Wase 15

Vakamau Tawamudu

“Na taucoko kei na veivakalougatataki ni Matabete kei na Kosipeli e tubu mai na vakamau Vakasilesitieli. Oqo na ulu ni cakacaka vakalotu ni Kosipeli ka ulu ni cakacaka vakalotu ni valetabu.”

Na Bula nei Joseph Fielding Smith

A tukuni vei Joseph Fielding Smith yabaki tinikawalu ni na mai tiko vata kei iratou na matavuvale na Smith ni mai vuli ena koliji e dua na goneyalewa ka yacana o Louie Emily Shurtliff. Ia a se kurabui voli ga—ka marau—ni lesu mai ena cakacaka ena dua na siga ka raici Louie ni vakatagitaka tiko na nodratou piano vakamatavuvale. Me tekivu mai na siga ko ya, ena mua ni vulaikatakata ni 1894, rau sa tekivuna o Joseph kei Louie e dua na veitokani ka qai titobu cake me yacova ni rau sa veidomoni. Erau a vauci ena Valetabu mai Salt Lake ena ika 26 ni Epereli, 1898.¹

Erau a marautaka o Louie kei Joseph e dua na isema ni veilomani. Ni kacivi o koya me laki kaulotu yabaki rua ki Igiladi ni oti ga vakalailai nodrau vakamau, a cakacaka vei tamana o yalewa me tokoni kina vakailavo nona kaulotu. E dau veitokoni talega ena veika ni lomana kei na yalona ena nona dau vakauta vua na ivola ni veivakayaloqaqataki. Ni lesu mai, erau a tauyavutaka e dua na vuvale mamarau ka kidavaka e rua na goneyalewa ki na nodrau matavuvale. Ni oti e 10 na yabaki ni vakawati, a tauvimate bibi sara o Louie ena ikatolu ni nona bukete ka mani mate ni se yabaki 31.

A kunea na vakacegu o Joseph ena veivakadeitaki ni sa lako yani o Louie “ki na dua na vuravura vinaka cake,” ka vola kina ena nona ivolaniveisiga e dua na masu ni na dau “bula kilikili tiko me rawa ni laki sotavi koya ena lagilagi tawamudu, me duavata tale kei koya.”² Ia e dina ni kunea na vakacegu kei na inuinui ena kosipeli, sa dua ga na ka na nona dau nanumi Louie vakalevu sara. Sa dau lomaleqataki rau na luvena yalewa ni sega tiko na tinadrau e vale. Ni oti ga vakalailai nona mate o Louie, a sotavi Ethel Georgina Reynolds o Joseph. E dina ni se bera ni seyavu nona domoni Louie, sa yaco me domoni Ethel, ka vakakina o rau na goneyalewa. Ena nodrau veivakadonui na nona itubutubu, na itubutubu nei Louie, kei na itubutubu nei Ethel, sa mani kerei Ethel o Joseph me rau veiwatini. Erau a vauci ena ka 2 ni Noveba, 1908. Erau a marautaka vata e dua na bula vuavuai ni a ciwa tale na luvedrau. E vakaitovotaki na nodrau vuvale ena ivakarau, cakacaka vakaukauwa, veirokorokovi, savasava, bula vakaivakarau, veilomani, kei na veilasamaki e taucoko.³

Ni oti e 29 na yabaki ni nodrau bula vakawati, a mate o Ethel ena dua na tauvimate rerevaki ka a kania sara vakalevu na nona kaukauwa ena loma ni 4 na yabaki. Se baci mai galili tale tu yani o Joseph ia e yalovakacegu tiko ena veivakadeitaki ni vakamau tawamudu.⁴ Vakadua tale na nona sotava e dua ka rawa ni wasea vata na nona bula. Erau a vauci vata kei Jessie Evans ena ika 12 ni Epereli, 1938. “Ena loma ni 33 na yabaki ni nodrau bula vata e dau tomani koya na watina ena veivanua kece sara e lako kina, voleka se yawa. Me kena isau e dau vukei koya ena laki volivoli, vakamamacataki na iyaya ni kana, ka tawaitavayataki vuanikau ena vulaimago. E sega ni dau kauwaitaka o koya ni iapositolo vakaliku ni veiqaravi.”⁵ E vakawasoma nona dau tukuna o Jessie me baleta na watina: “O koya na tagane dau loloma taudua au qai bau kila. Au se bera vakadua ni bau rogoca me cavuta e dua na vosa rogo ca.” Ena dau sauma lesu mai, ena matadredredre, “Au sega ni kila e dua na vosa rogo ca.”⁶

