1 Ia oqo, Jekope, au sa kaya vei iko: Ko iko na noqu ulumatua ka sucu ena gauna ni noqu rarawa ena loma ni lekutu. Ka raica, ni ko se gone, ko a sota kaya na leqa kei na veika rarawa e vuqa, ena vuku ni nodratou itovo ca na tuakamu.

2 Ia, Jekope, na imatai ni luvequ ka sucu ena lekutu, ko sa kila na cecere ni Kalou; ka na vakatabuya ko koya na nomu rarawa mo rawata kina na vinaka.

3 O koya, ena vakalougatataki kina na yalomu, ia ko na bula sautu tiko kei na tuakamu, ko Nifai; ia, ko na qarava na nomu Kalou ena nomu veisiga taucoko. O koya, au kila kina ni ko sa vueti, ena vuku ni nona yalododonu na nomu Dauveivueti; ni ko sa raica ni na yaco vakaidina ni ena taucoko ni gauna ena lako mai kina ko Koya me kauta mai na veivakabulai vei ira na tamata.

4 Ia, ko sa raica talega na nona lagilagi ni ko se cauravou; o koya gona, ko sa vakalougatataki kina me vakataki ira ena qaravi ira ko Koya ena bula vakayago; ka sai koyakoya tiko ga na Yalo ena noa, ena siga edaidai, ka sega ni mudu. Ka sa vakarautaki tu na sala mai na gauna a lutu kina na tamata, ia sa isolisoli wale ga na veivakabulai.

5 A sa vakavulici vakavinaka na tamata me kila kina na vinaka mai na ca. Ka sa soli na lawa vua na tamata. Ka sa sega ni vakadonui e dua na tamata ena lawa; se, ena lawa ga sa muduki tani kina na tamata. Io, era sa muduki tani ena lawa vakayago; e dua tale, ena lawa vakayalo era na rusa ga ka tawasei mai na ka vinaka, ka ra na rarawa sara tu me sega ni mudu.

6 Ia, sa yaco na veivueti ena vukui koya na Mesaia Tabu; ni sa sinai tu ena loloma soli wale kei na dina.

7 Raica, sa cabori Koya me isoro ni ivalavala ca, me vakayacori kina na inaki ni lawa, vei ira kece sa yalo raramusumusu ka yalo bibivoro; ka sa sega ni vakayacori rawa na inaki ni lawa ki vua e dua tale.

8 O koya, sa ka bibi sara kina me tukuni yani na veika oqo vei ira na lewei vuravura, me ra kila kina ni sa sega ni rawa ni dua na ka bula me tiko ena serau ni Kalou, ka vakavo ga ena nona cakacaka dodonu, kei na loloma cecere, kei na nona loloma soli wale na Mesaia Tabu, o koya sa solia na nona bula me vaka na veika vakayago, ka sa taura lesu tale ena kaukauwa ni Yalotabu, me vakayacora kina na tucake tale mai na mate, ni sa imatai me tucake tale.

9 O koya, sa isevu vua na Kalou ko koya, ka na vakamamasu ena vukudra kecega na luve ni tamata; ka ra na vakabulai ko ira yadua sa vakabauti Koya.

10 Ia ena vuku ni vakamamasu oqo me baleta na tamata kecega, era sa lako rawa kina vua na Kalou na tamata kecega; o koya, era na tu kina e matana, me ra lewai mai vua me vaka na dina kei na savasava sa tu vua. O koya, na inaki ni lawa ka a solia na Yalo Savasava, ena soli kina nai itotogi ka sa toka vata, ia na itotogi ka toka vata oqo sa veibasai kei na marau sa toka vata talega, me vakayacori kina na inaki ni veisorovaki—

11 Ni sa dodonu kina me tu na veibasai ni ka kecega. Kevaka e sega, a imatai ni luvequ ka a sucu ena lekutu, ena sega ni yaco rawa na ivalavala dodonu, se na caka ca, ka sega na bula savasava se na rarawa, ka sega na vinaka se na ca. O koya, sa dodonu kina me vakatautauvatataki na veika kecega; ia kevaka me tautauvata tu ga, sa ka mate wale, ka sa sega kina na bula se na mate, se na vuca se na tawavuca, na marau se na rarawa, ka sega na vuku se na lialia.

12 O koya, sa qai buli kina me ka wale ga; ka sa sega kina ni dua na inaki ni kena a buli. Ia, ena vakarusa na ka oqo na yalomatua ni Kalou kei na nona inaki tawamudu, kei na kaukauwa talega, kei na loloma cecere, kei na lewa dodonu ni Kalou.

13 Ka kevaka dou na kaya ni sega na lawa, ko na kaya talega ni sega na ivalavala ca. Kevaka ko na kaya ni sega na ivalavala ca, ko na kaya talega ni sa sega na ivalavala dodonu. Ia kevaka e sega na ivalavala dodonu ena sega na marau. Ka kevaka sa sega na ivalavala dodonu se na marau ena sega na itotogi se na rarawa. Ka kevaka sa sega na veika oqo sa sega na Kalou. Ka kevaka sa sega na Kalou, sa sega koi keda, ka sega talega na vuravura; ni na sega ni buli e dua na ka, ni sa sega na ka me caka se me cakacakataki; o koya, sa qai takali yani kina na veika kece.

