Kapitulu 2
I Lehi dela nala ding keang pamilia king ilang malapit king Dayatmalat a Malutu — Likuan da ing karelang pibandian — I Lehi minain yang sakripisyu king Guinu at tiruanan nala ding anak nang lalaki bang mamintu karing kautusan — Di Laman at Lemuel bubulung la laban kang tata ra — I Nephi mapamintu ya at manalangin ya king kasalpantayanan; ing Guinu magsalita ya kea, at mepili ya bang manimunu karing keang kapatad.
1 Uling lawan, milyari a ing Guinu pekisabian ne i tata ku, wa, king paninap, at sinabi na kea: Nuan ka Lehi, uli da ring bage a arapat mu; at uling meging matapat ka at sinabi mu karening tau ding bage a inutus ku keka, lawan, pignasan dang paten daka.
2 At milyari a ing Guinu inutus ne i tata ku, king paninap, a dapat nong dalan ding keang pamilia at munta la king ilang.
3 At milyari a meging mapamintu ya karing amanu ningGuinu, anya pin gewa na nung nanu ing inutus na ning Guinu kea.
4 At milyari a minta la king ilang. At likuan ne ing bale na, at labuad a pekamana na, at ing keang gintu, at ing keang pilak, at ding keang maulagang bage, at ala yang dela, nune ding keang pamilia, at kabiayan, at tolda, at minta la king ilang.
5 At tinipa ya king angganang malapit king pampang na ning Dayatmalat a Malutu; at miglakbe ya king ilang karing angganan a malapit king Dayatmalat a Malutu; at miglakbe ya king ilang kayabe nala ding pamilia na, kayabe la di ima ku, i Sariah, at ding matua kung kapatad a lalaki, a di Laman, Lemuel, at Sam.
6 At milyari a kaibat nang miglakbe atlung aldo king ilang, telakad ne ing keang tolda king metung a libis lele ning ilug.
7 At milyari a mitalakad yang altar yari king batu, at ginawa yang ain king Guinu, at miniye yang pasalamat king Guinu ing Dios tamu.
8 At milyari a pemalagiuan ne ing ilug, Laman, at iti minagus ya king Dayatmalat a Malutu; at ing libis atiu king angganan malapit king asbuk ning ilug.
9 At anyang i tata ku ikit na ing danum king ilug minagus king Dayatmalat a Malutu, migsalita ya kang Laman, a sasabing: O ikayu maging kalupa na kayu ning ilug a ini a misundu kayung mamagus king sibol ning anggang kayapan.
10 At migsalita ya naman kang Lemuel: O ikayu maging kalupa na kayu ning libis a ini, a pilmi at matatag, at e makimut king pamamintu karing kautusan na ning Guinu!
11 Ngeni ini sinabi na uli na ning kesiasan dang buntuk di Laman at Lemuel; uling lawan ila bubulung la karing dakal a bage laban king karelang tata, uling tau yang mapagmalikmata, at tinaid na lang palual king gabun ning Jerusalem, bang lakuan ing labuad dang pekamana, at ding karelang gintu, ding karelang pilak, at ding karelang maulagang bage, bang mate king ilang. At ini sinabi da gewa na uli na ning kalokuan a isipan ning keang pusu.
12 At anya pin di Laman at Lemuel, bilang pekamatuang dili, bubulung la laban king karelang tata. At ila binulung la uling eda balu ing dapat na nitang Dios a linalang karela.
13 Ni ela maniwala a ing Jerusalem, itang dakilang siudad, malyari yang malasak agpang karing amanu da ring propeta. At ila kalupa dala ding Judio a atiu Jerusalem, a magnasang paten de ing kakung tata.
14 At milyari a ing kakung tata migsalita ya karela king libis ning Lemuel, a maki kayupayan, mitmu king Espiritu, angga king ding karelang katawan ginalgal la king arapan na. At pemakarine nala, a ila enala mengangas magsalita laban kea, anya pin ila memintu la anti ing inutus na karela.
15 At i tata ku menuknangan ya king metung a tolda.
16 At milyari a aku, i Nephi, bilang masyadung anak pa, dapot maragul a bulas, at maki maragul mu namang pamagnasang abalu ding misteryu ning Dios, anya pin, aku menalangin ku king Guinu; at tutu pintalan naku, at pepalambut ne ing pusu ku bang kaku lang paniwalan ding anggang amanung sinabi ning kakung tata; anya pin, aku eku sinalangsang kea kalupa ning gewa da ring kakung kapatad a lalaki.
17 At mekipagsalita ku kang Sam, pepabalu ku kea ding bage a ing Guinu pepakit na kaku king kapamilatan na ning keang Banal a Espiritu. At milyari a meniwala ya karing kakung amanu.
18 Dapot lawan, di Laman at Lemuel ela mekiramdam karing kakung amanu, at uling melungkut ku uli na ning kesiasan da ring karelang pusu, menalangin ku king Guinu para karela.
19 At milyari a ing Guinu migsalita ya kaku, a sasabing: Nuan ka, Nephi, uli ning kekang kasalpantayanan, uling penintun mu kung maki pamagsikap, maki kapagkumbaban king pusu.
20 At nung tuparan mu la ding kakung kautusan, munlad ka, at mituki papunta king labuad a pangaku; wa, anggiyang ing metung a labuad a sidia ku para keka; wa, ing metung a labuad a mepili babo da ring anggang aliwang labuad.
21 At nung ding kekang kapatad salangsang la keka, ila mitakwil la king arapan ning Dios.
22 At nung tuparan mu la ding kakung kautusan, ika maging metung kang mamuntukan at metung a talaturu karing kekang kapatad.
23 Uling lawan, king aldo a salangsang la kaku, isumpa ku la anggiyang king metung a masakit a sumpa, at ela mika upaya karing kekang bini maliban king ila salangsang la naman kaku.
24 At nung salangsang la kaku, ila maging pasakit la karing kekang bini, bang gisingan la king pamanalala.