1. I na, kia tae ki te au rā openga ra, ki te au ra o te Etene; I na, ko te au basileia katoa o te Etene, e te ngati Iuda katoa oki, ko te ka tae mai ki runga i teianei enua e ko te ka noo ki runga i te au enua ke ke ra, koia oki te au enua katoatoa o teianei ao. ka konaia i te tuatua tika kore, e te au angaanga viivii katoa ra.

2. E kia tae ki taua rā ra, e atoro mai ei te Atua Sabaota ia ratou i te mangungu, e te ngaueue enua, e te aruru maata, e te matangi maata e te uriia, e te ai akapou maata ra.

3. E te au enua katoatoa e tamaki mai ki Ziona ra, e tei takinga kino oki iaia, e riro ia ratou mei te moemoeā i te po. Mei te moemoeā a te tangata matepongi, i na, te kaikai ra aia, kia ara mai ra, kare oki i pangia tona kaki, e mei te tangata kaki vai ra kia rokoia e te moemoeā, te inu ra aia, kia ara mai ra, i na, kua paruparu aia e te kaki ua atu ra aia; e pera rai te tangata katoatoa o te pa enua ra, ko tei tamaki ki te maunga ra ki Ziona.

4. E i na, ko kotou katoatoa tei rave i te kino ra, e oki e akamanako ana, ka kapiki atu kotou e ka aue atu oki, i na, ka kona kotou, kare ra i te wina, e tauriuri ua kotou, kare ra i te kava kona.

5. E i na, kua riringi oki te Atu i te vaerua o te moe maata ki rungao ia kotou. E i na, kua tapiri kotou i to kotou mata, e kua akaruke oki kotou i te au peroveta; e no ta kotou au ara i tapoki ei aia i to kotou au tutara, e to kotou au akara.

6. E akatae maira oki te Atu ra ko te Atua i te tuatua o tetai puka kia kotou, ko te tuatua a te aronga i moe ra.

7. E i na, e topiriia taua puka ra, e ko taua puka ra, e akakiteanga ïa mei te Atua maira, no muatangana maira o teianei ao e tae ua atu ki te openga ra.

8. E no te au mea i topiriia ra, e kore ei te reira e tukuia atu i te tuatau o te tuatua tika kore e te au angaanga kikino a te tangata nei, no reira i araiiaʼi te puka ia ratou.

9. E tukuia atu ra taua puka ra ki tetai tangata, e nana oki e tuku atu i te tuatua o taua puka ra, koia oki te au tuatua a te aronga i moe ki raro i te one ra; e nana oki e tuku atu i te tuatua o taua puka ra ki tetai ke;

10. Kare ra aia e oronga atu i te puka, kare katoa i te tuatua i topiriia ra. E topiriia te puka e te mana o te Atua, e ka vaio uaia te eeuanga i topiriia i roto i te puka ra, e tae ua atu ki te tuatau tau i te Atu kia tukuia mai ei, i na oki, na te reira e akakite mai i te au mea katoatoa mei muatangana maira o teia nei ao e tae rava atu ki te openga.

11. E ka tae maira oki te ra e tatauiaʼi te au tuatua o te puka i topiriia ra ki runga i te au tauu o te are, e tatauia ïa e te mana o te Mesia ra, e ka eeuia mai te au mea katoatoa i raveia ana i rotopu i te tamariki a te tangata ra, e te ka raveia e tae rava atu ki te openga o teianei ao.

12. Ei taua rā ra, e tukuia atu ei taua puka ra ki taua tangata taku i tuatua ana, ka uunaia taua puka ra i te mata o to te ao nei, kia kore te tangata e kite i te reira, mari ra ko nga kite toko toru te ka akara ki taua puka ra, e ka kite ratou na roto i te mana o te Atua, pera katoa te tangata i orongaia te puka kiaia ra; e e riro ratou ei akakite e, e tuatua mou taua puka ra, e te au mea katoa i tataia ki roto ra.

13. E kare tetai ke atu e akara i te reira, mari ra, e toko tai puke tangata mei tei tau i te inangaro o te Atua, e riro ratou ei akakite i tana tuatua ki te tamariki a te tangata, kua tuatua maira oki te Atu ra ko te Atua, e kapiki mai te tuatua a te aronga tuatua tika ra, mei te mea e no te mate maira.

14. E no reira e apai maira te Atu ra ko te Atua, i te au tuatua o taua puka ra, e na roto i te vaa o nga kite mei tei tau i tona inangaro e akatinamouiaʼi tana tuatua, aue oki tei akaruke i te tuatua a te Atua ra.

15. Ina ra, e tuatua mai te Atu ra ko te Atua kiaia, ki tei rauka te puka ra, ka rave koe i teia au tuatua tei kore i topiriia ra, ka tuku atu ei ki tetai, e nana oki e akaari atu i te reira ki te tangata apiiia ma te tuatua e, ka tatau ana koe i teia, ei reira, e tuatua mai ei te tangata kite e, Ka apai mai i te puka, e ka tatau au i te reira.

