Wase 10

Noda Vakasaqara na Dina

“Oqo e dua na ka e gadrevi vei keda, me vaka ni da lewena na Lotu oqo, me da vakaveikilaitaki keda ena veika sa vakatakila mai na Turaga, me da kakua kina ni vakau vakatani. … Eda na lako vakacava ena dina kevaka eda sega ni kila?”

Na Bula nei Joseph Fielding Smith

Ni se qai yabaki walu o Joseph Fielding Smith, a solia vua na tamana e dua na iVola i Momani ka kerei koya me wilika. “Au a ciqoma na nodra ivolatukutuku na Nifai oqo ena yalo vakavinavinaka,” a qai nanuma lesu o koya, “ka soli au sara ki na cakacaka sa lesi vei au.” Na nona taleitaka na ivola e vakauqeti koya me cakava vakatotolo na nona itavi vakacakacaka ka so na gauna dau biubiu totolo mai na qito tavipolo me rawa ni kunea eso na vanua vakadigagalu me wilivola kina. Se bera ni rua na yabaki mai na gauna e ciqoma kina na iloloma mai vei tamana, sa wilika oti vakarua na ivola. Ena vuku ni vuli ena gauna ni gone oqori, e qai kaya kina e muri, “Era tu eso na tikina sa sitabataki tu ena noqu vakasama kau sega sara ni guilecava tale.”¹ A wilika talega eso tale na ivola. “Au dau wilika na ivola e vakayagataki me baleti ira na gone ena Lalai kei na kena e baleta na Wilivola ni Sigatabu vei ira na gonelalai ena veisiga taumada oya,” e kaya o koya, “ka dau tiko voli ga e ligaqu e dua na ivola niu tiko e vale. … E muri au qai wilika na iTukutuku ni Lotu me vaka e tabaki ena Millennial Star. Au wilika talega na iVolatabu, na iVola i Momani, na Mataniciva Talei, na Vunau kei na Veiyalayalati, kei na ivola kecega e taura na ligaqu.”²

Sa dau kauta voli ena nona bula taucoko o Peresitedi Smith na gagadre oqo me baleta na kosipeli. Ni vulica na dina ni kosipeli, e dau wasea, ia ni ganita, ena taqomaka. Ni oti e tolu na yabaki mai na nona tabaki me iApositolo, a ciqoma e dua na veivakalougatataki ni matabete ka soli mai kina na ivakasala eso oqo: “O sa vakalougatataki ena kaukauwa mo kila, mo dikeva, ka taqomaka na ivakavuvuli ni dina mai vei ira e vuqa na nomu itokani, ka na yaco mai na gauna ena tu kina me itataqomaki na ivakadinadina eso o sa sokumuna tiko mai, mai vei ira era sa segata tiko ka ra na qai segata me ra vakarusa na ivakadinadina ni kena vakalou na nona ilesilesi na Parofita o Josefa; ia ena veitaqomaki oqori ena sega sara ni rawa ni o vakamaduataki kina, ka na cilava vakamalua yani na yalomu na rarama ni Yalotabu me vaka na tegu e lutu mai lomalagi, ka na cereka ki na nomu vakasama e vuqa na dina me baleta na cakacaka oqo.”³ A bulataka ka dinata na veimalanivosa vakaparofita oqo. Ni dua na vuku ena veika vakosipeli, qasenivuli, ka dauvolaivola, sa dau cakacaka vagumatua me vakamacalataka ka taqomaka na ivunau ni veivakabulai. A vakatokai koya ena dua na gauna o Peresitedi Heber J. Grant me “tamata vuku duadua vakaivolanikalou” vei ira kece na Vakaitutu Raraba.⁴

Ena mua ni nona bula, sa dau vakananuma lesu o Peresitedi Smith na veivakalougatataki sa ciqoma ena nona dau vulica na kosipeli:

“Ena noqu bula taucoko au sa vulica ka dau vakananuma vakatitobu na ivakavuvuli ni kosipeli ka segata meu bulataka na nona lawa na Turaga. Sa yaco mai kina ki yaloqu na loloma cecere ena vukuna kei na vuku ni nona cakacaka kei ira kece sara era segata me ra tosoya na nona inaki e vuravura.”⁵

“Ena noqu bula taucoko au sa dau vulica na ivolanikalou ka segata na veituberi ni Yalo ni Turaga meu kila kina na kedra ibalebale dina. Sa rui vinaka vei au na Turaga, kau reki ena kila ka sa solia mai vei au ko koya kei na galala dokai e noqu meu vakavulica na nona ivakavuvuli ni veivakabulai.”⁶

Elder Joseph Fielding Smith ena Kuoramu ni iApositoloLe Tinikarua kei Peresitedi Joseph F. Smith, 1914

iVakavuvuli nei Joseph Fielding Smith

E dodonu me da vakasaqara na dina ena vuqa na sala, ia na kila ka bibi duadua sai koya na kila ka vakosipeli.

