Kapitulu 18
Ing barko meyari ne — Ing pangabait nang Jacob at Jose mebanggit la — Ing grupu miglayag ne king pangakung labuad — Ding anak nang Ismael at ding karelang asawa mekiyabe la keng kasayan at pamanialangsang — I Nephi migapus ya, at ing barko pepaatras ne ning makatakut a bagyu — I Nephi mebulus ya, at kapamilatan ning keang panalangin ing bagyu tinuknang — Ding tau miras la king pangakung labuad.
1 At milyari a sinamba la king Guinu, at tinuki la kanaku; at maingat keng menabas dutung king e pangkaraniwan a gawa. At ing Guinu pepakit na kaku king anggang panaun nung makananu kulang gawan ding trosu na ning barko.
2 Ngeni aku, i Nephi, eko tinabas ding trosu king pareung paralan a beluan da ring tau, ni gewa ke ing barko king pareung paralan ning tau; dapot gewa ke king pareung paralan a pepakit na ning Guinu kaku; anya pin, iti eya king pareung paralan ning tau.
3 At aku, i Nephi, minukiat kung madalas king babo bunduk, at menalangin kung madalas king Guinu; anya pin ing Guinu pepakit yang mangaragul a bage kanaku.
4 At milyari a kaibat keng ayari ing barko, agpang kareng amanu ning Guinu, ding kapatad ku ikit da ing mayap ya, at ing paralan ning pangagawa na masanting ya; anya pin, migpakumbaba lang pasibayu king arapan ning Guinu.
5 At milyari a ing siwala ning Guinu dinatang ya kang tata ku, a dapat kaming mibangun at sake kilub ning barko.
6 At milyari a anyang tutuking aldo, kaibat ming sidia ing eganaganang bage, dakal a bunga at karne manibat king ilang, at dakal a pulut, at ing panustus anti ing sinabi ning Guinu kekami, sinake kami kilub ning barko, dadalan ing anggang karga mi at ding kekaming bini, at nanumang bage a dela mi, balang metung agpang keng keang idad; anya pin, sinake kami ngan king barko, kayabe ring kekaming asawa at kekaming anak.
7 At ngeni, ing tata ku meka anak yang aduang lalaki king ilang; ing makatua meyaus yang Jacob at ing kayanakan i Jose.
8 At milyari a kaibat mi ngan sinake keng barko, at adala mi ngan ing anggang panustus at ding bage a miutus kekami, miglayag kami keng dayatmalat at lebulan neng pasulung ning angin papunta king pangakung labuad.
9 At kaibat ming melabul pasulung king angin kilub ning dakal a aldo, lawan, ding kapatad ku at ding anak nang lalaking Ismael at ding karela mu namang asawa megumpisa lang magsaya, angga king megumpisa lang terak, at magkanta, at magsalitang magagaspang, wa, angga king kalingwan da nung nanung upaya midala la king lugal a ita, wa meging malaswa la.
10 At aku, i Nephi, megumpisa kung mitakutan masyadu pota ing Guinu mimua ya kekami, at parusan na kami uli ning kekaming kasalanan, angga king inakmul na kami ning lalam ning dayatmalat; anya pin, aku, i Nephi, megumpisa kung magsalita karelang masyadung seriosu; dapot lawan, mimua la kaku, a sasabing: Emi paburen a ing kekaming makawaling kapatad yang mamuntukan kekami.
11 At milyari a i Laman at i Lemuel kinua daku at ginapus daku kareng lubid, at tinratu daku king sobrang kagaspangan; makanian man, ing Guinu pepaburen nang gawan da bang apakit na ing keang upaya, bang matupad ing amanu na agpang keng sinabi na tungkul kareng mangarok.