Na dauvolaitukutuku ni tamata yadua o John J. Stewart a vola vakaoqo me baleta na nona ivalavala malua kei na yalololoma vei Jessie o Peresitedi Smith: “E dau veivakauqeti mai na itutunivunau vei ira na tagane vakawati me ra dau loloma ka yalodina vei watidra. Ia na ivunau a lauti au na nona cabeta cake e ciwa na buloko ena veisalatu veidelana ena vualiku kei Salt Lake City ki na Valenibula ni Yalododonu Edaidai ena dua na siga katakata ni vula o Julai 1971 me laki dabe toka ena yasa ni idavodavo ni tauvimate nei Jessie ka vakananuma toka kina na ika 95 ni yabaki ni nona bula. Ni sa lutu sobu tikoga na nona bula, a tiko ga vata kei koya ena siga kei na bogi ena vica vata na macawa me yadravi koya tiko, ka solia tiko na vakacegu kei na veivakayaloqaqataki e rawata me yacova na ivakataotioti.”⁷

A mate o Jessie ena ika 3 ni Okosita, 1971. Ena rua na vula yani ki muri, a solia kina o Peresitedi Smith na vosa idola ni koniferedi raraba. E vakaraitaka ena nona ivakadinadina ni kunea tu na vakacegu mai na nona rarawa ena nona vakabauta na Turaga ka vakanuinui ki na bula tawamudu:

“Au nanuma meu kaya vata kei Jope ni gauna makawa, o koya sa yaco na nona kila ka mai na ivurevure vata ga e vu mai kina na noqu: ‘Niu sa kila sa bula tiko na noqu iVakabula, ena tu talega e vuravura ena siga mai muri,’ ka niu ‘na kunea ga na Kalou ena yagoqu: Ko koya kau na raica dina sara koi au, ka kunea ena mataqu, ka sega ni duatani. …’ (Jope 19:25–27.)

“Niu vakaduavatataka na noqu ivakadinadina kei na nei Jope, meu duavata tale ga kei koya ena vakavinavinaka, ena tagi, ka osivaki mai na yaluma kei na rarawa ni yalona: ‘… sa solia ko Jiova, ka sa kauta tani ko Jiova; me vakavinavinakataki ga na yaca i Jiova.’ (Jope 1:21.)

“Au masuta me na tuberi keda na kaukauwa ni Yalo Tabu, me da lako kina vakadodonu ena matana na Turaga, me noda ivotavota kina na bula tawamudu ena veitikotiko vakatui kei na veimatanitu sa vakarautaki tu me nodra era sa talairawarawa.”⁸

Ni oti na vosa nei Peresitedi Smith, qai kaya o Peresitedi Harold B. Lee, ka a veiliutaki tiko ena soqoni: “Au kila ni o kemuni kece na lewe ni Lotu ena veivanua kecega, ni da sa kila na ituvaki ni bula sa cavuta kina na itukutuku qaqa oqo, eda sa na laveti vakalevu cake sara ena kaukauwa kei na igu sa vakaraitaka vei keda ena mataka oqo. Vinaka vakalevu, Peresitedi Smith, mai na vu ni yaloi keimami.”⁹

iVakavuvuli nei Joseph Fielding Smith

Na vakamau vakasilesitieli na ulu ni cakacaka vakalotu ni kosipeli i Jisu Karisito.

