1 Ā, i pahawa ake, i kōrero au ki ōku tuākana, e kī ana: Tēnā, kia haere ake anō ai tātou ki Hiruharama, ā, kia ū tātou ki te pupuri ki ngā whakahaunga a te Ariki; nana rā he kaha ake ia i te ao katoa, nā, he aha e kore ai e kaha ake i a Rāpana me tana rima tekau, āe rā, i ana tekau rānei o ngā mano?

2 Nō reira kia haere ake tātou; kia kaha tātou pērā i a Mohi; nā, nāna pono nei i kōrero ki ngā wai o te Moana Whero, ā, ka wehe ki tētahi taha, ki tētahi taha, ā, ka haere i waenganui, i waho atu i te hereherenga, mā runga whenua maroke, ā, ka aruaru mai ngā tauā a Parao, ā, ka tōremi iho i ngā wai o te Moana Whero.

3 Nana ianei, e mōhio ana kōrua e pono ana tēnei; ā, e mōhio ana anō hoki kōrua kua kōrero tētahi anahera ki a kōrua; nā reira e āhei ana kōrua kia rangirua ai? Kia haere ake tātou; e kaha ana te Ariki ki te whakaputa i a tātou, pērā ki ō tātou mātua, me te whakangaro i a Rāpana, pērā ki ngā Ihipiana.

4 Kōrero kau anō au i ēnei kupu, i te riri tonu rāua, ā, ka amuamu tonu rāua; hei aha koa ka aruaru mai rāua i ahau kia tae anō mātou ki waho i ngā taiapa o Hiruharama.

5 Ā, i te pō ia; ā, ka meinga rātou e ahau kia huna ai i a rātou anō i waho i ngā taiapa. Ā, whai muri iho i tā rātou hunanga, ko au, ko Nīwhai, ka ngōki ki roto ki te pā, ā, ka haere whaka-te-whare o Rāpana.

6 Ā, i arahina au e te Wairua, tē mātau i mua i ngā mea e mahi ai ahau.

7 Hei aha koa, ka haere whakamua ahau, ā, i ahau e whakatata atu ana ki te whare o Rāpana ka kite au i tētahi tangata, ā, kua hinga ia ki te whenua i mua i ahau, nā te mea kua haurangi ia ki te waina.

8 Ā, tae ana au ki a ia ka kitea e ahau ko Rāpana ia.

9 Ā, ka kite ahau i tana hoari, ā, ka unuhia mai ia e au i tōna pūkoro; ā, he kōura horomata tōna kakau; he tino mātanga rawa tōna whakamahinga, ā, ka kite ahau i tōna rau he maitai tino utu nui.

10 Ā, i pahawa ake, i meinga ahau e te Wairua kia whakamate au i a Rāpana; engari ka kī ake ahau i tōku ngākau: Kīhai rawa atu au i ngā wā katoa kia whakaheke ai i te toto o te tangata.

11 Ā, ka kī mai te Wairua ki ahau: Nana kua tukuna mai ia e te Ariki ki roto i ō ringaringa. Āe rā, i mōhio anō ahau i whai anō ia kia murua atu ai tōku oranga ake; āe rā, ā, kua kore ia e whakarongo ki ngā whakahaunga a te Ariki; ā, i raupatu anō ia i ā mātou rawa.

12 Ā, i pahawa ake, i kī mai anō te Ariki ki ahau: Whakamatea ia, nā te mea kua tukuna mai ia e te Ariki ki roto i ō ringaringa;

13 Nana, ka whakamate te Ariki i te hunga kino kia whakaputaia mai ai ana take tika. He pai ake kia mate ai te tangata kotahi i te memeha haeretanga me te tāmatehanga o tētahi iwi i te whakapono kore.

14 Ā ināianei, rongo ana au, a Nīwhai i ēnei kupu, ka mahara au ki ngā kupu a te Ariki i kōrero mai ki ahau i roto i te koraha, e kī ana: ina pupuri ō uri i aku whakahaunga, ka whaioranga rātou i te whenua whakaari.

15 Āe rā, i whakaaro anō ahau e kore e taea e rātou ngā whakahaunga te pupuri e ai ki te ture a Mohi, ki te kore e riro mai i a rātou te ture.

16 Ā, i mōhio anō ahau kua whaowhaoa te ture ki runga i ngā papa parāhe.

17 Ā, waihoki, i mōhio ahau kua tukuna a Rāpana e te Ariki ki roto i ōku ringaringa mō tēnei take, kia hopu mai ai ahau i ngā tuhinga e ai ki ana whakahaunga.

18 Nō reira, ka whakarongo au ki te reo o te Wairua, ā, ka mau ahau ki ngā makawe o te upoko o Rāpana, ā, ka poutoa iho tōna upoko ki tana hoari ake.

