1 At ngeni milyari a kaibat ku, i Nephi, a migsalita kareng kanakung kapatad, makiramdam sinabi da kanaku: Sinabi mula kekami ding mangasakit a bage, mas masakit kesa king agiu ming tanggapan.

2 At milyari a sinabi ku karela a balu ku aku megsalita kung mangasakit a bage laban karing mangarok, agpang king katutuan; at ding mayap dininan kong matulid, at migpatutu a ila dapat lang mitas king tauling aldo; anya pin, ding makasalanan tatanggapan dang masakit ing katutuan, uling balamu mapuputut la king kalibudtan na ning karelang katawan.

3 At ngeni, kanakung kapatad, nung ikayu mangayap kayu at bisa kong makiramdam king katutuan, at mamintu kaniti, bang makalakad kong matulid king arapan ning Dios, nung makanian ekayu bubulung uli ning katutuan, at sumabing: Ika magsalita kang mangasakit a bage laban kekami.

4 At milyari a aku, i Nephi, inamuyut ko ring kakung kapatad, king anggang sipagan, bang pamintuan do ring kautusan na ning Guinu.

5 At milyari a migpakumbaba la king arapan na ning Guinu; angga king mika tula ku at maragul a pagasa para karela, a lumakad la king dalan na ning kayapan.

6 Ngeni, dening anggang bage mesabi la at metupad kabang menuknangan ya i tata ku king metung tolda king libis a inaus nang Lemuel.

7 At milyari a aku, i Nephi, inasawanan ke ing metung karing anak nang babaing Ismael; makanian mu naman, ding kanakung kapatad kinangua la karing babaing anak nang Ismael bang maging asawa; at makanian mu naman i Zoram kinua ne ing pekamatua nang anak a babaing Ismael bang maging asawa.

8 At kanita i tata ku atupad na nala ding anggang kautusan na ning Guinu a biniye na kea. At makanian mu naman, aku, i Nephi penuanan nakung maragul ning Guinu.

9 At milyari a ing siwala na ning Guinu migsalita ya kang tata ku neng bengi, at inutusan ne a itang kabukasan dapat yang maglakbe king ilang.

10 At milyari a anyang mibangun ya i tata ku pangaabak, at linual king pasbul ning tolda, king maragul nang pangabigla menakit ya king gabun metung a mabilug a bola e pangkaraniwan a pangagawa; at gawa ya king purung tansu. At king kilub ning bola ating aduang panuldu; at ing metung makatuldu ya king dalan nung nukarin ke dapat munta king ilang.

11 At milyari a tinipun mi ing eganaganang bage dapat ming dalan king ilang, at ing eganaganang mitagan king kekaming gamit a biniye na kekami ning Guinu; at kinangua kaming bini king balang uri a malyari ming dalan king ilang.

12 At milyari a dela mi la ring kekaming tolda at minta na kami king ilang, palipat king ilug ning Laman.

13 At milyari a miglakbe kami kilub ning apat a aldo, malapit namu king timug-timugaslagan a dalan, at telakad mi lang pasibayu ding kekaming tolda; at inaus miyang Shazer ing lugal.

14 At milyari a dela mila ding kekaming pana at palasu, at minta kami king ilang bang mangasu para pamangan kareng kekaming pamilia; at kaibat ming mengasu para pamangan kareng kekaming pamilia mibalik keng pasibayu kareng kekaming pamilia king ilang, king lugal ning Shazer. At minta keng pasibayu king ilang, tutukian ing pareung dalan, maglakbe king pekamatabang dake ning ilang, a malapit king angganan na ning Dayatmalat a Malutu.

15 At milyari a miglakbe kami kilub ning dakal a aldo, mangasu kabang maglakbe, kareng kekaming pana at palasu at karing kekaming batu at tiradol.

16 At tikian mila ding tuturu na ning bola, a midadala kekami king mas matabang dake ning ilang.

17 At kaibat ming miglakbe kilub ning dakal a aldo, telakad mi la ring kekaming tolda kilub ning mapilan a aldo, ba kaming makapagpainawang pasibayu at manikuang pamangan para kareng kekaming pamilia.

18 At milyari a kabang aku, i Nephi, meko ku para mangasu, lawan, apakli ke ing kakung pana, a gawa king purung bakal; at kaibat keng apakli ing kakung pana, lawan ding kanakung kapatad mimua la kanaku uli ning pangasira ning kanakung pana, uling eke menikuang pamangan.

19 At milyari a mibalik kaming alang dadalang pamangan para kareng kekaming pamilia, at uling masyadu lang mapagal, uli ning karelang pamaglakbe, misakitan la uling ala lang pamangan.

20 At milyari a i Laman at Lemuel at ding anak nang Ismael megumpisa lang binulung masyadu, uli na ning karelang pamagkasakit at kasakitan king ilang; at i tata ku naman megumpisa yang binulung laban king Guinung keang Dios; wa, at lubus ing karelang kalungkutan, angga king binulung la laban king Guinu.

