1 Cristo huañuimanda causarishca jipaca cangunaman pai ricurimuringa, ñuca huahuacuna, ñuca juyashca huauquicuna; shimicunaca pai imatami parlanga catichunbacha saquishcami canga chaicunata ruranguichi.

2 Riqui, cangunaman nini ñuca ricushcani tauca miraicuna yalinga, jatun macanajuicuna tianga ñuca llactapura fiñanajuicuna.

3 Mesías shamushca jipa paipaj nacirina señalcuna ñuca llactapuracunaman cushca canga, paipaj huañui causarinapash; chai punlla na alita rurajcunapa jatun manllanayai canga, paicuna huañunga; paicuna huañunga achil villachijcunata, santocunatapash llujchishpa cachaimanda, paicunata rumihuan macanbash huañuchinbash; chaimanda santocunapaj yahuar alpamanda caparin, Diospaman vitsianga paicunapaj contra.

4 Chaimanda, tucui picunami jariyashcacuna caj, na alita rurajcunapash, punlla shamun paicuna rupachishca canga, Tucuita Mandaj Apunchij nin, paicuna jupashna canga.

5 Achil villachijcunata, santocunatapash huañuchijcunata, alpa ucu ucucunaman langanga, Tucuita Mandaj Apunchij nin; urcucunapash pambanga, acapanacuna apanga, huasicuna paicunapaj jahuapi urmanga ñutungapash cutashca alpaman tigrachinga.

6 Paicuna ricuj shamui tucushca canga culun nijcunahuan, punchapamba micha shitaicunahuan, alpamama cuyuicunahuan, tucui laya tucuchicunahuanbash, paicunahuan Apunchijpaj fiñai nina japirishca canga, paicuna jupashna canga, punlla shamujca tucuchinga, Tucuita Mandaj Apunchij nin.

7 Oh nanai, ñuca almapaj jatun llaqui ñuca llactapuracuna huañushpa chingachimanda! Ñuca, Nefi, ricushcani, Apunchijpaj ñaupapi ñalla ñalla ñucata tucuchin; ashtahuangari ñuca Diosta mañana cani: Quiquinba ñangunaca alimi can.

8 Ashtahuangari riqui, alita rurajcuna achil villachijcunapaj shimicunata uyajcuna, paicunata na tucuchijcuna, ashtahuangari Cristopi shuyan na shaijushpa señalcunata ricuchishcacunamanda, masqui tucui na ricunayachishpa catijpipash—riqui, paicunami na huañunga.

9 Ashtahuangari Ali Ruranapaj Churica paicunapaman ricurimunga; paicunata jambinga, paihuan sumaj causaita charinga, quimsa miraicuna yalingacaman, tauca chuscu miraimanda alita rurashpa huañushca canga.

10 Imaura cai cuzascuna yalishca cajpica shuj ñapash tucuchina ñuca llactapuracunaman shamunga; masqui ñuca almapaj nanaicunamanda, caita ricushcani; chaimanda, ñuca yachani cai yalinga; paicunamandallata yangapa jaturinga; paicunapaj jariyaipa, juizu illacunapaj alicachishca canaca tucuchinata chasquinga; ayaman mingarimanda yanallapaj ruranacunata ajllaimanda michapa randi, caimanda paicuna ucu pachaman ringami.

11 Apunchijpaj Espírituca runahuan na macanajunshna punllan punllan catijungallachu. Imaura Espíritu runahuan macanajunshna ñana catijpica chaica ñapash tucuchina shamunga, cai ñuca almata llaquichin.

12 Imashna ñuca parlarcani Judíocunata crichingapa, Jesús ciertopacha Cristo can, cai minishtirishca can Gentilcunapash crichun Jesús Cristo cajta, Mana Tucurina Dios;

13 Paica ricurimungami tucui picunaman paipi crin, Espíritu Santopaj ushaihuan; ari, shujllangaman jatun llactaman, reinoman, shimi rimaiman, llactapuracunamanbash, jatun juyailla ruraita ricuchinacuna rurashpa, señalcuna juyailla ricurinacunapash, runacunapaj huahuacunaman paicunapaj femanda.

14 Ashtahuangari riqui, cangunaman achil villani tucuri punllacunamanda; punllacunamanda imaura Apunchij Dios runacunapaj huahuacunaman cai cuzascunata ricuchinga.

15 Jipaman ñuca cati aillucuna ñuca huauquicunapaj cati aillucunapash na crishpa asha asha chingaringa, Gentilcunahuan chugrichishca canga; ari. Apunchij Dios paicunata muyundi jarcashpa shayarishpaca, chaupipi churashpa baluartehuan, paicunata jarcanacunata shayachishpa; chai paicuna alpacaman llaquichi tucushca jipa, paicuna ñana tiangacaman, shina cashpapash ali rurajcunapaj shimicunaca quilcashca canga, fielcunapaj achil mañaicuna uyashca canga, tucui picunami na crishpa asha asha chingarishcacuna na cungai tucushcacuna cangachu.