19 Ā, whai muri iho i taku poutoahanga iho i tōna upoko ki tana hoari ake, ka tiki atu au i ngā kākahu o Rāpana kātahi ka whakamaua ki tōku tīnana ake; āe rā, ko ngā mea katoa; ā, ka whītiki au i ana kākahu whawhai ki ōku hope.

20 Ā, oti ana tēnei i ahau, ka haere whakamua au ki te takotoranga taonga a Rāpana. Ā, i ahau e haere whakamua atu ana whaka-te-takotoranga taonga a Rāpana, nana, ka kite au i te pononga a Rāpana i a ia ngā kī o te takotoranga taonga. Ā, ka whakahaua atu ia e ahau mā roto i te reo o Rāpana, kia haere tahi me au ki roto i te takotoranga taonga.

21 Ā, ka whakapono ia ko ahau tōna rangatira, a Rāpana, nā te mea i kite ia i ngā kākahu me te hoari e whītiki ana ki ōku hope.

22 Ā, ka kōrero mai ia ki ahau mō ngā erata o ngā Hūrai, e mōhio ana ia ko tōna rangatira, a Rāpana, kua puta atu i te pō ki waenganui i a rātou.

23 Ā, ka kōrero atu ahau me te mea nei ko Rāpana.

24 Ā, ka kī anō au ki a ia māku e kawe ngā whaowhaonga, i runga i ngā papa parāhe, ki ōku tuākana, i waho atu i ngā taiapa.

25 Ā, ka tono anō au ki a ia kia arumia mai au e ia.

26 Ā, ko ia, e whakapono ana i te kōrero au mō ngā tuākana o te hāhi, ā, ko ahau pū anō taua Rāpana nāku i whakamate, nā reira ia i aru mai i ahau.

27 Ā, he maha ana kōrerotanga ki ahau mō ngā kaumātua o ngā Hūrai, i ahau e haere whakamua ana ki ōku tuākana, i waho atu i ngā taiapa.

28 Ā, i pahawa ake, i kite a Rāmana i ahau he nui tōna wehi, me Remuere anō hoki rātou ko Hāmi. Ā, ka tahuti atu i mua i tōku aroaro; nā te mea i whakapono rātou ko Rāpana ahau, ā, kua whakamate anō ia i ahau, ā, kua whai ki te muru i ō rātou oranga anō hoki.

29 Ā, i pahawa ake, i karanga atu au ki a rātou, ā, ka rongo rātou i ahau; nā reira ka mutu tā rātou tahuti atu i tōku aroaro.

30 Ā, i pahawa ake, i kite atu te pononga a Rāpana i ōku tuākana ka tīmata te tūwiriwiri, whano ka tahuti atu i mua i ahau me te hoki atu ki te pā o Hiruharama.

31 Ā, ko au ianei, ko Nīwhai, he tangata tupu rahi, ā, nā te mea kua riro mai hoki i ahau he kaha nui i te Ariki, nō reira ka hopu au i te pononga a Rāpana, ā, ka mau ia, kei tahuti atu ia.

32 Ā, i pahawa ake, i kōrero tahi ahau me ia, mehemea ka whakarongo ia ki aku kupu, e ora ana te Ariki, ā, e ora ana ahau, nā konei rā ki te whakarongo ia ki ā mātou kupu, ka tohungia e mātou tōna oranga.

33 Ā, ka kōrero ahau ki a ia, he mea oati hoki, kia kaua ia e wehi; nā, ka meinga ia he tangata herekore pērā i a mātou mehemea ka haere iho ki te koraha me mātou.

34 Ā, ka kōrero anō ahau ki a ia, e kī ana: Kāore e kore kua whakahau te Ariki i a mātou kia mahi ai i tēnei mea; ā, me kaua mātou e ū ki te pupuri i ngā whakahaunga a te Ariki? Nō reira, mehemea ka haere iho koe me mātou ki roto i te koraha ki tōku matua ka whaiwāhi koe i a mātou.

35 Ā, i pahawa ake, i māia a Hōrama i ngā kupu i kōrero ai ahau. Nā, ko Hōrama te ingoa o te pononga; ā, ka whakataurangi mai ia ka haere iho ki roto i te koraha ki tō mātou matua. Āe rā, ka oati anō hoki ki a mātou ka piri tahi me mātou mai i taua wā, ā, haere ake nei.

36 Nā, i te hiahia mātou kia piri tahi ia me mātou nā tēnei take, kia kaua ngā Hūrai e mōhio ai e pā ana ki tā mātou rere ki roto i te koraha, kei whaiwhai mai rātou i a mātou me te whakangaro i a mātou.

37 Ā, i pahawa ake, nā, oati ana a Hōrama ki a mātou, ka mutu ō mātou wehi i a ia.

38 Ā, i pahawa ake, i mauria atu e mātou ngā papa parāhe me te pononga a Rāpana, ā, ka māwehe atu ki roto i te koraha, ā, ka haere atu ki te tēneti o tōku matua.