Eda vakabauta na vuli. Vakamatatamata eda sa segata na vuli ena veitabana kece sara, vaka Matalotu eda vakayagataka na umailavo lelevu ka sorovaki ka vakalevu me vakarautaki na madigi eso ni vuli vei ira na lewe ni Lotu. Ka vakauasivi ena gauna oqo ni vakadidike kei na veivakatorocaketaki. Eda vakabauta ni dodonu me soli vei ira na noda itabagone na levu ni vuli kei na veituberi ni cakacaka vakaliga e ganita, ena rai vakayalomatua.

Ia eda vakabauta ni dodonu me veiwaki vakamatau na sasaga ni vuli vakavuravura oqo kei na ivakarau ni kila ka vakayalo e tautauvata. E bibi cake sara, vakaduanaudolu, me da kila na Kalou kei na nona lawa, me rawa ni da cakava na veika ena rawa kina na veivakabulai, mai na noda rawata na kila-ka kece vakavuravura e rawa ni rawati.⁷

“Ia dou na kila na ka dina, ia na ka dina ena sereki kemudou” (Joni 8:32).

Me vulica e dua na ka vou ena dua na siga na tamata kece sara. E dui tu na vakatataro ni lomamuni ka vakasaqara tu na dina ena vuqa na tabana vakavuli. Au nuitaka dina sara ni nomuni vakasaqaqara levu cake ena vakayacori ena iyalava ni veika vakayalo, baleta oqori na tabana eda na rawata kina na veivakabulai ka vakayacora na toso ka na kauti keda ki na bula tawamudu ena nona matanitu na Tamada.

Na kila-ka bibi duadua ena vuravura oqo na kila-ka vakosipeli. Sai koya na kila na Kalou kei na nona lawa, na veika me cakava na tamata me cakacakataka kina na nona vakabulai ena rere kei na sautaninini ena matana na Turaga [raica na Filipai 2:12; Momani 9:27].⁸

E sega ni tautauvata taucoko na kedra yaga kei na kedra bibi na dina. Eso na dina era cecere cake mai na kena tale eso. Na dina cecere duadua, se veidina cecere duadua, eda na kunea ena veivakavuvuli bibi ni kosipeli i Jisu Karisito. Taumada, ni o Jisu Karisito na Luve ni Kalou, na Dauveivueti kei vuravura, ka lako mai ki vuravura me mai mate me rawa ni bula na tamata. Na dina oqori e dodonu me da kila. E bibi cake sara me da kila ni noda Dauveivueti o Jisu Karisito, ni sa solia mai vei keda o koya na ivakavuvuli ni bula tawamudu, mai na noda kila na veika kece sara eda rawa ni rawata mai na vuli vakayago.⁹

Me baleta na vuku kei na yalomatua vakavuravura, era sega ni vakaibalebale vakavo kevaka era sala vata mai kei na vosa vakatakilai mai ni Kalou. Se na ivunau cava ga, se lako mai ena lotu, vakadidike, rai vakavuku, se cava ga, ke veisaqasaqa kei na vosa vakatakilai mai ni Turaga, ena guce. Ena vakaibalebale beka. Ena biu beka e matamu ena vosa ni veirawai ka na sega beka ni rawa ni o sauma. Ena kena irairai beka ni tu na kena ivakadinadina ka sega ni rawa ni o veibataka, ia na ka ga mo cakava mo waraka ena yalovosota. Na gauna ena qai tukuna na ka kecega. O na raica ni ivunau kecega, na ivakavuvuli kecega, se vakacava na kena vakabauti raraba tu, kevaka e sega ni sala vata kei na vosa vakalou ni Turaga vei ira na nona italai, ena rusa ga. E sega talega ni gadrevi vei keda me da tovolea me da vakarabailevutaka na vosa ni Turaga ena dua na sasaga malumalumu me rawa ni veidonui kei na vakasama kei na ivakavuvuli oqo. Na vosa ni Turaga ena sega ni tale wale, ia na veivunau kei na vakasama lasu ena druka kecega. Na dina, kei na dina duadua ga, ena tudei tu ni sa rusa na ka kecega.¹⁰

Sa vakaroti keda na Turaga me da vakasaqaqara ena ivolanikalou.