16 Picunami tucuchi tucushcacunaca alpamanda parlanga, paicunapaj shimicuna alpamanda alillaguta parlanga, paicunapaj shimi cangami shuj rijsi espíritushnalla; Apunchij Dios paiman ushaita cunga, chaicunamanda alillaguta parlachun, alpamanda cai can laya; paicunapaj shimicuna alpamanda alillaguta parlanga.

17 Apunchij Diosca shina nin: Quilcangami paipura rurashca cuzascunata, quilcashca shuj quilcaipi sellashca canga, picunami na crishpa asha asha chingarishcacuna na charingachu, paicuna Diospaj cuzascunata tucuchingapa mascaimanda.

18 Chaimanda, picuna tucuchishcacuna carca shinallata ñapash tucuchi tucurca; paicunapaj ashtacapacha tandanajushca manllanayaicunaca tucurina ujshashna canga—ari, Apunchij Diosca shina nin: Cai cangami jaicamanda, ñapash—

19 Yalishca jipa, picunami na crishpa asha asha chingarishcacuna Gentilcunapaj maquihuan chugrichishca canga.

20 Gentilcunaca vichai alsarishca canga paicunapaj jariyai ñavicunapi, nitijashca can, paicunapaj jatun nitijachijmanda, paicuna huasichishca tauca iglesiacunata; shina cajpipash, Diospaj ushaita juyailla ruraita ricuchinacunatapash yangapi churan, yachachin paicunapaj jatun yachaitalla paicunapaj yachajushcatalla, paicuna charijyangapa huajchacunapaj ñavita cutan.

21 Tauca iglesiacuna huasichishca tian imacuna tangachin envidiacunaman, fiñachinajuicunamanbash, na alicunata rurachinamanbash.

22 Pacalla tandanajunacunapash tian, punda punllacunapishnallata, ayapaj tandanajunacunamanda, paimi tucui cai cuzascunapa shayachij; ari, huañuchinapaj shayachij, yanallapaj ruranacunapash; ari, pai apan shuj lino cabiahuan huatashpa, imaura shinlli cabiahuan na tucurinacaman huatangacaman.

23 Riqui, ñuca juyashca huauquicuna, cangunaman nini Apunchij Diosca na yanallapi ruranllu.

24 Pai na imatapash ruranllu, cai alpapa ali canatalla ruran; cai alpata juyaimanda, paipaj causaita cungacaman, tucui runacunata paipaman apamungapa. Chaimanda, nipita pai na mandanllu paipa quishpichinata ama chasquichun.

25 Riqui, pai caparinllu pitapash, nishpa: Anchurichi ñucapamanda? Riqui, cangunaman nini, Na; ashtahuangari pai nin: Ñucapaman shamuichi tucui alpa tucurinacunamanda, lecheta randi mishquitapash, culqui illa, precio illa.

26 Riqui, pai mandarcachu pipash tandanajuna huasicunamanda llujshichun, nacashpaca adorana huasicunamanda llujshichun? Riqui, cangunaman nini, Na.

27 Pai mandashcachu pipash paipaj quishpichinata ama chasquichun? Riqui cangunaman nini, Na; ashtahuangari pai tucui runacunaman carashca can; pai mandashca paipaj llactapuracunata paicuna tucui runacunata arrepentirinata nichun.

28 Riqui, Apunchijca mandashcachu pipash paipaj alicaita ama chasquichun? Riqui cangunaman nini, Na; ashtahuangari tucui runacuna chai charinacunallata can caishupapash chaishupapash, pipapash na saquishca na canllu.

29 Pai mandashca supercheríacuna ama tiachun; riqui, supercheríacunaca can runacunapa yachachichun paicunallata cai alpapaj micha cachun, paicuna charijyachun cai alpapaj alicachinatapash; ashtahuangari paicuna Sión ali canata na mascanllu.

30 Riqui, Apunchijca na saquinllu cai cuzasta; chaimanda, Apunchij Diosca shuj rurachunbacha saquishcata cushca tucui runacuna caridadta charichun, chai caridad can juyai. Paicuna caridadta charina na cashpaca ima na canllu. Chaimanda, caridadta charishpaca, na saquingachu Siónpi ruraj runa huañuchun.

31 Ashtahuangari Siónpi ruraj runaca Siónpa ruranga; culquipa rurashpaca tucuringami.

32 Cutin, Apunchij Dios mandashca can runacuna ama huañuchichun; ama llullachun; ama shuhuachun; paicunapaj Apunchij Diospaj shutita ama yanga japichun; ama shujpa charishcata munachun, ama na alita rurachun; caishuhuan chaishuhuan ama fiñanajuchun, ama fornicacióncunata rurachun; cai cuzascunamanda nimaijanda na rurana, picuna caicunata rurashpaca tucuringami.

33 Nimaijan cai na ali ruraicunaca na Apunchijpamanda shamun; pai ruran ima runacunapaj huahuacunapa ali canata; nimata na ruran runacunapaj huahuacunapa na pandana punchalla canata; pai cumbidan tucui paicuna shamuchun paipaj ali caita chasquichun; paipaman shamujcunata na jarcashpa saquinllu, yanata yurajtapash, esclavota libretapash, jarita huarmitapash; pai yarin Diosta na crijta; tucuimi Diospaca shinallata can, ishcandi Judíopash Gentilpash.