1 Cunan, riqui, ñuca juyashca huauquicuna, ñuca yani cangunapaj shungucunapi ashtahuan aliguta yarinajunguichilla cai ñanman yaicushpa imatashi jipaman rurasha yashpa. Ashtahuangari, riqui, imashpata aliguta yarinajunguichi cai cuzascunata cangunapaj shungucunapi?

2 Nachu yaringuichi ñuca nircani Espíritu Santota chasquishca jipaca ángelcunapaj shimirimaicunahuan parlai ushanguichita? Cunan, imashna ángelcunapaj shimirimaicunahuan parlai ushanguichi Espíritu Santohuan cai caimandalla?

3 Ángelcuna parlan Espíritu Santopaj ushaihuan; chaimanda, paicuna Cristopaj shimicunata parlan. Chaimanda, cangunaman nini, ninan munanayai jahuapi chasqui Cristopaj shimicunata; riqui, Cristopaj shimicunami cangunaman ninga tucui cuzascunata imata rurana canguichi.

4 Chaimanda, cunan cai shimicunata parlashca jipa, na yuyaipi chasqui ushashpaca na tapuimanda, na cayaimanda canga; chaimanda na michaman apai tucushca canguichi, ashtahuangari yanallapi tucurina canguichi.

5 Riqui, cutin nini cai ñanman yaicushpaca, Espíritu Santota chasquinguichi, cai ricuchinga tucui cuzascunata imata rurana canguichi.

6 Riqui, cai Cristopaj yachajui can, na tianllu ashtahuan yachajui cushca imaura pai cangunaman aichapi ricurishca jipacaman. Imaura pai aichapi ricurimujpi, ima cuzascunata pai nishcata rurangapa atiringuichi.

7 Cunan ñuca, Nefi, ashtahuan na ni ushani; Espírituca ñuca shimicunata upallayachin, ñucalla cani llaquiringapa na cricunamanda na alita ruraicunamandapash, na yachaimandapash, runacunapaj shinlli shungucunamandapash; imashpa paicuna na yachajuita mascan, jatun yachajuicunata na yuyaipi chasquishpa, imaura cai punchalla na pandana cushca cajpi, punchalla na pandai shimi cajpipash.

8 Cunan, ñuca juyashca huauquicuna, ñuca yashpa ricuipica cangunapaj shungucunapi aliguta yarinajunguichira; llaquiyanimi cai cuzasta canguna parlanamanda. Uyanguichiman Espírituta pimi shuj runata yachachin achil mañachun, yachanguichimanmi, achil mañanata; na ali espírituca runata achil mañanata na yachachinllu, ashtahuangari achil mañanata na yachachinmi.

9 Ashtahuangari riqui, cangunaman ninimi achil mañanapacha canguichi punllan punllan, ama shaijungapa; nima cuzasta ama ruranguichichu Apunchijpaj ñaupapi nara callaripillata Taitata Cristopaj shutipi achil mañashpaca, pai quiquingunapaj ruraicunata achilyachinga chai ruraicuna quiquingunapaj almapa ali cachun.