Jebta 6
Nipai ej jeje kōn men ko an Anij—Jibadbad eo an Nipai ej n̄an karreel būruōn armej n̄an itok n̄an Anij an Ebream im mour. Iturinļo̧k 600–592 M.K.
1 Im kiiō n̄a, Nipai, ij jab letok menmenbwij eo an ro jema ilo m̧ōttan jab in ilo ļo̧o̧k in aō; ijjamin ilo jabdewōt iien naaj letok ālik ilo pileij kein ij jei; bwe em̧ōj letok ilo ļo̧o̧k ko jema eaar kōjparoki; kōn menin, ij jab jei ilo jerbal in.
2 Bwe ebwe wōt n̄an aō ba bwe kōmij ro bwijjin Josep.
3 Im ejjab mennin aikuj bwe in lukkuun jejjet ilo aō kwaļo̧k aolepān men ko an jema, bwe rejjab maron̄ jeje ilo pileij kein, bwe iaikuj jikin jeje men ko an Anij.
4 Bwe unleplep in kōttōpar in aō ej n̄an karreel armej n̄an itok n̄an Anij an Ebream, im Anij an Aisak, im Anij an Jekab, im mour.
5 Kōn menin, men ko rej kam̧ōņōņō n̄an laļ ij jab jeje, ak men ko rekōm̧ōņōņō n̄an Anij im ro rejjab jān laļ.
6 Kōn menin, inaaj leļo̧k kakien n̄an ineō, bwe ren jab kobrak pileij kein kōn men ko rejjab aorōk n̄an ro nejin armej.