9 Capítulo
Judíocuna tandanajushca canga tucui paicunapaj cushapacha nishca alpacunapi—Shujpa juchacunamanda huañunaca runacunata quishpichin Urmashcamanda—Huañushcacunapaj cuerpocuna pambashca pushtumanda llujshimunga, paicunapaj espíritucuna ucu pachamanda paraísomandapash—Paicuna ricushpa chasquichishca canga—Shujpa juchacunamanda huañuna huañuimanda quishpichinga, ucu pachamanda, ayamanda na tucurinata chari llaqui apanamandapash—Ali rurajcunaca quishpichishcacuna canga Diospaj reinopi—Juchacunamanda castigocunata yachaj chayachishca canga—Israelpaj Achil punguta cuidaj canga. Nara 559–545 C.Ñ.
1 Cunan, ñuca juyashca huauquicuna, ñuca liishca cani cai cuzascunata canguna yachai ushachun Apunchijpaj conveniocunata maijan pai conveniota rurashca carca tucui Israelpaj huasihuan—
2 Judíocunaman parlashca carca, paipaj achil achi villachijcunapaj shimihuan, callarimanda urai, shuj miraimanda cutishuj miraiman, punlla imaura chayamungacaman paicuna cutinlla apamungacaman na llulla iglesiata Diospaj llama corraltapash; imaura paicuna huasiman tigramushca cajpi paicunapaj chasquina alpacunaman, tiarishca cangapash tucui cushapacha nishca alpacunapi.
3 Riqui, ñuca juyashca huauquicuna, ñuca parlani cangunaman cai cuzascunata canguna cushijui ushachun, jahuaman alsachunbash cangunapaj umacunata na tucurinacaman, achil yachishcacunamanda caicunata Apunchij Dios caranga cangunapaj huahuacunaman.
4 Ñuca yachani canguna ashtacata mascanajushcanguichi, cangunamanda tauca, shamuna cuzascunamanda yachangapa; chaimanda ñuca yachani canguna yachajta cangunapaj aicha asha asha tucurimunga huañungapash; shina cajpipash, ñucanchi cuerpopi ñucanchi Diosta ricushunchi.
5 Ari, ñuca yachani canguna yachajta paillata cuerpopi ricurimunga maijan Jerusalénpi cajcunaman, maimanda ñucanchi shamurcanchi; shina cana can paicunapi cachun; minishtirishca can Jatun Rurajca paillata aichapi runapaj munashcaman saquirichun, huañunapash tucui runacunamanda, tucui runacuna paipaj munashcaman saquirichun.
6 Huañuica imashnami yalishca can tucui runacunapaj jahuata, Jatun Rurajpa llaquina imata ruranata pactachingapa, minishtirishcapacha can shuj ushai tiana causarinapa, causarinaca minishtirishcapacha runacunaman shamuchun urmashcamanda; urmanaca shamurca na ali ruraimanda; runa urmaimanda paicuna Apunchijpaj ñaupamanda anchuchi tucurca.
7 Chaimanda, minishtirishcapacha can shuj na maipi tucuri shujpa juchacunamanda huañuna—shuj na maipi tucuri shujpa juchacunamanda huañuna cai ismuna caimandalla na churajuita ushanga na ismunahuan. Chaimanda, callari ricushpa chasquichina shamushca runapa jahuaman minishtirishca canman carca shuj imami shinallata na tucurinata charingacaman. Shina cajpica, cai aicha siriringa ismushpa asha asha tucuringapa paipaj mama pachapi, nimaurapash na jataringapa.
8 Oh, Diospaj jatun yachai, paipaj shujta llaquina ninan juyaipash! Riqui, aicha nimaurapash na jatarijpica ñucanchi espíritucunaca minishtishca canman saquirichun chai ángelpa pimi mana tucurina Diospaj ñaupamanda urmarca, ayaman tigrarcapash, ashtahuan na jataringapa.
9 Ñucanchi espíritucunaca paishnalla tigranman carca, ñucanchipash ayacuna canchiman carca, ayapaj shuj ángelcuna, ñucanchi Diospaj ñaupamanda shicanyachishca, shinallata cangapa llullacunapaj taitahuan, llaquipi, paishnalla; ari, chai causa cajpimi ñucanchi callari taitacunata umachirca, pi paimandallata ñalla shuj punchalla ángelman tigrarca, runacunapaj huahuacunatapash huañuchingapa tangan pacalla tandanajunacunaman tucui laya pacalla yanallapaj ruranacunamanbash.
10 Oh ima jatun ñucanchi Diospaj alicai, pimi shuj ñanda charin ñucanchi quishpiringapa cai manllanayai ayapa sillumanda; ari, chai aya, huañui ucu pachapash, chaita ñuca shutichini cuerpopaj huañui, espíritupaj huañuipash.