E sega ni dua na cakacaka vakalotu e semati ki na Kosipeli i Jisu Karisito e cecere cake na kena bibi, e titobu ka bibi cake na kena ibalebale, ka gadrevi vakalevu sara ena [noda] marau tawamudu … mai na vakamau.¹⁰

Na taucoko kei na veivakalougatataki ni Matabete kei na Kosipeli e tubu mai na vakamau Vakasilesitieli. Oqo na ulu ni cakacaka vakalotu ni Kosipeli ka ulu ni cakacaka vakalotu ni valetabu.¹¹

Au vinakata meu vakatakekere vei ira na taciqu kei na ganequ vinaka, o kemuni na lewenilotu vinaka, mo ni lako ki na valetabu mo ni laki vakamau kina me baleta na gauna oqo kei na veigauna tawamudu.¹²

E veibasai kei na kena ivalavala vakavuravura, na vakamau ena ituvatuva ni kosipeli ena yacova na tawamudu.

Na vakamau era nanuma e vuqa sara na tamata ni dua ga na konitaraki se veidinadinati vakamatanitu vei rau e dua na tagane kei na dua na yalewa ni rau na bula vata tiko ena isema ni veiwatini. Ia na ka dina, oqo e dua na ivakavuvuli tawamudu ka vakatau kina na bula ni kawatamata. E solia na Turaga na lawa oqo vua na tamata ena ivakatekivu sara ni vuravura me vaka ni lawa ni Kosipeli, na imatai ni vakamau me na tawamudu. Me vaka na lawa ni Kalou na vakamau kece me tawamudu. Kevaka e bula na kawatamata kece ka talairawarawa vakadodonu sara ki na Kosipeli ena loloma ka vakasucuma mai na Yalo ni Turaga, ena tawamudu na vakamau kecega. …

… Na vakamau me vaka eda kila na Yalododonu Edaidai e dua na veiyalayalati sa nakiti me tawamudu. Sai koya na yavu ni bula vakacerecerei tawamudu, kevaka e sega ena sega na itosotoso tawamudu ena matanitu ni Kalou.¹³

“Na vakamau me vaka era kila na Yalododonu Edaidai e dua na veiyalayalati ka caka me tawamudu.”

E matata tu vei keda kece eda dau wili niusipepa, o keda eda dau vakarorogo ki na itukutuku kacivaki ena retio ka sarava na kena e kaburaki mai na retioyaloyalo ni sa rui levu era sega ni dau rokova na bula vakawati kei na matavuvale ena kena ivakarau e vinakata na Turaga.¹⁴

Na vakamau e dua na veiyalayalati tabu, ia ena vuqa na gauna sa dau ulutaga ni veiwali velavela, laurai me ka wale ga, mai vei ira na tamata itovo ca ka tawasavasava, ka vakakina, vei ira na lewe vuqa era dau nanuma ni ra tamata savasava ia era sega ni kauwaitaka na bibi ni ivakavuvuli cecere oqo.¹⁵

Sa solia mai vei keda na Turaga na nona kosipeli tawa vakaiyalayala me noda rarama ka ivakatagedegede, ia na kosipeli oqo e okati kina na ivakarau tabu ni vakawati, ka tawamudu na kena ituvaki. E sega ni dodonu me da muria na ivalavala ni vakawati vakavuravura. E cecere cake na noda rarama mai vei vuravura, ka namaka vakalevu cake vei keda na Turaga mai vei ira.

Eda kila na ivakarau dodonu ni vakawati. Eda kila na inaki ni matavuvale ena yavu ni veivakabulai. Eda kila ni dodonu me da vakamau ena valetabu, ka dodonu me da maroroi keda me da savasava tiko me da rawata kina na ivau veivakadonui ni Yalo Tabu ni Yalayala ena keda isema ni bula vakamau.

