Kapitulu 7
Ding anak nang lalaking Lehi mibalik la Jerusalem at inagkat de i lsmael at ing keang balayan bang makiyabe karela king karelang pamaglakbe — I Laman at ding aliwa sinalangsang la — I Nephi inamuyut nala ding keang kapatad bang mika kasalpantayanan king Guinu — Ginapus de king lubid at binalak da ing keang kamatayan — Meging malaya ya king upaya ning kasalpantayanan — Ding keang kapatad meniawad lang kapatawaran — I Lehi at ding keang kayabe minain lang sakripisyu at ain a durulukan.
1 At ngeni buri ku abalu yu ngan, a kaibat nang menulang tata ku, i Lehi, tungkul king keang bini, iti milyari a ing Guinu mengamanu ya keang pasibayu, sasabian na e dapat para kea, i Lehi, a ing pamilia na kabud ing ituki na king ilang, dapot ding keang anak a lalaki dapat lang kumang anak a babai para maging asawa, bang mika anak la para king Guinu king labuad ning pangaku.
2 At milyari a ing Guinu inutus na kea a aku, i Nephi, at ding kakung kapatad, dapat lang mibalik pasibayu king labuad ning Jerusalem, at ituki ya i Ismael at ing keang pamilia king ilang.
3 At milyari a aku, i Nephi, at ding kakung kapatad, minta kaming pasibayu king ilang bang munta king Jerusalem.
4 At milyari a minta kami king bale nang Ismael at ikua mi ing mayap nang paglalawe Ismael, angga king sinabi mila kea ding amanu na ning Guinu.
5 At milyari a ing Guinu pepalambut ne ing pusu nang Ismael, at makanian mu naman ding keang katubale, angga king miglakbe lang kayabe mi king ilang angga king tolda ning kekaming tata.
6 At milyari a kabang maglakbe kami king ilang, lawan, i Laman at i Lemuel, at ding adua nang anak a lalaking Ismael at ding karelang pamilia sinalangsang la laban kekami; wa, laban kaku, i Nephi, at i Sam, at ing karelang tata, i Ismael, at ing keang asawa, at ding keang atlung aliwang anak a babai.
7 At milyari a king pamagsalangsang a ini, bisa lang mibalik king labuad ning Jerusalem.
8 At ngeni aku, i Nephi bilang malungkut king kesiasan da ring karelang pusu, nung makanian migsalita ku karela, a sasabing, wa, anggiyang kang Laman at kang Lemuel: Lawan, ikayu ding kakung matuang kapatad, makananung meging masias la ding kekayung pusu, at meging bulag la ding kekayung kaisipan, a kailangan pang aku, ing kekayung makawaling kapatad, ing dapat mangamanu kekayu, wa, at mamiye alimbawa kekayu?
9 Makananu kayung e makiramdam king amanu na ning Guinu?
10 Makananu yung akalinguan a menakit kayung anghel na ning Guinu?
11 Wa, at makananu yung akalinguan ding dakilang bage a agawa ning Guinu para kekatamu, king pamagligtas na kekatamu karing upaya nang Laban, at makanian mu naman a dapat talang akua ding kasulatan?
12 Wa, makananu yung akalinguan a ing Guinu agiu nalang gawan ding anggang bage agpang king keang kaburian, para karing tau, nung gagawan da ing kasalpantayanan da kea? Anya pin, dapat tamung maging matapat kea.
13 At nung matapat tamu kea, kekatamu yang dasnan ing labuad ning pangaku, at kekayu yang abalu king daratang a panaun a ding amanu na ning Guinu matupad la tungkul king pangalasak ning Jerusalem; uling ding anggang bage a sinabi ning Guinu tungkul king pangalasak ning Jerusalem dapat lang matupad.
14 Uling lawan, ing Espiritu na ning Guinu, e maglambat tuknang yang sasaup karela; uling lawan, tinggian da la ding propeta, at i Jeremias kilung de. At pignasan deng paten ing kanakung tata, angga king pinilit deng penabi palual king labuad.
15 Ngeni makiramdam, sasabian ku kekayu a nung mibalik kayu king Jerusalem mangamate kayu mu namang kayabe ra. At ngeni, nung ita ing kekayung kaburian magbalik kayu king labuad, at ganakan yula ding amanung sinabi ku kekayu, a nung mibalik kayu mangamate kayu mu naman; anya pin ing Espiritu ning Guinu pipilitan nakung sabian ku ini.
16 At milyari a anyang aku, i Nephi, asabi kula dening amanung deni karing kanakung kapatad, mimua la kanaku. At milyari a penasakit daku, uling lawan, masyadu ing mua ra, at ginapus daku king lubid, uling pignasan dakung paten, kapamilatan na ning pamaglakuan da kaku king ilang para apangan daku ding animal.
17 Dapot milyari a menalangin ku king Guinu, a sasabing: O Guinu, agpang king kakung kasalpantayanan a atiu kekayu, iligtas yu ku sana karing gamat da ring kanakung kapatad; wa, anggiamang dinan mu kung sikanan ba ku lang apatlud dening lubid a reni a makagapus kanaku.
18 At milyari a anyang asabi kula dening amanu, lawan, milako la pangagapus ding kanakung gamat at bitis, at tinalakad ku arapan da ring kapatad ku, at mengamanu ku karelang pasibayu.
19 At milyari a mimua la kakung pasibayu, at pignasan dang panasakitan daku; dapot lawan, metung karing anak nang babaing Ismael, wa, at makanian mu naman ing keang ima, at metung karing anak nang lalaking Ismael, migmakalunus la karing kakung kapatad, angga king ila pepalambut dala ring karelang pusu; at tinuknang lang magnasang paten daku.
20 At milyari a ila melungkut la, uli ning karelang karokan angga king dinuku la king arapan ku, at migmakalunus la kanaku para patawaran kula king bage agawa ra laban kaku.
21 At milyari a agad ku lang pepatawad king anggang agawa ra, at inagkat kula a manalangin la king Guinu a Dios da king kapatawaran. At milyari a depatan da pin. At kaibat dang menalangin king Guinu sinulung kaming pasibayu king kekaming pamaglakbe papunta king tolda nang tata mi.
22 At milyari a miras kami king tolda nang tata mi. At kaibat aku at ding kapatad ku at ding eganaganang pamilia nang Ismael dinatang kami king tolda nang tata ku, pepasalamat la king Guinu a Dios da; at menain lang sakripisyu at ain a durulukan kea.