14 Ia oqo, oi kemudou na luvequ, au sa vosataka vei kemudou na veika oqo me yaga vei kemudou ka mo dou vuli kina; ni sa tiko e dua na Kalou, ka a bulia o koya na veika kecega, na lomalagi kei na vuravura, kei na veika kecega sa tu kina, na veika me caka kei na veika me cakacakataki.

15 Ka me vakayacora rawa kina na nona inaki tawamudu vei ira na tamata; ni oti na nona a buli rau na noda itubutubu taumada, kei na manumanu ni vanua kei na manumanu vuka e macawa; ka me vakalekalekataki ga, na ka kecega sa buli, a sa dodonu me tu na kena veibasai, me vaka sa veibasai na vuanikau vakatabui kei na vunikau ni bula, e dua e kamikamica ka dua e wiwi.

16 O koya, sa solia kina na Turaga na Kalou vua na tamata me lewa na ka e kitaka. Ia, sa sega ni rawa ni lewa na ka me kitaka na tamata ka vakavo kevaka me na bacani mai vua e dua se mai vei koya ka dua.

17 Ia, koi au ko Liai, me vaka na veika au a wilika, au vakabauta kina ni dua na agilosi ni Kalou, me vaka na ka sa volai, a lutu tani mai lomalagi ka sa yaco o koya oqo me tevoro, ni a segata na ka ca ena mata ni Kalou.

18 Ia, me baleta ni sa lutu tani mai lomalagi, ka sa rarawa sara me sega ni mudu, sa segata talega me ra rarawa vaka kina na tamata kecega. O koya, a sa kaya kina vei Ivi, io, na gata qase ko ya, o koya na tevoro, o koya na tama ni ka lasu kecega, a sa kaya: Mo kania na vuanikau vakatabui, ka ko na sega ni mate kina; ia ko na vaka na Kalou ni ko na kila na vinaka kei na ca.

19 Ia, ni rau sa kania oti na vuanikau vakatabui ko Atama kei Ivi, erau sa vakatalai tani mai na were ko Iteni, me rau teivaka na qele.

20 Ka rau sa vakasucumi ira mai na gone; io, na vuvale ni vuravura taucoko.

21 A sa vakabalavutaki kina na gauna ni nodra bula na luve ni tamata, me vaka na lewa ni Kalou, me ra veivutuni rawa kina ena gauna ni bula vakayago; ia na nodra itutu sa yaco me itutu ni vakatovolei, ka sa vakabalavutaki na nodra gauna, me vaka na veivakaro sa solia na Turaga na Kalou vei ira na luve ni tamata. Ni a solia na ivakaro ko koya me ra veivutuni na tamata kecega; ni sa vakaraitaka vei ira na tamata kecega ni ra sa yali, ena vuku ni nodrau talaidredre na nodra itubutubu taumada.

22 Ia oqo, kevaka me a sega ni talaidredre ko Atama ke a sega ni lutu tani, ia ke a tiko ga ena were ko Iteni. Ka ra na tu ga ena itutu era a buli kina na veika kecega sa buli; ka ra na vaka tu ga ko ya, ka sega na kedra icavacava.

23 Ka rau na sega ni vakaluveni; ia erau na bula tu ga ka lecaika, ka sega na nodrau marau, ni rau sega ni kila na rarawa; sa sega na ka vinaka erau cakava, ni rau sega ni kila na ivalavala ca.

24 Ia raica, sa caka na veika kece ena lewa yalomatua i Koya sa kila na ka kecega.

25 Sa lutu ko Atama me sucu kina na tamata; sa sucu na tamata me rawata na marau.

26 Ia ena lako mai na Mesaia ena taucoko ni gauna, me vueti ira na luve ni tamata mai na lutu tani. Ia ni ra sa vueti mai na lutu tani era sa galala kina ka sega ni mudu, ka ra sa kila na vinaka mai na ca; me ra lewa vakaira na ka me ra kitaka ka sega na ka me lewai ira, ka vakavo ga na itotogi ni lawa ka na tau vei ira ena siga levu mai muri, me vaka na veivakaro sa solia na Kalou.

27 O koya, era sa galala kina na tamata me vaka na veika vakayago; ka sa soli vei ira na ka kecega sa yaga vua na tamata. Era sa galala me ra digitaka na galala kei na bula tawamudu, ena vukui koya na Dauveivakaduavatataki ni tamata kecega, se me ra digitaka na tiko vakavesu kei na mate, me vaka na nona veivesuki kei na nona kaukauwa na tevoro; raica sa segata ko koya me ra rarawa sara na tamata kecega me vakataki koya.

28 Ia oqo, oi kemudou na luvequ, au gadreva mo dou vakararavi vua na Dauveivakaduavatataki, ka vakarorogo ki na nona veivakaro cecere; ka mo dou yalodina ki na nona vosa, ka digitaka na bula tawamudu, me vaka na gagadre ni nona Yalo Tabu;

29 Ka kakua ni digitaka na mate tawamudu, me vaka na gagadre ni yago kei na ca sa tu kina, ka solia vua na yalo ni tevoro na kaukauwa me veivesu kina, me kauti kemudou sobu ki eli, me lewai kemudou ena nona matanitu.

30 Au sa vosataka na vosa e vica oqo vei kemudou kece na luvequ, ena iotioti ni veisiga ni noqu bula vakatovolei; ka’u a digitaka na tikina vinaka, me vaka na nona vosa na parofita. Ka sa sega ni dua tale na ka au gadreva na tiko vinaka tawavakaiyalayala ga ni yalomudou. Emeni.