Eda luvena vakayalo na Tamada Tawamudu, ka a vakarautaka e dua na ituvatuva ni veivakabulai me da lako mai kina ki vuravura ka tubu ka toso ka yaco me vakataki koya; sai koya, ni a vakarautaka e dua na ituvatuva ni kosipeli ka na rawa kina vei keda me da taukena e dua na noda matavuvale tawamudu ka marautaka na bula tawamudu.¹⁶

A sega vakadua ni nakita na Turaga me tinia ga na mate ni yago mate oqo na bula vakamau; ia me vakaikuritaki na dokai, na qaqa, na kaukauwa vei ira era veiyalayalati kina, ka tomani tiko me tawamudu ena matanitu ni Kalou na duavata ni matavuvale. Na veivakalougatataki vakaoqori sa maroroi tu ena vukudra era sa tu vakarau me ra muria na veiyalayalati oqo me vaka sa vakatakila mai na Turaga. E sega ni nodrau duavata walega e dua na tagane kei na dua na yalewa, me vaka sa kaya na Turaga, ena vakamau erau sa yaco me duabau ga ena yago ka vakaduavatataki kei na Kalou.¹⁷

Na yalodina ena veiyalayalati ni bula vakamau ena kauta mai na marau ka na liutaki keda ki na veivakalougatataki ni lagilagi tawamudu.

Au vakavinavinaka vua na Turaga niu kila na tawamudu ni veiyalayalati ni vakamau, ka soli kina vua na tagane na dodonu me kaya ni nona na watina, kei na yalewa na dodonu me kaya ni nona na watina ena vuravura sa bera mai, ia me rau sa lesu mai na Vale ni Turaga ka vakaduavatataki me baleta na gauna oqo kei na veigauna tawamudu mai vua e dua e tu vua na kaukauwa ni veivauci oqo, ni sega tale ni dua na sala ena rawati kina na veivakalougatataki cecere oqo. Au vakavinavinakataka talega niu kila na isema ni matavuvale, kei na duavata ni matavuvale, ena tomani tiko, ena veivanua sa tauyavutaki kina vakadodonu, ena buladodonu ena bula sa bera mai.¹⁸

Au vinakata meu vakatakekere vei ira era sa lesu mai na valetabu ka ra sa vakamau kina me ra yalodina ka dinata na nodra veiyalayalati kei na nodra veidinadinati, ni ra sa cakava mai na veiyalayalati bibi ena Vale ni Turaga.¹⁹

E sega ni dua na ka ena rawarawa cake na kena vakarautaka na kawatamata me vakalagilagi ena matanitu ni Kalou me vaka na yalodina ki na veiyalayalati ni vakamau. …

Kevaka e ciqomi ena kena ivakarau dodonu sa na idewadewa ni bula marau cecere duadua na veiyalayalati oqo. Na ka dokai cecere duadua ena bula oqo, kei na bula sa bera mai, na dokai, na qaqa kei na kaukauwa ena loloma uasivi sara, sai koya na veivakalougatataki e vure mai kina. Na veivakalougatataki oqo ni lagilagi tawamudu sa maroroi tu ena vukudra era sa tu vakarau me ra dinata na veiyalayalati oqo kei na veiyalayalati kece tale ni Kosipeli.²⁰

“Na isema ni matavuvale, kei na duavata ni matavuvale, ena tomani tiko, ena veivanua sa tauyavutaki kina vakadodonu, ena buladodonu ena bula sa bera mai.”

Na cava na ibalebale ni vakamau vei ira na lewe ni Lotu? Na kena ibalebale ni ra sa ciqoma ena veiyalayalati oya na cecere duadua, na ulu ni veivakalougatataki, na veivakalougatataki ni bula tawamudu. Oqori na kena ivakarau e biuta kina na Turaga, “tawamudu ni bula,” kena ibalebale ni rau na sega walega ni curu ki na bula tawamudu na veiwatini, ia o ira na luvedrau era a sucu ena veiyalayalati era na rawata ena nodra yalodina ki na bula tawamudu. Ka kena ikuri, o rau na veiwatini ni sa oti na vakaturi cake tale mai na mate erau na sega ni tini e kea. Ena ka oqori sa kaya kina na Turaga ni na tomani tikoga me tawamudu na nodrau kawa, ka na sega ni cavuka rawa na matavuvale. (Raica naV&V 132:19–24.)]²¹