12 At milyari a kaibat dakung ginapus ba kung e migalo, ing kompas, a sidia na ning Guinu, tinuknang yang ginana.
13 Anya pin, e da balu nung nukarin de manewan ing barko, uling ating memuung masikan a bagyu, at lebulan na kaming pabalik keng danuman kilub ning atlung aldo; at megumpisa lang mitakutan masyadu, pota malumud la king dayatmalat; makanian man e da ku binulus.
14 At king kapat a aldo, a nung kapilan mipaatras kami, ing bagyu megumpisa yang lalung mesikan.
15 At milyari a malapit na kami mung akmulan ning lalam ning dayatmalat. At kaibat ming mipaatras keng danuman kilub ning apat a aldo, ding kapatad ku megumpisa dang ikit a ding kayatulan ning Dios atiu karela, at dapat lang mangamate nung ela sumisi kareng kasalanan da; anya pin, linapit la kaku, at kelag do ring lubid atiu kareng kanakung pulsu, at lawan, mengalbag lang masyadu; at makanian mu naman ding kakung bukung-bukung mengalbag la at asnalang kasakit.
16 Makanian man, migtiwala ku king kakung Dios, at pinuri ke kilub ning patingapun; at eku binulung laban king Guinu uli ning kakung kasakitan.
17 Ngeni i tata ku, i Lehi, dakal ya asabi karela, at karen mu namang anak nang lalaking Ismael; dapot, oini, dakal la sinabing pamatakut laban kaninu man a magsalitang para kanaku; at ding kakung pengari bilang mangatua na; at dakal no denasang kalungkutan uli da reng anak da, mengaina la, wa, at angga king mirate la.
18 Uli ning karelang kalungkutan at sobrang lumbe, at ding karokan da reng kakung kapatad, milapit la keng kamatayan angga king mayari ya ing bie da para makikit la king karelang Dios; wa, ding karelang kule abung buak malapit na lang malagas bang miyabe king alikabuk; wa, angga king malapit nalang miugseng maki kalungkutan king kutkutan a danuman.
19 At i Jacob at i Jose mu naman, uling anak la pa, a mangailangan pang dakal a pamangan, melungkut la uli na ning kasakitan na ning ima ra; at ing asawa ku mu naman, kayabe ing keang lua at panalangin, at ding kakung anak mu naman, e dala apalambut ding pusu da reng kakung kapatad bang ibulus daku.
20 At alang nanumang bage nung e ing upaya ning Dios, a babala keng karelang pangalasak, ing makapalambut kareng pusu da; anya pin, anyang ikit dang malapit na lamung mayakmul king lalam ning dayatmalat sinisi la king bage depatan da, angga king binulus daku.
21 At milyari a kaibat dakung binulus, lawan, kinua ke ing kompas, at ginana ya nung nukarin ing kaburian ku. At milyari a menalangin ku king Guinu; at kaibat kung menalangin ing angin tinuknang, at ing bagyu tinuknang, at mika maragul a kapanatagan.
22 At milyari a aku, i Nephi, meneu ke ing barko, bang makapaglayag keng pasibayu papunta king pangakung labuad.
23 At milyari a kaibat ming miglayag king kilub ning dakal a aldo miras kami king pangakung labuad; at minta kami king labuad, at telakad mila ding tolda mi; at inaus miya iting pangakung labuad.
24 At milyari a inumpisan miyang serulan ing gabun, at megumpisa keng tanam bini; wa, binili mila ngan ding kekaming bini king gabun, a dela mi menibatan keng gabun ning Jerusalem. At milyari a masyadu lang meragul; anya pin, mipanuanan kami king kasaganan.
25 At milyari a ikit mi king pangakung labuad, kabang mag lakbe ke king ilang, a ating animales king kasukalan king balang klasi, pareung ing baka at ing bakang lalaki, at ing asno at ing kabayu, at ing kambing at ing liling kambing, at ding eganaganang klasi da ring liling animales, a agamit ning tau. At menakit kaming miyaliwang klasi ning mina, pareung king gintu, at king pilak, at king tansu.