21 At milyari a aku, i Nephi, a magkasakit kayabe da ring kakung kapatad uli ning pangawala ning kanakung pana, at ding karelang pana mengawala la sikad, at ing pamangasu meging lubus masakit, wa, angga king ala na keng akuang pamangan.

22 At milyari a aku, i Nephi, migsalita kung dakal karing kanakung kapatad, uling pepasias do ding pusu dang pasibayu, angga king pamanutul da laban king Guinu dang Dios.

23 At milyari a aku, i Nephi, ginawa kung panang gawa king dutung, at menibatan king matulid a patpat, metung a palasu; anya pin, migdala kung pana at palasu, kayabe ing tiradol at batu. At sinabi ku keng kakung tata: Nukarin ku munta para manikua kung pamangan?

24 At milyari a mengutang ya king Guinu, uling migpakumbaba la uli da ring kanakung amanu; uling mengamanu kung dakal a bage karela king anggang sikanan a atiu kanaku.

25 At milyari a ing siwala ning Guinu dinatang ya kang tata ku; at mikamuanan yang tutu uli ning pamamulung na laban king Guinu, angga king milugmuk ya king lalam na ning kalungkutan.

26 At milyari a ing siwala na ning Guinu mengamanu ya kea: Lumawe ka king bola, at lawan la ding bage makasulat.

27 At milyari a anyang i tata ku abasa no ring bage makasulat king bola, mitakutan ya at sobrang mengalgal, at ding kapatad ku mu naman at ding anak nang Ismael at ding asawa ra.

28 At milyari a aku, i Nephi, ikit kula ding panuldung atiu king bola, magobra la agpang king kasalpantayanan at sipagan at pamakiramdam a biniye mi karela.

29 At atin mu namang makasulat kareti a bayung mensahe, a malino basan, a miniye kaintindian tungkul kareng paralan ning Guinu, at iti misulat at miyalilan king panapanaun, agpang king kasalpantayanan at sipagan a biniye mi kaniti. At anya pin akakit tamu a king kapamilatan ning mangalating bage, ing Guinu makagawa yang mangaragul a bage.

30 At milyari a aku, i Nephi minukiat ku babo ning bunduk, agpang karing dalan a makabiye king bola.

31 At milyari a aku mekamate kung mangabangis a animal, a angga king menikua kung pamangan para kareng kekaming pamilia.

32 At milyari a mibalik ku king kekaming tolda, dadalan ding animal a apate ku; at ngeni anyang ikit da ing menikua kung pamangan, karagul ning karelang tula! At milyari a migpakumbaba la arapan na ning Guinu, at miniye lang pasalamat kea.

33 At milyari a miglakbe keng pasibayu, dinalan king alus kalupa ning dalan anti anyang minuna; at kaibat ming miglakbe kilub ning dakal a aldo, telakad mi lang pasibayu ding kekaming tolda, bang manatili ke pamu king ditak a panaun.

34 At milyari a i Ismael mete ya, at mikutkut ya king lugal a meyaus Nahom.

35 At milyari a ding anak nang babaing Ismael tutu lang melungkut, uli na ning pangawala ning karelang tata, at uli na ning karelang kasakitan king ilang; at binulung la laban kang tata ku, uli ning dela nala king lual na ning gabun ning Jerusalem, a sasabing: Ing kekaming tata mete ne; wa, at melili tamung masyadu king ilang, at menamdaman tamung masyadung kasakitan, danup, pamangawa, at pagal; at kaibat na nining eganaganang kasakitan, mangamate tamu king ilang keng danup.

36 At anya pin binulung la laban kang tata ku, at kanaku mu naman; at bisa lang mibalik pasibayu king Jerusalem.

37 At i Laman sinabi na kang Lemuel at karing anak nang lalaking Ismael mu naman: Makiramdam, paten taya ing kekatamung tata, at ing kekatamu namang kapatad a Nephi, a ginawa king sarili na bilang kekatamung pamuntuk at talaturu, a keang makamatuang kapatad.

38 Ngeni, sasabian na ing Guinu mekipagsalita ya kea, at makanian mu naman ding anghel binisita at tiru re. Dapot lawan, balu tamu ing maglaram ya kekatamu; at sasabian na kekatamu ing bage iti, at gagawa yang dakal a bage kapamilatan ning keang tusung paralan, bang kanita aloku no ring mata tamu, isipan na, siguru, bang atake na katamung parayu king e karaniwang ilang; at kaibat na katamung atake palaut, binalak nang maging ari at pamuntuk kekatamu, bang agawa na ing buri na kekatamu king sarili nang kaligayan. At king paralan a ini ing kapatad a Laman peparagul nala mua ding pusu ding keang kapatad.

39 At milyari a ing Guinu kayabe mi ya, wa, anggiyang ing siwala na ning Guinu dinatang ya at migsalitang dakal a amanu karela, at kemuanan nalang masyadu; at kaibat dang mikamuanan king siwala ning Guinu tinuknang lang mimua, at sinisi la kareng karelang kasalanan, angga king pigkalaman na kaming pasibayung pamangan, bang eke mate.