Wase 17

Kaukauwa ni Veivauci kei na Veivakalougatataki ni Valetabu

“Lako mai o Ilaijia me vakalesuya ki vuravura … na taucoko ni kaukauwa ni matabete. Na matabete qo e tiko kina na idola ni kena dregati ka vauci e vuravura kei lomalagi na cakacaka vakalotu kece sara kei na ivakavuvuli sa baleta na nodra vakabulai na tamata.

Na Bula nei Joseph Fielding Smith

Ena 1902 e a lako kina o Joseph Fielding Smith ki Massachusetts, ka kunea sara kina na itukutuku baleti ira na nona kawa na Smith. Na nona tiko mai kea, qai sotava kina e dua na daunivolaitukutuku ni kawa o Sidney Perley. Tukuna vua o Mr. Perley, “Sa lomaqu dina sara, kevaka e rawa, meu na vakaraica na itukutuku kece sara ni tamata era a mai tawani Essex County ni bera na yabaki 1700.”

Nanuma lesu o Peresitedi Smith: “Au kaya vua, ‘Mr. Perley, ko sa vakarau cakava qo e dua na cakacaka levu, se vakaevei?’ Sauma mai o koya, ‘Io, au rairai na sega beka ni vakaotia.’ Au kaya sara yani vua, ‘Na cava o cakava tiko kina na cakacaka qo?’ E a vakasama vakalailai ka vaka e kidroa qai kaya mai, ‘Au sega ni kila na vuna, ia, au sa tekivutaka, kau na sega ni cegu.’ Au kaya sara, ‘Au rawa ni tukuna vei iko se cava o cakava tiko kina na ka oqo kei na vuna ko na sega ni cegu kina, ia kevaka meu na kaya, ko na sega ni vakabauta ka na dredrevaki au.’

“‘Isa,’e a kaya mai, ‘Au sega mada ni kila. Kevaka mo tukuna mai vei au, au kila niu na vinakata meu rogoca.’ Au sa qai tukuna vua na parofisai baleti Ilaija kei na vakavatukana ni yalayala qo vei Josefa Simici kei Oliver Cowdery, ena ika 3 ni Epereli, 1836 mai na Valetabu mai Kirtland, kei na nodra sa vakamuria na cakacaka vata oqo e lewe levu sara na tamata ena nodra sa vaqarai ira na wekadra era sa mate ena vakavotukanataki ni yalayala ka na yaco ni bera na ikarua ni lesumai, me kakua kina ni na vakarusai o vuravura ena cudruvi. Qo era sa vagolea na yalodra na gone vei ira na qase, ka da sa cakava tiko na cakacaka vakalotu baleti ira na mate me rawa ni ra na vakabulai kina, ka soli vei ira na dodonu mera na curu ki na matanitu ni Kalou, ka dina ga ni ra sa mate.

“Niu sa vakamacala oti, e dredre ga o koya ka kaya mai, ‘Sa dua na itukutuku levu, ia au sega ni vakabauta.’ Ia e vakadinadinataka ni dua na ka e tukuna tiko vua me tomana tiko na vakararai ka na sega kina ni rawa me na cegu. Au sa sotava e levu na tamata ka ra sa tekivutaka ka ra sa sega ni rawa mera cegu, tagane kei na yalewa, ka ra sega ni lewe ni Lotu. Nikua eda sa na raica e udolu na tagane kei na yalewa era vakaraica na kedra itukutuku na mate. Era sega ni kila na vuna, ia eda na rawa ga ni rawata na ivolatukutuku o ya ka lako yani ki na noda valetabu ka cakava na cakacaka me baleti ira.”¹