Me vakataucokotaki na inaki ni Tamada Tawamudu, sa dodonu me dua na veivakaduavatataki, o ira na veiwatini me ra rawata na veivakalougatataki sa yalataki tu vei ira era sa yalodina ka dina ka ra na bula vakacerecerei kina ki na bula Vakalou. E sega ni rawa vua e dua na tagane me na rawata duadua na taucoko ni veivakalougatataki ni matanitu ni Kalou, e sega vakakina vua na yalewa, ia o rau vata e rawa ni rau ciqoma na veivakalougatataki kece sara kei na dodonu ka baleta na taucoko ni matanitu nei Tamada.²²

Na tamata kece e dodonu tu na yalona ena rawata na madigi me rawata na veivakalougatataki ni vakamau tawamudu, se ena bula oqo se na kena ka tarava.

Ena ituvatuva cecere ni veivakabulai e sega ni dua na ka e raibaleti kina. Na kosipeli i Jisu Karisito na ka totoka duadua e vuravura. E vakamareqeta na tamata kecega e dodonu tu na yalona ka dau vakasaqarai koya vagumatua ka gadreva me talairawarawa ki na nona lawa kei na veiyalayalati. O koya, kevaka e dua na tamata e vakuwai mai na galala me dinata e dua na veiyalayalati ena vuku ni dua na ka e yaco, ena lewai koya na Turaga ena inaki ni yalona. E udolu vakaudolu na lewe ni Lotu [era sega ni yacova rawa e dua na valetabu] era sa vakamau ka susuga cake na nodra matavuvale ena Lotu, ka ra sega ni rawata me ra laki “vauci” me baleta na bula oqo kei na bula tawamudu. E vuqa vei ira oqo era sa takali yani, ka soli vei ira vakaveisosomitaki na nodra veivakalougatataki. Na kosipeli e cakacaka vakaveisosomitaki. A cakava vakaveisosomitaki o Jisu e dua na cakacaka me baleti keda kece baleta ni da sega ni rawa ni cakava ena vukuda. E vakakina, na nona sa vakadonuya vei ira na lewe ni Lotu bula me ra cakacaka vakaveisosomitaki ena vukudra na mate era sa mate ka sega ni donumaki ira na madigi me ra cakava vakataki ira.

Kena ikuri, e udolu vakaudolu na cauravou kei na goneyalewa, era sa takali yani ki na nodra vuravura na yalo ka sega ni donui ira na madigi ni veivakalougatataki oqo. E vuqa vei ira era solia na nodra bula ena ivalu; e vuqa era mate ni ra se itabagone sara; ka vuqa era mate ena nodra gauna ni gone. Ena sega ni guilecava e dua vei ira na Turaga. Na veivakalougatataki kece e baleta na bula vakacerecerei ena soli vei ira, ni sai koya oqo na ivakarau ni lewa dodonu kei na loloma cecere. E vakakina vei ira era tiko ena veiiteki kei Saioni kei na yasa ni noda veivaletabu; kevaka era vakuwai ena veivakalougatataki ena bula oqo ena soli vei ira na veivakalougatataki oqori ena mileniumi.²³

E sega ni rawa ni dua e yalodina tikoga me na vakuwai ki na bula vakacerecerei. … E sega ni rawa ni vakuwai na watina yalewa yalodina mai na bula vakacerecerei e dua na tagane sega ni veiganiti, vakakina vei yalewa.²⁴

Era na vakarautaki ira na gonelalai kei na itabagone ki na vakamau tawamudu ena nodra vulica na veiyalayalati ni vakamau, tara cake na vakabauta e veiganiti, ka maroroi ira me ra savasava tikoga.

