamaiti ua koe, e no reira e akarongo i te au tuatua a toou tuakana ra, ko Niphai, e akaperaia koe kia tau ki te au tuatua taku i tuatua. E akamaara i te au tuatua a to metua nei, ko tei vaitata i te mate.