11 Ñucanchi Diospaj quishpirina ñanmanda, Israelpaj Achilca, cai huañui, imamanda ñuca parlashca cani, chaica temporal can, paicunapaj huañushcacunata cacharinga; chai huañuica pambana pushtumi.
12 Cai huañui imamanda ñuca parlashca cani, chaica espiritual huañui can, paicunapaj huañushcacunata cacharinga; chai espiritual huañuica ucu pacha can; chaimanda, huañui ucu pachapash paicunapaj huañushcacunata cacharinga, ucu pacha paicunapaj huatai tucushcashna espíritucunata cacharinga, pambana pushtuca paipaj huatai tucushcashna cuerpocunata cacharinga, runacunapaj cuerpocuna espíritucunapash cutinlla apamushca canga caishu chaishu; cai can Israelpaj Achilpaj causarinapa ushaihuan.
13 Oh ima jatun ñucanchi Diospaj imata rurana! Cutishujmanda, Diospaj paraíso ali rurajcuna espíritucunata cacharinga; pambana pushtupash ali rurajcunapaj cuerpocunata cacharinga; espíritu cuerpohuan cutinlla apamushca canga cutin paipura, tucui runacuna na ismuna aichaman tigranga, na huañushpa, paicuna causa almacuna can, shuj alipacha yachaita charishpa aichapi ñucanchi laya, ñucanchi yachaillami alipacha canga.
14 Chaimanda, ñucanchi shuj alipacha yachaita charishunchi tucui ñucanchi juchachita, ñucanchi mapallata, ñucanchi lluchullata; ali rurajcunaca charinga shuj alipacha yachaita paicunapaj cushijuita, paicunapaj ali caita, churajushca canga mapa illa caihuan, ari, ali rurana churajunahuanbash.
15 Yalishca jipa imaura tucui runacuna callari huañuimanda causaiman yalishca cashpa, shinapacha paicuna na huañunaman tigrashpa, paicuna Israelpaj Achilpaj ricushpa chasquichina jatun tiarinaman shamunapacha; jipaman ricushpa chasquichina shamunga, jipaman paicuna ricushpa chasquichishca canga Diospaj achil ricushpa chasquichinahuan.
16 Ciertopacha, imashna Apunchij causan, Apunchij Dios caita parlashca can, caimi paipaj mana tucurina shimi can, caica na canata saqui ushan, picunami ali rurajcuna can ali rurajcuna canga, picunami mapa can mapara canga; chaimanda, picunami mapa can aya can paipaj ángelcunapash; paicuna mana tucurina ninaman ringa, paicunapa alichishca; paicunapaj llaqui apana shuj nina azufrepash cocha laya can, rupajuj nina imaurapash na tucurina imaurapash na tucurinacamanbash na tucuri tianllu.
17 Oh Ñucanchi Diospaj jatun cai alicaipash! Paica paipaj tucui shimicunata rurachin, chaicuna paipaj shimimanda llujshishcacuna can, paipaj catichunbacha saquishcacunapash pactachishca canga.
18 Ashtahuangari, riqui, ali rurajcunaca, Israelpaj Achilpaj santocuna, paicuna Israelpaj Achilta crishcacuna can, paicuna pachamanda cruzcunata apashcacuna can, na yachashcashna chaipaj pingaitapash, paicuna Diospaj reinota chasquinga, caica paicunaman alichishca carca cai pachata rurashcamandapacha, paicunapaj cushi cai na tucurinacaman junda canga.
19 Oh jatun caica ñucanchi Diospaj llaquina, Israelpaj Achil! Paimi paipaj santocunata manllanayai na ricunayai ayamanda cacharichin, huañui, ucu pacha chai nina azufrepash cochamanda, chaica imami na tucurinata chari llaqui apanami.
20 Oh ima jatun achilcai ñucanchi Diospaj! Pai tucui cuzascunata yachan, imapash na tianllu pai na yachashca.
21 Pai cai pachaman shamurca tucui runacunata quishpichi ushangapa paicuna paipaj shimita cazujpi; riqui, pai llaqui chasquirca tucui runacunapaj nanaicunata, ari, tucui causa cajcunapaj nanaicunata, ishcandi jaricuna, huarmicuna, huahuacunapash, pimi Adánpaj aillucuna catijcuna can.
22 Pai llaquita chasquin cutin causarina tucui runacunapaman shamui ushachun, chai tucui paipaj ñaupaman shayarimui ushachun jatun ricushpa chasquichina punllapi.
23 Pai mandan tucui runacuna arrepentirichun, paipaj shutipi bautizarishca cachun, Israelpaj Achilpi alipacha feta charishpa, nacashpaca paicuna Diospaj reinopi na quishpiringachu.