Sa vakaroti ira na lewe ni Lotu ena gauna oqo na Turaga me ra vakasaqarai koya ena masu, ena vakabauta kei na vuli. Eda sa vakaroti me da vulica na ivakaro sa solia vei keda ko koya ena Vunau kei na Veiyalayalati, ena iVola i Momani kei na ivolanikalou kecega, kei na yalayala ni “Kila ka kecega eda rawata ena bula oqo, ena tucake vata kei keda ena tucake tale mai na mate. Kevaka e dua na tamata sa levu na ka e vulica ka kila ena nona gugumatua ka talairawarawa, ena yaga vakalevu cake sara vua ena bula sa bera mai.” [V&V 130:18–19.] … Sa kaya na iVakabula vei ira na Jiu: “Dou sa vakasaqara ena ivolanikalou; ni dou sa nanuma dou sa rawata kina na bula tawamudu: ia na ivola oqo sa tukuni au.” [Joni 5:39.] E vica na lewe ni Lotu e vakakina na nodra vakasama, ia era druka ena nodra vakarautaki ira ena vuli kei na vakabauta?¹¹

E vaka vei au ni na sega ni vakacegu e dua na lewe ni Lotu oqo se makare na nona vakatulewa kevaka e sega vua na kila ka e rawa mai na vuli kei na vakabauta ena ivolayavu ni Lotu. Na ivolatukutuku eso oqo e sega na kena ivoli. Na vuravura e dau vakalialia, ia mai na kedra ivakavuvuli sa rawa kina vei keda me da toro voleka mai vua na Kalou, me da kila vakavinaka cake na Tamada Vakalomalagi kei na Luvena o Jisu Karisito, yaco me da veikilai vakavinaka cake kei rau ka kila vakalevu cake me baleta na ituvatuva vakasakiti ni veivakabulai erau sa solia mai vei keda vakakina ki vuravura.¹²

Era sa vosa na veiparofita ni gauna makawa, ka ra sa raica mai na noda gauna, sega ni baleti ira na tamata ena nodra gauna, ia me baleti ira na tamata era bula donumaka na gauna e tukuni tiko ena parofisai.¹³

Au kaya vei kemuni na taciqu kei na ganequ, ena sega ni rawa ni o ni maroroya na ivakaro ni Turaga ka lako ena buladodonu vakavo kevaka o ni kilai ira. Sa vakaroti keda na Turaga me da vakasaqaqara ena ivolanikalou, ka ni ra dina ka na yaco vakaidina na veika era tu kina [raica na V&V 1:37]. … Vakasaqara na ivolanikalou; vakaveikilaitaki iko ki na veika sa vakatakila mai na Turaga me baleta na nomu vakabulai, na vakabulai ni nomu vale, kei na vuravura.¹⁴

Sa dua na noda itavi cecere me da vakarorogo ki na itukutuku ni ka dina sa vakatakila tiko mai na Turaga ena gauna oqo vei ira na Nona tamata.

Kevaka eda na vakarorogo ki na vosa ni Turaga ka vakasaqara vakataki keda ka rawata na kila-ka mai na iVola i Momani, mai na iVolatabu, mai na Vunau kei na Veiyalayalati, mai na Mataniciva Talei, kei na idusidusi dau soli vei keda ena veigauna eso mai vei ira na vakaitutu ni Lotu, ka segata mo cakava na loma ni Turaga, ka nanuma na noda masu kei na noda veiyalayalati vua, eda na sega sara ni lako sese.¹⁵

Ena ikaciwa ni Yavu ni Vakabauta eda tukuna kina ni “Keimami vakabauta na veika sa vakatakila oti na Kalou, na veika sa vakatakilai mai oqo, ka keimami vakabauta ni na levu tale na veika ena qai vakatakilai mai me baleta tiko ga na Matanitu ni Kalou.” E dina oqo, sa yaco me yaga vei keda me da kila na veika sa vakatakila mai ko Koya, kei na veika sa vakatakila tiko mai ena gauna oqo; kevaka e sega eda sa sega tiko ni toso vata kei na Nona cakacaka ka da na sega ni rawa ni kila na Lomana me baleti keda, ni da sa sega ni raica rawa.¹⁶