Vakatavuvulitaka o Peresitedi Smith ni itukutuku ni matavuvale e sega walega ni baleta na yaca, tikinisiga, kei na vanua, vakakina na vakasoqoni vata ni itukutuku. Qo e baleta tiko na vakarautaki ni cakacaka vakalotu ena valetabu ka na vakaduavatataka na matavuvale me tawamudu, nodra vauci na tamata ni veitabatamata mera sa lewena na matavuvale ni Kalou. “Mera vauci vata na itubutubu, ka ra vauci na gone vei ira na itubutubu me rawa ni ra ciqoma na veivakalougatataki ni matanitu silesitieli,” e a kaya. “O ya na vuna ena vakatau na noda vakabulai kei na tosocake vakayalo ena nodra vakabulai na wekada era sa mate, ni dodonu meda na vauci vei ira ni da matavuvale vata. Oqo ena qaravi rawa walega ena noda Valetabu.”² Ni bera ni vakatabuya na valetabu mai Ogden Utah, e a kaya vakaoqo, “ meu vakananumi kemuni ga ni bera ni vakatabui e dua na vale vua na Turaga, ni o keda eda sa vakatabui keda tiko meda veiqaravi vua na Turaga, ni da na vakayagataka na vale ena kena ivakavakayagataki e gadreva o koya.”³

iVakavuvuli nei Joseph Fielding Smith

E vakalesuya mai o Ilaija na kaukauwa ni veivauci, se dregati vata, e vuravura kei lomalagi.

E a mai sogota o Malakai na iotioti ni parofita ena Veiyalayalati Makawa, ena parofisai ena vosa:

“Raica, au na talai Ilaija na parofita vei kemudou eliu, ena qai lako mai e muri na siga i Jiova e levu ka rerevaki:

“Ia, ena vagolea ko koya na lomadra na qase vei ira na gone, kei na lomadra na gone vei ira na nodra qase; deu lako mai ka cudruva na vanua ena veivakarusai.” (Malakai 4:5–6.)

Sa vaka ga e nakiti me qai mai sogosogo na iotioti ni parofita ni gauna makawa ena nona ivola ena dua na iyalayala ki na itabatamata ni gauna vou, ka sa yalataka kina ni na yaco na gauna mera na semati vata o ira ena itabagauna sa oti vei ira ena gauna oqo e muri. …

E tiko vei keda e dua na ilavelave ka matata cake mai na vosa nei Malakai ka a solia na parofita vaka-Nifai o Moronai rairai vei Josefa Simici ena ika 21 ni Sepiteba, 1823. Vakaoqo na ka e a kaya na agilosi:

“Raica au na talai Ilaijia na parofita me solia vei kemudou na ilesilesi vakabete, ena qai yaco e muri na siga ni Turaga sa levu ka rerevaki.

“Ia, ena vakadeitaka ko koya ena lomadra na gone na vosa ni yalayala a caka vei ira na qase io ena vagolea na lomadra na gone vei ira na nodra qase.

“Raica kevaka sa sega ni yaco vakakina, ena vakarusai sara ko vuravura ni sa lako mai ko koya.” (V&V 2:1–3.)

Tukuna o Moronai vei Josefa Simici ni sa voleka sara me vakavotukana na yalayala oqo. Sa qai mai vakavotukana ni oti e tinikarua na yabaki ena ika 3 ni Epereli, 1836. Ena siga oqori e a basika kina o Ilaijia vei Josefa Simici kei Oliver Cowdery ena valetabu mai Kirtland ka vakatikora vei rau … na kaukauwa me rau dregata se vauca e vuravura, vakakina mai lomalagi. Na idola ni matabete qo e a dau tiko ga vei Ilaijia, ni a solia vua na Turaga me tiko vua ena vuku ni draki kei na tamata kei na dodonu me vauca ena gauna oqo ka tawamudu vei ira na yalododonu na cakacaka kece vakalotu me baleta na taucoko ni veivakabulai ⁴

E so na lewe ni Lotu e sega ni matata tiko vei ira ka ra nanuma ni o Ilaijia e lako vata mai na idola ni papitaiso baleti ira na mate se na nodra vakabulai na mate. E tiko sara e cake na idola e tiko qo vei Ilaijia. O ya na idola ni veivauci, kei na idola ni veivauci oqori baleti ira na se bula ka ra umani kina na sa mate o ira era na malele mera veivutuni.⁵