24 Paicuna na arrepentirishpaca paipaj shutipi na crishpaca, paipaj shutipi na bautizarishpaca, tucuringacaman na catiriashpaca, paicuna llaquichi tucushca canga; imashpa Apunchij Dios, Israelpaj Achil cai parlashca can.
25 Chaimanda, pai shuj catichunbacha saquishcacunata cushca can; maipi catichunbacha saquishcacunata na tiajpica castigo na tianllu; maipi na tian castigo llaquichi tucuna na tian; maipi na tian llaquichi tucuna Israelpaj Achilpaj ali caicuna cutin mañai ushan, shujpa juchacunamanda huañunamanda; paicuna cacharirishca can paipaj ushaimanda.
26 Shujpa juchacunamanda huañunaca pactachin alicai mañajta tucui picunaman catichunbacha saquishcacunata na cushcacunaman, paicuna cacharichishca can chai na ricunayai manllanayaimanda, huañui ucu pachapash ayamandapash, nina azufrepash cochamandapash, chai imami can na tucurinata llaqui apana; paicuna cutinlla apamui tucushca can chai Dios pimi paicunaman samaita cushca, chai Israelpaj Achil can.
27 Ashtahuangari ay picunaman catichunbacha saquishcacunata cushca can, ari, pimi Diospaj tucui rurachunbacha saquishcacunata charin, ñucanchishna, na ali ruran, yangata paicunapaj punllacunata ruran na ruran ricunaca yalin, paicunapa cana manllanayaimi can.
28 Oh pandachingapa yachashca ayapaj imata rurana! Oh jariyaicuna, irquiyaicuna, runacunapaj juizu illacuna! Imaura paicuna yachajushca cashpaca paicunallata yachajcuna canchi yan, paicuna na cazun Diospaj consejota, ladoman churan, paicunamandallatami yachani yashpa, chaimanda, paicunapaj jatun yachaica juizu illami can paicunapa imapapash na alichu canga. Paicuna tucuringami.
29 Ashtahuangari yachajushca canaca alimi can paicuna Diospaj consejota cazushpaca.
30 Ashtahuangari ay charijcuna, picunami charijcuna can cai pachapaj cuzascunahuan. Charijcaimanda paicuna huajchacunata millanayachin, mansocunata na ricunayachishpa catirian, paicunapaj shungucunata churashca can paicunapaj tesorocunapi; chaimanda, paicunapaj tesoro can paicunapaj dios. Riqui, paicunapaj tesorocuna paicunahuanbash tucuringa.
31 Ay na uyajcuna na uyangapa munan; paicunaca tucuringami.
32 Ay ñausacuna na ricungapa munan; paicuna tucuringapashmi.
33 Ay shunguta na circuncidashcacuna paicunapaj na ali ruraicunata yachaicunaca chugrichinga chai tucuri punllapi.
34 Ay llullajca, ucu pachaman shitai tucushca canga.
35 Ay huañuchij huañuchisha yashpapacha huañuchijca, pai huañungami.
36 Ay picuna fornicacióncunata ruran, paicunaca ucu pachaman shitai tucunga.
37 Ari, ay picuna yanga dioscunata adoranajun, tucui ayacunapaj aya paicunapi cushijun.
38 Tucuripi, ay tucui paicunapaj juchacunapi huañun; paicunaca Diospaman tigramunga, paipaj ñavita ricunga, paicunapaj juchacunata yaringa.
39 Oh, ñuca juyashca huauquicuna, yarichi Achil Diosta na alita ruraica manllanayai cajta, manllanayai cajtapash umachijpaj munachiman curishpa. Yarichi, aichapilla yashpa caica huañui can, espíritupilla yashpa caica mana tucurina causaimi.
40 Oh, ñuca juyashca huauquicuna, ñuca shimicunata uyaichi. Yarichi Israelpaj Achil jatun caita. Cangunaman shinlli cuzascunata ñuca parlashcani ama nichichu; canguna rurashpaca, canguna ciertopachata plitunguichi; ñuca cai shimicunata parlashcani cangunapaj Rurajmanda. Ñuca yachani na llulla shimicunaca shinlli can tucui mapallacunapa; ashtahuangari ali rurajcuna na manllanllu, paicuna na llullata juyan shinllicunapash can.
41 Oh, ñuca juyashca huauquicuna, Apunchijpaman shamuichi, Achilman. Yarichi paipaj chaqui ñangunaca alicuna can. Riqui, runacunapa ñanga quichiji can, ashtahuangari derecho ñan rin paipa ñaupaman, punguta cuidajca Israelpaj Achilmi can; paica shuj sirvijtaca na charinllu; na tianllu cutishuj ñanda yaicungapa pungucashcatalla; paitaca na umai ushanllu, Apunchij Diosmi paipaj shutica.