E dodonu vei ira na Yalododonu Edaidai me ra veivakabauti vei ira na nodra iliuliu, ka talairawarawa ki na nodra ivakavuvuli na vakaitutu ni Lotu, ni ra sa dau vosa mai vei keda ena domo ni parofisai. Sa tukuna na Turaga ena imatai sara ga ni iwase ni Vunau kei na Veiyalayalati, se kevaka e tukuna ga mai ko koya se ra tukuna na nona italai, e tautauvata ga [raica na V&V 1:38]. O koya gona, sa noda itavi bibi talega kina ka noda icolacola me da vakarorogo vei koya e veiliutaki tiko ena lotu, se da vakarorogo ki na domodra na italatala qase e Isireli, ni ra kauta voli ena kedra maliwa na tamata na itukutuku ni dina, ni da vakakina [kevaka] ena tala mai na Turaga mai na nona iserau e dua na agilosi se lako sara ga mai o koya me mai tukuna na veika oqo.¹⁷

E rawa ni da kila na dina vakosipeli ena vuli, vakabauta, kei na talairawarawa ka vakakina mai na veitubei ni Yalo Tabu.

Ena vinaka kevaka eda muria na ivakasala sa solia mai vei keda na Turaga, sai koya: “Ia ko koya sa muria na noqu vosa, ena sega ni rawai.” [Josefa Simici—Maciu 1:37.] Na noda muria na nona vosa e sega ni noda wilika walega. Me da muria e sega ni da wilika walega ka vulica, ia me da segata ena yalomalumalumu kei na talairawarawa me da cakava na ivakaro e soli mai, ka rawata na veivakauqeti ena solia mai na Yalo Tabu.¹⁸

Ena so na gauna eda dau rogoca na vosakudrukudru, “E sega na noqu gauna.” Ia e tu kece vei keda na gauna me da wiliwili ka vuli sai koya na noda itavi bibi sara. E sega beka ni rawa ni da vakarautaka me da raica e tinikalima na miniti e veisiga yadua me da vagoleya ki na wiliwili e vakaivakarau kei na vakanananu? Oqo e dua na gauna lailai sara, ena dua na auwa vasagavulu kalima na miniti ena dua na macawa; vitu veimama na auwa ena dua na vula e tolusagavulu na kena siga, ciwasagavulu kadua ka dua na ikava na auwa ena dua na yabaki. …

… E vica wale sara vei keda eda dau wiliwili vakasivia; e levu ga vei keda e dau wiliwili ga vakalailai. E kaya na Turaga:“Ia me vaka ni sa sega ni taucoko sara na nomudou vakabauta, dou gumatua sara mo dou veivakavulici vakai kemudou ena veika mo dou yalomatua kina; dou gumatua sara mo dou kila ka; io ena vuli kei na vakabauta.” [V&V 88:118; 109:7.]¹⁹

E namaki vei keda me da vuli ena kena levu eda rawata ena vakadidike ka dikevi vakamatailalai. Ia e vakaiyalayala na noda rawa ni vuli ena iyalava ni vuli kei na vakadidike. Na veika ni Kalou ena rawa walega ni kilai ena Yalo ni Kalou. Me da rawata na kila-ka ena vakabauta.²⁰

Ena vakasaqaqara na tamata, era na vuli beka, era na kila ka, io, e levu sara na ka; era na rawata beka me ra kila e levu sara na itukutuku, ia ena sega ni rawa vakadua me ra kila na taucoko ni dina … vakavo kevaka era dusimaki mai na Yalotabu ni ka dina, na Yalo Tabu, ka talairawarawa ki na ivakaro ni Kalou.²¹

Na vakabauta dina ni veitokani kei na yalomalumalumu ena vakavurea vua na tamata me kila na ka dina. E sega ni dua na iulubale vinaka ni nodra sega ni kila na tamata kecega na ka dina ka na sereka na tamata. E sega ni dua na iulubale vinaka me ra sega ni kunea rawa na tamata kecega na rarama ni dina ka kila se sa vosa tale se sega na Turaga ena veisiga e muri oqo. E kaya ko Paula ni dodonu vua na tamata me ra “vakasaqara na Kalou, de ra vakayayamo beka vua, ka kunea, ia sa sega ga ni yawa ko koya vei keda yadua.” [Cakacaka 17:27.] Ena loma sara mada ga ni butobuto vakayalo kei na tawavakabauta, e ologa tu na vuravura, sa sega ni dau lekaleka na liga ni Turaga. Ena rogoca ko Koya na nona vakatakekere vagumatua o koya sa vakasaqara vakaidina sara na dina; ka sega ni dodonu me lako voli e dua ka sega ni kila na dina vakalou kei na vanua me kunea kina na Lotu i Jisu Karisito. Na ka ga ena gadreva e dua na tamata na vakabauta yalomalumalumu kei na yalo raramusumusu kei na gagadre me lako voli ena rarama, ena vakatakila vua na Turaga.²²

