1 Riqui, Apunchijca, Tucuita Mandaj Apunchijca, Jerusalénmanda Judámandapash anchuchin, shinllichinata charichinatapash, tucuilla tandata charichina, tucuilla yacuta shinllichinatapash—

2 Shinlli runa, macanajuj runapash, ricushpa chasquichijpash, achil villachijpash, ali yachajpash, rucupash;

3 Pichachugapaj mandajpash, ali cachi tucushca runapash, consejerotapash, juyailla ruranata yachajtapash, juyailla shimicunata nijtapash.

4 Huahuacunata cusha paicunapa mandajcuna cachun, uchilla huahuacuna paicunapa jatun mandanga.

5 Llactapuracunaca llaquichishca canga, caishuhuan chaishuhuan, shujllangaman paipaj ladolla causajcunahuan; huambracuna jariyashca canga rucucunahuan contra, yanga purijcunapash alicachi tucushcahuan contra.

6 Imaura shuj runa paipaj huauquita japinga paipaj taita huasipuramanda, ningami: Churajunata charingui, ñucanchi mandaj cai, ama cai tucuchina quiquinba maqui ucupi cachun—

7 Chai punllacunapi juranga, nishpa: Ñuca na cashachu shuj jambij; ñuca huasipica na tianllu ni tanda ni churajuna; llactapuracunapa ama mandajta rurahuaichu.

8 Jerusalénca tucuchishca can, Judápash urmashca can, paicunapaj jallucunamanda paicunapaj rurashcacuna Apunchijpaj contra cashca caimanda, fiñachingapa munashpa paipaj punchalla caipa ñavicunata.

9 Paicunapaj ñavi ricuicuna paicunapaj contra testifican, villachinbash paicunapaj juchaca Sodomashna can, caita na pacaita ushan. Ay paicunapaj almacuna, paicunamandallata na ali ruraicunaman quimirishca!

10 Nin ali rurajcunata paicunata ali ringa; paicunapaj rurashcacunamanda fucushcacunata micunga.

11 Ay na alita rurajcunata, paicuna tucuringami; paicunapaj maquicunamanda alicachishpa cushca paicunapapi canga!

12 Ñuca llactapuracuna, huahuacuna paicunapa llaquichijcuna canga, huarmicuna paicunata mandanga. Oh ñuca llactapuracuna, paicuna pimi quiquinda pushan pandachin tucuchinbash quiquinba rina chaquiñangunata.

13 Apunchijca jatarin randi shayarinbash llactapuracunata ricushpa chasquichingapa.

14 Apunchijca callaringa ricushpa chasquichingapa paipaj llactapura rucucunahuan mandajcunahuanbash; canguna uvas chagrata micushpa tucuchishcanguichi huajchacunapaj charishcacunata quichushcanguichi paicunapaj huasicunapi.

15 Imata munanguichi? Ñuca llactapuracunata tzangashpa llaquichinguichi, huajchacunapaj ñavicunata cutanguichi, Tucuita Mandaj Apunchij Dios nin.

16 Ashtahuanbash, Apunchij nin: Siónba ushicuna jariyashcacuna caimanda, jatun tucushca purin ñavicunapash pingai illacuna, purishpa paicuna bailanajunshna rin, paicunapaj chaquicunahuan tsilin nichishpapash—

17 Chaimanda Apunchijca chugrichinga shuj shijshi sarnacunahuan Siónba ushicunapaj mollerata, Apunchijca paicunapaj pinganayai pushtucunata ricuchinga.

18 Chai punllapica Apunchijca anchuchinga juyailla ricurinata paicunapaj juyailla tsilin ninapa, ajchata juyaillayachinacunata, lunashnalla redondolla chaupipash;

19 Hualcacunata maqui huatanacunatapash, uchilla rebozocunatapash;

20 Umapi churanacunata, changacunata juyaillayachinacunatapash, umata huatanacuna, ashnachinacuna, sarcillocunapash;

21 Sortijascuna, singapa juyaillacuna;

22 Shujta shujta churajunacuna, jahualla pillurinacuna, umamanda quilparinacuna, ajchata churuyachinacuna;

23 Espejocuna, lino finocuna, rebozocuna, velocunapash.

24 Yalishca jipa, mishquilla ashanana randica millanayaita ashnai canga; chumbipaj randica cabia; ali ñajchashca ajcha randica nima ajcha illa; juyailla pillurina randica cañamu; juyaillagu randica rupashca canga.

25 Quiquinba runacuna espadahuan huañuchi tucunga quiquinba shinllicunapash macanajuicunapi.

26 Paipaj pungucunapi llaquiringa llaquiyangapash; pipash illa canga, alpa jahuapi tiaringa.