Kapitulu 5
I Sariah tututul ya laban kang Lehi — Pareu lang matula king pamagbalik da ring karelang anak a lalaki — Minain lang sakripisyu — Ding laminang tansu maglaman lang kasulatan nang Moises at ding propeta — Kilalanan de ding lamina i Lehi bilang lahi nang Jose — I Lehi manula ya tungkul king keang bini at king pamanatili da ring lamina.
1 At milyari a kaibat ming minta king ilang king kekaming tata, lawan, kinatmu ya king tula, at makanian mu naman ing kekaming ima, i Sariah, lubus yang mesaya, uling tutu yang magmalun king uli mi.
2 Uling inisip na mete na kami king ilang; at tinutul ya naman laban kang tata ku, sasabian na kea a ya tau yang mapagmalikmata, a sasabing: Lawan petnubayan mu kami manibat king labuad a pekamana mi, at ding anak kung lalaki ala nalu, at mate tamu king ilang.
3 At agpang kening paralan ning pamagsalita i ima ku tinutul ya laban kang tata ku.
4 At milyari a i tata ku migsalita ya kea, a sasabing: Balu ku a aku tau kung mapagmalikmata; uling nung ekula ikit ding bage ning Dios king malikmata eku sana abalu ing kayapan ning Dios, dapot menatili king Jerusalem, at mete kayabe da ring kakung kapatad.
5 Dapot lawan, midinan kung labuad a pangaku, at uli da reting bage matula ku; wa, at balu ku a ing Guinu iligtas nala ding kakung anak a lalaki ibat karing gamat nang Laban, at ibalik nalang pasibayu kekatamu king ilang.
6 At agpang kening paralan ning pamagsalita, i tata ku, i Lehi, dininan neng kapasnawan i ima ku, i Sariah, tungkul kekami, kabang maglakbe king ilang papunta king gabun ning Jerusalem bang kuanan ing kasulatan da ring Judio.
7 At anyang mekapagbalik kami king tolda na ning kakung tata, lawan, ing tula da kinatmu, at i ima ku mipasno ya.
8 At migsalita ya a sasabing: Ngeni balu kung maki kasiguraduan a ing Guinu inutus ne ing kakung asawa a tumakas king ilang; wa, at balu ku mu namang maki kasiguraduan a ing Guinu iningat nala ding kakung anak a lalaki, at linigtas nala ibat karing gamat nang Laban, at dininan nalang upaya bang agawa da ing bage a inutus na ning Guinu karela. At agpang kanining paralan ning pamagsalita a migsalita ya.
9 At milyari a lubus lang metula, at midaun lang ain at ain a durulukan king Guinu, at pepasalamat la king Dios nang Israel.
10 At kaibat dang pepasalamat king Dios nang Israel, i tata ku, i Lehi, kinua nala ding kasulatan a makasulat karing laminang tansu, at pegaralan nalang masalese manibat king umpisa.
11 At ikit na a maglaman lang limang libru nang Moises, a bibiye istorya ning pangalalang na ning yatu, at makanian mu naman i Adan at i Eva, a kekatamung mumunang pengari;
12 At makanian mu naman ing kasulatan da ring Judio ibat king umpisa, angga king pamagumpisa ning pamagari nang Zedequias, ing ari ning Judea;
13 At makanian mu naman ding ula da ring banal a propeta, ibat king umpisa, angga king pamagumpisa ning pamagari nang Zedequias; at makanian mu naman dakal a pamanula a mesabi king kapamilatan na ning asbuk nang Jeremias.
14 At milyari a ing kakung tata, i Lehi, ikit na mu naman karing laminang tansu ing metung a istorya ning lahi da ring keang ninunu, anya pin balu na ya lahi neng Jose, wa, ita mu namang Jose a anak nang Jacob, a misali king Ehipto, at ya a meingat king gamat ning Guinu bang keang asadia ing keang tata, i Jacob at ing anggang keang bale king kamatayan king danup.
15 At ila pepalaya dala naman ibat king pangakulung at ibat king gabun ning Ehipto, ning pareung Guinu a miningat karela.
16 At anya pin i tata ku, i Lehi, atuklasan ne ing istorya ning lahi da ring keang ninunu. At i Laban lahi ne mu namang Jose, anya pin ya at ing keang tata selikut dala ding kasulatan.
17 At ngeni anyang ing kakung tata ikit nala ngan dening bage kinatmu ya king Espiritu, at megumpisa yang menula tungkul karing keang bini —
18 A dening laminang tansu dapat lang mipunta karing anggang bansa, lahi, amanu at karing tau a kayabe karing keang bini.
19 Anya pin, sinabi na a dening laminang tansu ela dapat mawala; ni ela dapat dalumduman pasibayu ning panaun. At menula yang dakal a bage tungkul king keang bini.
20 At milyari a anya aku at ing tata ku tinupad kami karing kautusan a ing Guinu inutus na kekami.
21 At ikua mila ding kasulatan a ing Guinu inutus na kekami, at seliksikan mila at ikit mi a masanting la; wa, anggiyang king maragul a ulaga kekami, anya pin aingat mila ding kautusan na ning Guinu angga karing kekaming anak.
22 Anya pin, kabiasnan king Guinu a dapat milang dalan deti, kabang maglakbe kami king ilang papunta king labuad ning pangaku.