1 Ashtahuangari riqui, tauca tianga—chai punlla imaura ñuca paicunahuan rurashpa catisha shuj juyaillapacha ruraita, ñuca yarisha pactachinacunata runacunapaj huahuacunahuan rurashcata, ñuca maquita chutasha catipi ñuca llactapuracunata tigrachimusha, picuna Israelpaj huasipami can;

2 Ñuca yarichunbash nishcapachacunata imatami ñuca quiquinman Nefi rurarcani, quiquinba taitamanbash, ñuca yarishami canbaj cati aillucunata; canbaj cati aillucunapaj shimicunaca ñuca shimimanda llujshimunga canba cati aillucunaman; ñuca shimi caruman uyaringa cai alpa tucurinacaman, ñuca llactapuracunaman shuj bandera laya, picuna Israelpaj huasimanda can;

3 Ñuca shimicuna caruman uyarimanda—tauca Gentilcunamanda ninga: Shuj Biblia! Shuj Biblia! shuj Bibliata charinchi, ashtahuan Biblia na tiai ushanllu.

4 Ashtahuangari Apunchij Diosca shina nin: Oh juizu illacuna, paicuna charinga shuj Bibliata; Judíocunamanda llujshimunga, ñuca punda convenio llactapuracuna. Nachu pagui nin Judíocunata Bibliamanda imatami chasquin paicunamanda? Ari, caihuan Gentilcuna ima ningapa munan? paicuna Judíocunapaj llaquicunata yarinllu, ruraicunata, nanaicunata, ñucaman paicunapaj rurariajcunapash, quishpita Gentilcunaman apangapa?

5 Oh Gentilcuna, Judíocunata yarishcachu canguichi, ñuca punda convenio llactapuracuna? Na; ashtahuangari paicunata llaquichishcanguichi, na ricunayachishcanguichi, paicunata na tigrachimungapa munanguichi. Ashtahuangari riqui, ñuca tigrachisha tucui cuzascunata cangunapa umacunamanllata; ñuca, Apunchij ñuca llactapuracunata na cungashcanichu.

6 Oh juizu illa, ninguimi: Shuj Biblia, shuj Bibliata ñucanchi charinchi, na ashtahuan Bibliata minishtinchichu. Charinguichimanlla carca shuj Bibliata Judíocunamanda na cashpaca?

7 Nachu yachanguichi jatun llactacunaca shujlla tiajmanda ashtaca tian. Nachu yachanguichi ñuca, Apunchij cangunapaj Dios, tucui runacunata rurashca can, ñuca yarini picuna jatun mama cocha islacunapi cajcunatapash; ñuca mandani jahua pachapi alpapipash; ñuca shimita runacunapaj huahuacunaman apamuni, ari, cai alpapaj tucui jatun llactacunatapash.

8 Imashpata huasharimanguichi, ashtahuan ñuca shimita chasquingapa? Nachu yachanguichi ishcai jatun llactacunamanda testimonioca ñuca Dios cani ricushcata nijcuna can, ñuca yarini shuj jatun llactata cutishujtapash? Chaimanda, ñuca parlani chai shimicunatallata shuj jatun llactaman chaishumanbash. Imaura ishcai jatun llactacuna tandanajujpi ishcandi jatun llactacunapaj testimoniopash tandanajungapash.

9 Caita rurani taucacunaman ricuchingapa ñuca paillata cani, caina, cunan, imaurapash na tucurinacaman; ñuca shimicunata villani ñuca munaimanda. Ama yaichichu shuj shimita parlaimanda, shujta na parlai ushani; ñuca rurai nara tucurinllu; na tucuringachu runa tucurijpipash, chai punllamanda na tucurinacaman.

10 Chaimanda, shuj Bibliata charimanda na yanachu canguichi tucui ñuca shimicunata charinchi yashpa, na yanachu canguichipash ñuca na ashtahuan quilcachishcani.

11 Tucui runacunata mandani, ishcandi lado indi llujshiju ladopi, indi huashajuj ladopipash, vichaipipash, uraipipash, jatun mama cocha islacunapipash, paicuna quilcanga ñuca parlashca shimicunata; quilcashcacuna chai quilcashca cajcunamanda cai alpata ricushpa chasquichisha, shujllangaman paipaj rurashcacunamanda, quilcashca cajcunamanda.

12 Riqui, Judíocunaman parlasha chaita paicuna quilcanga; Nefitacunamanbash parlasha paicunapash quilcanga; Israelpaj huasipaj shuj tribucunaman parlasha, picunata caruman pushashcani, paicunapash quilcanga; tucui alpapaj jatun llactacunamanbash parlasha paicuna quilcanga.

13 Yalishca jipa Judíocuna, Nefitacunapaj shimicunata charinga, Nefitacuna Judíocunapaj shimicunata charinga; Nefitacuna Judíocunapash Israelpaj chingashca tribucunapaj shimicunata charinga; Israelpaj chingashca tribucuna Nefitacunapaj Judíocunapaj shimicunatapash charinga.

14 Yalishca jipa ñuca llactapuracuna, Israelpaj huasimandacuna can, tandanajushca canga paicunapaj huasipi paicunapaj charishca alpacunaman; ñuca shimipash shujllapi tandachishca canga. Ricurimushami ñuca shimirimashcacunahuan ñuca llactapuracunahuan macanajujcunaman, picunami Israelpaj huasimanda, ñuca cani Dios, ñuca conveniota rurashcani Abrahamhuan paipaj cati aillucunata na tucurinacaman yarishami nishpa.