E a lako mai ki vuravura o Ilaija me mai vakalesuya na taucoko ni kaukauwa ni matabete ka tabaki ira na parofita ena veitalai ni Turaga. Na Matabete qo e tiko kina na idola ni kena vesuki ka vauci e vuravura kei lomalagi na cakacakatabu vakalotu kece sara kei na ivakavuvuli baleta na nona vakabulai na tamata me na rawa ni vakadonui ena matanitu silesitieli ni Kalou. …

Na savasava ni veivakadonui ni dodonu oqo sa qaravi tiko kina na cakacaka vakalotu oqo ena valetabu baleti ira na bula kei ira sa mate. Na kaukauwa o ya ena vauca na tagane kei na yalewa vakawati ena nodrau sa laki vakamau me vaka na ituvatuva tawamudu. Na dodonu sa tiko vei ira na itubutubu mera na rawata na nodra vauci vei ira na luvedra me tawamudu ka sega walega ni gauna oqo, ka sa na tawamudu kina na matavuvale ena Matanitu ni Kalou.⁶

Na vakalesuimai ni dodonu ni veivauci sa na sega ni vakarusai kina o vuravura ena nona sa na tadu mai o Jisu Karisito.

Kevaka me a sega ni lako mai o Ilaija, eda na raica ni veika kece sa qaravi oti ena sega sara ni dua na kena yaga, baleta ni sa kaya oti na Turaga ni vaka tu o ya na ituvaki ni vuravura sa na vakarusai dina ga ena nona sa na tadu mai. Sa ikoya gona sa ka bibi sara na inaki ni nona lako mai ki vuravura. E sega walega ni baleta na papitaiso ni mate, ia sa baleta talega na nodra vauci na itubutubu kei ira na luvedra vei ira na itubutubu, ni gadrevi me na “yaco na duavata, maucokona ka tudei sara na isema ni veika kecega e vakayacori, io, na kaukauwa kei na lewa kei na lagilagi,” mai na ivakatekivu me yacova mai na gauna oqo. [raica na V&V128:18]. Kevaka me sega ni tiko e vuravura na idola ni veivauci oqo , sa na dua na veilecayaki levu e vuravura, sa na qai lako mai na Turaga ia me kilai tiko ni na sega ni rawa ni vaka o ya ni veika kece e liutaki tiko ka vakatulewataki ena nona lawa ena matanitu ni Kalou.⁷

Na cava me vakarusai kina o vuravura? Baleta ga qo, kevaka me sega ni tiko na isema ena kedra maliwa na tama kei ira na gone— sa ikoya na cakacaka baleti ira na mate—eda sa na qai druka vakaidina; sa na qai sega tu ni yaga na cakacaka ni Kalou ka sa na vakarusai. Ena sega sara ni vakatarai me yaco na veika oqori.⁸

Na vakalesui mai ni dodonu ni [veivauci] sa ikoya na leveni me na vakabulai vuravura mai na veivakarusai ena nona lako mai o Jisu Karisito. Ni sa vakadeitaki tu ena noda vakasama na dina oqo, sa na matata sara tu ga vakasigalevu ni na yaco dina ga na veilecalecavi ni sa yaco mai na Karisito ka qai sega ni tu eke na kaukauwa ni veivauci.⁹

Meda na vakarautaka na veivakabulai ena kena taucoko, sa dodonu meda ciqoma na cakacaka vakalotu ni valetabu ena kaukauwa ni veivauci.

Na Turaga [sa]solia tu vei keda na galala kei na kalougata, kei na dodonu meda ia na veiyalayalati, meda ciqoma na cakacakatabu vakalotu ka da na rawata kina na veivakabulai ka tiko sara e cake mai na kena ka tu oqo e vuravura, sivia sara na vakabauti Jisu Karisito na Turaga, veivutuni mai na ivalavala ca, ka papitaiso me bokoci kina na ivalavala ca, kei na veitabaki ni liga baleta na isolisoli ni Yalo Tabu, kei na vanua duadua ga me ciqomi kina na veiyalayalati oqo sa ikoya na valetabu ni Kalou.¹⁰

Na cakacaka e valetabu e rau veiwekani voleka sara kei na yavu ni veivakabulai, ni sega ni rawa me dua vei rau me toso kevaka me sega ni tiko na kena ikarua. Dua tale na kena itukutukuni, ena sega na veivakabulai kevaka me sega ni tiko kina na cakacaka vakalotu ka na kune duadua ga ena valetabu.¹¹