16. E teianei, no te kaka o teianei ao, e kia rauka oki te moni ka tuatua aia i te reira, e kare no te kaka o te Atua ra.

17. E ka karanga maira te tangata, kare e rauka iaku kia apai mai i te puka, no te mea kua topiriia.

18. Ei reira te tangata kite e tuatuaʼi e, kare e rauka iaku i te tatau.

19. E tuku akaou atu ra te Atua i taua puka ra e te au tuatua o roto, ki te tangata apii koreia, e ka karanga mai te tangata apii koreia e, kare au i apiiia.

20. Ei reira te Atu ra ko te Atua e tuatuaʼi kiaia ra e, kare te aronga kite e tatau i te reira, no te mea kua akaruke ratou i te reira e ka rauka iaku i te rave i taku uaorai angaanga; no reira ka tatau koe i te tuatua taku ka oronga atu kia koe.

21. E vaoo ua i te ngai i topiriia ra, e akatupu oki au i te reira i te tuatau tau iaku ra, ka akakite oki au ki te tamariki a te tangata nei e, ka rauka iaku te rave i taku uaorai angaanga.

22. E tenana, e oti akera ia koe te tatau i te au tuatua taku i akaue atu kia koe ra, e kia rauka oki ia koe nga kite taku i tuatua ia koe, ei reira koe e tapiri akaou ei i taua puka ra, e e uuna akaou oki kiaku ra, kia akono au i te au tuatua i kore i tataia e koe ra, e tae rava atu ki te tuatau e tika iaku kia akakite atu i te au mea katoatoa ki te tamariki a te tangata nei.

23. I na oki, ko au te Atua, e Atua oki au no te semeio, e e akakite oki au ki to te ao nei e, okotai oku tu, i nanai, i teia nei ra, e tuatau ua atu; e kare oki au e angaanga i rotopu i te tamariki a te tangata nei, mari ra, na roto i to ratou akarongo.

24. E tuatua atura oki te Atua kiaia te ka tatau i te au tuatua e tukuia atu kiaia ra e,

25. No te mea te akavaitata mai nei teianei aronga iaku i to ratou vaa, e te akameitaki maira to ratou ngutu iaku, tei te atea ke ra to ratou ngakau iaku nei, e to ratou mataku iaku nei, e mea apii uaia ïa e te tuatua a te tangata anake ra.

26. No reira i rave atu ei au i te ravenga vavaria i teianei aronga; i na, e ravenga vavaria e te poitirere. Te kite o to ratou aronga pakari e tei apiiia, ka kore, e te kite a to ratou aronga akono ra, e ngaro ke ïa.

27. Aue oki ratou to tei kimi i te mea oonu, e uunaʼi i ta ratou ravenga i te Atu! E tei te poiri ta ratou angaanga e te karanga ra oki ratou e, Naai tatou e akara mai? Koai tei kite mai ia tatou? E karanga katoa ratou e, e akaaiteia ta kotou akauri anga i te au mea ravarai mei te karaea o te potera ra, ina ra, e akakite atu au kia ratou e, te kite nei au i ta ratou au angaanga katoatoa, te na ko maira te Atu Sabaota ra. E tuatua ainei oki te angaanga ki te tangata nana i maani, kare aia i maani iaku? E tuatua ainei tei angaia ki tei anga iaia, kare ona kite?

28. I na, te na ko maira te Atu Sabaota ra, E akakite atu au ki te tamariki a te tangata e, kare e roa te tuatau e riro ei Lebanona ei kainga ua maata, e manakoia oki te kainga ua maata ei enua vaorakau ra.

29. Kia tae ki te reira ra, e akarongo ei te turi i te tuatua o te puka; e mei roto i te kareureu e te poiri, e kite ei te mata o te aronga matapo tikai ra.

30. E akamaata te aronga maru i to ratou rekareka i te Atu; e e mataora ua te tangata putaua i Tei Tapu i Iseraela nei.

31. E te ora ra te Atu, e kite ei ratou e, ko tei rikarika, ka kore ïa; e ka pou tei taitoito, e ko tei kimi i te mea kino, ka tipu keia ïa;

32. E ko tei akaapa i te tangata i te tuatua, e tei tuku oki i te ereere i tei ako mai i te ngutupa ra, e tei kopae atu i te aronga tuatua tika ra mei te mea puapinga kore ra.

33. E teianei, te na ko maira te Atu ko tei akaora ia Aberahama, no runga i te ngutuare o Iakoba, kare a Iakoba e akama akaou, kare oki e moteteaka akaou tona rae.

34. Kia kite ra aia i tana au tamariki, te angaanga no toku rima, i roto iaia, e akatapu ratou i Tei Teitei ia Iakoba ra, e mataku ratou i te Atua o Iseraela.

35. E te aronga i apa i te vaerua, e rauka ia ratou te kite i te reira, e te aronga i nanunanu maira, e akaronga ïa i te ako.