1 Ket napasamak a kalpasan a siak, ni Nephi, inturayannak ti espiritu, ket nakitak amin dagitoy a banag, nagsubliak iti tolda ti amak.

2 Ket napasamak a naimatangak dagiti kakabsatko, ket nagsisinnupiatanda ti maipanggep kadagiti bambanag nga imbaga ti amak kadakuada.

3 Ta agpayso nga adu a napateg a bambanag ti imbagana kadakuada, a narigat a maawatan, malaksid no agsaludsod ti tao iti Apo; ket gapu ta natangken ti panagpuspusoda, ngarud saanda a nagtalek iti Apo a kas rebbengenda.

4 Ket ita siak, ni Nephi, nagladingitak gapu iti kinatangken ti pusoda, ken kasta met, a gapu kadagiti banag a nakitak, ken naammuak a nasken dagitoy a saan a maliklikan a mapasamak gapu iti kinadakes unay dagiti annak ti tattao.

5 Ket napasamak a naparmekak gapu iti panagrigrigat, gapu ta imbilangko dagiti bukodko a panagrigrigat iti amin, gapu iti pannakadadael dagiti tattaok, ta naimatangak ti pannakadadaelda.

6 Ket napasamak a kalpasan ti pannakaisubli ti pigsak kinasaok dagiti kakabsatko, tinarigagayak a maammuan kadakuada ti rason iti panagsisinnuppiatda.

7 Ket kinunada: Kitaen, saanmi a maawatan dagiti balikas nga imbaga ti amatayo maipanggep kadagiti gagangay a sanga ti kayo ti olibo, ken ti maipanggep kadagiti Gentil.

8 Ket kinunak kadakuada: Nagsaludsodkayo kadin iti Apo?

9 Ket kinunada kaniak: Saan pay; ta awan ti kasta nga impakpakaammo kadakami ti Apo.

10 Kitaen, kinunak kadakuada: Apay kadi a saankayo nga agtungpal kadagiti bilin ti Apo? Kasano a mapukawkayonto, gapu iti kinatangken ti panagpuspusoyo?

11 Saanyo kadi a malagip dagiti bambanag nga imbaga ti Apo?—No saanyo a patangkenen dagiti puspusoyo, ken agkiddawkayo kaniak a sipapammati, a mamatikayo a maawatyonto, nga addaan iti kinaregta a mangtungpal kadagiti bilinko, sigurado maipakaammonto dagitoy a banag kadakayo.

12 Kitaen, ibagak kadakayo, a naiyarig ti balay ti Israel iti kayo ti olibo, babaen ti Espiritu ti Apo nga adda iti amatayo; ken kitaen saantayo kadi a naisina iti balay ti Israel, ken saan kadi a sanganatayo ti balay ti Israel?

13 Ket ita, ti banag a kayat a sawen ti amatayo maipanggep iti pannakaisulbong dagiti gagangay a sanga babaen ti pakabuklan dagiti Gentil, isu, nga kadagitinto ud-udina nga aldaw, inton mapukawen ti pammati dagiti kaputotantayo, wen, iti uneg ti adu a tawen, ken adu a kaputotan kalpasan ti panangipakitanto ti Mesias iti bagina kadagiti annak ti tattao, isunton ti pannakaited kadagiti Gentil ti pakabuklan ti ebanghelio ti Mesias kadagiti Gentil, ket manipud kadagiti Gentil maiyallatiwto kadagiti natda iti kaputotantayo—

14 Ket iti dayta nga aldaw maammuandanto dagiti natda ti kaputotantayo a kamengda iti balay ti Israel, ken isuda dagiti natulagan a tao ti Apo; ket maammuanda ken dumtengto ti pannakaammoda dagiti kapupuonanda, ken kasta met iti pannakaammoda iti ebanghelio ti Mannubbotda, nga impaayna kadagiti ammada; gapuna, dumtengto ti pannakaammoda iti Mannubbotda ken ti tunggal paset ti doktrinana, tapno ammoda no kasano ti yaasidegda kenkuana ket maisalakanda.

15 Ket kalpasanna, iti dayta nga aldaw didanto kadi agrag-o ken agdaydayaw iti agnanayon a Diosda, ti pundasion ken pakaisalakananda? Wen, iti dayta nga aldaw, didanto kadi umawat iti pigsa ken pannaraon manipud iti pudno a lanut? Wen, saandanto kadi sumurot iti pudno a pagaponan ti Dios?

16 Kitaen, kunak kadakayo, Wen; maipalagipdanto manen kadagiti kameng iti balay ti Israel; maisulbongto ida, a kas maysa a gagangay a sanga ti kayo ti olibo, iti pudno a kayo ti olibo.

17 Ket daytoy ti kayat a sawen ti amatayo; ket kayatna a sawen a saanto a mapasamak daytoy agingga iti kalpasan ti panangwarawara kadakuada dagiti Gentil; ken kayatna a sawen a mapasamakto babaen iti wagas dagiti Gentil, tapno maipakitanto ti Apo ti bilegna kadagiti Gentil, nga isu ti agpayso a gapuna a supringento isuna dagiti Hudio, wenno iti balay ti Israel.

18 Gapuna, saan laeng a ti amatayo ti nagsarita maipapan iti kaputotantayo, ngem kasta met iti amin nga adda iti balay ti Israel, ta itudtudona ti katulagan a matungpalto iti ud-udina nga al-aldaw; ti katulagan nga inaramid ti Apo iti amatayo a ni Abraham, a kinunana: Babaen iti kaputotam mabendisionanto dagiti amin nga puli iti daga.