Rauta ni udolu na Yalododonu Edaidai era … na via lako ki na soqoni, sauma nodra ikatini, ka qarava na itavi e dau cakava na Lotu, ia e vaka ga era se bera ni kila na bibi ni kena ciqomi na kalougata mai na valetabu ni Turaga o koya ena kauti ira yani ki na bula vakalagilagi. Sa dua na ka e matalia. E so na tamata era sa na toso tu ga ka sega ni dausasagataka mera na rawata na veika e soli vei ira me rawa ni ra na ciqoma na veiyalayalati ka na kauti ira lesu vua na Kalou me vaka ni ra sa luvena.¹²

Kevaka o vinakata na veivakabulai e taucoko, o ya na bula vakalou ena matanitu ni Kalou, … sa na dodonu mo lako ki na valetabu ni Turaga ka laki ciqoma na cakacakatabu vakalotu ka tiko mai na vale o ya, ka sega ni rawa me na ciqomi ena dua tale na vanua. Sega ni dua na tamata ena ciqoma na taucoko ni bula tawamudu, me bula vakalou vakaikoya; sega ni dua na yalewa ena ciqoma duadua na kalougata o ya; ia, na tagane kei na yalewa, ni rau sa ciqoma na kaukauwa ni veivauci ena valetabu ni Turaga, erau na curuma yani na bula vakalou, ka rau na tomana nodrau toso me yacova ni rau sa laki yaco me vaka na Turaga. O ya sara ga na icavacava ni tamata, o ya na ka e gadreva na Turaga vei ira kece na luvena.¹³

Me kilai: Mo wilika e so na vosa ni vakanuinui kei na yalayala nei Peresitedi Smith vei ira na tamata vakabauta ka ra na sega beka ni rawa ni ciqoma na cakacaka vakalotu ena valetabu, ena bula oqo, raica na wase 18 ena ivola oqo.

Baleta na kaukauwa ni veivauci e rawa ni da cakava na cakacaka vakalotu baleti ira na sa mate ka ra sega ni se ciqoma.

O cei o ira na qase kei ira na gone ka tukuna tiko oqo o Malakai ? O ira na qase, sai ira na wekada era sa mate ka ra sega ni ciqoma na Kosipeli, ia o keda eda ciqoma na yalayala ni na yaco mai na gauna, ni ra na vakalougatataki talega kina. O ira na gone sai ira era se bula tiko nikua ka ra sa vakarautaka tiko na kedra itukutuku ka ra sa laki cakava tiko na kena cakacaka vakalotu ena Valetabu.¹⁴

E rawa ni ra vakaitavi kece na lewe ni matavuvale ena cakacaka ni tuva kawa ni matavuvale.

E a lako mai o Ilaija ni tiko vua na idola ni veivauci, ka sa mai soli vei keda na kaukauwa meda dodoliga yani vei ira era sa mate. Na kaukauwa ni veivauci oqo ena kauti ira mai o ira era sa mate ka ra na gadreva mera veivutuni ka ciqoma na Kosipeli, ia era sa mate ka sega ni kila, me vakataki keda nikua ni da sa ciqoma ka veivutuni.¹⁵

Sa vakalawataka oti tu na Kalou ni o ira kece na luvena vakayalo, o ira kece era sa mai bula se o ira era na mai bula e vuravura, ena soli vei ira na dodonu mera na vakabauta ka muria na lawa ni nona kosipeli tawamudu. O ira era sa ciqoma na kosipeli ka bulataka tiko, wili kina na papitaiso kei na vakamau vakasilesitieli era na bula tawamudu.

Sa kilai tiko ni lewe lailai sara na tamata era sa rogoca na ivunau ni dina ka sa vakatakilai mai vua e dua ka nona tamata dina na Turaga. E dodonu me rogoca taucoko na tamata me vaka na nona ituvatuva na Turaga. Me vaka e a kaya o Pita:

“Ena vuku ni ka oqo sa vunautaki kina na itukutuku vinaka vei ira talega era sa mate tu, mera lewai me vaka na tamata me mate na yagodra, ia, mera bula ga vua na Kalou ena yalodra.” (1 Pita 4:6.)