Me ra raica na tama kei na tina Yalododonu Edaidai kece sara me ra vakavulici ira na luvedra ena bibi ni veiyalayalati ni vakamau. Me ra vakadeitaka vei ira na luvedra ni sega tale ni dua na sala era na rawata kina na veivakalougatataki ni bula tawamudu, ia ena nodra vakarokorokotaka na veiyalayalati ni Kalou, ka dua vei ira na kena e cecere duadua ka yaga vakalevu sara na veiyalayalati ni vakamau tawamudu. ²⁵

Na bula oqo e lekaleka, ia na tawamudu e balavu. Ni da vakasamataka ni na tawamudu na veiyalayalati ni vakamau, ena vinaka me dau vakasamataki sara vakavinaka. … Na ivakasala dodonu vei ira na noda itabagone me ra vakasamataka sara vakavinaka ka raica me ra digitaka sara vakamatau e dua na nodra itokani ka tudei tiko ga na nodra vakabauta na Kosipeli. Na mataqali tamata vakaoqori ena vakadinadinataki koya ena nona dinata na bubului kei na veiyalayalati kece sara. Ni ra sa yavutaki vakavinaka sara na noda cauravou kei na goneyalewa ena nona ilesilesi vakalou na Turaga ka ra vakabauta na Kosipeli me vaka sa vakatakilai mai vei Josefa Simici, na Parofita, na madigi kece sara era dusia ni na dua na veivauci mamarau ka tawamudu.²⁶

Au vakatakekere vei kemuni na itabagone kei Saioni ena veivanua kecega, mo ni maroroi kemuni mo ni savasava tikoga me ganiti kemuni kina na lako ki na valetabu ka, marautaka vata kei ira na itokani o ni sa digitaka na veivakalougatataki cecere kece oqo sa vakarautaka tu vei kemuni na Turaga.²⁷

E dua na ka… au na vinakata mo ni kila vei ira—na itabagone, ni ra vakamau, era sega ni dau vinakata me ra tekivu mai ra ena ka lalai, ia era vinakata me ra rawata me tautauvata ga kei na ka era rawata tiko na nodra itubutubu ena gauna era vakamau kina. … Era vinakata me ra tekivu ena veika kecega e gadrevi ena ruku ni matanisiga me ra logalogavinaka kina. Au vakabauta ni cala oqori. Au vakabauta ni dodonu me ra tekivu vakamalua, me ra vakabauta tiko na Turaga, tara vakalailai eke ka vakalailai e kea me vaka na ka era rawata, kumuna cake na veitikina lalai, me yacova ni ra sa yacova na ivakatagedegede ni bula sautu era vinakata.²⁸

Ni rau sa muria tiko ena yalodina e dua na veiwatini na veicakacaka vakalotu kece sara kei na ivakavuvuli ni kosipeli, ena kamica cake na reki ena nodrau bula vakamau.

E lewa ni Kalou na vakamau. E dua na ivakavuvuli dodonu ni ciqomi ka vakayacori ena yalosavasava. Kevaka era na curuma na veiyalayalati oqo na tagane kei na yalewa ena gauna nikua ena yalomalumalumu, ena loloma kei na vakabauta, me vaka era sa vakaroti kina, ka lako vakadodonu ena sala ni bula tawamudu, ena sega na veisere, ena sega na kasere ni vuvale; ia e dua na marau, dua na reki e sega ni vakamacalataki rawa.²⁹

Au vinakata meu vakadeitaka vei ira kece na taciqu kei na ganequ vinaka ka ra sa vakamau oti ena valetabu me ra kakua sara ni guilecava na veivakalougatataki cecere ka a soli vei ira: Sa solia vei ira na Turaga, ena nodra yalodina, na dodonu me ra yaco me ra luvena tagane ka luvena yalewa, me ra votai vata kei Jisu Karisito, me ra taukena, me vaka e tukuni eke, na veika e tu vei Tamada [raica na Roma 8:13–19 kei na Vunau kei na Veiyalayalati 76:54–60].