E rawa ni da kila kece na dina; eda sega ni tawavukei. Sa vakarautaka na Turaga vei ira na tamata kecega me ra kila ena nodra muria na [Nona] lawa, kei na veituberi ni Nona Yalo Tabu, o koya sa talai mai me mai vakavulici keda ni da sa bulamuria na lawa, me rawa kina ni da kila na dina oya ka na sereki keda [raica na Joni 8:32].²³

Ni da sa bula me salavata kei na dina, ena vakalevutaka cake na Turaga na noda rarama kei na kila ka.

E dua na ka e gadrevi vei keda, me vaka ni da lewe ni Lotu oqo, me da vakaveikilaitaki keda ki na veika sa vakatakila mai na Turaga, me da kakua kina ni vagolei tani. … Eda na lako vakacava ena dina kevaka eda sega ni kila?²⁴

Na noda inaki duadua ga ena veika e baleta na dina ni veivakabulai me da raica na veika sa vakatakila na Turaga ka da qai vakabauta ka cakacakataka.²⁵

Kevaka eda na muria na yalo ni rarama, na yalo ni dina, na yalo sa soli mai ena ivakatakila eso ni Turaga, kevaka eda vakasaqara, ena yalo ni masumasu kei na yalomalumalumu, na veituberi ni Yalo Tabu, ena valevutaka na Turaga na noda rarama kei na noda kila ka; me tiko kina vei keda na yalo ni kila na duidui, eda na kila na dina, eda na kila na ka lasu ena gauna eda raica kina, ka da na sega ni rawai.

O cei e dau rawai ena Lotu oqo? Sega ni o koya na tamata e yalodina tiko ena nona qarava na nona itavi; sega ni o koya sa vakamatautaki koya tiko ki na vosa ni Turaga; sega ni o koya na tamata sa bulataka tiko na ivakaro e soli tu ena ivakatakila eso oqo, ia na tamata e sega ni vakamatautaki koya ena dina, na tamata e tu ena butobuto vakayalo, na tamata e sega ni vakasamataka se kila rawa na ivakavuvuli ni Kosipeli. Na tamata vaqori ena rawai, ni yaco mai na veiyalo lasu oqo ena keda maliwa ena sega ni kila o koya se vakaduiduitaka rawa na rarama mai na butobuto.

Ia kevaka eda na lako voli ena rarama ni ivakatakila ni Turaga, kevaka eda na vakarorogo ki na ivakasala eso e soli mai vei ira era tu ena veimatabose ni Lotu, ka sa soli vei ira na kaukauwa me ra veidusimaki, eda na sega ni lakosese.²⁶

Me da vakasaqara [na] ivolanikalou, me da kila na veika sa vakatakila mai na Turaga, me da vakaduavatataka na noda bula ki na Nona dina. Eda na sega ni rawai, ia ena tu vei keda na kaukauwa me da vorata na ca kei na veitemaki. Ena vakararamataki na noda vakasama ka na rawa vei keda me da vakasamataka na ka dina ka rawa ni vakaduiduitaka mai na lasu.²⁷

Kevaka e dua na ivunau se ivakavuvuli e semati ki na ivakavuvuli ni Lotu eda sega ni vakasamataka rawa, me da tekiduru. Me da lako yani vua na Turaga ena yalo ni masumasu, yalomalumalumu, ka kerea me vakararamataki na noda vakasama me da kila.²⁸

“Raica sa vu ni rarama na Kalou; ia ko koya sa kunea na rarama, ka tudei tikoga vua na Kalou, —ena vakararamataki vakalevu; io ena tubu cake tikoga na nona rarama me yacova na siga lagilagi ko ya. [V&V 50:24]

O koya eda sa kila mai na veika oqo ni tamata e vakasaqara na Kalou ka liutaki mai na Yalo ni ka dina, se na Dauveivakacegui, ka tomana tiko vua na Kalou, ena tubu ena kila ka, ena rarama, ena dina, me yacova ni sa vavaca yani na siga sa uasivi sara ni rarama kei na dina.