O ira era sega ni a rogoca na itukutuku ni veivakabulai ena bula oqo, ia era na ciqoma kevaka mera a rogoca kevaka me a donumaki ira ni ra a se bula tu—sai ira oqori era na ciqoma ena vuravura ni yalo; sai ira oqori eda na cakava na nodra cakacakatabu vakalotu ena valetabu; ka sai ira talega oqori era na laki vakabulai vata kei keda ena bula tawamudu.¹⁶

Na vagolei ni lomadra na qase vei ira na gone kei ira na gone vei ira na qase, sai koya na kaukauwa ni veivakabulai vei ira na mate, ena kena qaravi na cakacaka ni vakaveisosomitaki era na cakava na gone baleti ira na qase, ka sa na dodonu me na caka vaka kina. Au sa dau rogoca wasoma mai vei ira era saqata tiko na cakacaka oqo ni sa sega sara ga na rawa me duatani tale me na veisosomitaki vua e dua tale. O ira era sa dau vosa vakaoqori, era sa guilecava tiko ni cakacaka oqo ni veivakabulai e caka ena vakaveisosomitaki, ni sai Jisu Karisito ga sa tu me vakatulewataka, me vueti keda mai na mate, ka ni a sega ni noda digidigi o ya, ka vueti keda talega mai na noda ivalavala ca ena noda na veivutuni ka ciqoma na kosipeli. O Koya sa cakava na cakacaka levu oqo ena ivakavuvuli vata ga ena nona sa solia na kaukauwa vei ira na lewe ni nona Lotu mera qarava ena vukudra na mate ni ra sa na sega ni cakava rawa na nodra cakacaka vakalotu.¹⁷

Au nanuma ni so na gauna eda sa rui vakamamadataka na kena qaravi na itavi ni nodra vakabulai na mate. Ena cala ni da vakasamataka tiko ni cakacaka eda cakava tiko oqo ena valetabu ni Turaga e baleti ira era sa mate. Meda nanumi ira me vaka ga era se bula; kei na vakaveisosomitaki bula me vakaraitaka tiko na veika e a rawa ni yaco kevaka mera a se bula tu o ira ena dua na itabagauna ni kosipeli. Sa ikoya gona ni qaravi na cakacaka ni dua na tamata sa mate ena valetabu ena vakasamataki tiko ni tamata oqori e se bula tiko ena gauna e qaravi tiko kina.¹⁸

Na ivunau oqo ni veivakabulai baleti ira na mate sa ikoya e dua na ivakavuvuli cecere e vakatakilai vua na tamata. Sa ikoya na sala ka na muri me vunautaki kina na kosipeli ki na tamata taucoko. Sa vakadeitaka na ka e dina, ni Kalou e sega ni dau doka na tamata [raica na Cakacaka 10:34]; ni bibi kece ga na yalo vei Koya; ni tamata kece sara era na lewai me vaka na nodra ivalavala.

Oqo, au sa vakavinavinaka vua na Turaga ni sa vakalesuya mai na Nona kosipeli ena gauna oqo. Au vakavinavinaka Vua baleta na kaukauwa ni veivauci sa vakalesuya mai vuravura o Ilaija na Parofita. Au vakavinavinaka Vua baleta na tawamudu ni matavuvale, na galala e soli vei keda meda lako ka laki vauci ena valetabu, kei na kena sa caka me rawa talega ni ra na vauci na noda qase ka ra sa mate ka sega ni kila tu na kosipeli.¹⁹

Na cakacaka ni itukutuku ni matavuvale kei na cakacaka e valetabu baleti ira era sa mate e cakacaka ni loloma.