Ia, eso na lewe ni Lotu era sega ni raica rawa na ka oqo, ni oti na nodra vakamau mai me baleta na gauna oqo kei na veigauna tawamudu, … ka ra ciqoma na yalayala ni taucoko ni nona matanitu na Tamada, era qai vakatara tale me curu mai ki na nodra bula na veika e dau vakavuna na duidui ka tawasei ira. Ka ra guilecava ni ra sa veiyalayalatitaka vakataki ira me baleta na gauna oqo kei na veigauna tawamudu; e sega ni o koya walega oqori, ia era sa vakayacora e dua na veiyalayalati kei na Tamadra mai lomalagi.³⁰

Ni rau rokova vata toka e dua na veiwatini na kosipeli, ena “kamica cake” na nodrau reki kei na marau ena bula vakamau.

Kevaka e dua na tagane kei na watina erau a rokova tiko vagumatua ena yalodina na veicakacaka kece vakalotu kei na ivakavuvuli ni kosipeli, ena sega ni basika rawa e dua na ka me yaco kina na veisere. Ena kamica cake na reki kei na marau e basika ena isema ni bula vakaveiwatini, ka yaco me ra veivolekati cake na veiwatini ni toso tiko na veisiga. Ena sega walega ni lomana na watina yalewa na tagane kei na yalewa na watina tagane, ia era na bula ena dua na draki ni veilomani kei na duavata o ira na gone era sucu mai vei rau. Ena sega ni vakatauvatani rawa na veilomalomani vei ira yadua, ka uasivi cake sara ni na tudei e yalodra kece sara na loloma vei rau na Tamada Tawamudu kei na Luvena o Jisu Karisito.³¹

Vakatutu ni Vuli kei na Veivakavulici

Taro

E tekivu na iwase oqo ena ivakaraitaki eso ni reki kei na rarawa ka rawa ni tiki ni bula vakamau kei na bula vakamatavuvale. E rawa ni tokoni keda vakacava na ivunau ni bula tawamudu ena gauna ni marau kei na rarawa ena noda bula?
Na cava e tiko ena vakamau vakasilesitieli ka yaco kina me “ulu ni cakacaka vakalotu ena valetabu”? (Raica na iwasewase e 1.)
E vakatautauvatataka o Peresitedi Smith na ivakarau ni nona rai na Turaga me baleta na vakamau ki na ivakarau ni rai vakavuravura ena vakamau (raica na iwasewase e 2). Na cava e bibi kina vei iko na duidui oqo? E rawa vakacava ni da taqomaka ka vaqaqacotaka na bula vakamau kei na matavuvale e vuravura nikua?
Ena iwasewase e 3, e tuva kina o Peresitedi Smith e lima madaga na veivakalougatataki e dau yaco mai vei ira era dau “yalodina ka dinata” na veiyalayalati ni vakamau. Na cava na kena ibalebale vei iko mo yalodina ka dinata na veiyalayalati ni vakamau?
Na cava eso na ka e rawa ni ra cakava na itubutubu me ra “vakavuvulitaka kina vei ira na luvedra na bibi ni veiyalayalati ni vakamau”? (Me baleta eso na vakasama, raica na iwasewase e 5.)
Ena iwasewase e 6, e vakamacalataka kina o Peresitedi Smith na ivakarau me “kamica cake kina” na isema vakaveiwatini.” Na ivakaraitaki cava beka o sa bau raica me baleta na ivakavuvuli oqo? Kevaka o sa vakamau, vakasamataka na veika e rawa ni o cakava me levu cake kina na reki kei na marau ki na nomu bula vakamau.

iVolanikalou Veisemati

1 Korinica 11:11; V&V 42:22; 131:1–4; Mosese 3:18–24

Veivuke ni Veivakavulici

“Na taro e dau volai tu ena papaloaloa ni bera ni dau tekivu na lesoni e dau vukei ira na vuli tiko mera vakasamataka kina na lesoni ni bera ni tekivu na kalasi” (Veituberi, Me iLutua ni Noda Bula, 114).