42 Paita cayachijpica, pai pascanga; yachajcunatapash, yachashca cajcunatapash, charijcunatapash, picuna yapa jariyan paicunapaj yachaimanda, paicunapaj jatun yachaimanda, paicunapaj charishcacunamandapash—ari, pai na yachashcashna charin; cai cuzascunata saquishpalla, paicunamandallata juizu illa yashpalla Dios ñaupapi, jatun humildadman urai shamushpallami, na shina cajpica pai na pascangachu.
43 Ashtahuangari yachajpa cuzascuna ali juyaita charijpapash paicunapamanda na tucurinacaman pacashca canga—ari, chai cushijui imami santocunaman alichishca can.
44 Oh, ñuca juyashca huauquicuna, yarichi ñuca shimicunata. Riqui, ñuca churajunacunata llujchini, ñuca chaspini cangunapaj ñaupapi; ñuca achil mañani ñuca jatun quishpichina Diosta pai ricuhuachun paipaj tucui rijsina ñavihuan; chaimanda, can yachangui chai tucuri punllapi, imaura tucui runacuna paicunapaj rurashcacunamanda ricushpa chasquichishca canga, Israelpaj Diosca ricuhuarca ñuca chaspijta cangunapaj na ali ruraicunata ñuca almamanda, ñuca paipaj ñaupapi mapa illa shayarisha, ñuca mapa illa cani cangunapaj yahuarmanda.
45 Oh, ñuca juyashca huauquicuna, cangunapaj juchacunamanda anchurichi; chaspirichi huatanacunamanda pimi cangunata shinlli huatangapa munajmanda; Diospaman shamuichi pimi cangunapaj jatun quishpirinapa rumi can.
46 Cangunapaj almacunata alichichi chai punchapamba punllapa imaura alicai cushca canga ali rurajcunaman, ricushpa chasquichina punllapi, manllanayai manllaihuan ama uchillayanguichi; ama yaringuichi cangunapaj manllanayai juchachita alitapacha, tangashca can caparichun: Achil, achil quiquinba ricushpa chasquichinacunaca can, Oh Tucui Ushaita Charij Apunchij Dios—ashtahuangari ñuca yachani ñuca juchachinata; quiquinba catichunbacha saquishcacunata na alita rurashcani, ñuca na alita rurashcacunaca ñucapami can; ayaca mishahuarcami, ñuca shuj japinalla cani paipaj manllanayai llaqui caipa.
47 Ashtahuangari riqui, ñuca huauquicuna, minishtirishca can ñuca rijchachichun cai cuzascunapaj manllanayai shutilla cai? Llaqui apachimanllu cangunapaj almacunata cangunapaj yuyaicuna mapa illacuna cajpi? Ima cashcata nimanmi cangunata ciertopachapaj na pandanallahuan canguna jucha illacuna cajpica?
48 Riqui, canguna achilcuna cajpica ñuca parlaiman achil canamanda; ashtahuangari canguna na achil canguichi, canguna ricuhuanguichi shuj yachachijtashna, cai minishtirishcapacha can ñuca yachachichun juchamanda jipaman ima shamujcunata.
49 Riqui, ñuca alma juchacunata millanayachin, ñuca shungu cushijun ali ruraicunapi; ñuca cungurishpa alicachisha ñuca Diospaj achil shutita.
50 Shamuichij, ñuca huauquicuna, tucui pimi yacunayachij, shamuichij canguna yacucunaman; na culquiyu, shamui randipash micuipash; ari, shamui vinota randi lechetapash culqui illa na preciohuanllu.
51 Chaimanda, imapash na valijpi ama tucuchichu culquita, canbaj ruranapash nimata na pactachijpi. Utsia cazuhuachi, yarichi ñuca parlashca shimicunata; shamui Israelpaj Achilpaman, ninan munanayai jahuapi chasqui cai na huaglinallata, na ismunallatapash, saqui cangunapaj almacuna cushijuchun micunacunapi.
52 Riqui, ñuca juyashca huauquicuna, yarichi cangunapaj Diospaj shimicunata; paita catilla punllan punllan achil mañaichi, tuta pagui nichi paipaj achil shutipi. Cushijuichi cangunapaj shungucuna.
53 Riqui ima jatun Apunchijpaj conveniocunaca, ima jatun paipaj achil juyai runacunapaj huahuacunaman; paipaj jatun canamanda, paipaj ninan juyai, llaquinapash, pai ñucanchita nishcapacha ñucanchipaj cati aillucuna tucuillapacha na tucuchishca canga, aicha caimanda, ashtahuangari pai alchishpa charinga; shamui miraicunapi paicuna shuj ali malqui Israelpaj huasiman tigranga.
54 Cunan, ñuca huauquicuna, ashtahuan parlaiman; ashtahuangari caya punlla ñuca yachaj chayachisha cangunaman ñucapaj puchushca shimicunata. Shinacapashcachun.