Era lewe levu sara na tamata vinaka ka yalomalua, era sa vakuai ira mai na veivakacegui kei na ka e gadrevi sara tu ga ena bula oqo, ni ra sa vakaogai ira ena vakarautaki ni itukutuku baleti ira na wekadra sa mate, me rawa kina vei ira mera na vakabulai. Na cakacaka ni loloma oqo ena sega ni ka ga ni vakaoti gauna, ni o ira kece era sa vakaogai ira tiko ena cakacaka talei oqo era na vakaiyau ena matanitu silesitieli ni Kalou. Ena levu sara na nodra kalougata, me na ulabaleta na kaukauwa ni tamata me kila.²⁰

Ena sega tale ni dua na cakacaka ka semati kina na kosipeli mena sivia na bibi ni cakacaka ka dau qaravi ena Valetabu ni Turaga, baleti ira na mate. O ira era cakava na cakacaka baleti ira na mate era sega ni namaka mera na saumi ena bula oqo. Sa tiko sara e cake na cakacaka ni loloma oqo, ni sa tiko sara ga ena yalo ni tamata na yalo ni vakabauta kei na dinati ni qaravi ni cakacaka vakalotu. E sega ni saumi vakailavo, ia ena dua na yalo ni marau levu mai lomalagi vei ira na yalo eda sa vukea mera sa mai vakabulai. Sa dua na cakacaka ena vakalevutaka na yalo ni tamata, vakarabailevutaka na nona rai baleta na nona vukei na wekana, ka tea e yalona na yalo ni lomani ira kece na luvena na Tamada Vakalomalagi. E sega tale ni dua na cakacaka ena tautauvata kei na kena ena valetabu baleti ira na mate me vakavulici na tamata me lomana na wekana me vakataki koya. O Jisu e lomani vuravura ka sa solia kina na nona bula me mai, mate me baleta na ivalavala ca ni kai vuravura me rawa kina ni ra vakabulai. Sa tiko talega oqo vei keda na galala meda vakaraitaka na noda lomani Koya kei ira na wekada ena noda vukei ira ki na veivakalougatataki ni kosipeli ka sa sega ni rawa mera ciqoma kevaka ena sega ni da veivuke kina.²¹

Eda na vakacokotaka na tuvalaki ni matavuvale mai na veitabatamata ni da cakava na cakacaka ni tuvai itukutuku ni matavuvale kei na cakacaka ni valetabu.

Na ivunau ni veivakabulai baleta na cakacaka ni valetabu e vakadeitaka tiko vei keda na lagilagi ni kena rawa ni tosoi na veiwekani ni matavuvale. Eda raica eke ni isema ni matavuvale ena sega ni na tagutuvi, ni o ira na veiwatini era na semati tikoga vakakina vei ira na luvedrau me yacova na iotioti ni itabatamata. Ia, kevaka me na ciqomi na veivakadonui, sa dodonu me na qaravi na cakacakatabu vakalotu ni veivauci ena valetabu ni noda Kalou. Na konitaraki, na ivesu vakalawa, na vosa ni yalayala kei na veidinadinati kece e cakava na tamata sa na mai tagutuvi, ia na veiyalayalati e vakayacori ena valetabu ni Kalou ni sa maroroi ena vakabauta sa na ka tawamudu [raica na V&V 132:7]. Na ivunau oqo ena vakamatatataka sara vei keda na inaki ni Turaga vei ira na luvena. Sa vakaraitaka na levu ni nona loloma veivueti kei na loloma vei ira kece sara era talairawarawa vua, io, vei ira talega era dau vakadrecike, ni nona sa rui vinaka sara ena vakalougatataki ira talega vakakina.²²

Eda vakavulici mai na kosipeli i Jisu Karisito ni matavuvale e sa cokonaki vinaka tu ena tadrava yani na bula vakalou, ka ni sa taucoko, mai vei tama kei tina kei ira na gone ena dua na itabatamata kivei ira e dua tale na itabatamata me na vaka tu ko ya me yacova sara na iotioti ni gauna.²³

Na kaukauwa ni idola ni matabete “ena vakaduavatataka na veiwatini ena nodra sa na laki vakamau me vaka na yavu tawamudu.”

