Ing Mumunang Libru Nang Nephi
Ing Keang Pamagari at Pamanibala
Ing istorya nang Lehi at ing keang asawa i Sariah at ding keang apat a anak a lalaki, a mayayaus karing lagiung (ibat king pangane) Laman, Lemuel, Sam at Nephi. Inamanuan ne ning Guinu i Lehi a mako ya king gabun ning Jerusalem, uling inula na karing tau agpang king karelang karokan at pignasan deng paten. Atlung aldo yang miglakbe king ilang kayabe nala ding keang pamilia. Tiki nong Nephi ding keang kapatad at mibalik la king gabun na ning Jerusalem ba da lang kuanan ding kasulatan da ring Judio. Ing istorya na ning karelang kasakitan. Kinua dala ding anak nang babaing Ismael para maging asawa. Tiki dala ding karelang pamilia papunta king ilang. Ding karelang kasakitan at sakit king ilang. Ing dalan ning karelang pamaglakbe. Miras la king malualas a danuman. Ding kapatad nang Nephi sinalangsang la laban kea. Giluan nala, at ginawa lang metung a barko. Inaus de ing lugal king lagiung Masagana. Linipat la king malualas a danuman papunta king pangakung gabun, at karing aliwa pa. Ini agpang ya king istorya nang Nephi; o king aliwang amanu, aku, i Nephi, ing sinulat king kasulatan a ini.
Kapitulu 1
I Nephi inumpisan ne ing kasulatan da ding keang tau — I Lehi ikit ne king malikmata ing metung a asias a api at memasa ya ibat king metung a libru ning propesia — Pupurian ne ing Dios, ulaan ne ing pamaniatang ning Mesias, at ulaan ne ing pangalasak ning Jerusalem — Ligaligan de ding Judio.
1 Aku, i Nephi, a mibait karing mangayap a pengari, anya pin palage ku mituruanan ku king anggang kabiasnan nang tata ku; at ikit ku ing dakal a kasakitan king pamandalan da ring kakung aldo, makanian man, masikan kung mipanuanan king Guinu king anggang aldo ku; wa, mika maragul kung kabaluan king kayapan at karing misteryu ning Dios, anya pin, sinulat kung kasulatan king kakung gagawan king kakung panaun.
2 Wa, sinulat kung kasulatan king salita nang tata ku, a bibilugan na ning kabiasnan da ring Judio at ding salita da ring tau Ehipto.
3 At balu ku ding kasulatan a gewa ku tutu la; at susulat ku la king sarili kung gamat; at susulat ku iti agpang king kanakung beluan.
4 Uling milyari a king pamagumpisa na ning mumunang banuang pamagari nang Zedequias, ing ari na ning Judah, (i tata ku, i Lehi, a menuknangan king Jerusalem king eganaganang aldo na); at king banua mu ring ita dinatang la ding dakal a propeta, a manula karing tau a dapat lang sumisi, o ing dakilang siudad ning Jerusalem malasak ya.
5 Anya pin milyari ing kakung tata, i Lehi, kabang darayu ya manalangin ya king Guinu, wa, anggiyang king kabilugan nang pusu, king kapakanan da ring tau na.
6 At milyari a kabang manalangin ya king Guinu, ating linto asias a api at tinuknang ya babo ning batu arapan na; at dakal ya ikit ampon dimdam; at uli da ding bage a ikit na at dimdam meugun ya at mengalgal yang lubus.
7 At milyari a mibalik ya king keang sariling tuknangan king Jerusalem; at kinera ne ing sarili na king keang pagkeran, bilang madadaig ya king Espiritu at karing bage a keang ikit.
8 At anya pin bilang madadaig king Espiritu, midala ya king metung a pamipatilip, angga king ikit ne ing banua a mibuklat, at balana ikit ne ing Dios makalukluk ya king keang tronu, mipapadurutan karing e mabilang a grupu da ring anghel a atiu king ukdu na ning pamagkanta at pamamuri king Dios.
9 At milyari a menakit yang Metung a bababa ibat king kalibutnan ning banua, at ikit na ing keang kinang mas masala ya pa kesa king aldo king kaugtuang aldo.
10 At ikit nala mu naman ding labing aduang aliwa pa tutuki kea, at ing karelang sala igit ya karing batwin king banua.
11 At tinipa la at minta king babo ning yatu; at ing mumuna linapit ya at tinalakad arap na ning kakung tata, at biniye ne kea ing metung a libru, at inutusan neng dapat neng basan.
12 At milyari a kabang babasan ne, kinatmu ya king Espiritu na ning Guinu.
13 At binasa ne, a sasabing: Kalulu, kalulu, king Jerusalem, uling ikit ko ding makasumami keka! Wa, at dakal pang bage ing binasa nang tata ku agpang king Jerusalem — a dapat yang malasak, at ding manuknangan karin; dakal lang dapat mawala kapamilatan da ring ispada, at dakal lang mituking sukul king Babilonia.
14 At milyari a kaibat nalang abasa at ikit tata ku ding dakal at makapagmulalang bage, gilisak na ing dakal a bage king Guinu; anti mo ding: Dakila at makapagmulala la ding kekong dapat, O Guinung Dios a Mayupaya! Ing kekang tronu matas ya king banua, at ing kekang upaya, at kayapan, at lunus mibiye la karing manuknangan king yatu; at, uli ning mapamakalulu ka, e mu la paburen detang lalapit keka para mate la!
15 At kening paralan a ini la ding sinabi nang tata ku king pamamuri king keang Dios; uling ing keang kaladua mesaya ya, at ing kabilugan nang pusu kinatmu ya, uli da ding bage a ikit na, wa, karing pepakit ning Guinu kea.
16 At ngeni aku, i Nephi e ku sinulat ing kabilugang istorya na ning bage a sinulat nang tata ku, uling sinulat yang dakal a bage a ikit na karing malikmata at karing paninap; at sinulat na mu naman ing dakal a bage a inula na at sinabi karing keang anak, a reti e ku la gawan ding kabilugang istorya.
17 Dapot sumulat kung istorya karing kakung pemaniapat, karing kakung aldo. Lawan, ginawa kung makuyad karing kasulatan nang tata ku, karing lamina a gewa ku karing sarili kung gamat; anya pin, kaibat keng kinuyad ing kasulatan nang tata ku kanita gawa kung istorya na ning sarili kung bie.
18 Anya pin, buri kung abalu yu ngan, a kaibat nang pepakit dakal a makapagmulalang bage ning Guinu king kanakung tata, i Lehi, wa, agpang king pangalasak ning Jerusalem, lawan minta ya karing busal ding tau, at megumpisa yang menula at sinabi na karela agpang karing bage a pareu nang ikit at dimdam.
19 At milyari a ding Judio kelian de uli da ring bage a sinabi na tungkul karela; uling tutu nang sinabi ing karelang karokan at ing karelang makasumaming gawa; at sinabi nala ding bage a ikit na at dimdam, at makanian mu naman ding bage a abasa na king libru, pepakit dang masala ing pamaniatang na ning Mesias, at makanian mu naman ing pangayatbus na ning yatu.
20 At anyang ding Judio dimdam dala dening bage a reni mimua la kea; wa, anggiyang anti karing propeta anyang minuna, a karelang penabi, at pemasibas, at pete; at pignasan de mu naman ing keang bie at buri deng paten. Dapot lawan, aku, i Nephi, ipakit ku kekayu a ing malugud nang pakalulu ning Guinu mibiye ya karing anggang keang pinili, uli ning karelang kasalpantayanan, bang gawan lang mayupaya angga king upaya ning pangaligtas.