19 Ket napasamak a siak, ni Nephi, adu ti imbagak kadakuada maipanggep kadagitoy a banag; wen, imbagak kadakuada ti maipanggep iti pannakaisubli dagiti Hudio kadagiti ud-udina nga al-aldaw.

20 Ket insalaysayko manen kadakuada dagiti balikas ni Isaias, a nagsao maipanggep ti pannakaisubli dagiti Hudio, wenno iti balay ti Israel; ket kalpasan ti pannakaisublida saandanton a mailaok kadagiti sabali a tattao, wenno mawarawara manen. Ket napasamak nga adu ti imbagak kadagiti kakabsatko, isu a nagtalnada ken nagpakumbabada iti Apo.

21 Ket napasamak a nagsaoda manen kaniak, a kinunada: Ania ti kaipapanan daytoy a banag a nakita ti amatayo iti tagtagainep? Ania ti kaipapanan ti kayo a nakitana?

22 Ket kinunak kadakuada: Isu ti mangibagi iti kayo ti biag.

23 Ket kinunada kaniak: Ania ti kaipapanan ti pagkaptan a landok a nakita ti amatayo, nga agturong iti kayo?

24 Ket kinunak kadakuada nga isu daytoy ti balikas ti Dios; ket asino man nga agdengngeg iti balikas ti Dios, ken kumpet a naimbag iti daytoy, saandanto a mapukaw; kasta met a saandanto a maparmek kadagiti sulisog ken dumardarang a pana ti kabusor a pakabulsekanda a mangiturong kadakuada iti pannakadadael.

25 Gapuna, siak, ni Nephi, ginutigotko ida nga imdenganda ti balikas ti Apo; wen, ginutigotko ida iti amin a kabaelan ti kararuak, ken amin a paglaingan nga adda kaniak, tapno imdenganda ti balikas ti Dios ken kanayon a lagipenda a tungpalen dagiti bilinna iti amin a bambanag.

26 Ket kinunada kaniak: Ania ti kaipapanan ti karayan ti danum a nakita ti amatayo?

27 Ket kinunak kadakuada a ti danum a naimatangan ti amak isu ti kinarugit; ket kasta unay ti pakaseknan ti panangpanpanunotna kadagiti dadduma a banag ta saanna a nakita ti kinarugit ti danum.

28 Ket kinunak kadakuada a daytoy ket maysa a nakaam-amak a dan-aw, a namagsina kadagiti dakes manipud iti kayo ti biag, ken manipud pay kadagiti santo ti Dios.

29 Ket kinunak kadakuada a daytoy ti mangibagi iti nakaam-amak nga impierno, nga imbaga kaniak ti anghel a naisagana para kadagiti nadangkes.

30 Ket kinunak kadakuada a nakita met ti amami a pinaglasin ti linteg ti Dios dagiti dakes kadagiti nalinteg; ken ti raniagna kaarni ti raniag ti gumiligil-ayab nga apuy, a nagpangato iti Dios iti agnanayon, ken awan ti patinggana.

31 Ket kinunada kaniak: Kayat kadi a sawen daytoy ti panagtuok ti bagi kadagiti aldaw ti pannakasubok, wenno kayatna kadi a sawen a daytoy ti maudi a kasasaad ti kararua kalpasan ti ipapatay ti temporal a bagi, wenno imbagana kadi dagiti banag a temporal?

32 Ket napasamak a kinunak kadakuada nga ibagian daytoy dagiti banag a naindagaan ken naespirituan; ta dumtengto ti aldaw a maukomdanto kadagiti aramidda, wen, uray pay dagiti aramid nga inaramid ti temporal a bagi kadagiti aldaw a pannakasubokda.

33 Gapuna, no nasken a matayda iti kinadakesda, nasken a mapapanawda met, a kas mainaig kadagiti banag a naespirituan, a maipapan iti kinalinteg; gapuna, nasken a maisaklangda iti sango ti Dios, tapno maukomda kadagiti aramidda; ket no rinurugit ti aramidda nasken nga agtalinaedda a narugit; ket no narugitda nasken a dida agnaed iti pagarian ti Dios; ta no kasta, narugit met ngarud ti pagarian ti Dios.

34 Ngem kitaen, kunak kadakayo, ti pagarian ti Dios ket saan a narugit, ket awan ti narugit a banag a makastrek iti pagarian ti Dios; gapuna a nasken nga adda lugar ti kinarugit a naisagana para iti dayta a narugit.

35 Ket adda naisagana a lugar, wen, a kas iti dayta nakaam-amak nga impierno a nasaokon, ket sairo ti nangisagana daytoy; gapuna a ti maudi a kasasaad dagiti karurua ti tattao isu iti panagnaed iti pagarian ti Dios, wenno ti mapapanaw gapu kadaytoy a hustisia a nasaokon.

36 Gapuna, nailaksid dagiti dakes manipud kadagiti nalinteg, ken kasta met manipud iti dayta a kayo ti biag, a bungana ti kapatgan ken kangrunaan a makaay-ayo iti amin a sabsabali a bunga; wen, ket daytoy ti kaindaklanan iti amin a sagut ti Dios. Ket dayta ti imbagak kadagiti kakabsatko. Amen.