E dodonu me tiko na isema, na ivau me vauci vata na veitabatamata mai na gauna i Atama me yacova na iotioti ni gauna. Era na semati ka vauci vata na veimatavuvale, ira na itubutubu vei ira na gone, ira na gone vei ira na itubutubu, mai na dua na itabatamata ki na dua tale, me yacova sara na gauna eda sa na cokovata me dua ga na matavuvale levu vata kei Atama na tamada ena ulu ni matavuvale na vanua sa biuti koya kina na Turaga. Sa na sega ni rawa meda vakabulai ena matanitu ni Kalou, vakavo ni sa tiko e yaloda na gagadre meda na dina ki na itavi oqo ni sa tiko vei keda na kaukauwa me baleti ira na wekada era sa mate. Oqo e dua na ivunau cecere, sa dua na dina levu sara, ka sa vakatakilai vei Parofita Josefa Simici. Meda tu vakarau ka ciqoma na itavi ni veiqaravi ena yalodina ni da sa lesi mai vua na Turaga, me rawa ni da na laki bula kina vakalou, ka laki bula marau ena matanitu ni Kalou vata kei ira na wekada kei na noda itokani ena noda sa na laki soqoni vata kei ira na Yalododonu ena Lotu ni Nona Ulumatua, o ira era sa vagalalataki ira tu mai na ivalavala ca e vuravura.

Me vakalougatataki keda na Kalou, ka me solia vei keda na gagadre ena vu ni yaloda meda na dinata na noda itavi ka qaravi Koya ena yalodina ena veika oqo, ni sa noqu masu.²⁴

Vakatutu ni Vuli kei na Veivakavulici

Taro

Mai “Na Bula nei Joseph Fielding Smith,” wilika na ivakasala nei Peresitedi Smith baleta “na ka saraga eda cakava tiko” ena vakatabui ni dua na valetabu. Na cava meda cakava meda muria kina na ivakasala oqo.
E vakaveiwekanitaki vakacava na ivakavuvuli e tiko ena iwasewase 1 kei na ka eda sa cakava tiko mera vukei kina na wekada era sa mate? Ena veisemati vakacava na noda veiwekani tiko kei ira na lewe ni matavuvale era bula tiko?
Ni ko sa wilika tiko na iwasewase 2, vakaraica na ivakamacala nei Peresitedi Smith se cava na vuna ena “vakabula kina na vuravura na kaukauwa ni veivauci mai na kena vakarusai ena nona lako mai o Jisu Karisito.” Na cava e vakavulica na ka oqo baleta na matavuvale ena yavu ni veivakabulai?
Na cakacaka ni valetabu erau “veiwekani vakacava kei na yavu ni veivakabulai”? (Raica na iwasewase 3.) Ena yavalata vakaevei na ka eda vakila baleta na ivakavuvuli ni cakacaka ni valetabu?
E vakasalataka o Peresitedi Smith ni da cakava na cakacaka ni valetabu baleti ira na mate, meda vakasamataki ira na tamata oqori ni ra se bula tiko (raica na iwasewase 4). Na cava na ibalebale ni ka oqo vei iko? Ena vukica vakacava na nomu vakasama na ka oqo baleta na veiqaravi ena valetabu?
Ni ko sa railesuva tiko na iwasewase 5, vakaraica na kalougata ka a tukuna o Peresitedi Smith ni na lako mai vei ira era na cakava na cakacaka ni tuvai ni kawa ni matavuvale. Ko sa raica vakacava ni sa vakavatukana na veika oqo?
Vulica na iwasewase 6, ka vakananuma na marau ko na sotava ni ko sa na “marau vata” kei ira na nomu qase era sa yali. Vakananuma na ka o rawa ni cakava mo vakarautaki iko kei na nomu matavuvale me baleta na gauna oqori.

iVolanikalou Veisemati

1 Korinica 15:29; V&V 95:8; 97:15–16; 128:16–19

Veivuke ni Veivakavulici

“ Ni sa taroga na taro, raica mada ke o rawa ni sureta mai e dua me sauma ka me kua ni sauma o qasenivuli. Me kena ivakaraitaki oqo, o rawa ni kaya, ‘Oqori e dua na taro vinaka. Na cava o ni vakasamataka na vo ni kalasi?’ se ‘E rawa ni dua e veivuke mai me baleta na taro oqo?’” (Veituberi, Me iLutua ni Noda Bula [1999], 73).