Eda na sega ni rawata kece oqori ena bula oqo. Ena sega ni rawa vua e dua me yacova yani na takete oqori ena vica ga na yabaki se ena bula oqo. Ia na veika eda vulica eke, na veika e tawamudu, na veika e vakauqeta na Yalotabu ni ka dina, ena ulabaleta vata yani kei keda na ibulubulu ka da na tomana yani ka, kevaka eda se tomana tikoga vua na Kalou, eda na ciqoma na rarama kei na dina me yacova ni da sa vavaca yani na siga uasivi sara ko ya.²⁹

Sa vakayacori na yalayala vei ira kece era na ciqoma na rarama ni ka dina ia ena nodra vaqaqara kei na sasaga ena talairawarawa era sa vakamatautaki ira kina ki na Kosipeli, me ra na ciqoma mai na vunau ena vunau, na vosa ena vosa, vakalailai eke, vakalailai mai kea, me yacova ni ra sa rawata na taucoko ni dina; io ena vakatakilai vei ira na veika vuni ni matanitu; “ni sa rawata ko koya yadua sa kerekere; ka sa kunea ko koya yadua sa vakasaqaqara ka na dolavi vua sa tukituki.” [Maciu 7:8; 3 Nifai 14:8; raica talega na Aisea 28:10; V&V 76:1–10; 98:11–12.] Sai ira kece oqo era na vakaivotavota ena veivakabulai ka ra na vakaisalataki ena lagilagi, tawamate rawa kei na bula tawamudu me vaka ni ra luvena tagane ka luvena yalewa na Kalou, kei na bula vakacerecerei ena Nona matanitu vakasilesitieli.³⁰

Vakatutu ni Vuli kei na Veivakavulici

Taro

Ni o wilika me baleta na sasaga nei Peresitedi Smith me vulica na kosipeli (raica “Na Bula nei Joseph Fielding Smith”), vakasamataka na nomu sasaga vakaiiko. Na veivakalougatataki cava sa yaco mai vei iko ena nomu vulica na ivolanikalou kei na ivakavuvuli tale eso ni kosipeli?
Na cava e rawa ni da vulica mai na iwasewase 1 me baleta na kedrau dui bibi na vuli vakayalo kei na vuli vakayago? E rawa vakacava ni da vukei ira na lewe ni matavuvale kei ira tale eso me ra vakabibitaka na kila ka vakayalo ena nodra segata na rawa-ka vakavuli?
Sa vukei iko vakacava na ivolanikalou mo “vakamatautaki iko vakavoleka cake” vei Tamada Vakalomalagi kei Jisu Karisito? (Raica na iwasewase e 2.) Vakasamataka na veika e rawa ni o cakava mo vakavinakataka cake kina na nomu vulica na ivolanikalou.
Ni oti nomu wilika na iwasewase e 3, vakasamataka na veivakalougatataki o sa ciqoma ena nomu muria na nodra ivakasala na iliuliu ni Lotu. Eda rawa ni wasea vakacava na nodra ivakavuvuli na parofita bula vei ira na noda matavuvale kei ira tale eso?
Na cava na kena ibalebale vei iko mo maroroya na vosa ni Turaga? (Me baleta eso na vakasama, raica na iwasewase e 4.) Na sala cava soti ena vakauqeta kina na noda bula “e tinikalima na miniti e veisiga yadua me da vagoleya ki na wiliwili e vakaivakarau kei na vakanananu.”
Vakananuma vakatitobu na ivakarau e yaco kina ena nomu bula na ivakasala ena iwasewase e 5. Ni sa kaukauwa ka rawarawa cake ni raici na itukutuku lasu, e rawa vakacava vei keda me da vakaduiduitaka na rarama mai na butobuto”? Na cava e rawa ni da cakava me da vukei ira kina na gonelalai kei na itabagone?

iVolanikalou Veisemati

Same 119:105; Joni 7:17; 2 Timoci 3:15–17; 2 Nifai 4:15; 32:3; Ilamani 3:29–30; V&V 19:23; 84:85; 88:77–80

Veivuke ni Veivakavulici

“Ni o vakavulici ira sara mada ga e vuqa na tamata ena dua ga na gauna, e rawa ni o yacova yani na tamata yadua. Me vaka beka oqo, o na yacovi ira yani na tamata ni o kidavaki ira yadudua na tamata ena yalomamarau ena itekivu ni kalasi. … Ena rawa talega mo vakauqeta na vakaitavi me taleitaki ka bulabula” (Veituberi, Me iLutua ni Noda Bula [1999], 39).